ɛYohana 10 - ɛWee ne ìTsɛm iHywas

iBol ne iGɔrɔp daa ɛHaa ne Ntsabhak

¹ ɛYɛso gha ne yaak nibhɛ, “Nzi tɔng nyini itin nɛ, ɛnyi gha ne ɛ kɛ sang roos ɛnu ne izuk ne ibang ne ntsabhak ge, ɛ kyii roos ikɛk ge ɛ lel lo ɛ soye ɛhaa ɛyi, ne ɛhaa ne bo ihwet ɛ phɔrɔt nɛ nikɔn ninyi.

² ɛNyi gha ne ɛ roos ɛnu ne izuk ka ɛbhɛ soye ɛhaa ne ᐩigyol la.

³ ɛNyi ne wɛɛ ɛnu ne izuk ne ntsabhak ka i ne phaal ɛhaa ne ntsabhak ka ɛnu ne izuk kɛ, ntsabhak ge i ne phok izɔlɔs ɛhaa ne ntsabhak ka. Ɛɛ yel-le ihywɛ ne irywɛɛk ne ihywɛ ɛ ji wuru nɛ.

⁴ Yaa ne sɛ ɛ kɛ tul ntsabhak ɛbhɛ de, ne ɛ ji ho ɛyisɛ ihywɛ ne i kungus ɛbhɛ, daa ɛli ne ihywɛ ku yɛɛ izɔlɔs ɛbhɛ.

⁵ Sɔng ihywɛ yaa ne roos ɛhak ɛnyi nang, ihywɛ yaa yang tel ɛhak ɛnyi gha daa ɛli ne sɔng ihywɛ yɛɛ izɔlɔs ɛbhɛ nang.”

⁶ ɛYɛso gha kɛ tɔng nibhɛ ibol ne igɔrɔp pɛdee wo, sɔng nibhɛ ne seng ɛkɔn negha ne ɛɛ bol nang.

ɛYɛso Ɛbhɛ so ɛHaa ne Hyep Ntsabhak ɛYɛnɛng Nga

⁷ iPhɛ ɛlɛy, ɛYɛso gha ne ta ɛ yaak nibhɛ, “Nzi tɔng nyini itin nɛ, Mee nzo ɛnu ne izuk ne ibang ntsabhak ge.

⁸ Gbik ninaa nɛ nibhɛ kaa yɛɛs ɛyisɛ nge gha, nibhɛ sos ninaa ɛyi nɛ ninaa ne bo ihwet nibhɛ phɔrɔt nɛ nikɔn ninyi, sɔng ntsabhak ge kaa ne tenes nibhɛ nang.

⁹ Mee n so ɛnu ne izuk ne ibang nga, ɛhiha ɛnyi ne ɛ kɛ roos ɛlɔ nge gha ɛ lel, aa ne phɔrɔt. Aa ne i leesel ɛ ta wuusi, ne i hyep ɛbhɛ yɛnɛng.

¹⁰ ɛHaa ɛyi gha yɛɛs te ɛ hyel ɛyi, ɛbhɛ phoo, ɛ ta bees. Nggɛ ne yɛɛs tɛ nibhɛ sɛ iken, nibhɛ ne sɛ iphɛ hyɔrɔ.

¹¹ “Mee nzo ɛhaa ne ntsabhak ɛyɛnɛng nga. ɛHaa ntsabhak ɛyɛnɛng nga nang iken ɛbhɛ ɛlɔ ne ntsabhak ɛbhɛ de.

¹² Sɔng ɛnyi gha ne kɛ kɔp ɛbhɛ wo ɛbhɛ so ɛhaa ntsabhak ka nang, sɔng ntsabhak ge ne so izee ɛbhɛ nang. iPhɛ ɛlɛy yaa ne sɛ ɛ kɛ yaang nibu-nizaram, ne ɛ tel ɛ tek ntsabhak ge. Nibu-nizaram ma ne ji sɛngɛre ntsabhak ge ihywɛ ne teye shwaa.

¹³ ɛNyi gha kɛ tel lo daa ɛli ne kɛ kɔp ɛbhɛ ihywep ba, sɔng ɛɛ ne tas ntsabhak ge nang.

¹⁴ “Mee nzo ɛhaa ne ntsabhak ɛyɛnɛng nga, nzi ne yɛɛ ntsabhak nge de, ntsabhak nge de ne ma yɛɛ me,

¹⁵ ɛli ne ɛKyɛɛ nge gha i yɛɛ me ma nzi yɛɛ ɛKyɛɛ gha. Nggɛ ne nang iken nge de ɛlɔ ntsabhak nge de.

¹⁶ Ne n bok idɛ ntsabhak de ne hame ihywɛ so ndɔ ne ibang ngɛdee wo. Naa ne bhɛ yɛɛs ne ihywɛ, ihywɛ ne yaa tenes izɔlɔs nge. iHywɛ ne ji teye iwa ijwaan, ɛhaa ntsabhak ɛdaan.

¹⁷ ɛKyɛɛ gha sim me wo daa ɛli ne nzi naas iken nge, nzɛ ne kyii ta bo iphɛ dɔng.

¹⁸ Sɔng ɛnyi yaa ne phɔt iken nge de nɛ me wo nang, mee nzi naas iken de ne ishwim nge. N bok ito ne nang iphɛ, gbik ne ito ne bo iphɛ dɔng. ɛKyɛɛ nge gha ɛbhɛ kɛ yɛk me nɛ te mɔn ɛlɛ wo.”

¹⁹ iVol lɛbaa wo ne te niYahodawa na nibhɛ ta hosop en ndɔ nibhɛ dɔng.

²⁰ iDay nibhɛ ne yaa bo, “Ɛ bok ɛphoo! Ɛɛ hoghɛse nisan! iKyee iphɛ kɛ te ɛɛ tenes ɛn ɛbhɛ woo?”

²¹ ɛByin nɛ ne yɔngɔ, “Sɔng ivol lɛdaa wo so ivaa ɛnyi ne ɛ bok ɛphoo nang. ɛPhoo gha sɛ yɛɛ ne phaal ɛwil irwisɛ bɛ?”

Kɛ Mbaray ɛYɛso Ye

²² Nten nɛ kaa so nten ne ntsentseng, nibhɛ kaa ne bok idɛ idira de, ndɔ ne iYɛrushɛlɛm be nibhɛ tas nɛ ɛli nɛ nikyɛɛ-nikyɛɛ nibhɛ na kaa haan ɛTaanggbey yegha iDeng ngge.

²³ ɛYɛso gha ne so ndɔ ɛsaa ne iDeng nga ɛɛ hyel ɛlɔ gha ne i bok ɛbhɛ ɛLɔ ɛSirim ɛSɔlɔmɔn.

²⁴ niYahodawa na ne bhɛ tumɛy ɛlɔ ɛbhɛ gha, nibhɛ ne yaak ɛbhɛ, “Aa tek njwii ndɔ ne irip ba bhɛ hɔn iya nten ne? Wu igyɛ ɛ soyɛ ɛKiriti gha mɔng njwi itin nɛ.”

²⁵ ɛYɛso gha ne kyii nɛ ɛ yɔngɔ, “Nggɛ ku mɔng nyini, sɔng ɛ kɛ nang ɛn ne itin nɛ nang. Nikɔn ne kparat ta ne nggɛ mɔn ndɔ ne irywɛɛk ɛKyɛɛ nge wo kɛ bol daa ne ito nge,

²⁶ gbik ne iphɛ ɛlɛy sɔng ɛ kɛ ne nang ɛn ne itin nɛ nang daa ɛli ne sɔng ɛ so ɛn ndɔ ne iwa ne ntsabhak nge wo nang.

²⁷ Ntsabhak nge de tenes izɔlɔs nge; nzi yɛɛ ihywɛ, ihywɛ ne roos me.

²⁸ Nzi naas ihywɛ iken ne inat, sɔng ihywɛ sɛ́ ne kus sang; sɔng ɛnyi sɛ ne yɛɛ ne phɔt ihywɛ ndɔ ne iwɔ nge gha nang.

²⁹ ɛKyɛɛ nge gha ne ɛ kɛ nang me ihywɛ wo ɛ phyin ne igbom gbik; sɔng ɛnyi sɛ yɛɛ ne phɔt ihywɛ ndɔ ne iwɔ ɛKyɛɛ nge wo nang.

³⁰ Mee wo ne ɛkyɛɛ gha njwi so nidaan nɛ.”

³¹ niYahodawa na ne tang ikpɛɛ tɛ nibhɛ phengɛ ɛbhɛ nɛ dɔng.

³² ɛYɛso gha ne yaak nibhɛ, “Nggɛ tɔɔrek nyini nikɔn niyɛnɛng gbom ne ɛkyɛɛ gha kɛ tom me te mɔn, aa ne phengɛ mɛɛn lenɛ nɛ ya phɛɛ yɛɛ?”

³³ Nibhɛ ne kyii nɛ, nibhɛ yɔngɔ, “Sɔng njwii sim njwi yaa phengɛ yɛ lenɛ ne daa nikɔn niyɛnɛng nɛghaa wo nang, yang lenɛ ne ivol ne bɛɛs ɛTaanggbey ye. Ɛ soyɛ ɛten ɛsii, ɛ kɛ ne yaa bo wu ɛ so ɛn ɛte ne ɛTaanggbey.”

³⁴ ɛYɛso gha ne kyii nibhɛ nɛ ɛ yɔngɔ, “Kɛ haa ndɔ ɛShara mon na wu ɛTaanggbey ya bo, ‘ˆƐ so ɛn nitaanggbey.’

³⁵ Njwɛɛn ne yɛɛ ɛkɔn na ne ɛWee ne iBol ɛTaanggbey yo bol so itin nɛ; ɛTaanggbey ya kɛ ne yel-le ninyi yɛnaa wo nitaanggbey, ninyi na ne kɛ nang nibhɛ ibol ɛbhɛ de.

³⁶ Mee wo ne ɛKyɛɛ gha kɛ ne tul me ɛ tom me ndɔ ɛzay ya. Aa ne ji mɔn ɛlii ɛ yɔng ɛn wu nzi bɛɛs ɛTaanggbey yegha daa ɛli ne nzi bo wu nzo ɛNgɔn ɛTaanggbey yaa?

³⁷ Wu nzi sang mɔn ihywee ɛtomɛ de ne ɛkyɛɛ gha mɔn no, sɔng ne ɛ nang ne itin nɛ ne ibol nge de nang.

³⁸ Wu nzi ne mɔn ɛlɛy, wu aa ne sang nang ɛn itin nɛ ne me wo, ne ɛ nang ɛn ne itin nɛ ne ɛtomɛ gha, tɛ nɛ ɛ yɛɛ ɛn ɛ ta seng ɛn wu ɛkyɛɛ gha so ndɔ mee, ne ma nzo ndɔ ɛbhɛ wo.”

³⁹ Nibhɛ ne ta yɔng wu n yaa wum ɛYɛso yegha, ne ɛ ta phɔrɔt dɔng.

⁴⁰ ɛYɛso gha ne ta kyii ɛ phɛ ne ikpang ne iHywel ne iWurudun no, ɛlɔ gha ne ɛYohana gha kaa yaak ninyi na ne ibatisima de, ɛbhɛ shɛɛ ɛnggyɛ wo.

⁴¹ Ninyi gbom ne phɛɛs ɛlɔ ɛbhɛ gha, nibhɛ ne yɔngɔ, “Sɔng ɛYohana gha kaa mɔn nikɔn ne kparat tang, gbik ne iphɛ ɛlɛy, nikɔn na ne ɛ kaa ne bol daa ɛnyi yɛghaa wo ne so itin nɛ.”

⁴² Ninyi gbom ɛnggyɛ wo ne nang ne itin nɛ ne ɛYɛso gha.