ɛYakub 3 - ɛWee ne ìTsɛm iHywas

iGbaat iLem

¹ Nigwaa en, sɔng iday mon sim nibhɛ teye nikyɛɛ ne icwam ma nang, daa ɛli ne ˆɛ yɛɛ ɛn njwit to ne njwi soye nikyɛɛ ne icwam ma, sɛ bol njwii ɛshara gha ne ihwet i phyin ɛbyin ninyi na.

² Njwɛɛn no gbik i ibenes gbom. ɛNyi gha ne ɛ sang ben ndɔ ne ivol ɛbhɛ da ne ɛ so hyɔrɔ, ɛɛ ne ta yɛɛ ne boos ibek de ɛbhɛ byirik.

³ Njwɛɛn i yɛk inantse de ne igyɔs de te ihywɛ roos njwɛɛn nɛ. Ɛlɛy ne njwɛɛn yaa ne phɛ ne ihywɛ ɛlɔ gha njwɛɛn i sim.

⁴ Yung yaang ɛn ɛgyirigyi inɛn na dɔng. Gbik ɛli ne ɛ so ɛgbaang ngɛ wo ɛgbaang ne igbil lo i ne hyel ne ɛbhɛ wo, ɛhyohyon ɛshɛɛrɛng ne ɛhaa ne hɔ yɛ i ne bo ɛ hyere ne ɛbhɛ ɛlɔ gha ne ɛ sim te ɛ sɛ phɛ.

⁵ ɛLɛy ne ilem be ne ma so. Gbik ɛli ne iphɛ so ncɛt ndɔ nilɔ ne ibek ɛnyi gha, iphɛ i ne hal ɛgyɛy daa ne igbaang nikɔn ne iphɛ sɛ yɛɛ ne mɔn. Yaang ɛn ɛli ne ɛphyuphyut ne igboo gha sɛ yɛɛ ne re ɛgbaang ɛhay yo!

⁶ iLem ɛnyi de ne so te igboo. iPhɛ soye ɛzay ne ibebhe ndɔ ne ibek njwɛɛn de! iLem be i yɛɛ ne bees ɛnyi gha gbik. iPhɛ i yɛɛ ne te irway ɛnyi da gbik phele ifɛ bees ishwɛɛ ɛbhɛ. Sɛ ne ma wɔɔ ilem be ne ito ne iphɛ ne igboo wo ne ifɛ le ne ijwee ne igboo wo.

⁷ ɛTen ɛsii gha i yɛɛ ne hyep inyam be ihywee-ihywee, ɛɛ ma yung ku hyep ᐩinyam ɛhay, nɛ ninon, ne ᐩizɔ nɛ nikɔn ne hyel ne ibuu, ne ᐩizing nɛ nikɔn nɛ nibhɛ so ndɔ ɛling.

⁸ Sɔng ɛnyi i ne yɛɛ ne gbaat ilem be nang. iPhɛ so ɛbebhe ɛkɔn ne ɛ sang kyinak ɛlɔ ɛdaan, iphɛ so hyɔrɔ ne irɔ ne ifɛ bees nilɔ gbarang.

⁹ Ne ilem be ne njwɛɛn i dɛp ɛDaray njwɛɛn na nɛ gbik ne ɛTaa gha. iLem be ne njwɛɛn i ne ta towos nɛ ninyi na ne kɛ ryɔng nibhɛ ɛli ne ɛTaanggbey ya so wo.

¹⁰ Ne ɛnu gha ne i dɛp mɛ, ne ɛbhɛ ne i ne ta towos nɛ. Aa! Nigwaa en, sɔng iphɛ kɛ jam mɛ ɛlɛ wo nang.

¹¹ ˆƐ kɛ ku yaang ɛn ɛyek ɛdaan nɛ bok inɛn inyɛnɛng ne inɛn raghatak bɛ?

¹² Nigwaa en, ɛpharang sɛ yɛɛ ne yɛk ifaa bɛ? ɛHon ɛnap sɛ ne yɛɛ ne yɛk ikpam ɛpharang bɛ? ɛLɛy, sɔng ɛyek inɛn ne mpɛ bok ngkal i ne yɛɛ ne nang inɛn inyɛnɛng nang.

iNtsɛntsɛng ne iTin Nɛ

¹³ ɛHay ɛbhɛ bok ntsɛntsɛng gbik ne ishweng ndɔ mon noo? Te ne ɛ tɔɔrek iphɛ daa ne ishwɛɛ iywɛnɛng gbik nɛ nitomɛ niyɛnɛng ne ɛ mɔn ne irway ilyaak ne i sɛ lenɛ ne ntsɛntsɛng ngge.

¹⁴ Wu ˆɛ boos ɛn ɛnkyis sa ne sim ito de ndɔ ne irway mon da, sɔng ne ˆɛ hal ɛn ɛggyɛy wu ˆɛ so ɛn ninyi ne ntsɛntsɛng nang. Wu ˆɛ kɛ mɔn ɛlɛ wo, ˆɛ kɛ ne hyere ɛn itin de iphɛ kɛ teye irywɛɛk.

¹⁵ Sɔng ihywee ne ntsɛntsɛng ngɛdee wo so ihywee ne izee ne ihywɛ le daa ne irywa nang, ihywɛ yang so izee ɛzay. Sɔng ihywɛ ne ta so izee ne ikabyik nang, ihywɛ so izee niphoo.

¹⁶ Gbik ɛlɔ gha ne ɛnkyis sa ne sim ito de sonɛ wo, ishisim ihywee-ihywee gbik ne ibebhe yaa ne ma sonɛ ɛlɔ yɛ.

¹⁷ Ntsɛntsɛng ngge ne ihywɛ ne le ɛlɔ ɛTaanggbey ya nang, idee ɛyisɛ yɛ, ihywɛ so wɛwɛy, ihywɛ i ne yɛɛs ne shɛɛ ncaang, ihywɛ bok ihywɛɛ, ihywɛ so lyaak, ihywɛ bok isan iyɔm, ihywɛ bok izɛɛng, sɔng ihywɛ i tɔɔrek sim ito nang, sɔng ihywɛ ne bok iluk nang.

¹⁸ I sɛ ninyi na kɛ shɛɛ ncaang nibhɛ tup ncaang, nibhɛ ne pha icik.