ɛYakub 4 - ɛWee ne ìTsɛm iHywas

iSaa ne ɛZay

¹ iKyee iphɛ yɛɛs ne irywen da gbik ne ishamas de ndɔ mon noo? Sang so ihyop ne ibek mon ihywee-ihywee ne ᐩihywɛ lɛng ɛn ndɔ mon ne i?

² ˆƐ tɔk nikɔn sɔng ne ˆɛ sɛ ɛn nang, iphɛ ɛlɛy ne ˆɛ phobho ɛn ninyi. ˆƐ yɛk ɛn irisɛ gbom daa nikɔn nihak ninyi sɔng ne ˆɛ sɛ ɛn nang, iphɛ ɛlɛy ne ˆɛ tum ɛn ishamas ˆɛ lɛng ɛn nyini. Sɔng ˆɛ kɛ sɛ ɛn ɛkɔn na ne ˆɛ sim ɛn no nang daa ɛli ne ˆɛ kɛ sang phom ɛn ɛTaanggbey ye.

³ I sɛ ˆɛ kɛ phom ɛn no, sɔng ne ˆɛ sɛ ɛn nang, daa ɛli ne ˆɛ kɛ phom ɛn ne icwas ne sim ito. ˆƐɛ phom ɛn nikɔn na ne ˆaa phok ɛn ne iyɛnɛng ne ibek mon.

⁴ Nyinɛn no ne ˆɛ kɛ sang kyinak ɛn daa ibol de ne ɛ kɛ sim ɛn ɛTaanggbey yegha nɛ wo! ˆƐ doo ɛn ɛli ne isaa de ne ɛzay ya soye iphup be ne ɛTaanggbey ya naa? Gbik ɛnyi gha ne ɛ kɛ kasa aa wum isaa de ne ɛzay ya, ɛ kɛ ne teye ɛhaa ne iphup ɛTaanggbey ya.

⁵ Hang ˆɛ wɛɛ ɛn te iphɛ so buu ne kɛ haa ndɔ ne ɛWee ne iBol ɛTaanggbey yo i bo, “ɛTaanggbey so hyɔrɔ ne ɛnkyis wu ikabyik ge ne ɛ kɛ yɛk ndɔ njwɛɛn no i sim ɛhak ɛkɔn na naa?”

⁶ Gbik ne iphɛ ɛlɛy, ɛTaanggbey ya i ne hanas njwɛɛn ne izɛɛng ngge gbom. iPhɛ phɛ kɛ te kɛ haa ndɔ ne ɛWee ne iBol ɛTaanggbey yo i bo, “ɛTaanggbey ya i mbaray ɛhaa ne tɔɔk ito, ne ɛ nang ɛhaa ne laasek ito izɛɛng ɛbhɛ.”

⁷ iPhɛ ɛlɛy ne ˆɛ nang ɛn ɛTaanggbey yegha itso mon. Mbaray nyini ɛShɛtan negha, aa ne tel nyini.

⁸ Yɛɛs ɛn cɛcɛk ne ɛTaanggbey ya aa ne ma yɛɛs cɛcɛk ne nyinɛn. Nyinɛn ninaa ne ɛfɔt ta, kuus ɛn ibɔ mon ndɔ ɛtomɛ ne ɛfɔt ta, nyinɛn niluk ka te ɛn irway mon wɛwɛy.

⁹ Bees ɛn irway, yɛk ɛn irway ishwii, banga ɛn ikun. Te ishwɛ mon da teye ishwin, te irway ihwala mon da ne teye irway ishwii.

¹⁰ Laasek ɛn itso mon ɛnu ɛyisɛ ɛDaray ya, aa ne yinɛ nyini.

Sɔng i Hyɛ ɛGwaa ɛShara Nang

¹¹ Nigwaa en, sɔng ˆɛ bol ɛn ivol ne bees daa nigwaa nɛ nibhɛ so ninaa ne roos nang. Gbik ɛnyi gha ne ɛ kɛ bol ivol ne bees daa ɛgwaa ɛbhɛ gha, hang ɛ kɛ hyɛ ɛbhɛ ɛshara gha yɔɔ, ɛ kɛ ne bol ivol ne bees daa ne iMɛmɛ ɛMuusaa da, ɛ ta hyɛ imɛmɛ yɛ ɛshara. Wu ˆɛ kɛ ne bol ivol ne bees iMɛmɛ ɛMuusaa da, sɔng ˆɛ kɛ ne roos imɛmɛ yɛ nang, ˆɛ kɛ yang hyɛ imɛmɛ da ɛshara.

¹² ɛTaanggbey ya zɔng ɛbhɛ ɛ so ɛhaa ne nang ikpii da ne ɛhaa ne bol ɛshara gha. Ɛbhɛ zɔng ɛ nang iphɔrɔt da ɛ ta bunga ninyi na. Ne ˆɛ ji soyɛ ɛhay ne ˆaa hyɛ ɛnyi gha ɛshara ghaa?

Sɔng i Hal ɛGyɛy Nang

¹³ Ne ˆɛ tenes ɛn, nyinɛn no ne ˆɛ bo ɛn, “iZenge, hang ihwɛlɛ yɔɔ, njwi sɛ phɛ ɛhiha ɛgarang, njwi bhɛ shɛɛ nɛ ishay idaan, njwi bhɛ bol iza, njwi sɛ ɛco ne jam mɛ wo.”

¹⁴ Sɔng Ɛɛ yɛɛ ɛn ɛli ne iken mon sɛ so ne ihwɛlɛ wo nang. Nzo ˆɛ so ɛn te ɛbung ne ɛ tɔɔl le nten ncɛt, ɛ ji birit.

¹⁵ iPhɛ kɛ jam mɛ ˆɛ yɔng ɛn, “Wu ɛDaray kɛ sim, wu njwi so niken, njwi sɛ ne mɔn ɛhiha ne ɛhiha ɛkɔn.”

¹⁶ iPhɛ dee ˆɛ hal ɛn ɛgyɛy, ˆɛ tɔɔsek ɛn ito. iHal ɛgyɛy yɛdaa nggyɛ wo ne so kpɛɛ.

¹⁷ iPhɛ ɛlɛy, gbik ɛnyi gha ne ɛ ne yɛɛ ɛkɔn na ne ɛ kɛ jam ɛ sɛ mon no ɛ mbaray tang mɔn no, ɛ kɛ ne mɔn ɛfɔt.