ɛMarakus 4 - ɛWee ne ìTsɛm iHywas

iBol ɛNyi ne Sanga iHywee

¹ ɛYɛso gha ne ta tsa ɛ yaa mɛmɛ ninyi na nɛ ɛnu ɛLing ne iGalili gha dɔng. iDira ninyi de kaa ne kat gbom nibhɛ te ɛbhɛ ɛ lel ndɔ ne ikparak ɛ tul le kyaam ndɔ inɛn ɛ soos nɛ, ninyi na ne ji sooset ɛnu ne ihywel la.

² Ne ɛ tɔng nibhɛ nikɔn na gbom ndɔ ne ivol ne igɔrɔp, ɛɛ bok nibhɛ,

³ “Tenes ɛn sak! ɛHaa ne ihwap pa kaa wuru ɛ bo ihywee ɛ phɛɛs ne sanga.

⁴ Kɛ ne sɛ ɛ sanga wo nang, izɛ́ng ne ho ne nkiinɛ. Ninon ne shii yɛɛs nibhɛ tang.

⁵ iZɛ́ng ne ho ne nkinkang. iHywɛ ne yang wuru sɔng ihywɛ ne sɛ nvel ne ihywɛ yaa see ne ilwing nang.

⁶ Kɛ ne sɛ igbey kɛ wuru, nzaratat, ihywɛ ne shii te yɔɔy, ihywɛ howo, daa ɛli ne hame ilwing nge kɛ sɛ ne ivel.

⁷ iZɛ́ng ne ho ndɔ ne itin ne itsutsɔ. iTsutsɔ ba ne hɔn gbom ifɛ nang ihywɛ ɛwil. Sɔng ihywɛ ne tang yɛk ibɔrɔk kang.

⁸ iZɛ́ng ne ji ho ndɔ ne ivel nyɛnɛng, ihywɛ ne wuru ihywɛ raras. iHywɛ yɛk ibɔrɔk gbogbom ihywɛ hɔn te ihywee de ne kaa sanga wo ɛnduwubɔ ɛtat, ne ɛnduwubɔ ɛtaraa, izɛ́ng ne ji so ikɔl idaan.”

⁹ Ne sɛ ɛYɛso gha kɛ taal ivol ɛbhɛ da ne ɛ ji yɔngɔ, “ɛNyi gha ne ɛ bok itoro ne tenes, te ne ɛ phok ibol lɛdee wo.”

ɛKɔn na ne ɛ kɛ Te ɛYɛso gha Bol ndɔ ne iGɔrɔp Ba

¹⁰ Kɛ ne sɛ ɛli nɛ niYɛso yena kɛ mak nggenggerey ndɔ nibhɛ, ninyi ɛnduwubɔ nɛ ninyi ifaa na gbik ne ɛbyin ninaa nɛ nibhɛ roos ɛbhɛ wo ne yaak ɛbhɛ wu te ɛ mɔng en ɛnting ne ibol ne igɔrɔp po.

¹¹ ɛYɛso gha ne kyii nɛ ɛ yaak nibhɛ, “Nyinɛn ne kɛ nang nyini ɛduk ne igbɔm ɛTaanggbey ya. Ninaa ne hame nibhɛ ne so ndɔ mon no nang, yaa ne i bol nɛ nibhɛ ndɔ ivol ne igɔrɔp.

¹² Kɛ haa ndɔ ne ɛWee ne iBol ɛTaanggbey yo i bo, ‘Nibhɛ yaa i wɛɛ, sɔng nibhɛ ne yaang nang. Nibhɛ yaa ne i tenes, sɔng nibhɛ ne seng nang. Wu nibhɛ seng en, nibhɛ yaa ne ji san ɛbɔk, i hana nibhɛ ne ɛfɔt nibhɛ wo!’ ”

ɛYɛso gha kɛ Kpɛl iBol ne iGɔrɔp Be

¹³ ɛYɛso gha ne ji yaak nibhɛ, “ˆƐ doo ɛn ɛkɔn na ne ibol ne igɔrɔp pɛdee wo bol lee? Wu ɛ doo ɛn no, ɛ sɛ ne ji seng ɛn ɛbyin ne ivol ba ɛlii?

¹⁴ “ɛHaa ne sanga gha i sanga ibol ɛTaanggbey.

¹⁵ iZee ne ihywɛ kɛ ne ho ne nkiinɛ wo ne so tɛ ninyi nɛ nibhɛ kɛ phok ibol ɛTaanggbey de, ɛShɛtan ne shii yɛɛs ɛ phɔt iphɛ ɛlɔ nibhɛ gha.

¹⁶ ɛLɛy ne izee ne ihywɛ kɛ ho ne nkinkang ngge. iHywɛ so tɛ ninyi nɛ nibhɛ kɛ phok ibol ɛTaanggbey de nibhɛ ne say iphɛ ne irway ihwala.

¹⁷ Sɔng ibol lɛ ne kyii lel ndɔ ne irway nibhɛ kyukyum nang. Sɔng iphɛ ne phyɔngɔle nɛ nang. iPhɛ ɛlɛy ne sɛ iku ne nggbang sɔng te sɛ nibhɛ lenɛ ne ibol lɛdee wo, nibhɛ shii hana iphɛ nibhɛ kyii ne ɛtsim.

¹⁸ iZee ne ihywɛ kɛ ne ho ndɔ ne itsutsɔ ba nang, ihywɛ ne so tɛ ninyi nɛ nibhɛ kɛ phok ibol ɛTaanggbey de nibhɛ say iphɛ,

¹⁹ nibhɛ ne kyii ta i tas icwas nikɔn nggyɔngyɔɔt ɛzay, te sim iryat, gbik nɛ ɛbyin nikɔn nɛ. Nikɔn nɛnaa nggyɛ wo ne i ring ibol ɛTaanggbey de ne hyel cik ndɔ nibhɛ wo. Sɔng nibhɛ ne yɛk ibɔrɔk kang.

²⁰ Nidɛng ninyi na ne so te ihywɛ de ne ihywɛ kɛ ho ne ivel nyɛnɛng ngga. Nibhɛ bhɛ ne soye ninaa nɛ nibhɛ kɛ phok ibol ɛTaanggbey de nibhɛ say yo. Nibhɛ ne so te ihywee de ne ihywɛ kɛ yɛk ibɔrɔk ge gbogbom mo, ihywɛ hɔn te izee de ne kaa sanga wo, nzuwubɔ icwat da, ne nzuwubɔ ɛtaraa ba, izɛ́ng ne ji so ikɔl idaan de.”

iBol ne iGboo ne iKum

²¹ ɛYɛso gha ne re ɛnu ɛyisɛ ɛ yaak nibhɛ, “Ɛ yɛk ɛn ne igboo wo ɛ kyii cwaak ɛn ndɔ ne izong naa? Hang ɛ yɛk ɛn nɛ ɛ tek ɛn ndɔ ɛtaa ne igini naa? N nzi bo ɛ yɛk ɛn nɛ ɛ tek ɛn daa ɛkɔn te ifɛ ne i tol.

²² ɛKɔn na ne kaa rɛɛ wo, yaa ne tul ɛbhɛ. ɛDɛ ɛkɔn na ne kaa ne cwaal ɛbhɛ wo yaa ne phaal ɛbhɛ.

²³ ɛNyi gha ne ɛ bok itoro ne tenes, te ne ɛ phok.”

²⁴ Ne ɛ ta yaak nibhɛ, “Tenes ɛn nikɔn na ne ɛ phok ɛn no yɛnɛng. ɛGyuuru gha ne ɛ kɛ nang ɛn nɛ, ɛbhɛ ne sɛ ne ma nang nyini nɛ ne hante nyini nɛ.

²⁵ ɛNyi gha ne ɛ bok ɛkɔn na sɛ ne hante ɛbhɛ nɛ, ɛhaa ne ɛ sang sɛ ne phɔt ɛkyiikyɔnɔ gha ne ɛ ku bok ko tek ɛbhɛ buu.”

iBol ne iRe ne iPhɛ i Raras

²⁶ ɛYɛso gha ne yaak nibhɛ, “iBol ne iGbɔm ɛTaanggbey de ne so te ihywee ne ɛnyi kɛ bhɛ sanga ɛhay.

²⁷ Kɛ ne sɛ ɛnyi yɛghaa nggyɛ wo kɛ bhɛ sanga ihywee ɛbhɛ de nang, ne ɛ kyii ɛbhɛ soos se. Nituk ka ne maa phebhe, ihywee de ne phyii wuru ihywɛ ne i raras. Sɔng ɛnyi gha ne yɛɛ ɛli ne ihywɛ de raras so nang.

²⁸ Nvel nyɛnɛng mpɛ nang ire de ishwal iphɛ hɔn no. iPhɛ tsa iphɛ wuru, iphɛ ne teye ibee, iphɛ ne mɔɔng iphɛ yɛk nggbay. iPhɛ ne ji taal iphɛ tul ibɔrɔk.

²⁹ Yaa ne sɛ ire de kɛ bel nang, ɛnyi gha ne bhɛ pha ire ɛbhɛ de, daa ɛli ne nten ne pha yɛ iphɛ kɛ tuu.”

iBol ne iTsara ne iMɔsita

³⁰ ɛYɛso gha ne ta yɔngɔ, “Yaa ne ta ten igbɔm ɛTaanggbey ba ne kyee daa mɛɛ? Yang ibol ne yaa ne ten iphɛ nɛ dɔng daa mɛɛ?

³¹ iPhɛ ne so te itsara ne iMɔsita. iTsara ne iMɔsita de ihywɛ kɛ taasek ihywɛ shɛs gbik ndɔ ne ihywee de nɛ ninyi na tubhus so.

³² Gbik ne iphɛ ɛlɛy, i ne sɛ kɛ tup po nang, ihywɛ ne hɔn, ihywee phyin ɛbyin ne ivee da gbik. Ninon ne yaa ryɔng niryee nɛ ne ilaak kɛ.”

³³ ɛYɛso gha kaa ne tɔng ninyi na ibol ɛTaanggbey de ndɔ ne ivol ne igɔrɔp ba gbom, ɛli nɛ nibhɛ yaa ne seng iphɛ wɛwɛy.

³⁴ Wɛlɛng idɛ bol de ne ɛYɛso gha kaa sang tɔng ninyi na ndɔ ne igɔrɔp ba. Yaa ne ji sɛ nibhɛ kɛ bhɛ mak nɛ ninɔn ne icwam ɛbhɛ na nang, ne ɛ ji kpɛl nibhɛ ibol lɛ.

ɛYɛso gha kɛ Boote ne ɛGbaang ne iGbil

³⁵ Kɛ ne sɛ ɛlɔ yɛ yɛɛs ne te ywii ɛtuk kɛghaa nggyɛ wo nang, ɛYɛso gha ne yaak ninɔn ne icwam ɛbhɛ na, “Njwɛɛn te berey te phɛ ne ihwak ikpang ɛrenes so.”

³⁶ iPhɛ ɛlɛy yang, nibhɛ ne tek ninyi na nibhɛ lel ndɔ ne ikparak ko ne ɛYɛso gha ku sonɛ wo nibhɛ bo nikɔn, nibhɛ yaa hyel ndɔ ɛrenes sa. iHwak ikparak kaa ne maa kungus niYɛso yena.

³⁷ Kɛ ne sɛ nibhɛ so ndɔ ne ihywel ba nang, ɛdɛ gbaang ne igbil lo ne shii wuru, ifɛ ne yaa subhus inɛn ba gbom. Mpɛ ne yaa leesel ndɔ ne ɛkparak ko nɛ niYɛso yena sonɛ nɛ ndɔ yɛwo. ɛKparak ko ne yaa mɔn te ɛbhɛ yaa rene.

³⁸ Ɛlɛy ɛYɛso gha bhɛ so kɔrɔ ɛtsim ne ikparak ka ɛ kɛ teye nggbɛɛ, ɛ tek ito ɛbhɛ daa ɛkɔn ne tek ito, ɛ wumus nwa. Ninɔn ne icwam ɛbhɛ na ne bhɛ seme ɛbhɛ nibhɛ ne yaak ɛbhɛ, “ɛKyɛɛ, sɔng ɛ sap ɛli ne njwɛɛn yaa rene en ndɔ inɛn da nang nge?”

³⁹ ɛYɛso gha ne yilitsik, ɛ sit igbil lo ne ɛbung, ne ɛ ta yaak inɛn ba, “Laal yak! iPhɛ kɛ hɔn nɛ ɛlɛy!” Nɛ nten nɛ, igbil lo ne shii kyinak yak, ɛlɔ yɛ ne te yak.

⁴⁰ ɛYɛso gha ne ji yaak ninɔn ne icwam ɛbhɛ na, “Kyee iphɛ kɛ te ɛ wum ɛn ɛnik koo? Ɛ ma tɔ ɛn tang ìnang ne itin de naa?”

⁴¹ Nibhɛ ne kyii hante ne wum ɛnik ko. Nibhɛ ne yaa phomos en nibhɛ bo, “Ji ta so ɛya ɛnyi ghaa woo, ne igbil lo gbik ne inɛn ne ɛLing ngga ta phok ɛbhɛ woo?”