ɛYakub 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛYakub, ɛkpuru ɛTaanggbey gbik ne ɛhaa ɛDaray ɛYɛso ɛKiriti. Ɛbhɛ phɛɛs ɛlɔ ninyi ɛTaanggbey ne kɛ te shwaa ndɔ ne igbagha ɛzay yo gbik ko te itaang ɛnduwubɔ ne iphɛ ifaa niSɛrɛla de. Nzi kyiisi nyini gbom.

ìNang ne iTin Gbik ne Ntsɛntsɛng

² Nigwaa en, bo ɛn nggbang ngga ne ˆɛ sɔ ɛn ihywee-ihywee de te mpɛ teye ɛkɔn ne irway ihwala,

³ daa ɛli ne ˆɛ yɛɛ ɛn nggbang ngga i tɛrɛk ìnang ne itin mon, mpɛ ne te nyini ˆɛ rop ɛn iku.

⁴ Te irop iku de ne mɔn ɛtomɛ ndɔ mon, te ˆɛ hɔn ɛn, ˆɛ te ɛn hyɔrɔ ˆɛ sang wɔs ɛn ɛkɔn.

⁵ Wu ɛdɛ mon ne sang ntsɛntsɛng, te ne ɛ roo ɛTaanggbey ye ne ɛbhɛ ɛ so ɛhaa ne nang izɛɛng ngge walala tang kyii bol ivol ne ɛdak kɛ, ɛTaanggbey ya yaa ne nang ɛbhɛ.

⁶ Wu ˆaa ne roo wo, iphɛ ne so nggbinggbing ˆɛ nang ne itin nɛ, sɔng ˆɛ to irway nang. Daa ɛli ne ɛhaa ne to irway da so te igbugbung inɛn ɛling ne igbil i banas, ifɛ i hyeem nilɔ na gbik.

⁷ Sɔng ihywee ɛnyi yɛ de wo ne yɛk ne irway wu yaa sɛ ɛkɔn ɛlɔ ɛDaray ya nang,

⁸ daa ɛli ne ɛ bok irway ifaa, sɔng ɛ kɛ tek ihywɛɛ ɛbhɛ ɛlɔ ɛdaan ndɔ nikɔn na ne ɛ mɔn no nang.

iHala Gbik ne iRyat

⁹ Te ɛgwaa gha ne ɛ so ɛhaa ne roos sa ɛ so ɛhala gha tɔɔrek irway ihwala, daa ɛli ne ɛ ɛTaanggbey kɛ yinɛ ɛbhɛ.

¹⁰ ɛLɛy ne ɛhaa ne roos sa ne ɛ bok iryat de, te ne ɛ ma yɛk irway ihwala nten de ne ɛTaanggbey ya kɛ tɔmɔsek ɛbhɛ wo, daa ɛli ne ɛbhɛ wo ne iryat ɛbhɛ de yaa phee te nggbay ne idik.

¹¹ I sɛ iroy de kɛ wuru iphɛ i rarat iphɛ ne te idik ge howo nggbay yɛ teye kokok iyɛnɛng ngɛ taal le. Ɛlɛy nɛ ɛhaa ne iryat ta sɛ ne ma te ndɔ ne ɛgban ɛbhɛ da.

Nggbang ne iTɛrɛk

¹² ɛHaa ɛwɛng nga nggyɛ ne ɛ kɛ rop iku ndɔ ne itɛɛsek ga, daa ɛli ne yaa sɛ ɛ kɛ kyinak gɛy ndɔ ne itɛɛsek ga, ɛ sɛ ne say ɛkɔn ne ito ne igbɔm ne iken ne ɛTaanggbey ya kaa ku sim-mɛ aa nang ninaa nɛ nibhɛ sim ɛbhɛ wo.

¹³ Wu itɛrɛk ga kɛ sɛ ɛnyi gha, sɔng ne ɛ yɔngɔ wu ɛTaanggbey ɛbhɛ kɛ tɛrɛk ɛbhɛ nang. Daa ɛli ne sɔng ɛTaanggbey ya i tɛrɛk ɛnyi ne ibebhe nang, sɔng i ne ma yɛɛ ne tɛrɛk ɛbhɛ nang.

¹⁴ ɛNyi gha i ne lel ndɔ ne itɛrɛk ga nten de ne ihyop igywebhe ɛbhɛ kɛ luk ɛbhɛ ihywɛ hɔ ɛbhɛ.

¹⁵ I ne sɛ ihyop igywebhe de kɛ say isik, ihywɛ ne yɛk ɛfɔt. Ne sɛ ɛfɔt to kɛ hɔn, ɛbhɛ ne yɛk iku.

¹⁶ Nigwaa nge ne nzi sim, sɔng ˆɛ sim ɛn luk nyini nang.

¹⁷ Gbik ɛdɛ ɛkɔn ɛyɛnɛng hyɔrɔ gha ne kɛ nang ɛ le daa ne irywa. Ɛ le ɛlɔ ɛTaanggbey ne ɛ so ɛTaa, ɛhaa ne ɛbhɛ ɛ kɛ ryɔng iroy, ne ifɛl gbik nɛ niyuyɔrɔ nɛ nibhɛ soye iwɛwɛy daa ne irywa. ɛHaa ne hame ɛ sunuuy, ɛ sang hyeeme te ɛlɔ ɛsirim.

¹⁸ Kɛ lenɛ ne icwas ɛTaanggbey da, ne nang njwɛɛn iken lenɛ ne ibol ɛbhɛ ne iphɛ so itin nɛ, te njwɛɛn teye ninaa ɛyisɛ yɛ ndɔ nikɔn na ne kɛ ryɔng ngo.

Te Tenes te Mɔn ne ɛTomɛ

¹⁹ Nigwaa nge ne nzi sim, seng ɛn ɛlɛ, te ɛrɔngɔ so cwacwat ne tenes ivol da, sɔng ne ɛ so hywarat ne boote nang. Sɔng ne ɛ ta so hywarat ne te njenjek nang.

²⁰ Daa ɛli ne sɔng njenjek ɛnyi de i te ɛbhɛ ɛ mɔn ɛkɔn ɛcik ka ne ɛTaanggbey ya i sim mo nang.

²¹ iPhɛ ɛlɛy, ne ˆɛ hana ɛn ishwɛɛ ne ishis da ne ibebhe de gbik. Te ɛ say ɛn ibol de ne kɛ tup ndɔ ne irway mon da ne irway lyaak. iBol de ne iphɛ i yɛɛ ne phɔt nyini wo.

²² Te ɛn nyini ninaa ne mɔn ɛtomɛ ne ibol ɛTaanggbey de, sɔng ninaa ne tenes sɛ zɔng ngo nang, daa ɛli ne ˆaa yung luk ɛn ito mon.

²³ Gbik ɛnyi gha ne ɛ tenes ibol ɛTaanggbey de zɔng ngo, ɛ sang kyii mɔn ɛtomɛ gha ne iphɛ wo, ne ɛ so te ɛnyi ne ɛ wɛɛ ɛyisɛ ɛbhɛ ɛmɔdɔbi.

²⁴ ɛTsim mɛ ɛ kɛ wɛɛ ɛyisɛ ɛbhɛ gha ɛmɔdɔbi gha ɛ kɛ shompeey, ne ɛ shii te bap ɛli ne ɛyisɛ ɛbhɛ gha so.

²⁵ ɛNyi gha ne ɛ kɛ kyii ne ihywɛɛ ɛbhɛ de daa ne phɛl imɛmɛ yɛdaa wo ne ifɛ so hyɔrɔ wo, ifɛ i nang ɛnyi gha ishwɛɛ ne ito ɛbhɛ da, yaa ne sit ɛbhɛ ne ɛwɛng daa nikɔn na ne ɛ mɔn no. Yaa sit ɛbhɛ ne ɛwɛng nga wu ɛ kɛ sang teye ɛhaa ne phok zɔng ɛ tenɛ bap, ɛ yang kyii teye ɛhaa ne ɛ kɛ yɛk ne ito ndɔ ne mɔn ɛtomɛ ne iphɛ.

²⁶ Wu ɛdɛ ɛnyi gha i wɛɛ te ɛ so ɛhaa ne roos ɛTaanggbey ye byirik ɛ kyi sang wum ɛnu ɛbhɛ, ɛ ne luk ito ɛbhɛ, iroos ɛbhɛ da ne so buu.

²⁷ iRoos da ne ɛTaanggbey ya ne ɛ so ɛTaa gha kɛ say wu ifɛ so itin nɛ wo ne kɛ ta tul kang ngo so ɛlɛ: te i wɛɛ nicwɛɛn nɛ nikusang ndɔ ne nggbang nɛ nibhɛ i sɔ, te ɛnyi yɛ ne tul ito ɛbhɛ ndɔ ne ishwɛɛ ivebhe ɛzay da.