iBirani 12 - ɛWee ne ìTsɛm iHywas

ɛTaanggbey ya i Gbaat Ninɔn Ɛbhɛ Na

¹ iHywee nishɛɛda yɛdee wo so gbom nɛ nibhɛ kɛ te njwɛɛn gyɔɔ. Daa ɛli ne ihywee nishɛɛda yɛdee wo ne sonɛ ɛlɛ wo, ninaa nɛ nibhɛ kɛ tɔɔrek njwɛɛn ɛli ìnang ne itin da so wo, nɛ njwɛɛn hana gbik ɛkɔn na ne ɛ ring njwɛɛn ne ihywel da. Te njwɛɛn ta hana ɛfɔt to ne ɛbhɛ kɛ wum njwɛɛn no, te njwɛɛn rop irway i tel nggbiy yɛdaa wo ne mpɛ so ɛyisɛ njwɛɛn na.

² Nɛ njwɛɛn sit irwisɛ daa ɛYɛso gha ne ɛbhɛ ɛ kɛ phaal ɛnkiinɛ ne ìnang ne itin de, ɛ ta so ɛhaa ne te ìnang ne itin njwɛɛn de te hyɔrɔ wo. Kaa lenɛ ne irway ihwala da ne ifɛ hyep ɛbhɛ wo, ne ɛ rop iku daa ne ihon ne gangat to, sɔng ne ɛ bo ncwa yɛ te mpɛ ɛkɔn nang. Ɛ kɛ ne ji bhɛ soos ne iwɔ ne irwye ɛcuruu ne igbɔm ɛTaanggbey ya.

³ Yung tas ɛn ne ɛYɛso gha ne ihywee ɛbɔk ge ne ɛ kɛ bo daa ne mbaray da nɛ ninaa ne ɛfɔt ta kɛ mbaray ɛbhɛ wo! iPhɛ ɛlɛy sɔng ne ɛ te ɛn kpos, ɛ tul ɛn irway nang.

⁴ Ndɔ ne cwaasek ghe mon da ne ɛfɔt to, sɔng iphɛ kɛ ku hɔn ɛli ne ɛ kɛ lok ɛn neyi mon nang.

⁵ Hang ˆɛ kɛ yung te ɛn bap ne ibol ne te itsɔngɔl de gɛgɛy yo ne ɛTaanggbey ya kɛ bol nɛ nyinɛn ninɔn ɛbhɛ na naa? iBol de ne ɛ kaa yɔngɔ, “ɛNgɔn nge, kyii ne ihywɛɛ mo ɛlɔ ɛdaan. Yaa ne sɛ ɛDaray ya kɛ teyɛ tsik ko, sɔng ne ˆɛ tul irway, sɔng ne ˆɛ tul irway nten de ne ɛ nep pɛ wo nang.

⁶ Daa ɛli ne ɛDaray ya i gbaat ninyi na ne ɛ sim. Ne ɛ baasek ninyi na ne ɛ kɛ say nibhɛ, nibhɛ so ninɔn ɛbhɛ nggbang.”

⁷ Bo ɛn ɛbɔk ne nggbang ngga ne ˆɛ sɔ ɛn no bo ɛn wu mpɛ igbaat. ɛTaanggbey ya i mɔn nyini ɛlɛ wo daa ɛli ne ˆɛ so ɛn ninɔn ɛbhɛ. ɛYaphɛɛ ɛngɔn ne ɛkyɛɛ gha sang gbaat ɛbhɛ woo?

⁸ Wu ɛTaanggbey ya kɛ ne sang gbaat nyini ɛli ne ɛ gbaat ninɔn ɛbhɛ na, sɔng ne ˆɛ so ɛn nyini ninɔn ɛbhɛ na ririk nang, ˆɛ so ɛn te itso ne irywen.

⁹ Nzo njwɛɛn bok nikyɛɛ na ndɔ ɛzay nɛ nibhɛ gbaat njwɛɛn, njwɛɛn i ne naas nibhɛ ne ndiinday. Yaa ne ji mɔn ɛli njwɛɛn sang say igbaat da ne ɛKyɛɛ ne iKabyik njwɛɛn na i gbaat njwɛɛn no te shɛɛ niken naa?

¹⁰ niKyɛɛ njwɛɛn na kaa gbake njwɛɛn nten ncɛt, ɛli nɛ nibhɛ yaang iphɛ kɛ jam njwɛɛn nɛ. ɛTaanggbey ya i ne gbaat njwɛɛn te iphɛ phyik njwɛɛn, te njwɛɛn sɛ ihop ndɔ ne ishwɛɛ kang ngga te ɛbhɛ wo.

¹¹ Sɔng igbaat da i jam nten de ne i gbaat ɛnyi gha nang, ifɛ yang rɔ. Yaa ne sɛ ɛtsim mɛ, ifɛ yaa ne ji yɛɛs ne irway ne laal gbik ne icik daa ɛnyi gha ne ɛ kɛ mɛmɛ ne ɛkɔn daa ne igbaat tɛ.

¹² iPhɛ ɛlɛy, sɔng ne ˆɛ shɛɛ ɛn kyɔkyɔt to nang, te ɛn irum ne kparat mon da gɛgɛy.

¹³ Hyel ɛn ne nkpiinɛ mon da cik, ɛlɔ ne ita mon de ne iphɛ rɔ wo yaa yung hante ne te kyɔkyɔt, te iphɛ yang te iken.

¹⁴ Mɔn ɛn gbik ɛkɔn na ne ˆaa yɛɛ ne mɔn ɛn te ˆɛ shɛɛ ɛn ncaang nɛ ninyi na gbik. iPhɛ ɛlɛy, tul ɛn nyini kang, daa ɛli ne sɔng ɛnyi sɛ yɛɛ ne yaang ɛDaray yegha wu ɛ kɛ sang tul le kang ngo nang.

¹⁵ Wɛɛ ɛn yɛnɛng, sɔng ɛdɛ mon hyere ɛTaanggbey yegha ne ɛ nang izɛɛng ngge ɛduu nang. Sɔng ɛdɛ mon yɛk irway ivebhe ne ifɛ yaa hɔn ifɛ yɛɛs ne ishisim, ifɛ bees ninyi na gbom mo nang.

¹⁶ Wɛɛ ɛn yɛnɛng, sɔng ɛdɛ mon teye ɛhaa ne ra nzangas nang, sɔng ɛdɛ mon ne teye ɛhaa ne sang phok ɛnik ɛTaanggbey yɔɔ te ɛSuwa gha ne ɛ kaa rɛp ikɔɔn ɛbhɛ de ɛlɔ ɛkyɛɛrɛng ne ire gha nang.

¹⁷ ɛTsim mɛ, ɛli ne ˆɛ yɛɛ ɛn no, ɛ kaa i sim te ɛ sɛ kyii ta say ɛwɛng ne ikɔɔn ɛbhɛ gha, ne mbaray ɛbhɛ. Sɔng ɛ kaa ne tang sɛ ɛnkiinɛ ne san ɛbɔk nang, gbik ɛli ne ɛ kaa jung tɔk ɛwɛng ngɛghaa nggyɛ wo nɛ niyilis sa.

¹⁸ Sɔng ˆɛ kɛ yɛɛs ɛn ne ɛwarang ne iSinay ne i yɛɛ ne dat ne iwɔ wo, ɛlɔ gha ne igboo i re nɛ gbom ɛ so gbyighilik ne inɔp isii sonɛ de,

¹⁹ ɛlɔ gha ne wurus igba wo, ɛlɔ gha ne kɛ phok ne izɔlɔs de, ninaa ne phok kɛ roo wu te ihywɛ kɔɔng nge wo nang.

²⁰ Nibhɛ kaa roo wo daa ɛli ne nibhɛ kaa sang yɛɛ ne hyep ikpii da ne kaa yɛk ngɛ wo i bo, “Wu inyam ihywɛ sɛɛ kyi dat ɛwarang ngo, te ne phengɛ ihywɛ, ihywɛ ku.”

²¹ ɛKɔn na nɛ nibhɛ kaa yaang ngo kaa bok ɛnik gbom, iphɛ ne te ɛMuusaa yegha ɛ yɔngɔ, “Nggɛ yaa kparat ɛlɔ ne ɛnik.”

²² ˆƐ kɛ ne yang yɛɛs ɛn ne ɛwarang ne iSihiyɔɔna, ne iYɛrushɛlɛm ɛdaa ne irywa, ɛgarang ɛTaanggbey ne iken. ˆƐ kɛ yɛɛs ɛn ɛlɔ ne idira ne nimalɛka nɛ nibhɛ kɛ hɔn ninom ma daa ɛco ninom, nibhɛ so irway ihwala.

²³ ˆƐ kɛ yɛɛs ɛn ɛlɔ ne idira ninaa ne roos nɛ nibhɛ so te ɛngɔn ɛkɔɔn ɛTaanggbey, ne kɛ haa irɛɛk nibhɛ de daa ne irywa. ˆƐ kɛ yɛɛs ɛn ɛlɔ ɛTaanggbey, ne ɛbhɛ ɛ so ɛhaa ne bol ninyi na gbik ɛshara, gbik ne ɛlɔ ne ikpabyik ninyi ne icik ne kɛ te nibhɛ hyɔrɔ.

²⁴ ˆƐ kɛ yɛɛs ɛn ɛlɔ ɛYɛso ne ɛbhɛ ɛ kɛ kyinak ɛceree ninyi ne ɛTaanggbey ndɔ ne ìtsɛm ihywas de ne kɛ rop. ˆƐ kɛ yɛɛs ɛn ɛlɔ neyi ɛYɛso ne kɛ phyimɛ. Neyi nɛ nibhɛ bol ivol ne ifɛ phyin ivaa neyi ɛHabila na.

²⁵ Wɛɛ ɛn yɛnɛng, sɔng ˆɛ mbaray ɛn nyini tang tenes ɛn ɛnyi gha ne ɛ bol lo nang. Seng ɛn, ninyi na nɛ nibhɛ kɛ mbaray tang tenes ibol ɛnyi de ne ɛ kaa kpɛng nibhɛ ndɔ ɛzay ya, sɔng nibhɛ kɛ ne phɔrɔt nang. Yaa ne ji mɔn ɛlii njwɛɛn phɔrɔt to wu njwɛɛn kɛ mbaray tang tenes ɛnyi gha ne ɛ kpɛng njwɛɛn daa ne irywa woo?

²⁶ Nten nɛdee nggyɛ wo, izɔlɔs ɛTaanggbey de kaa sungki ɛzay ya. ɛLyilyɛghaa wo, ɛ kɛ ne ji sim-mɛ, ɛ bo, “Naa ta sungki ɛzay ya ɛdaan zɔng, sɔng ne so ɛzay ya zɔng nang, gbik ne ɛdaa ne irywa wo gbik.”

²⁷ iBol de ne iphɛ bo, “ɛDaan na zɔng ngo,” kɛ tɔɔrek wɛsɛrɛk wu sɛ sungki nikɔn na ne kɛ ryɔng ngo i tuul nibhɛ, te nikɔn na ne hame yaa yɛɛ ne sungki wo nibhɛ ji mak.

²⁸ iPhɛ ɛlɛy, te njwɛɛn teye ninaa ne irway ihwala, daa ɛli ne njwɛɛn i saasel igbɔm ba ne hame i ta sungki wo. Te njwɛɛn i re ɛTaanggbey yegha ntsong ngga ɛli ne ɛ sim, ndɔ ne ndiinday ne ɛnik.

²⁹ Daa ɛli ne ɛTaanggbey njwɛɛn na so te igboo ne ifɛ re mɛlɛm-mɛlɛm.