iBirani 10 - ɛWee ne ìTsɛm iHywas

ɛYɛso ɛKiriti gha kɛ Ku ɛDaan Zɔng

¹ iMɛmɛ ɛMuusaa da i tɔɔsel izazurum nikɔn niyɛnɛng nga nɛ nibhɛ yaaso wo. Sɔng izazurum be ihywɛ ne soye nikɔn niyɛnɛng nga nang. iPhɛ ɛlɛy, sɔng izazurum be sɛɛ yɛɛ ne te ninyi nɛ nibhɛ yɛɛset cɛcɛk ne ɛTaanggbey ya te hyɔrɔ lenɛ ne hap itsanga de ne hap i tiil ishay-ishay de nang.

² Sɛɛ yɔng iMɛmɛ ɛMuusaa da bok ihwet ne te nibhɛ hyɔrɔ wo, sɛɛ ne ku kɔɔng tang tɔ naas nikɔn na ne hap itsanga na. Daa ɛli nɛ ninaa ne naas nikɔn na sɛɛ ne ku seng wu kɛ kuus ɛfɔt nibhɛ wo gbik. Sɔng irway nibhɛ sɛɛ ne tɔɔ tak nibhɛ iyɔm daa ne ibol ne ɛfɔt nibhɛ de nang.

³ Nikɔn ne hap itsanga na ne i naas ishay-ishay de i te ninyi na yaa tas wu nibhɛ soye ninaa ne ɛfɔt.

⁴ Daa ɛli ne sɔng neyi ne irom ne irwandɔng ngga nɛ ninaa ne ᐩigyol la i yɛɛ ne kuus ɛfɔt to nang.

⁵ iPhɛ phɛ kɛ te kaa sɛ ɛKiriti gha yaaso ndɔ ɛzay ya, ne ɛ yɔngɔ: “Sɔng nikɔn ne hap itsanga, ne izɛɛng ngge ne ɛ sim nang, ˆɛ kɛ ryɔng me ibek nge te hap ne itsang de.

⁶ Nikɔn ne hap itsanga na ne i sorok ko, nɛ ninaa ne kuus ɛfɔt to, sɔng ˆɛ phok iyɛnɛng ngɛ nang.

⁷ iPhɛ ɛlɛy, ɛKiriti gha kɛ ne yɔngɔ, ‘Mee woo bɛ ɛTaanggbey, nggɛ yɛɛs te n mɔn ɛkɔn na ne ˆɛ sim te ɛli ne kɛ ku haa ndɔ ne ɛWee ne iBol mo de.’ ”

⁸ iMɛmɛ ɛMuusaa da kaa yɔngɔ wu iphɛ so nggbinggbing i naas nikɔn ne hap itsanga na ɛlɔ ne ɛfɔt to. iKyee iphɛ kɛ ne te ɛKiriti gha boote daa nikɔn nɛnaa wo ɛ ji yɔngɔ wu hang ɛTaanggbey ya i sim nibhɛ woo?

⁹ iPhɛ kaa so te tek izɛɛng nɛ nikɔn ne hap itsanga na gɔɔ i yɛk ihap itsang ɛKiriti ne ɛlɔ yɛ. ˆƐ kaa ne ta boote ɛ yɔngɔ, “Mee woo, nggɛ yɛɛs te n mɔn ɛkɔn na ne ɛ sim.”

¹⁰ Daa ɛli ne ɛKiriti gha kɛ mɔn ɛkɔn na ne ɛTaanggbey ya i sim mo, kɛ ne tul njwɛɛn kang lenɛ ne ɛYɛso ɛKiriti gha i nang ibek ɛbhɛ de te hap ne itsanga de ɛdaan na zɔng ngo.

¹¹ Nibo ɛTaanggbey ya i mɔn ɛtomɛ nibhɛ gha izenge ne ihwɛlɛ, nibhɛ ne naas nikɔn ne hap itsanga na ninaa ne hame nibhɛ yɛɛ ne kuus ɛfɔt to.

¹² ɛKiriti gha kɛ ne nang ibek ɛbhɛ ɛdaan zɔng te hap itsanga ne kuus ɛfɔt ne ishay-ishay, ne ɛ kɛ ne ji bhɛ soos ne iwɔ ne irwye ɛTaanggbey.

¹³ Aa ne shɛɛ ɛnggyɛ wo i phyii hɔn nten de nɛ ninaa ne iphup ɛbhɛ na yaa teye ɛkɔn ne tek ita ɛbhɛ.

¹⁴ Kɛ ne lenɛ ne ihap itsanga ɛdaan ɛbhɛ de ɛ kɛ hap po, ɛ kɛ ne te ninyi na ne ɛTaanggbey kɛ tul kang ngo nibhɛ te hyɔrɔ, ihyɔrɔ ne ishay-ishay.

¹⁵ ɛKabyik ɛTaanggbey de kɛ ne ma nang ishɛɛda ne ibol lɛdee wo, iphɛ bo,

¹⁶ “Sɛ́ sɛ nten nɛ kɛ tuu, nzɛ rop ìtsɛm nɛ nibhɛ ɛlɛ, Nzɛ haa ikpii nge da ne irway nibhɛ, nzɛ yɛk ifɛ ndɔ ne ikok nibhɛ.”

¹⁷ ˆƐ kaa ne ta boote ɛ yɔngɔ, “Nzɛ te bap ne ɛfɔt nibhɛ wo, Sɔng nzɛ ne tang taate ne ibebhe nibhɛ de nang.”

¹⁸ I ne sɛ kɛ ne hana ɛfɔt to, sɔng ibol ne hap itsanga de ɛlɔ ne ɛfɔt to ne ta tɔ nɛ nang.

Te Shompeey Cɛcɛk ne ɛTaanggbey

¹⁹ iPhɛ ɛlɛy nigwaa en, njwɛɛn kɛ ne te tɔrɔk ɛli ne yaa yɛɛ ne bhɛ lel ɛLɔ gha ne Tul Kang i Shɛs so lenɛ nɛ neyi ɛYɛso na.

²⁰ ˆƐ kɛ phaal njwɛɛn ɛnkiinɛ ɛphas, ɛnkiinɛ ne sɛ iken lenɛ ne ɛlɛbhɛlɛ yɛghaa nggyɛ wo, kaabi ibek ɛbhɛ de.

²¹ Njwɛɛn ne bok ɛGɔm Nibo ne ɛbhɛ ɛ wɛɛ ninyi ɛTaanggbey ya.

²² iPhɛ ɛlɛy nɛ njwɛɛn shompeey cɛcɛk ne ɛTaanggbey ya ne irway ijwaan, ne ìnang ne itin hyɔrɔ. Nɛ njwɛɛn shompeey ne irway ne kɛ kuus ifɛ kɛ te tɔrɔk, gbik ne ibek ne kɛ kuus ne inɛn iwɛwɛy.

²³ Nɛ njwɛɛn ta kyinak gɛgɛy daa ne sit irwisɛ yɛdaa nggyɛ wo ne njwɛɛn ku bok ko, i ta bol lo, daa ɛli ne ɛTaanggbey ya ne ɛbhɛ kɛ ku sim njwɛɛn nɛwo so sɛ kyinak daa ne ibol ɛbhɛ.

²⁴ Nɛ njwɛɛn wɛɛ en, te phyighis en ɛli ne njwɛɛn yaa tɔɔrek ishwim i mɔn nikɔn niyɛnɛng.

²⁵ Sɔng njwɛɛn shɛɛ en itumɛ ne re ntsong ngga te ɛli nɛ nidɛng i mɔn no nang. Te njwɛɛn yang i tes en itsɔngɔl gɛgɛy, te njwɛɛn hante ne mɔn ɛlɛ wo daa ɛli ne ɛtuk ɛDaray ya yek cɛcɛk.

²⁶ Wu njwɛɛn kɛ ne re ɛnu ɛyisɛ ne mɔn ɛfɔt ne igan no ɛtsim mɛ ne njwɛɛn kɛ seng itin de, sɔng idɛ hap itsanga de ne ta sonɛ ne tang ta hap ɛlɔ ne ɛfɔt to nang.

²⁷ ɛKɔn ɛ kɛ mak ɛbhɛ so njwɛɛn yaa yang ku i hyep ɛshara gha ne ɛgbaang ne igboo ndɔ ne ɛnik gbom. iGboo wo ne ifɛ sɛ re ninaa ne iphup ɛTaanggbey ya.

²⁸ Gbik ɛnyi gha ne ɛ kɛ mbaray imɛmɛ ɛMuusaa da, wu kɛ sɛ nishɛɛda ifaa hang itwat yɔɔ, yaa ne phoo ɛbhɛ, wɛlɛng san iyɔm.

²⁹ iPhɛ sɛ ne ji so ɛlii daa ɛnyi gha ne ɛ kɛ bɛɛs ɛNgɔn ɛTaanggbey yaa? ɛNyi gha ne ɛ kɛ sang bo neyi ne rop ne ìtsɛm ne tul ɛbhɛ kang ngo te ɛkɔn naa? ɛNyi ghe ne ɛ kɛ towos iKabyik ɛTaanggbey dee? iYa ihywee ɛshara ne sɛ ne ji hyɛ ɛbhɛ nɛɛ?

³⁰ Daa ɛli ne njwii yɛɛ wu ɛTaanggbey ya kɛ yɔngɔ, “iPhɛ so mee naa tal lɛ nɛ, naa ne tal lɛ nɛ.” Ne ɛ ta yɔngɔ, “ɛDaray ya sɛ bol ninyi ɛbhɛ na ɛshara.”

³¹ iPhɛ so ɛkɔn ne ɛnik gbom ɛnyi gha ho ne iwɔ ɛTaanggbey ne iKen na.

³² Taate ɛn nɛ ɛli ne iphɛ kaa te ne nyinɛn ne ira ɛtsim ba, nten de ne ɛ kaa tsa ɛ say ɛn iwɛwɛy de, ɛ sɔ ɛn nggbang ngga ɛ kyinak ɛn ne irway nviit da.

³³ Kaa ne i sɛ idɛ nten nɛ ne i towos nyini ɛnu ɛyisɛ ninyi, i baasek nyini nggbang. Ne ta sɛ idɛ nten nɛ, ne ɛ ta sim ɛ byinki ɛn ito nɛ ninyi na ne i ma mɔn nibhɛ ɛlɛ wo.

³⁴ Ɛ kaa san ɛn iyɔm ninyi nibhɛ so ne nyang. Kaa ne phɔrɔt nikɔn mon ne ihwet, ne ɛ sim ɛn ɛlɛy ne irway ihwala, daa ɛli ne ɛ yɛɛ ɛ bok ɛn nikɔn niyɛnɛng nɛ nibhɛ kɛ jam gbom nibhɛ so ninaa ne inat.

³⁵ iPhɛ ɛlɛy, ne ɛ hante ɛn ne irway nviit mon da, sɛ mɔn nyini iyɛnɛng gbom.

³⁶ iPhɛ so nggbinggbing ɛ bo ɛn ɛbɔk te ɛ mɔn ɛn ɛkɔn na ne ɛTaanggbey ya sim, te ɛ sɛ ne say ɛn ɛkɔn na ne kaa ku sim-mɛ wo.

³⁷ Daa ɛli ne ɛWee ne iBol ɛTaanggbey yo i bo, “Yaa phyɔngɔle ncɛt, ɛhaa ne yaaso gha ne yɛɛs, sɔng aa rɔn nang.

³⁸ ɛNyi ɛcik nge gha, sɛ ne lenɛ ne ìnang ne itin, ɛ sɛ iken. Wu ɛ kɛ ne kyii ne ɛtsim, sɔng naa ne phok iyɛnɛng, ɛbhɛ nang.”

³⁹ Sɔng njwɛɛn ne so ndɔ ninyi na nɛ nibhɛ kyisi ne ɛtsim ma nibhɛ phɛɛs ne bees se wo nang, njwɛɛn yang so ndɔ ninyi na nɛ nibhɛ kɛ nang ne itin nɛ nibhɛ phɔrɔt.