ɛYakub 2 - ɛWee ne ìTsɛm iHywas

Kɛ Nep iBol ne Sim iTo

¹ Nigwaa nge, daa ɛli ne ˆɛ kɛ nang ɛn ne itin nɛ ne ɛDaray njwɛɛn ɛYɛso ɛKiriti gha, ne ɛ so ɛDaray ne ito-ndiinday ya, sɔng ne ˆɛ tɔɔrek ɛn sim ito ndɔ mon no nang.

² Te yɔngɔ ɛdɛ ɛnyi gha kɛ lel ne itɔɔy mon de ne ɛ kɛ sɔɔl le isu ne izinariya ne itsura ne izel, ɛdɛ ɛnyi ɛhala gha ne ma lel ɛ kɛ sɔɔl le ᐩishɛrɛp ne itsura.

³ Wu ˆɛ kɛ ne wɛɛ ɛn ɛnyi gha ne ɛ kɛ sɔɔl le itsura iywɛnɛng ngga, ˆɛ yaak ɛn ɛbhɛ, “ɛLɔ ne soos ɛyɛnɛng ngaa bɛ, soos nɛ,” ɛ ji yaak ɛn ɛnyi ɛhala gha, “Kyinak gɔɔ,” hang ˆɛ yaak ɛn ɛbhɛ, “Soos ne ivel yɔɔ,”

⁴ Kaabi ˆɛ kɛ tɔɔrek ɛn sim ito ndɔ mon no, ˆɛ ta hyɛghɛ ɛn ɛshara ne icwas ivebhe.

⁵ Phok ɛn nigwaa nge ne nzi sim, ɛDaray ya kɛ sang kasa nihala ɛzay yɛnaa wo tɛ nibhɛ teye ninaa ne iryat ndɔ ne ìnang ne itin ne i? Nibhɛ bhɛ sang soye ninaa nɛ nibhɛ sɛ re isha ne igbɔm ba ne ɛ kɛ ku sim-mɛ daa ninaa nɛ nibhɛ i sim ɛbhɛ woo?

⁶ iPhɛ dee ɛ ne bɛɛs ɛn nihala na! Nzi bo ninaa ne iryat ta bhɛ yɛbhɛsek nyini wo nang? Nzi bo nibhɛ bhɛ hɔ nyini bhɛ phɛɛset nɛ ne icwam ɛshara wo nang?

⁷ Nzi bo nibhɛ bhɛ ta bol ivol ne bɛɛs da daa ne irywɛɛk iywɛnɛng ngo ne i yɛɛ nyini ne nɛ wo nang?

⁸ Wu ˆɛ kɛ ne ɛ roos ɛn iMɛmɛ ne igbɔm ɛTaanggbey da ne kɛ haa ndɔ ɛWee ne iBol ɛTaanggbey de i bo, “Sim ɛhaa ɛcɛcɛk mo gha ɛli ne ɛ sim ito mo,” ˆɛ kɛ ne mɔn ɛn ɛkɔn ɛyɛnɛng.

⁹ Wu ˆɛɛ ne tɔɔsel ɛn sim ito da, ˆɛɛ ne mɔn ɛn ɛfɔt. iMɛmɛ ɛMuusaa da kɛ ne re nyini te ɛhaa ne ɛ kɛ te ɛshara tsaan.

¹⁰ Gbik ɛnyi gha ne ɛ kɛ roos iMɛmɛ ɛMuusaa da gbyak ne ɛ kyii te idaan tsaan, ɛ kɛ ne te ifɛ tsaan gbik.

¹¹ ɛTaanggbey ya ɛbhɛ ɛ kɛ yɔngɔ, “Sɔng ˆɛ ra nzangas sang,” ɛ ta yɔngɔ, “Sɔng ˆɛ phoo ɛnyi nang.” Wu ˆɛ kɛ ne sang ra nzangas de, ˆɛ ji phoo ɛnyi gha, ˆɛ kɛ ne teye ɛhaa ne te iMɛmɛ ɛMuusaa da tsaan.

¹² iPhɛ ɛlɛy bol ɛn ivol mon da, ˆɛ ta mɔn ɛn ɛtomɛ mon ɛli ne iphɛ yaa tɔɔrek wu ˆɛ so ɛn ninyi ne sɛ bol nibhɛ ɛshara daa ne ikpii da ne ifɛ i nang ninyi ishwɛɛ ne ito nibhɛ.

¹³ Daa ɛli ne nten ne bol ɛshara de, sɔng ɛTaanggbey ya sɛ ne san iyɔm ɛnyi gha ne ɛ kɛ sang san iyɔm ɛbyin ninyi na nang. iSan iyɔm be sɛ ne yang re ɛwɛng daa ne hyɛ ɛshara gha.

ìNang ne iTin de Tang Nitomɛ na so Buu

¹⁴ Nigwaa en, wu ɛdɛ ɛnyi gha kɛ yɔng wu i bok ìnang ne itin de nitomɛ na ne ɛ mɔn no sang kyii tɔɔrek ɛlɛy, iyɛnɛng ngɛ ne so ɛbii? iHywee ne ìnang ne itin nɛdee wo sɛ yɛɛ ne phɔt ɛbhɛ?

¹⁵ Te ten-nɛ yɔng wu ɛdɛ ɛgwaa gha ɛras sɛ, hang ɛkuk kɛ yɔɔ sang ɛtura ɛ ta sang ire.

¹⁶ ɛDɛng ndɔ mon no ne ji yaak ɛbhɛ, “Cwi ɛn ncaang, te ɛTaanggbey nang nyini itsura da ne ire de,” ɛ sang nang nibhɛ itsura da ne ire de, iyɛnɛng ngɛ ne ji so ɛbii?

¹⁷ Ɛlɛy ne ìnang ne itin de ne iphɛ sang tɔɔrek ghe ndɔ nitomɛ na ne so, iphɛ soye ikom mɛ.

¹⁸ ɛDɛng sɛ yɛɛ ne yɔngɔ, “iGyɛ wo ɛ bok ìnang ne itin de, mee wo ne ma n bok nitomɛ.” Nzi ne bo, tɔɔrek me ìnang ne itin mo de tang nitomɛ na, naa ne tɔɔrek kɛ ìnang ne itin nge de lenɛ nɛ nitomɛ nge na.

¹⁹ ˆƐ kɛ nang ne itin nɛ wu ɛTaanggbey ɛdaan ɛbhɛ ɛ sonɛ. iPhɛ kɛ ne jam mɛ. Nzo niphoo kɛ ne ma nang ne itin nɛ ɛlɛy ne mang, nibhɛ ne kyi ta bok ɛnik, nibhɛ kparat.

²⁰ iGyɛ niwamang ngo, ˆɛ sim te sɛ ji ta tɔɔrek kɛ wu ìnang ne itin de tang nitomɛ na so buu woo?

²¹ Kaa sɛ ɛli ne ɛkyɛɛ-ɛkyɛɛ njwɛɛn ɛBaraying nga kɛ bo ɛngɔn ɛbhɛ ɛShaaku ye ɛ hap ne itsanga de, nzi bo wu ɛtomɛ ɛbhɛ gha ɛbhɛ kaa tɔɔrek wu ɛ soye ɛnyi cik ka nang?

²² Yaang ɛn. ìNang ne itin ɛbhɛ de gbik nɛ nitomɛ ɛbhɛ na kaa ku hyel kancɛng, ìnang ne itin ɛbhɛ de ne shwaak ghe lenɛ nɛ nitomɛ ɛbhɛ na.

²³ ɛBɛ wo ne kɛ ne shwaak ɛWee ne iBol ɛTaanggbey yo ne iphɛ bo, “Daa ɛli ne ɛBaraying nga kaa nang ne itin nɛ ne ɛTaanggbey, ɛTaanggbey ya ne say ɛbhɛ wu ɛ so cik.” iPhɛ ne te i yel-le ɛbhɛ ɛtaay ɛTaanggbey.

²⁴ Ne ˆɛ yaang ɛn, i lenɛ nɛ nitomɛ ɛnyi na, ɛTaanggbey ya ne say ɛbhɛ wu ɛ so cik, sɔng i lenɛ ne ìnang ne itin zɔng nang.

²⁵ Ɛlɛy ne phɛ kaa te ne ɛRahaba ne ɛ kaa so ɛkuk ne re shwaa. Kaa say ɛbhɛ wo ɛ so cik ɛnu ɛyisɛ ɛTaanggbey ya lenɛ ne ɛtomɛ ɛbhɛ ne ɛ kaa mɔn nten de ne ɛ kaa nang ninaa ne ta ɛduk ka ɛlɔ ne ra gha ɛ ta phyik nibhɛ nibhɛ roos ɛnkiinɛ ɛhak ko nibhɛ phɔt en no.

²⁶ iPhɛ ɛlɛy, ɛli ne ibek ge ne iphɛ sang ikabyik ge so ikom be, ɛlɛy ne ìnang ne itin de ne iphɛ sang nitomɛ na ne ma so ikom.