ɛYohana 8 - ɛWee ne ìTsɛm iHywas

ɛKuk ne Kɛ Wum Ɛbhɛ ne Nzangas

¹ ɛYɛso gha ne ji ɛbhɛ wara daa ne iGol Niphaa wo.

² Kɛ ne cwiil ne ihwɛlɛ ywiriri, ne ɛ kyii ɛ phɛ ne iDeng ngge. iDira ninyi de ne bhɛ tumɛy ɛlɔ ɛbhɛ gha, ne ɛ soos, ɛ ho ne mɛmɛ nibhɛ nɛ.

³ Ninaa ne kpɛl ɛShara gha nɛ niFarisawa na ne yɛɛs ɛbhɛ ne ɛkuk ne kɛ wum ɛbhɛ ne nzangas, nibhɛ yɛk ɛbhɛ nɛ ɛ kyinak ɛnu ɛyisɛ nibhɛ gbik,

⁴ nibhɛ ji yaak ɛYɛso yegha, “ɛKyɛɛ ne icwam, kɛ wum ɛkuk kɛghaa wo ɛ so ne nzangas.

⁵ Ndɔ ɛShara gha, ɛMuusaa kɛ ne yɛk njwii nɛ wu te phengɛ ihywee nikuk kɛdee wo. Ɛɛ ne bo ɛlii?”

⁶ Nibhɛ kaa boote ɛlɛ wo nibhɛ ten ɛbhɛ, tɛ nibhɛ ne ji sɛ ɛkɔn na nɛ yaa wum ɛbhɛ nɛ. ɛYɛso gha ne see ito ɛ ho ne haa nikɔn ne ivel ne ikɛn ne iwɔ ɛbhɛ.

⁷ Kɛ ne sɛ nibhɛ kɛ maa re ɛnu ɛyisɛ ne phomos ɛYɛso yegha ivol ba, ne ɛ yinɛ ito ɛbhɛ de ɛ yaak nibhɛ, “ɛNyi gha ne ɛ so tang ɛfɔt ndɔ mon no, te ɛbhɛ ɛ cwaak ne itsetsee yɛ.”

⁸ Ne ɛ ta see ito de dɔng ɛ yaa haa nikɔn na ne ivel ba.

⁹ Kɛ ne sɛ nibhɛ kɛ phok ɛlɛ wo, nibhɛ ne tek ɛlɔ yɛ nidaan-nidaan, nibhɛ tsa nɛ nihelem mɛ. Nibhɛ ne ji tek ɛYɛso yegha nggerey ne ɛkuk ka ɛ kɛ kyinak ɛnggyɛ wo.

¹⁰ ɛYɛso gha ne yinɛ ito, ɛ phom ɛkuk ka ɛ yaak ɛbhɛ, “ɛKuk, nibhɛ so ɛbi lɛɛ? Sɔng ɛnyi kɛ cwaak ne itsetsee mo de nang nge?”

¹¹ ɛKuk ka ne kyii nɛ ɛ yɔngɔ, “ɛNdiinday, sɔng ɛdɛng kɛ cwaak ngɛ nang.” ɛYɛso gha ne yaak ɛbhɛ, sɔng naa ne ma phoo yɛ nang. Hyel, sɔng ne ɛ tang bhɛ mɔn ɛfɔt to nang.

ɛYɛso gha Ɛbhɛ soye iWɛwɛy ɛZay De

¹² ɛYɛso gha ne ta boote nɛ ninyi na, ɛ yaak nibhɛ, “Mee nzo iwɛwɛy ɛzay de, ɛhiha ɛnyi ne ɛɛ roos me wo nang, sɔng aa ne hyel ndɔ gbyik kang, aa yang bok iwɛwɛy ne iken.”

¹³ niFarisawa na ne yaak ɛbhɛ, “iGyɛ ɛ bol ivol ne ito mo. Sɔng ivol mo da ne so itin nɛ nang.”

¹⁴ ɛYɛso gha ne kyii nɛ ɛ yaak nibhɛ, “Sɛɛ kyi yɔng nzi bol ivol ne ito nge da, ifɛ ne so itin nɛ, daa ɛli ne nzi yɛɛ ɛlɔ gha ne nggɛ le, ne ɛlɔ gha ne naa phɛ, nyinɛn no nang, sɔng ɛɛ ne yɛɛ ɛn ɛlɔ gha ne nggɛ le ne ɛlɔ gha ne naa phɛ nang.

¹⁵ Ɛɛ hyɛ ɛn ɛnyi gha ɛshara gha ne icwas ɛten ɛsii, mee wo, sɔng nzi ne hyɛ ɛnyi ɛshara nang.

¹⁶ Wu naa ne hyɛ ɛshara gha, naa ne hyɛ ɛhaa ne itin nɛ, daa ɛli ne sɔng mee nzi hyɛ nggenggere nge nang. Njwii hyɛ ne ɛKyɛɛ nge gha ne ɛ kɛ tom me wo.

¹⁷ Ndɔ ɛShara mon na, kɛ ne haa i sim me nɛ wu ibol ɛnu ninyi ifaa so itin nɛ.

¹⁸ Mee wo nzi ne bol ibol ne ito nge, ɛKyɛɛ nge gha ne ɛ kɛ tom me wo ne so ɛhaa ne ɛɛ bol daa ne ito nge de ne mang.”

¹⁹ Nibhɛ ne phom ɛbhɛ nibhɛ yaak ɛbhɛ, “ɛKyɛɛ mo gha so ɛbii?” ɛYɛso gha ne kyii nɛ ɛ yɔngɔ, “Sɔng ɛ yɛɛ ɛn mɛɛn gbik ne ɛKyɛɛ nge gha nang. Sɛɛ yɔng ɛ yɛɛ ɛn mɛɛn no, ɛ sɛɛ ne maa yɛɛ ɛn ɛKyɛɛ nge gha ne mang.”

²⁰ Ɛ kaa bol ivol lɛdaa wo nten de ne ɛ kaa mɛmɛ ninyi nɛ ndɔ ne iDeng ngge, cɛcɛk ɛlɔ gha ne i teesek ne izɛɛng. Gbik ne iphɛ ɛlɛy sɔng ɛnyi ne yɛɛ ne wum ɛbhɛ nang, daa ɛli ne nten ɛbhɛ de kaa kyi tɔ.

Sɔng Aa Yɛɛ ne Phɛ ɛn ɛLɔ gha ne Naa Phɛ wo Nang

²¹ ɛYɛso gha ne ta yaak nibhɛ, “Naa bak ne ɛlɔ yɛ, aa ne tɔk ɛn mɛɛn, ne ɛ kus ɛn ndɔ ne ɛfɔt mon no. Sɔng aa yɛɛ ne phɛ ɛn ɛlɔ gha ne naa phɛ wo nang.”

²² iBol lɛ ne te niYahodawa na ne yaa phomos en nibhɛ bo, “Aa phoo ito ɛbhɛ naa? iPhɛ phɛ kɛ te ɛ bo wu ɛlɔ gha ne yaa phɛ hang njwɛɛn yaa yɛɛ phɛ yɛwo naa?”

²³ ɛYɛso gha ne re ɛnu ɛyisɛ ɛ yɔngɔ, “Ɛ so nyini ninaa ndɔ ne ivel, ne nzo ɛhaa ɛdaa ne irywa. Ɛ so ɛn ninaa ndɔ ɛzay yɛghaa wo, sɔng ne nzo ɛhaa ndɔ ɛzay yɛghaa wo nang.

²⁴ Nzi bok nyini aa kus ɛn ndɔ ne ɛfɔt mon no; wu ˆɛ kɛ ne sang nang ɛn ne itin nɛ wu ‘Mee wo ne Nzo Mee wo’ ˆaa ne kus ɛn ndɔ ne ɛfɔt mon no ɛtsak.”

²⁵ Nibhɛ ne phom nibhɛ yɔngɔ, “Ɛ so yɛ ɛhay?” ɛYɛso gha ne kyii nɛ ɛ yɔngɔ, “Nggu so ɛli ne nggɛ mɔng nyini ɛyisɛ gha.

²⁶ N bok nikɔn na gbom ne nzɛɛ bol daa ne ito mon de, ninaa ne nzɛɛ bol n phoo nyini nɛ. Nzi ne tɔng ɛzay ya ɛkɔn na ne nggɛ phok ɛlɔ ɛhaa ne ɛ kɛ tom me wo, nibhɛ ne ɛ so itin nɛ.”

²⁷ Sɔng nibhɛ ne seng wu ɛYɛso gha tɔng nibhɛ ibol ɛKyɛɛ ɛbhɛ nang.

²⁸ iPhɛ ɛlɛy yang, ɛYɛso gha ne yaak nibhɛ, “Sɛ́ sɛ ˆɛ kɛ yinɛ ɛn ɛNgɔn ɛNyi gha, ˆɛ sɛ ne ji seng ɛn ɛNyi gha ne nzo, ɛ ta seng ɛn sɔng nzi mɔn ɛdɛ ɛkɔn ɛhaa ne ito nge nang. Nzi yang bol nikɔn na ne ɛkyɛɛ gha kɛ mɛmɛ nɛ.

²⁹ ɛHaa ne ɛ kɛ tom me wo ɛ so ne mee, sɔng ɛ kɛ tek me nggenggere nge nang daa ɛli ne nzi mɔn nikɔn na nɛ nibhɛ yaa laasek ɛbhɛ irway cɛcɛɛy.”

³⁰ Ninyi na gbom nɛ nibhɛ kɛ tenes ɛYɛso yegha ɛ bol nikɔn nɛnaa wo ne nang ne itin nɛ ne ɛbhɛ.

iTin de Yaa Biri Yɛ

³¹ ɛYɛso gha ne yaak niYahodawa na nɛ nibhɛ kɛ nang ne itin nɛ ne ɛbhɛ wo, “Wu ɛ kɛ wum ɛn ibol nge de, ne ɛ ji so ɛn ninɔn ne icwam nge na ntin nɛ.

³² Aa ne ji seng ɛn itin de, itin de iphɛ yaa ne te nyini ɛ phɔrɔt ɛn.”

Ninɔn nTin ɛTaanggbey

³³ Nibhɛ ne kyii ɛbhɛ nɛ nibhɛ yɔngɔ, “Njwi so icwaang ɛBaraying, sɔng njwi kɛ ne ku teye nikpuru ɛhak ɛnyi nang, ˆaa ne mɔn ɛlii ˆɛ yɔng wu njwii sɛ phɔrɔt too?”

³⁴ ɛYɛso gha ne kyii nɛ ɛ yɔngɔ, “Nzi tɔng nyini itin nɛ, ɛhiha ɛnyi ne ɛ kɛ mɔn ɛfɔt, ɛ kɛ teye ɛkpuru ne ɛfɔt ta.

³⁵ Sɔng ɛkpuru gha ne so ɛhaa ne ijwee ntinting nang, ɛngɔn ne ijwee ɛbhɛ so ɛhaa ne ijwee gha ishay-ishay.

³⁶ iPhɛ ɛlɛy, wu ɛNgɔn na kɛ ne phɔt nyini wo, ˆɛ kɛ phɔrɔt ɛn nɛ ntin nɛ.

³⁷ Nzi yɛɛ ˆɛ so ɛn icwaang ɛBaraying ngo, gbik ne iphɛ ɛlɛy ɛɛ tɔk ɛn te ɛ sɛɛ phoo ɛn mɛɛn daa ɛli ne sɔng ɛ kɛ say ɛn ibol nge de nang.

³⁸ Nzi bol nikɔn na ne nggɛ yaang ɛlɔ ɛKyɛɛ nge gha, ɛɛ ne mɔn ɛn ninaa ne ɛ kɛ phok ɛn ɛlɔ ɛkyɛɛ mon.”

³⁹ Nibhɛ ne kyii ɛbhɛ nɛ nibhɛ yɔngɔ, “ɛBaraying ɛbhɛ so ɛkyɛɛ mos sa.” ɛYɛso gha ne kyii nɛ ɛ yɔngɔ, “Sɛɛ yɔng ɛ so ɛn ninɔn ɛBaraying nga ɛtsak, ɛ sɛɛ ne mɔn ɛn nikɔn na ne ɛ kaa mɔn no.

⁴⁰ Nzo ɛnyi ne nggɛ tɔng nyini itin de ne nggɛ phok ɛlɔ ɛTaanggbey, gbik ne iphɛ ɛlɛy ɛ kɛ ne yaa tɔk ɛn ta ɛ sɛɛ phoo ɛn mɛɛn. Sɔng ɛBaraying nga kɛ ne mɔn ɛlɛ wo nang.

⁴¹ Ɛɛ mɔn ɛn nikɔn na ne ɛkyɛɛ mon na kɛ mɔn.” Nibhɛ ne kyii nɛ nibhɛ yɔngɔ, “Sɔng njwi so itso ne irywen nang, ɛTaanggbey ne ito ɛbhɛ, ɛbhɛ so ɛKyɛɛ mos sa zɔng, njwi ne so ninɔn ntin ɛbhɛ.”

⁴² ɛYɛso gha ne yaak nibhɛ, “Sɛɛ yɔng ɛTaanggbey ya bhɛ so ɛkyɛɛ mon na, ɛ sɛɛ ne sim ɛn mɛɛn, daa ɛli ne nggɛ le daa ɛlɔ ɛTaanggbey ya, ɛlyilyɛghaa wo ne nzo ɛbɛ. Sɔng ngge yɛɛs ne igbɔm ne ito nge nang, ɛbhɛ kɛ tom me.

⁴³ iKyee iphɛ kɛ te ɛ kɛ sang seng ɛn ivol nge daa? iPhɛ so daa ɛli ne hame ɛ kɛ kyii ɛn ne icwas mon ɛlɔ ɛdaan ɛ tenes ɛn ibol nge de.

⁴⁴ Ɛ so ɛn ninaa ɛkyɛɛ mon ɛShɛtan, ɛɛ sim ɛn te ɛ sɛɛ roos ɛn ɛkɔn na ne ɛkyɛɛ mon na sim. Ne le ne itsa yɛ ɛ kaa ku so ɛhaa ne phobho ninyi ne ɛ sang bok itin nɛ, daa ɛli ne hame itin de so ndɔ ɛbhɛ. I sɛ ɛ kɛ hyɛ irywɛɛk ga, kaa so ɛɛ ku bol ɛkɔn na ne ɛbhɛ yɛ ɛ ku so, daa ɛli ne ɛ ku so ɛhaa ne irywɛɛk ka, ne ɛ ta so ɛkyɛɛ ninaa ne irywɛɛk ka.

⁴⁵ Daa ɛli ne nzi tɔng nyini itin de, iphɛ phɛ kɛ te ɛ sang nang ɛn ne itin nɛ ne me wo.

⁴⁶ ɛDɛ mon sɛɛ yɛɛ yɔng wu kɛ ku wum me ne ɛfɔt bɛ? Wu itin nɛ ne nzi ne tɔng ngo, ikyee iphɛ kɛ ne te ˆɛ sang nang ɛn ne itin nɛ ne me woo?

⁴⁷ ɛNyi gha ne ɛ so ne ɛTaanggbey ya, ɛɛ tenes ɛkɔn na ne ɛTaanggbey ya bol. ɛKɔn na ne ɛ kɛ ne te ɛ sang tenes ɛn mɛɛn no, sɔng ɛ so ɛn ninaa ɛTaanggbey ya nang.”

ɛYɛso, ne ɛBaraying

⁴⁸ niYahodawa na ne yaak ɛYɛso yegha, “Sɔng ibol mos de so itin nɛ ne njwi kaa yɔng wu ɛ soyɛ ɛnyi ne iSamariya gha, ɛphoo gha ta so ndɔ mo de nang nge?”

⁴⁹ ɛYɛso gha ne kyii nɛ ɛ yɔngɔ, “Sɔng ɛphoo so ndɔ nge nang, nzi yang naas ɛkyɛɛ nge ne ndiinday, ɛ ne ji bɛɛs ɛn mɛɛn.

⁵⁰ Sɔng nzi tɔk ito nge ne ndiinday de nang, ɛdɛ ɛnyi gha sonɛ ne ɛbhɛ tɔk me nɛ, ɛbhɛ ne ɛ ta so ɛhaa ne hyɛ ɛshara gha.

⁵¹ Nzi tɔng nyini itin nɛ, ɛhiha ɛnyi ne ɛ kɛ roos ibol nge de, sɔng ɛ sɛ ne ku nang.”

⁵² niYahodawa ne yaak ɛbhɛ, “ɛLyilyɛghaa ne njwi kɛ ji seng wu ɛphoo gha so ndɔ mo ɛtsak! ɛBaraying nga kaa ku, ninabawa na kaa ne ma kus, iphɛ dee ɛɛ ne bo wu ɛnyi gha ne ɛ kɛ roos ibol mo, wu hang ɛ sɛ ne ku.

⁵³ Ɛ phyin ɛkyɛɛ mos ɛBaraying ngeghaa? Ɛ kaa ku, ɛlɛy nɛ ninabawa na. Ɛ ji wɛɛ te ɛ soyɛ ɛhay?”

⁵⁴ ɛYɛso gha ne yɔngɔ, “Wu nggɛ nang ito nge ne ndiinday de, sɔng ito-ndiinday yɛ ne so ɛkɔn nang. ɛKyɛɛ nge gha, ne ɛ bo ɛn wu ɛ so ɛTaanggbey mon na ɛbhɛ ɛ naas me ne ndiinday de.

⁵⁵ Sɔng ɛ ku yɛɛ ɛn ɛbhɛ nang, nzi ne yɛɛ ɛbhɛ. Wu nggɛ ne yɔng wu hang nzi yɛɛ ɛbhɛ, naa ne te me ɛhaa ne irywɛɛk tɛ nyinɛn. Nzi ne yɛɛ ɛbhɛ, ne n da i roos ibol ɛbhɛ.

⁵⁶ ɛKyɛɛ mon ɛBaraying nga kaa bok irway ihwala gbom da ne icwas ne yaang nten nge de; ɛ kaa ne yaang, iphɛ ne nang ɛbhɛ irway ihwala.”

⁵⁷ Nibhɛ ne yaak ɛYɛso yegha, “Sɔng ishay mo de kɛ hɔn nzuwubɔ iwii nang, iphɛ ne ɛ kɛ ne yaang ɛBaraying ngeghaa?”

⁵⁸ ɛYɛso gha ne yaak nibhɛ, “Nzi tɔng nyini itin nɛ, ɛli ne tang yɛk ɛBaraying nge gha, ‘Nggu Sonɛ.’ ”

⁵⁹ iBol lɛ ne te nibhɛ ji tang ikpɛɛ tɛ nibhɛ phengɛ ɛbhɛ nɛ, ɛYɛso gha ne ree ye, ɛ byangaret ɛ wuru, ɛ tek iDeng ngge.