ɛMarakus 3 - ɛWee ne ìTsɛm iHywas

iBol ɛNyi ne ɛ kɛ Baghat iWɔ

¹ Kɛ ne sɛ ɛdɛ ɛtuk kɛ ne ɛYɛso gha kɛ ta lel ndɔ ne itɔɔy niYahodawa de nang, ne ɛ sɛ ɛdɛ ɛnyi gha ɛnggyɛ yo ne iwɔ ɛbhɛ kɛ baghat.

² Nidɛng niFarisawa na kaa ne ma so ɛnggyɛ wo nɛ nibhɛ kaa ku ten ɛYɛso yegha. Ninyi yɛnaa nggyɛ wo ne sit ɛYɛso yegha ne irwisɛ, nibhɛ wɛɛ hang aa yung te ɛnyi gha ɛken ɛtuk ne wɛsɛ gha yoo.

³ ɛYɛso gha ne yaak ɛnyi gha ne ɛ kɛ baghat iwɔ wo, “Wuru te ˆɛ kyinak ɛyisɛ ɛbɛ.”

⁴ ɛYɛso gha ne ji phom ninyi yɛnaa nggyɛ wo, ɛ yaak nibhɛ, “ɛShara mon na bo wu te mɔn ɛkɔn ɛyɛnɛng ɛtuk ne iwɛsɛ mon naa hang mɔn ɛkɔn ɛkpɛɛ? Ɛɛ ne bo te phɔt iken ɛnyi dee hang phoo iphɛ?” Ninyi yɛnaa nggyɛ wo ne wum en yak.

⁵ ɛYɛso gha ne yɛɛn nibhɛ ne irway njɛt. Ne ɛ kyii ta bees irway nɛ nibhɛ daa ne ihywee ne irway ikpɛɛ ba nɛ nibhɛ bok ko. Ne ɛ ji yɛɛn ɛnyi gha ne ɛ kɛ baghat iwɔ wo ɛ yaak ɛbhɛ, “Tɔɔl iwɔ mo wo.” ɛNyi gha ne tɔɔl iwɔ ɛbhɛ wo. iFɛ ne shii te ikpen byirik.

⁶ Kɛ ne sɛ niFarisawa naa nggyɛ wo kɛ yaang ɛlɛ wo nang, nibhɛ ne wuusi nibhɛ tek itɔɔy de. Nibhɛ ne shii bhɛ sɛ ninyi na nɛ nibhɛ roos ibol ɛHyiridus de nibhɛ rop ɛnu nɛ nibhɛ, nibhɛ yaa tɔk ɛli nɛ nibhɛ sɛ phoo ɛYɛso yegha.

iDira Ninyi ɛnu ɛRenes

⁷ ɛYɛso gha ne bo ninɔn ne icwam ɛbhɛ na nibhɛ tek ɛgarang nga nibhɛ phɛ ɛnu ɛrenes ne iGalili. Ninyi na ne ta wuru, duu, nibhɛ roos ɛbhɛ. iDira ninyi yɛnaa nggyɛ wo kaa ne les ne ivel ne iGalili, gbik ne iYahudiya,

⁸ ne iYɛrushɛlɛm, ne iDɔmiya, gbik ne ikpang ne iHywel ne iWurudun. Nidɛng ne phyii bhɛ les nigarang nga nɛ nibhɛ so ne ivel ne iTaya gbik ne iSidɔn. Ninyi yɛnaa nggyɛ wo kaa ne yɛɛs ɛlɔ ɛYɛso gha daa ɛli nɛ nibhɛ kɛ phok ihywee nikɔn de ne ɛYɛso gha mɔn no.

⁹ Kɛ ne sɛ ɛYɛso gha yaang ɛli ne idira ninyi de kɛ kat ɛlɛ wo nang, ne ɛ yaak ninɔn ne icwam ɛbhɛ na wu te nibhɛ nang nge ɛkparak te lel nɛ ndɔ yɛ. Ɛ kaa mɔn ɛlɛ wo daa ɛli nɛ ninyi na kaa yaa phyii ɛbhɛ.

¹⁰ Ɛ kaa ne ku tes ninyi na niken gbom. iPhɛ nɛ nisha na ne yaa phyii en ɛlɔ ɛbhɛ gha nibhɛ sim tɛ nibhɛ sɛ dat ɛbhɛ.

¹¹ Ne i sɛ ɛli nɛ ninaa ne niphoo na kɛ yaang ɛYɛso yegha, nibhɛ ne ho ɛnu ɛyisɛ ɛbhɛ, nibhɛ ta ikun nibhɛ yɔngɔ, “iGyɛ ɛ soyɛ ɛNgɔn ɛTaanggbey ya!”

¹² ɛYɛso gha ne kpɛngke nibhɛ ɛ yaak nibhɛ tɛ nibhɛ kunggbyak, wu hang nibhɛ phaal le.

ɛYɛso gha kɛ Karase Ninɔn ne Tom Ɛbhɛ

¹³ Kɛ ne so ɛnggyɛ wo, ɛYɛso gha ne bhɛ wara daa ne ɛwarang ɛ yel-le nidɛng ndɔ ninyi na ne irway ɛbhɛ kɛ bo. Ninyi yɛnaa nggyɛ wo ne phɛ nibhɛ bhɛ sɛ ɛbhɛ.

¹⁴ Ne ɛ ji karase nidɛng ɛnduwubɔ nɛ ninyi ifaa ɛ yel-le nibhɛ ninɔn ne tom. Ɛ sim tɛ nibhɛ sɛ i shɛɛ cɛcɛk ne ɛbhɛ te ɛ tomos nibhɛ nibhɛ phɛ ne sanga ibol iyɛnɛng ngge,

¹⁵ tɛ nibhɛ ta sɛ ito-ndiinday ne tuul niphoo ndɔ ninyi na.

¹⁶ iRɛɛk ninyi yɛdee bɛ ne ɛYɛso gha kaa karase wo: ɛSimɔn, (ɛYɛso gha kaa ne yaak ɛbhɛ ɛBiturus se),

¹⁷ ne ɛYakub, ne ɛgwaa ɛbhɛ ɛYohana, ninɔn ɛZɛbɛdi, (ɛYɛso gha kaa ne nang ɛbhɛ idɛ irywɛɛk ko ɛ yaak nibhɛ ɛNɛbonajis, kaabi i bo ninɔn ne irywa).

¹⁸ Ne ɛNdarawus, ne ɛFilibus, ɛBatɔlɔmi, ne ɛMacu, ne ɛToma, ne ɛYakub ne so ɛngɔn ɛLifiyos, ne ɛTadiyus, ne ɛSimɔn ne ɛ kaa sim ɛgarang ɛbhɛ gbom,

¹⁹ gbik ne ɛYahuza ne iSikɔrɔti, ne ɛ kaa kyii mɔng ɛ rɛp ɛYɛso ye.

I bo wu ɛYɛso bok ɛBɛlizɛbul Le

²⁰ ɛYɛso gha nɛ ninɔn ne icwam ɛbhɛ na ne kyii nibhɛ bhɛ lel en ndɔ ne ijwee. Ninyi na ne ma ta roke duu nibhɛ pham ɛlɔ yɛ. Sɔng niYɛso yena ne yɛɛ ne sɛ ikɛk nɛ nibhɛ yaa re ne ire nang.

²¹ Kɛ ne sɛ nigwaa ɛYɛso na kɛ phok ibol lɛ, nibhɛ ne phɛ nibhɛ yaa bhɛ tɔk ɛbhɛ daa ɛli nɛ ninyi na ne kɛ yaa bol daa ne ito ɛYɛso de nibhɛ bo, “Ɛ kɛ ho nisan.”

²² Nidɛng ninaa ne kpɛl ɛShara gha kaa ne so ɛnggyɛ wo nɛ nibhɛ le ne iYɛrushɛlɛm. Nibhɛ ne yaa bol nɛ ninyi na nibhɛ bok nibhɛ, “ɛNyi yɛghaa wo bok ɛBɛlizɛbul le ne ɛ so ɛgɔm niphoo. Ɛbhɛ ɛ bok ɛbhɛ ɛ tuul niphoo na.”

²³ iPhɛ ɛlɛy yang, ɛYɛso gha ne yel-le ninyi yɛnaa nggyɛ wo ɛ boote nɛ nibhɛ ndɔ ne igɔrɔp ɛ yaak nibhɛ, “ɛShɛtan na sɛ kyi ta yɛɛ ne tul ikabyik ɛShɛtan de bɛ?

²⁴ iVel da ne ifɛ bok iphup, sɔng ifɛ yaa ne kyinak kang.

²⁵ Ɛlɛy ne ijwee ne ifɛ ne boos ishishim. Sɔng ifɛ sɛ ne ma kyinak kang.

²⁶ iPhɛ ɛlɛy, wu ninyi ɛShɛtan na kɛ yɛk iphup be ne ito ɛbhɛ de, sɔng igbɔm ɛbhɛ ba yaa ne shɛɛ nang, ifɛ yaa ne taal le.

²⁷ “Sɔng ɛhaa ɛyi gha shii bhɛ lel ndɔ ne ijwee ne ɛnyi ne ihwet to ɛ hyel ɛyi gha nang. Aa tsa ɛ kyi robhos ɛnyi gha nyɛɛn ne ɛ ji hyel ɛbhɛ ɛyi gha.

²⁸ “Naa tɔng nyini itin nɛ, ɛTaanggbey ya sɛ han ninyi na ne ibebhe de nɛ nibhɛ kɛ mɔn ɛbhɛ nɛ wo gbik, ɛ phyii han nibhɛ ne ivol ikpɛɛ da nɛ nibhɛ kɛ bol lo gbik.

²⁹ ɛHiha ɛNyi ne ɛ kɛ ne bol ivol ne bɛɛs iKabyik ɛTaanggbey de nang, sɔng ɛTaanggbey ya sɛ ne hana ɛbhɛ ne ɛfɔt ɛbhɛ wo nang. ɛFɔt ɛbhɛ wo so ɛwoo ne inat.”

³⁰ ɛYɛso gha kaa boote ɛlɛ wo daa ɛli nɛ ninyi na kaa yaa bo wu ɛ bok niphoo.

Ninaa ne iJwee ɛYɛso na

³¹ Kɛ ne so ndɔ ɛnggyɛ wo nang, ɛgyinɛ ɛYɛso gha nɛ nigwaa ɛbhɛ ne i tuu. Nibhɛ ne kyinak gɔɔ ne izay nibhɛ tom mɛ wu te yel-leey ɛbhɛ.

³² Ninyi na kaa sooset ɛlɔ ɛYɛso gha gbom nibhɛ te ɛbhɛ gyɔɔ. ɛDɛng ne yaak ɛYɛso yegha, “ɛGyinɛ mo nɛ nigwaa so gɔɔ ne izay nibhɛ bol ne igyɛ.”

³³ ɛYɛso gha ne kyii nɛ ɛ yɔngɔ, “ɛHay ɛbhɛ so ɛGyinɛ nge gha? Ninay nibhɛ so nigwaa nge niras sa nɛ nikuk kɛwoo?”

³⁴ Ne ɛ ji hyereey ɛ yɛɛn idira ninyi de nɛ nibhɛ kɛ sooset nibhɛ tes ɛbhɛ gyɔɔ wo ne ɛ ji yɔngɔ, “Nzo ɛGyinɛ nge yɛghaa bɛ, nigwaa nge niras sɛnaa bɛ, nigwaa nge nikuk kɛnaa bɛ!”

³⁵ ɛHiha ɛnyi ne ɛ kɛ mɔn ɛkɔn na ne ɛTaanggbey ya sim, ɛbhɛ so ɛgwaa nge ɛras sa ne ɛgwaa nge ɛkuk ka. Ɛbhɛ ne ɛ ta so ɛgyinɛ nge gha dɔng.