ɛMarakus 7 - ɛWee ne ìTsɛm iHywas

iKpii ne niKyɛɛ-niKyɛɛ niYahodawa

¹ niFarisawa na nɛ nidɛng ninaa ne kpɛl ɛShara gha ne le ne iYɛrushɛlɛm nibhɛ bhɛ tumɛy ɛlɔ ɛYɛso gha.

² Nibhɛ ne yaang nidɛng ninɔn ne icwam ɛYɛso na kɛ yaa re ire ne “ibɔ kpɔk,” sɔng nibhɛ kɛ kuus ibɔ nibhɛ de ɛli ne ikpii niYahodawa da i bo tee mon no nang.

³ (niFarisawa na gbik nɛ niYahodawa na kaa i roos ikpii nikyɛɛ-nikyɛɛ nibhɛ. Sɔng nibhɛ kaa i re ire tang kuus ibɔ ɛli ne ikpii nibhɛ ba i bol lo nang.

⁴ Wu nibhɛ kɛ bhɛ kyii ɛtungga, nibhɛ yaa ne kuus en nyɛɛn nibhɛ kyi re ire. Nibhɛ ne ta bok ikpii ne kuus nikyɛɛrɛng ne irwon gbik ne itsus dɔng.)

⁵ iPhɛ ɛlɛy niFarisawa na nɛ ninaa ne kpɛl ɛShara na ne yaak ɛYɛso yegha, “iKyee iphɛ kɛ te ninɔn ne icwam mo na sang roos ikpii nikyɛɛ-nikyɛɛ njwɛɛn daa? Nibhɛ i re ire tang nibhɛ te ibɔ nibhɛ wɛwɛy.”

⁶ ɛYɛso gha ne kyii nɛ ɛ yaak nibhɛ, “Nyinɛn niluk en, ibol ɛNɛbi ɛShaa de so itin nɛ ne ɛ kaa haa ɛ bo, ɛTaanggbey ya bo, ‘Ninyi yɛnaa wo i naas me ne ndiinday de ne ɛnu zɔng, irway nibhɛ da ne so kyaam ne mee.

⁷ Nibhɛ re me ntsong ngga buu. Nibhɛ mɛmɛ ne ikpii niten nisii, nibhɛ ne ji yɔngɔ wu ibol ɛTaanggbey.

⁸ Ɛ kɛ tek ɛn ibol ɛTaanggbey de ɛ kɛ yaa roos ɛn idee niten nisii.’ ”

⁹ Ne ɛ yaak nibhɛ, “Ɛ kɛ ji seng ɛn ntsɛntsɛng ne tek ibol ɛTaanggbey de ɛ roos ɛn idee mon de nang!

¹⁰ ɛMuusaa gha kaa yaak nyini, ‘Nang ɛkyɛɛ mo ne ɛgyinɛ mo ne ndiinday. ɛHiha ɛnyi ne ɛ kɛ toke ɛkyɛɛ gbik ne ɛgyinɛ yaa ne phoo ɛbhɛ.’

¹¹ ˆƐ kɛ ne yaa tɔng ɛn ninyi na ɛ bo ɛn wu ɛnyi sɛ bok ɛkɔn na ne ɛ sɛ phyik ɛkyɛɛ gbik ne ɛgyinɛ nɛ ɛ ji yɔng wu ɛkɔn negha nggyɛ wo soye ‘iKuban’ (kaabi i bo wu i kɛ tek ɛTaanggbey ye nɛ),

¹² yaa ne tek ɛbhɛ nɛ, sɔng iphɛ ne tɔ nggbinggbing ɛ phyik ɛkyɛɛ gha ne ɛgyinɛ gha nang.

¹³ Ɛlɛy ne ibol mon de ne ɛ mɛmɛ ɛn ninyi na nɛ wo kɛ ne te ibol ɛTaanggbey de te buu. Ɛbyin nikɔn na ne ta sonɛ gbom ne ɛ mɔn ɛn nibhɛ ɛlɛ wo.”

Nikɔn na nɛ Nibhɛ nang ɛNyi gha iVebhe Ba

¹⁴ ɛYɛso gha ne ta yel-le idira ninyi de ɛ yaak nibhɛ, “Tenes ɛn mɛɛn ncɛncɛng.

¹⁵ Sɔng ɛkɔn na ne ɛnyi gha kɛ re wo ɛbhɛ te ɛbhɛ ɛ te kpɛɛ wo nang. Yang so izɔlɔs ne irway ɛnyi ba ifɛ tɔɔsel ibebhe ɛbhɛ de.

¹⁶ iPhɛ ɛlɛy yang ɛhaa ne ɛ bok itoro ne tenes te ne ɛ phok.”

¹⁷ Kɛ ne sɛ ɛli nɛ niYɛso yena kɛ tek ninyi na nibhɛ bhɛ lel en nɛ ninɔn ne icwam ɛbhɛ na nang, ninɔn ne icwam ma ne yaak ɛYɛso yegha wu te ɛ kpɛl en ibol ne igɔrɔp be ne ɛ kɛɛ tɔng ngo.

¹⁸ ɛYɛso gha ne kyii nibhɛ nɛ ɛ yɔngɔ, “Ɛ ma tɔ ɛn tang seng ɛn naa? Sɔng ivebhe da i lel ndɔ ɛnyi daa ne ire de ne ɛ kɛ re wo nang.

¹⁹ Sɔng ire de i phɛ ndɔ ne ikok ɛnyi nang. iPhɛ yang bhɛ lel ndɔ ne iphul ɛnyi de. iPhɛ ne kyi ta bhɛ phee iphɛ bhɛ wuru ne ibek ɛnyi de dɔng.” (iBol lɛdee wo ne ɛYɛso gha kɛ bol lo kɛ tɔɔl wu hang idɛ ire de sɛ nang ɛnyi ivebhe).

²⁰ Ne ɛ re ɛnu ɛyisɛ ɛ yaak nibhɛ, “iCwas ɛnyi ba ne ifɛ wuusi ɛnu ɛbhɛ gha ifɛ ifɛ i bees ɛbhɛ ɛnu ɛyisɛ ɛTaanggbey ya.

²¹ Ndɔ ne ikok ɛnyi de ne icwas ivebhe ba le ifɛ wuru. iCwas ne nzangas, ɛyi, irway ne phoo ɛnyi, tɔk nikuk,

²² sim ito, boos ɛnyi ne irway, iluk, ihyop, irisɛ, irywɛɛk, tɔɔsek ito, gbik ne irway iwamang.

²³ Nikɔn nɛnaa wo nibhɛ wuusi ndɔ ne ikok ɛnyi de, nibhɛ ne ji nang ɛbhɛ ivebhe ba.”

iTin ne iBol ɛKuk ne Hame ɛ So ɛDaan ndɔ niYahodawa

²⁴ ɛTsim mɛ ɛlɛy, ɛYɛso gha ne bo nikɔn ɛnggyɛ wo ɛ phɛ ɛdɛ ɛlɔ gha ne ɛ so cɛcɛk ne ɛgarang ne iTaya. Ne ɛbhɛ lel ndɔ ne de ijwee wo sɔng ne ɛ sim tɛ ninyi na sɛ seng ɛ sonɛ nang gbik ne iphɛ ɛlɛy, ibol lɛ ne ta shii shwalat.

²⁵ ɛDɛ ɛKuk ka ne ɛlap ɛbhɛ bok niphoo ne ma phok ibol lɛ. ɛKuk kɛghaa nggyɛ ne phɛ ɛbhɛ ho ɛYɛso yegha ɛnu ɛyisɛ, nggbuk.

²⁶ Sɔng ɛkuk kɛghaa nggyɛ kaa ne so ɛdaan ndɔ niYahodawa na nang. Ɛ kaa so ɛhaa ne ivel ne iGirik, nikyɛɛ na kaa ne yɛk ɛbhɛ ɛgarang ne iFinikiya ndɔ ne ivel ne iSiriya. ɛKuk ka ne roo ne ɛYɛso gha wu te ɛ tul niphoo na nɛ nibhɛ so ndɔ ɛlap pa.

²⁷ ɛYɛso gha ne kyii ɛbhɛ nɛ ndɔ ne ibol ne igɔrɔp ɛ yaak ɛbhɛ, “Kyi shɛɛ gɔɔ nyɛɛn tɛ ninɔn ne ijwee na kyi sighi. Sɔng iphɛ kɛ jam mɛ i bo ire ninɔn de i nang nibabu na nang.”

²⁸ ɛKuk ka ne kyii nɛ ɛ yaak ɛYɛso yegha, “ɛKyɛɛ ɛlɛy ne iphɛ so. Gbik ne iphɛ ɛlɛy nibabu na ne laal ndɔ ne iphanta ninɔn de nibhɛ tang ntsɛk ne ire de.”

²⁹ ɛYɛso gha ne yaak ɛkuk ka, “Daa ne ibol lɛdee wo ne ɛ kɛ kyii me nɛ wo, kyii ɛ hyil lɛ, niphoo na kɛ wuru ndɔ ɛlap mo gha.”

³⁰ Kɛ ne sɛ ɛkuk kɛghaa nggyɛ wo kɛ kyii gɔɔ ne ijwee nang, ne ɛbhɛ sɛ ɛngɔn ɛbhɛ gha kɛ laal ɛlɔ ne laal, niphoo na kɛ wuru ndɔ ɛbhɛ wo ɛtsak.

ɛYɛso gha kɛ te ɛRwan ne ɛ ta so ɛNkpɔy ɛKen

³¹ ɛYɛso gha ne ta tek ɛgarang ne iTaya gha, ɛ kyii ɛ roos ndɔ ɛgarang ne iSidɔn ɛ phɛ ɛLing ne iGalili, ɛ ji bhɛ hɔn ivel ba ne i bok ifɛ nigarang ɛnduwubɔ na.

³² ɛNggyɛ wo nang, nidɛng ninyi na ne yɛɛs ɛbhɛ ne ɛdɛ ɛnyi gha ne ɛ so ɛrwan ɛ ta so ɛnkpɔy. Nibhɛ ne roo ɛYɛso yegha wu te ɛ dat ɛbhɛ ne iwɔ, wu aa te ɛken.

³³ ɛYɛso gha ne wum ɛnyi gha ɛ shompeey yɛ gɔɔ. Ɛ sɔɔl ikpɛn ne ibɔ ɛbhɛ ndɔ ne itoro ɛnyi de. Ne ɛ phyim ncwincway ne ikpɛn ne ibɔ ɛbhɛ, ɛ dad ɛnyi gha ne ilem,

³⁴ ne ɛ ji waal ito ɛ yɛɛn ɛdaa ne irywa. Ɛ hɔwɔ ifɔng gbom, ne ɛ ji ɛ yɔngɔ, “iFata!” Kaabi ɛ bo, “Phaal lɛ!”

³⁵ iToro ɛnyi de ne shii phaal le, ivol ɛbhɛ ba ne bhɛ kyii, ɛ yaa bol.

³⁶ ɛYɛso gha ne kpɛng ninyi na ɛ yaak nibhɛ wu hang nibhɛ tɔng ɛnyi. Ne jung sɛ ɛ ring nibhɛ nɛ wo, nibhɛ ne jung sanga ibol lɛ.

³⁷ Ninyi na ne yaang ɛkɔn ne kparat gbom. Nibhɛ ne ji yɔngɔ, “Nikɔn ɛbhɛ na ku so niyɛnɛng ngɛ gbik. Ɛ kɛ phaasel nirwan na itoro ɛ ta phaasel ningkpɔy ye ninu.”