iBirani 3 - ɛWee ne ìTsɛm iHywas

ɛYɛso gha Phyin ɛMuusaa Ye

¹ iPhɛ ɛlɛy, nigwaa nge ne kɛ tul kang, ne ɛTaanggbey kɛ ma yel-le nyini, sit ɛn irwisɛ daa ɛYɛso gha ne ɛbhɛ so ɛNgɔn ne Tom ma ne ɛGɔm nibo gha ne njwi tɔng ibol ɛbhɛ de.

² Ɛ kaa so i sɛ kyinak daa ne ibol ɛbhɛ ɛlɔ ɛnyi gha ne ɛ kɛ nang ɛbhɛ ɛtomɛ gha, te ɛli ne ɛMuusaa gha kaa ma so i sɛ say ibol ɛbhɛ ndɔ ɛtomɛ ɛTaanggbey ya ne ɛ kaa mɔn ndɔ ninyi ɛbhɛ na.

³ I nang ɛnyi ne lɔl ijwee gha ne igbom i phyin ijwee yɛ. ɛLɛy ne mang, ɛYɛso gha kɛ ne hɔn sɛɛ nang ɛbhɛ igbom i ne phyin ɛMuusaa yegha sɔng ncɛt tang.

⁴ Daa ɛli ne idee gbik, ihoho bok ɛnyi gha ne ɛ kɛ lɔl ifɛ, ɛTaanggbey ya ɛbhɛ kɛ ne lɔl nikɔn na gbik.

⁵ ɛMuusaa gha kaa so ɛkpuru ne ɛ kɛ hɔn sɛ kyinak daa ne ibol ɛbhɛ ndɔ ɛtomɛ ɛTaanggbey ya, ɛ kaa ne tɔng nikɔn na ne i sɛ bol gɔɔ ɛyisɛ.

⁶ ɛKiriti gha ne so sɛ kyinak daa ne ibol ɛbhɛ daa ɛli ne ɛbhɛ ɛ yang so ɛNgɔn na ne ɛ wɛɛ ninyi ɛTaanggbey ya. Njwɛɛn no, njwɛɛn ne soye ninyi ɛTaanggbey ya, wu njwɛɛn kɛ boos irway nviit da, njwɛɛn sang te ikyɔkyɔt daa ɛkɔn na ne njwɛɛn kɛ sit ne irwisɛ da.

iKpɛng ɛLi Yaa Hyel Cik

⁷ iPhɛ ɛlɛy, te ɛli ne iKabyik ɛTaanggbey de bo, “iZenge wo, yaa sɛ ɛ kɛ phok ɛn izɔlɔs ɛTaanggbey de,

⁸ sɔng ɛ yɛk ɛn ito ihet de, ɛli nɛ nikyɛɛ-nikyɛɛ mɔn na kaa mɔn no, nten de nɛ nibhɛ kaa mbaray ɛTaanggbey yegha ɛtuk kɛghaa nggyɛ wo ndɔ ɛhaa ya nang.

⁹ ɛNggyɛ wo nɛ nikyɛɛ mon na kaa phɔghɔ me, nibhɛ tɛɛsek me wo, nibhɛ ji yaang nikɔn na ne nggɛ mɔn ndɔ ne ishay nzuwubɔ nwaas da.

¹⁰ iPhɛ iphɛ kɛ te nggaa te njenjek nɛ nibhɛ nten nɛnaa nggyɛ wo n yɔngɔ, ‘Nibhɛ kɛ mbaray mee ndɔ ne irway nibhɛ, sɔng nibhɛ yɛɛ nkpiinɛ nge da nang.’

¹¹ Nggaa ne te njenjek, ne n lɛlɛm ihywa n yɔngɔ, ‘Sɔng nibhɛ sɛ ne lel ne ivel da ne nzɛ nang nibhɛ ne ìfɔng ngga nang.’ ”

¹² Nigwaa nge ninaa ne roos, wɛɛ ɛn nyini, sɔng ɛdɛ mon sim iyɔm ne ìnang ne itin de, ne irway ivebhe da te ɛbhɛ ɛ hyereey, ɛ tek ɛTaanggbey ne iken na nang.

¹³ Ne ɛ tes ɛn itso mon itsɔngɔl gɛgɛy cɛcɛɛy. Mɔn ɛn ɛlɛ wo nten de ne ɛ so ɛn niken “iZenge,” ɛlɔ ne ɛfɔt to ya yung luk ɛdɛ mon irway ɛbhɛ te gɛgɛy.

¹⁴ Njwɛɛn kɛ ne byinki ito njwɛɛn ne ɛKiriti gha wu njwɛɛn kɛ boos ìnang itin ne ibol njwɛɛn da gɛgɛy ɛli ne njwɛɛn kaa tsa wo phyii bhɛ taal.

¹⁵ Te ɛli ne kɛ ku boote i bo, “iZenge wo, wu ɛ phok ɛn izɔlɔs ɛTaanggbey de, sɔng ne ɛ yɛk ɛn ito ihet de, ɛli ne ɛ kaa mɔn ɛn nten de, ne ɛ kaa mbaray ɛn nyini ɛTaanggbey yegha nang.”

¹⁶ Niyang ninyi nɛ nibhɛ kaa phok izɔlɔs ɛTaanggbey de, nibhɛ jung mbaray yoo? Nzo gbik ninyi na ne ɛMuusaa gha kaa bhɛ tul ne imasad de.

¹⁷ Niyang ninyi ne ɛTaanggbey ya kaa te njenjek nɛ nibhɛ ishay nzuwubɔ nwaas daa? Nzo ninyi na nɛ nibhɛ kaa mɔn ɛfɔt to nibhɛ hoghɛse, nibhɛ kus so ndɔ ɛhay ya.

¹⁸ Niyang ninyi ne ɛTaanggbey ya kaa lɛlɛm ihywa de, ɛ yɔng wu hang nibhɛ yaa bhe lel ne ivel da ne ɛ kaa nang nibhɛ tɛ nibhɛ bhɛ phɔng ngɛ woo? Nzo ninyi na nɛ nibhɛ kaa mbaray tang roos ibol ɛbhɛ de.

¹⁹ iPhɛ ɛlɛy, njwɛɛn kɛ ne yaang ɛli nibhɛ kaa sang bhɛ lel ndɔ ne ivel da daa ɛli nɛ nibhɛ kaa mbaray tang nang ne itin nɛ.