iBirani 7 - ɛWee ne ìTsɛm iHywas

iBol ɛMakyisɛdɛk

¹ ɛMakyisɛdɛk kɛghaa nggyɛ wo kaa soye ɛgɔm ne iSalɛm ne ɛ ta soye ɛbo ɛTaanggbey ɛDaa ne Nyu ne irywa. Kaa ne sɛ ɛBaraying nga kɛ bhɛ kyii ne itsom be ne ɛ kaa bhɛ re nigɔm nwaas sa, ɛMakyisɛdɛk ka ne sɛme ne ɛbhɛ, ɛ sit ɛBaraying nge gha ne ɛwɛng.

² ɛBaraying nga ne nang ɛbhɛ ɛzaka nikɔn no gbik. ɛNting ne irywɛɛk ɛMakyisɛdɛk ko ne so, “iCik.” ɛMakyisɛdɛk ka kaa ne soye ɛgɔm ne iSalɛm ne i yeres ɛgarang ngɛ ɛgarang ne irway ne laal, ɛdɛ ɛnting ne irywɛɛk kɛ ne ta so, “ɛGɔm ne irway ne laal.”

³ Sɔng ɛMakyisɛdɛk ka bok ɛkyɛɛ nang, sɔng ne ɛ bok ɛgyinɛ nang, sɔng ne ɛ bok icwaang nang. Sɔng ishwɛɛ ɛbhɛ da kaa ne bok ɛtum ne ɛgak nang. Ɛ kaa ku so te ɛNgɔn ɛTaanggbey, ɛ soye ɛbo ne inat.

⁴ Yung yaang ɛn ihywee ne igbom be ne ɛMakyisɛdɛk ka bok ko! Ɛ kaa bok igbom be daa ɛli ne ɛBaraying nga ne ɛbhɛ soye ɛkyɛɛ-nikyɛɛ njwɛɛn na kaa nang ɛbhɛ ɛzaka nikɔn na ne ɛ kaa bhɛ kpuusi ne itsom be.

⁵ iMɛmɛ ɛMuusaa da i bo wu gbik ninyi ne icwaang ɛLawi na nɛ nibhɛ soye nibo ɛTaanggbey, tɛ nibhɛ say ɛzaka ɛlɔ ninyi na nɛ nibhɛ soye nigwaa nibhɛ, gbik ɛli nɛ nigwaa nibhɛ na jung soye ihywee ɛBaraying ge.

⁶ Gbik ɛli ne ɛMakyisɛdɛk ka kaa sang le ne icwaang ɛLawi wo, ɛ kaa ne jung say ɛzaka wo ɛlɔ ɛBaraying nga ɛ sit ɛbhɛ ne ɛwɛng. ɛBaraying nga ne ɛbhɛ ɛ soye ɛnyi gha ne ɛTaanggbey ya kaa sim-mɛ ɛ rop ibol de ne ɛbhɛ wo.

⁷ Sɔng iphɛ so ibol ne to irway nang, ɛndiinday ya ɛbhɛ ɛ sit ɛshɛɛrɛng nga ne ɛwɛng nga.

⁸ Nibo ne icwaang ɛLawi na ne i naas nibhɛ ɛzaka wo soye ninyi nɛ nibhɛ i kus, sɔng ɛlɛy ne ɛMakyisɛdɛk ka ne so nang. ɛWee ne iBol ɛTaanggbey yo kɛ ne tɔɔrek wu ɛ so ɛken.

⁹ Sɛ́ yɛɛ ne yɔng wu ɛLawi ne ito ɛbhɛ ne icwaang ɛbhɛ wo i saasel ɛzaka wo ɛlɔ nigwaa nibhɛ na kaa ne ma nang ɛMakyisɛdɛk kegha ɛzaka wo lenɛ ne ɛBaraying nga.

¹⁰ Sɛ́ yɛɛ ne yɔng ɛlɛ wo daa ɛli ne nten de ne ɛBaraying nga kaa sɛme ne ɛMakyisɛdɛk ka, sɔng kaa ne ku yɛk ɛLawi yegha nang, ɛ kaa kyi tɔ ndɔ ne ibek ɛBaraying ngge tang yɛk ɛbhɛ.

ɛYɛso gha So te ɛMakyisɛdɛk

¹¹ Yaang ɛn, ihywee ɛbo ne icwaang ɛLawi de ne kaa yɛɛs nɛ nten de ne kaa nang niSɛrɛla na iMɛmɛ ɛMuusaa da. ɛTsak, sɔng ɛtomɛ nibo ne icwaang ɛLawi gha kaa ne yɛɛ ne te ninyi na nibhɛ te hyɔrɔ ɛli ne ɛTaanggbey i sim mo nang. Sɛ́ yɔng nibhɛ kaa yɛɛ nɛ, sɔng sɛ ne ta yɔng wu i sim ɛdɛ ɛbo gha ne ɛ so te ɛMakyisɛdɛk ka, ne ɛ lap bhɛ ne ɛbo ne icwaang ɛHaruna gha nang.

¹² Wu kɛ sunu ikpii ne kasa ɛbo gha, iphɛ ne ma so nggbinggbing i sunu ɛshara yɛ ne mang.

¹³ Sɔng ɛDaray njwɛɛn na ne i bol ibol lɛdee wo daa ito ɛbhɛ de ne so ɛhaa ne icwaang ɛLawi nang. Ɛ so ɛhaa ne icwaang ihwak, sɔng ɛdɛ ɛnyi ne icwaang ngɛ kɛ ne ku mɔn ɛtomɛ ɛbo ɛTaanggbey ya nang.

¹⁴ I Yɛɛ iphɛ wɛsɛrɛk, ɛDaray njwɛɛn na kaa le ne icwaang ɛYahoda. Sɔng ɛMuusaa gha kaa ne boote ɛ yɔngɔ wu ɛdɛ ɛbo ɛTaanggbey ya sɛ le ne icwaang ngɛwoo nggyɛ wo nang.

¹⁵ iBol lɛdee wo kɛ ne phaal le wɛsɛrɛk ne kɛ sɛ ɛdɛ ɛbo gha kɛ wuru nɛ, ne ɛ so te ɛMakyisɛdɛk ka.

¹⁶ Sɔng ɛnyi yɛghaa nggyɛ wo kɛ ne teye ɛbo gha daa ɛli ne kɛ yɛk ɛbhɛ ne icwaang ɛLawi ɛli ne ikpii nikyɛɛ-nikyɛɛ da i bo wo nang. ˆƐ kɛ ne yang teye nɛ lenɛ ne ihwet ne iken ne iphɛ sang ɛgak.

¹⁷ ɛWee ne iBol ɛTaanggbey yo kɛ nang ishɛɛda daa ɛbhɛ ɛbhɛ bo, “Ɛ soyɛ ɛbo ne inat, ɛli ne ɛMakyisɛdɛk kaa soye nɛ.”

¹⁸ iPhɛ ɛlɛy kɛ ne tek iMɛmɛ ɛMuusaa da gɔɔ daa ɛli ne ifɛ sang ihwet, sɔng ifɛ tɔ ne ɛtomɛ nang.

¹⁹ Sɔng iMɛmɛ ɛMuusaa da kaa hɔn ifɛ sɛ te ɛnyi ɛ te hyɔrɔ nang. ɛLyilyɛghaa wo kɛ ne ji yɛɛs ne ɛkɔn ne ɛ phyin ne njwɛɛn yaa sit irwisɛ da ɛbhɛ te i lenɛ ne ɛbhɛ njwɛɛn yɛɛs cɛcɛk ne ɛTaanggbey ya.

²⁰ ɛTaanggbey ya kaa see ɛkɔn nɛghaa wo ne ɛ phyin no ɛ lɛlɛm ne ihywa. Sɔng ɛ kaa ne lɛlɛm ihywa de nten de ne kaa nang ɛbyin nibo gha ɛtomɛ nibhɛ gha nang.

²¹ ɛYɛso gha kaa ne teye ɛbo gha daa ne lɛlɛm ihywa de nten de ne ɛTaanggbey ya kaa boote ɛ yaak ɛbhɛ, “ɛDaray ya kɛ ku lɛlɛm ihywa, sɔng aa ne tang sunu irway ɛbhɛ nang, ɛ kaa yɔngɔ, ‘Ɛ soyɛ ɛbo ne inat.’ ”

²² Kɛ ne lenɛ ne ibol ne lɛlɛm ihywa yɛdee wo, ɛYɛso gha kɛ teye ɛhaa ne kyinak njwɛɛn nɛ daa ne ibol ne rop ìtsɛm be ne ɛTaanggbey ya kɛ rop ne njwɛɛn no. iHywɛ kɛ ne yɛk ihwet, ihywɛ phyin izee ne ɛTaanggbey ya kaa rop nɛ ɛMuusaa gha.

²³ Nibo ne ile na kaa ne so gbom daa ɛli ne nɛ nibhɛ so ninyi nɛ nibhɛ kus. I sɛ ɛdɛng kɛ ku ɛdɛng ne ma wara.

²⁴ Daa ɛli ne ɛYɛso gha bok iken ne inat de, sɔng ɛɛ ne nang ɛhak ɛnyi ɛtomɛ ne ɛbo gha nang.

²⁵ iPhɛ ɛlɛy, aa ne yɛɛ ne phɔt ninyi na wɛlɛng ɛgak. Ninyi na nɛ nibhɛ kɛ yɛɛs ɛlɔ ɛTaanggbey ya lenɛ ne ɛbhɛ wo, daa ɛli ne ɛ ku so ɛken, ɛɛ bol ne ɛTaanggbey ya ɛlɔ nibhɛ cɛcɛɛy.

²⁶ ɛYɛso gha ɛbhɛ ne ɛ soye ihywee ne ɛGbaang ɛGɔm Nibo gha ne njwɛɛn i sim. iHywee de ne aa nang njwɛɛn nikɔn na nɛ nibhɛ yaa hɔn njwɛɛn. Ɛ ku so kang, wɛlɛng ɛfɔt, ne ɛkɔn ne tok, kɛ tul ɛbhɛ ndɔ ninaa ne ɛfɔt ta, kɛ nang ɛbhɛ ne ndiinday i phyin irywa gbik.

²⁷ Sɔng ɛYɛso gha so te ɛbyin nigɔm nibo na nang. Daa ɛli ne sɔng iphɛ kaa so ɛbhɛ nggbinggbing ɛɛ hap itsanga de izenge ne ihwɛlɛ wo nang. Nibo yɛnaa nggyɛ wo kaa i tsa nibhɛ hap itsanga de ɛlɔ ne ɛfɔt nibhɛ nyɛɛn, nibhɛ ji kyi hap ɛlɔ ne ɛfɔt ninyi wo. Ɛbhɛ ɛYɛso gha kaa ne ku hap itsanga de ɛdaan nten de ne ɛ kaa nang ito ɛbhɛ de, ɛ ku ɛlɔ ninyi na.

²⁸ Ndɔ ne iMɛmɛ ɛMuusaa da, kaa i kasa ɛgbaang ɛgɔm nibo gha ndɔ niten nisii gbik ne itaasek ɛbhɛ. Kaa ne sɛ́ ɛtsim mɛ ne kɛ nang iMɛmɛ ɛMuusaa da, ɛTaanggbey ya ne kasa ɛNgɔn ɛbhɛ gha ne lɛlɛm ihywa, i te ɛNgɔn ɛbhɛ gha hyɔrɔ, ɛGbaang ɛGɔm Nibo ne inat ta.