ɛMarakus 16 - ɛWee ne ìTsɛm iHywas

ɛYɛso gha kɛ Yilitsik ne iKpuu Da

¹ Kɛ ne sɛ ɛtuk ne iwɛsɛ niYahodawa na kɛ phee nang, ɛMɛri gha ne ɛ le ne iMagadala de, ne ɛMɛri gha ne ɛ so ɛgyinɛ niYakub pa, gbik ne ɛSɔlɔmi gha ne bhɛ say idɛ nɔɔy da ne i ruu ikom mɛ, tɛ nibhɛ bhɛ ruu ikom ɛYɛso de nɛ.

² Kɛ ne cwiil ne ihwɛlɛ yɛ, nibhɛ ne tɛ ne ɛlɔ, nibhɛ bo nikɔn nibhɛ phɛɛs ne ikpuu ba.

³ Kɛ ne sɛ nibhɛ so ne ihywel ba, nibhɛ ne yaa phomos en nibhɛ bo, “Ɛhay ɛbhɛ yaa ji bhɛ kungare njwɛɛn ɛkikɛɛ wo ne kɛ cwaal ne ikpuu ba daa mɛɛ?”

⁴ Ne kyii sɛ nibhɛ kɛ bhɛ tuu ɛnu ne ikpuu gha nibhɛ ne sɛ kɛ ku kungare ɛkikɛɛ wo gɔɔ.

⁵ Kɛ ne sɛ nibhɛ kɛ lel ndɔ ne ikpuu da nibhɛ ne sɛ ɛdɛ ɛngɔn ɛphas sa ɛ ne itsura ihwala hyahyak, ɛ kɛ soos gɔɔ ne iwap ne irwye ne ikpuu da. Nibhɛ ne wum ɛnik.

⁶ ɛNgɔn ɛphas sa ne yaak nibhɛ, “Sɔng ɛ phok ɛn ɛnik ko nang. N nzi yɛɛ, ɛ tɔk ɛn ɛYɛso ne iNazarat te ne kɛ gangat ɛbhɛ. Sɔng ɛ so ɛbɛ wo nang, ɛ kɛ yilitsik. Yaang ɛn ɛlɔ yɛghaa bɛ ne kaa laasek ɛbhɛ nɛ!

⁷ Cwi ɛn te ɛbhɛ tɔng ɛn ninɔn ne icwam ɛbhɛ na, gbik ne ɛBiturus sa. ɛYɛso gha phɛɛs ne iGalili, aa ne bhɛ phɔt nyini nɛ. Aa ne bhɛ yaang ɛn ɛbhɛ ne iGalili de, ɛli ne ɛ kaa ku tɔng nyini wo.”

⁸ Nikuk ka ne wuru ndɔ ne ikpuu ba ne ɛnik. Nibhɛ ne i tel nibhɛ kparat, sɔng nibhɛ ne boote ne ɛnyi nang.

ɛYɛso gha kɛ bhɛ Wuru ɛMɛri ne iMagadala Ye

⁹ [Kaa ne sɛ ɛli ne ɛYɛso gha kɛ yilitsik ne ikpuu ba ne ihywɛlɛ-hywɛlɛ ɛtuk ne iLaadi gha nang, ne ɛ tsa ɛbhɛ wuru ɛMɛri ne iMagadala ye. ɛKuk kɛghaa nggyɛ wo ne ɛYɛso gha kaa ku tul ɛbhɛ niphoo nibhɛ ɛniitaa.

¹⁰ Kɛ ne sɛ ɛMɛri gha kɛ yaang ɛYɛso yegha nang, ne ɛbhɛ tɔng ninyi na nɛ nibhɛ kaa ku i roos ɛYɛso yegha. Ɛ kaa ne bhɛ sɛ nibhɛ san, nibhɛ bees irway.

¹¹ ɛMɛri gha ne yaak nibhɛ wu ɛYɛso gha so ɛken, wu i kɛ yaang ɛbhɛ. Sɔng nibhɛ ne sim ibol ɛMɛri de nang.

ɛYɛso gha kɛ bhɛ Wuru Ninɔn ne iCwam Ɛbhɛ Nibhɛ iFaa

¹² ɛTsim mɛ ɛlɛy, ɛYɛso gha ne hyere ibek ɛbhɛ, ɛbhɛ wuru nidɛng ninɔn ne icwam ɛbhɛ na ifaa nɛ nibhɛ hyel nkiinɛ nibhɛ hyil en.

¹³ Ninɔn ne icwam ifaa yɛnaa nggyɛ wo ne kyii nɛ, nibhɛ bhɛ tɔng ɛbyin ninɔn ne icwam ma ɛli nɛ nibhɛ kɛ yaang ɛYɛso yegha. Sɔng nibhɛ ne jung nang ne itin nɛ ne ibol lɛ nang.

ɛYɛso gha kɛ bhɛ Wuru Ninɔn ne iCwam Ɛbhɛ ɛSalɛng Nga

¹⁴ ɛTsim mɛ ɛlɛy, ɛYɛso gha ne ji bhɛ wuru ninɔn ne icwam ɛbhɛ ɛnduwubɔ ne ɛbhɛ ɛdaan na nten de nɛ nibhɛ kaa i re ire. Nibhɛ ne ji yaang ɛbhɛ. ɛYɛso gha ne nep nibhɛ daa ne yɔm ne nang ne itin nɛ ne ibol nibhɛ de. Ɛli nɛ nibhɛ kɛɛ mbaray tang say ibol de nɛ nigwaa nibhɛ na kɛɛ tɔng nibhɛ wo wu ɛYɛso gha kɛ yilitsik ne ikpuu da.

¹⁵ ɛYɛso gha ne yaak nibhɛ, “Cwi ɛn ndɔ ɛzay ya gbigbik, te ɛbhɛ tɔng ɛn igbagha wo gbik ibol ɛyɛnɛng ngge.

¹⁶ ɛHiha ɛnyi ne ɛ kɛ bhɛ say ibol mon de, wu ɛ kɛ ne yɛk ɛn ɛbhɛ ne ibatisima de, ɛbhɛ sɛ ne phɔrɔt. ɛHaa ne ɛ kɛ ne bhɛ mbaray tang say iphɛ, kɛ ne ku hyɛ ɛbhɛ ɛshara ne iku.

¹⁷ Sɛ ne nang ninyi na nɛ nibhɛ kɛ say ibol nge de ito-ndiinday ne mɔn nikɔn ne kparat gbom: Nibhɛ sɛ bo irywɛɛk nge wo nibhɛ tuul nɛ niphoo ndɔ ninyi. Nibhɛ sɛ ne ta bol ne ihwak ilwem ne hame kɛ ku mɛmɛ nibhɛ nɛ.

¹⁸ Wu nibhɛ kɛ ne phyii wumus izɔ igywebhe, sɔng ihywɛ sɛ ne mɔn nibhɛ ne ɛkɔn nang. Wu nibhɛ kɛ re irɔ, sɔng ifɛ ne ma ta mɔn nibhɛ ne ɛ ɛkɔn nang. Nibhɛ sɛ ne i darat nishwa nibhɛ tes nibhɛ niken.”

Kɛ bo ɛYɛso yegha phɛ nɛ daa ne irywa

¹⁹ Kɛ ne sɛ ɛYɛso gha kɛ taal ɛ tɔng ninɔn ne icwam ɛbhɛ na ivol lɛdaa wo gbik, ne bo ɛbhɛ i waray nɛ dak ne irywa, ɛbhɛ soos gɔɔ ne iwɔ ne irwye ɛTaanggbey.

²⁰ Ninɔn ne icwam ɛYɛso na ne wuusi nibhɛ leesel ndɔ nilɔ na gbarang, nibhɛ bhɛ sanga ɛnu ne ibol iyɛnɛng nga. ɛDaray ya ne i mɔn ɛtomɛ nɛ nibhɛ. Ne ɛ nang nibhɛ ito ne mɔn nikɔn ne kparat gbom te hante ibol nibhɛ de ne ihwet, te i seng wu iphɛ le daa ɛlɔ ɛTaanggbey.]