iBirani 2 - ɛWee ne ìTsɛm iHywas

Te Tenes iBol ne iPhɔrɔt De

¹ iPhɛ ɛlɛy, iphɛ so nggbinggbing njwɛɛn wɛɛ ibol de ne kaa tɔng njwɛɛn no yɛnɛng ɛlɔ ne iphɛ yaa yung te njwɛɛn lap en.

² iBol de nɛ nimalɛka na kaa tɔng nikyɛɛ-nikyɛɛ njwɛɛn na kaa so itin nɛ ɛtsak, iphɛ ne ta so itin nɛ wu gbik ɛnyi gha ne ɛ kaa mbaray tang roos iphɛ wo ɛ kaa sɔ nggbang ngga ne mpɛ so kacɛng ne ɛkɔn na ne ɛ kɛ mɔn no.

³ Wu iphɛ ne so ɛlɛ wo, njwɛɛn yaa mɔn ɛlii i phɔrɔt to wu njwɛɛn kɛ mbaray ibol ne igbaang ne iphɔrɔt da, ne ɛDaray ya ne ito ɛbhɛ de ɛbhɛ kɛ tsa ɛ tɔng ngoo? Ninyi na nɛ nibhɛ kaa ne phok ibol lɛdee wo kɛ mɔng kɛ ne tɔɔl njwɛɛn wu iphɛ so itin nɛ.

⁴ ɛTaanggbey ya kɛ ne ta hante nang idee ɛbhɛ ishɛɛda lenɛ nɛ nikɔn ne kparat, nɛ nikɔn ne ɛnik, ne ìnang ne iKabyik ɛbhɛ ihywee-ihywee ne ɛ kɛ naas ninyi na lenɛ ɛli ne ɛ sim.

ɛYɛso gha kɛ bo iBek ɛTen ɛSii

⁵ Sɔng i bo wu ɛTaanggbey ya kɛ nang nimalɛka na igbɔm ɛzay da ne ɛ sɛ yaaso wo nang, ɛzay ya ne njwi bol ibol ɛbhɛ.

⁶ ɛDɛ ɛlɔ yɛ ndɔ ɛWee ne iBol ɛTaanggbey yo i bo, “ɛTaanggbey ɛten ɛsii gha so ikyee, ne ɛ tas ne ɛbhɛ woo? ɛNgɔn ɛDɛmu ma so ikyee, ne ɛ tas ne ɛbhɛ woo?

⁷ ˆƐ kaa yɛk ngɛ igbɔm ɛbhɛ da taasek ivaa nimalɛka da, ne ˆɛ nang ɛbhɛ ne ndiinday gbik ne igbom,

⁸ ˆɛ kɛ nang ɛbhɛ igbɔm nikɔn na gbik.” Ɛli ne ɛTaanggbey ya kɛ nang ɛten ɛsii gha igbɔm nikɔn na gbik ko, sɔng ɛdɛ ɛkɔn na ne sonɛ ne i kɛ sang nang ɛbhɛ igbɔm mɛ nang. Gbik ne iphɛ ɛlɛy, sɔng njwɛɛn i ne yaang ɛli ne ɛten ɛsii gha bok igbɔm nikɔn na gbik ko ɛlyilyɛghaa wo nang.

⁹ Njwi yang yaang ɛYɛso yegha ne kaa yɛk ngɛ igbɔm ɛbhɛ taasek ivaa nimalɛka da. ɛLyilyɛghaa wo, kɛ ne nang ɛbhɛ ne ndiinday ne igbom, daa ɛli ne ɛ kɛ sɔ nggbang ne iku. Ɛ kaa mɔn ɛlɛ wo te lenɛ ne izɛɛng ɛTaanggbey de ɛ ku ɛlɔ ninyi na gbik.

¹⁰ ɛTaanggbey ya ɛbhɛ ɛ kɛ ryɔng nikɔn na gbik, nikɔn na ne sonɛ gbik tɛ nibhɛ nang ɛbhɛ ne ndiinday. ɛTaanggbey ya i sim te ɛ sɛ nang ninɔn ɛbhɛ na nɛ nibhɛ so gbom mo ne ndiinday. iPhɛ ɛlɛy, iphɛ kɛ jam mɛ ɛ te ɛYɛso yegha ne ɛbhɛ ɛ so ɛndiinday ne iphɔrɔt ta, ɛ te hyɔrɔ lenɛ ne nggbang ngga ne ɛbhɛ ɛYɛso gha kɛ sɔ wo.

¹¹ ɛYɛso gha ne ɛbhɛ ɛ so ɛhaa ne te ninyi na wɛwɛy, ɛbhɛ wo nɛ ninyi na ne ɛ kɛ te nibhɛ wɛwɛy yo soye ninɔn ɛkyɛɛ ɛdaan. iPhɛ phɛ kɛ te sɔng ɛYɛso gha ne bok ncwa ne yaak nibhɛ nigwaa ne nang.

¹² Ɛ kɛ yaak ɛTaanggbey yegha, “Naa tɔng nigwaa nge na ɛkɔn na ne ˆɛ kɛ mɔn; naa dɛp irywɛɛk mo ɛnu ɛyisɛ ninyi na.”

¹³ Ne ɛ ta yɔngɔ, “Naa hal ɛgyɛy ne ɛTaanggbey ya.” Ne ɛ ta hante nɛ ɛ yɔngɔ, “Mee wo bɛ nɛ ninɔn na ne ɛTaanggbey kɛ nang me.”

¹⁴ ɛLi nɛ ninɔn na so inwam ba nɛ neyi na, ɛYɛso gha kɛ ne ma teye ɛten ɛsii tɛ nibhɛ. Ɛ kɛ mɔn ɛlɛ wo te ne lenɛ ne iku ɛbhɛ de ɛ bunga ɛnyi ne ɛ bok igbɔm ne iku da, kaabi ɛShɛtan na.

¹⁵ Kɛ ne ta lenɛ ɛlɛ wo, ɛ biri gbik ninyi na nɛ nibhɛ kɛ ku teye nikpuru na lenɛ ne ɛnik ne iku wo nɛ nibhɛ phok ko.

¹⁶ Njwɛɛn i yɛɛ ncɛncɛng, sɔng ɛYɛso gha kɛ yɛɛs te ɛ phyik nimalɛka nang, ɛ kɛ yang yɛɛs te ɛ phyik ihywee ɛBaraying.

¹⁷ iPhɛ ɛlɛy, iphɛ ne so nggbinggbing i ma te ɛbhɛ ɛ te tɛ nigwaa ɛbhɛ na ndɔ nikɔn na gbik, te ɛ teye ɛgɔm nibo ɛTaanggbey, ɛhaa ne ɛ so sɛ kyinak daa ne ibol ɛbhɛ, ɛhaa ne san iyɔm ndɔ ɛtomɛ gha ne ɛ mɔn ɛTaanggbey yegha nɛ wo, te ɛ teye ɛkɔn ne hap itsanga te ɛTaanggbey ya han ninyi ne ɛfɔt.

¹⁸ Daa ɛli ne ɛYɛso gha kaa sɔ nggbang ngga ndɔ ne tɛrɛk ga, aa ne yɛɛ ne phyik ninyi na ne i tɛɛsek nibhɛ wo.