iBirani 8 - ɛWee ne ìTsɛm iHywas

ɛYɛso gha Soye ɛGbaang ɛGɔm Nibo ne Ɛ Shɛs

¹ ɛKɔn na ne njwii bol lo so ɛlɛ, njwɛɛn bok ɛGbaang ɛGɔm nibo ne ɛ shɛs ne ɛ kɛ soos ne iwɔ ne irwye ɛcuruu ne igbɔm ɛTaanggbey ɛHaa ne Ndiinday Gbik.

² ɛGɔm Nibo yɛghaa nggyɛ wo i mɔn ɛtomɛ gha ndɔ ne iPho ne kɛ Tul Kang, ɛlɔ ne shɛɛ ɛTaanggbey ririk ne ɛDaray ya ɛbhɛ ɛ kɛ ryɔng, sɔng ɛten ɛsii nang.

³ I kasa ɛGɔm Nibo na te ɛ hap itsanga nɛ izɛɛng nɛ ninyi i yɛɛset nɛ, nɛ nikɔn ne hap itsanga yɛ. ɛLɛy iphɛ ne ma so nggbinggbing ɛGɔm Nibo njwɛɛn na ma bok ɛkɔn na aa hap ne itsanga de.

⁴ Sɛɛ yɔng ɛ kaa so ndɔ ɛzay ya, sɔng ɛ saa ne teye ɛbo gha nang, daa ɛli nɛ nibo na kaa ku sonɛ nɛ nibhɛ hap itsanga de ne izɛɛng ngge nɛ ninyi i yɛɛset nɛ wo ɛli ne iMɛmɛ ɛMuusaa da kɛ yɛk ngɛ wo.

⁵ Nibo yɛnaa nggyɛ wo kaa i mɔn ɛtomɛ nibhɛ gha ɛLɔ ne kɛ Tul Kang ndɔ ɛzay yɛghaa wo. ɛLɔ ɛtomɛ nibhɛ gha kaa ne so te izazurum ne i ten-nɛ nɛ nikɔn ɛdaa ne irywa. iPhɛ phɛ kaa ne te kaa yaak ɛMuusaa yegha nten de ne aa ryɔng ipho ɛTaanggbey de, “Wɛɛ yɛnɛng te ɛ lɔl iphɛ kancɛng ɛli ne kaa tɔɔl lɛ izazurum mɛdaa ne ɛwarang ngo.”

⁶ ɛLyilyɛghaa wo, kɛ ne nang ɛYɛso yegha ɛtomɛ nibo gha ne ɛ phyin ne iyɛnɛng, te ɛli ne ibol ne rop ìtsɛm ne byinki ninyi na ne ɛTaanggbey ya, ne ɛbhɛ ɛYɛso gha so ɛhaa ɛceree yɛwo phyin ne iyɛnɛng ngge. iBol ne rop ìtsɛm mɛdee nggyɛ wo ne phyin ne iyɛnɛng ngge daa ɛli ne kɛ rop iphɛ daa nikɔn nɛ nibhɛ phyin ne iyɛnɛng.

⁷ Sɛ yɔng kaa sang sɛ itaasek ndɔ ne ibol ne rop ìtsɛm ɛyisɛ de, sɔng sɛɛ ne ta yaa tɔk ibol ne rop ìtsɛm ne ifaa de dɔng ngo nang.

⁸ ɛTaanggbey ya kaa ne yaang iben ndɔ ninyi ɛbhɛ na nten de ne ɛ kaa yɔngɔ, “Phok ɛn! Nten yaaso, ne nzɛ rop ìtsɛm ihywas nɛ ninyi niSɛrɛla na, ne ijwee ɛYahoda wo.

⁹ Sɔng irop ìtsɛm mɛ sɛ ne so te izee ne nggaa rop nɛ nikyɛɛ-nikyɛɛ nibhɛ na nten de ne nggaa wum nibhɛ iwɔ wo n tul nibhɛ ne iMasad de nang. Sɔng nibhɛ kaa hyel cik ndɔ ne rop ìtsɛm be nang, iphɛ ɛlɛy, sɔng ne n nang nibhɛ ɛyisɛ nang.

¹⁰ Phok ɛn, ìtsɛm mɛdee bɛ ne nzɛ rop nɛ niSɛrɛla na, ndɔ nituk ka nɛ nibhɛ yaaso wo. Nzɛ yɛk imɛmɛ nge da ndɔ ne irway nibhɛ, ne n da haa ndɔ ne ikok nibhɛ. Nzɛ te me ɛTaanggbey nibhɛ, nibhɛ ne teye ninyi nge.

¹¹ Sɔng ɛdɛ ɛbhɛ sɛ mɛmɛ ɛhak ɛtaay yɛ nang, sɔng ɛdɛng sɛ ne yaak ɛhak ɛgwaa ɛbhɛ, ‘Seng ɛDaray yegha nang.’ Daa ɛli nibhɛ wo gbik sɛ seng me. Sɛ tsa ne ɛtaasek kɛ, ne bhɛ hɔn ɛndiinday yɛ.

¹² Nzɛ hana nibhɛ ne ibebhe nibhɛ de. Sɔng nzɛ ne tang taate ne ɛfɔt nibhɛ wo dɔng nang.”

¹³ Daa ɛli ne ɛTaanggbey ya kɛ bol ibol ne rop ìtsɛm ihywas de, ìtsɛm ɛyisɛ de ne kɛ rop po kɛ ne teye itsɛl lɛ. ɛKɔn na ne ɛ kɛ ne teye ɛtɛl lɛ, ɛ kɛ ne helem, ɛ yunga birit.