ɛMarakus 12 - ɛWee ne ìTsɛm iHywas

iBol Ninaa ne Wɛɛ iHwap

¹ ɛYɛso gha ne ta mɔng nibhɛ idɛ bol de ndɔ ne igɔrɔp ɛ yaak nibhɛ, wu ɛdɛ ɛnyi gha kaa bok ihwap ɛnap. Ɛ kaa ne gan ifɛ, ɛ tɛm ɛyek ne sɛ pharak ne ikpam ɛnap ba. Ɛ lɔl ɛlɔ ne yaa wara i shɛɛ ta ɛkanang ne ihwap ba. Ne ɛ ji nang nidɛng ninyi na ifɛ wu tɛ nibhɛ wɛɛ en nɛ, ɛ hyel ihwel ɛ phɛ ɛhak ɛgarang.

² Kɛ ne sɛ nten de ne yaa bon ikpam ba kɛ tuu nang, ɛnyi yeghaa nggyɛ wo ne tom ɛkpuru ɛbhɛ ɛlɔ ninyi na ne ɛ kɛ tek nibhɛ ne ihwap ba. Ɛ kaa yaak ɛkpuru ɛbhɛ gha wu te ɛbhɛ say ye ihop ne ikpam ɛnap ba.

³ Ninyi na ne kɛ tek nibhɛ ne ihwap ba ne bhɛ wum ɛkpuru gha nibhɛ hal ɛbhɛ, nibhɛ kyii ne ɛbhɛ ne iwɔ howo.

⁴ ɛNyi gha ne ta tom ɛdɛ ɛkpuru ɛbhɛ gha dɔng. Ninyi yenaa nggyɛ wo ne bhɛ tɛrɛ ɛkpuru gha ito nibhɛ te ɛbhɛ ɛ sɔ ncwa.

⁵ ɛNyi gha ne ta kyii tom ɛdɛ ɛkpuru ɛbhɛ gha dɔng. Ninyi na ne ta bhɛ phoo ɛbhɛ. ɛNyi gha ne ji ta tom nɛ nidɛng nikpuru na maa. Ninaa ne wɛɛ ihwap ba ne ta bhɛ roos nibhɛ, nibhɛ hal nibhɛ, nibhɛ phobho ɛbyin nɛ.

⁶ ɛNyi yɛghaa nggyɛ wo kaa ne ji mak ne ɛnyi ɛdaan zɔng ne yaa tom ɛbhɛ wo. Ɛ kaa ne so ɛngɔn ɛbhɛ ne ɛ sim. ɛNyi gha ne ji bo ɛngɔn ɛbhɛ gha ɛ tom ɛbhɛ ɛlɔ ninaa ne wɛɛ ɛbhɛ ihwap ba, ɛɛ tas ɛ bo, “Nibhɛ yaa bhɛ nang ɛngɔn nge gha ne ndiinday.”

⁷ Ninaa ne wɛɛ ihwap ba ne ji yɔng, “Yɔɔ! Ji so ɛhaa ne ɛ sɛ re iryat ɛnyi yɛdee wo ɛbhɛ yaaso. Njwɛɛn te phoo ɛbhɛ te isha yɛdee wo ku teye izee njwɛɛn.”

⁸ Nibhɛ ne wum ɛngɔn na, nibhɛ phoo ɛbhɛ. Nibhɛ ji hana ikom mɛ gɔɔ ne ifam ne ihwap ba.

⁹ ɛYɛso gha ne ji phom nibhɛ ɛ yaak nibhɛ, “ɛYakɔn ne ɛnyi ne ihwap pa yaa ne mɔn ne? Aa ne yɛɛs ɛ phobho ninyi yɛnaa nggyɛ wo ɛ ji phɔt ihwap ba ɛ nang nihak ninyi.”

¹⁰ Ɛ kɛ ku tɔng ɛn bɛ ɛli ne ɛwee ne ibol ɛTaanggbey yo bo. “iKɛɛ de nɛ ninaa ne lɔl ijwee na kaa mbaray yo iphɛ phɛ kaa ne kyii teye ɛkangashi ne ijwee gha.

¹¹ ɛTaanggbey ɛbhɛ kɛ mɔn ɛkɔn neghaa wo, iphɛ ne so njwɛɛn ɛkɔn ne wɛɛ ne irwisɛ zii.”

¹² Nindiinday niYahodawa na ne seng wu ɛYɛso gha kɛ bol ndɔ ne igɔrɔp be daa ne ito nibhɛ. Nibhɛ ne yaa tɔk ɛli nɛ nibhɛ yaa wum ɛbhɛ. Nibhɛ ne kyii phok ɛnik ne igbagha wo. iPhɛ ɛlɛy yang nibhɛ ne bo nikɔn nibhɛ hyel.

iPhom daa ne iBol ne iJam ne iVel

¹³ Kaa ne tom nidɛng niFarisawa na nɛ ninyi ɛHyiridus sa tɛ nibhɛ bhɛ wum ɛYɛso yegha daa ne idɛ ibol ɛbhɛ.

¹⁴ Nibhɛ ne phɛ ɛlɔ ɛYɛso gha nibhɛ yaak ɛbhɛ, “ɛKyɛɛ! Njwii ku yɛɛ ɛli ne ɛ so ɛnyi ɛcik. Njwii ne ta yɛɛ ɛli ne hame ɛ bok sim ito. Sɔng ɛ bok nidɛng ninyi na ne ɛ sim nibhɛ ɛ ji mbaray yɛ nidɛng nang. Ɛ ku mɛmɛ ninyi na nɛ nikɔn ɛTaanggbey ya nɛ ne itin nɛ. Ne ɛ mɔng njwii iPhɛ kɛ ne jam mɛ njwi sɛ tal ɛKɛɛsat tegha ijam ne ivel dee? Hang iphɛ kɛ ma sang jam mɛ?

¹⁵ Njwii tal ijam ne ivel dee? Hang njwi shɛɛ tang tal!” ɛYɛso gha kaa ne ku yɛɛ iluk nibhɛ de. iPhɛ ɛlɛy yang ne ɛ yaak nibhɛ, “iKyee iphɛ kɛ te ɛ ten ɛn mɛɛn noo? Nang ɛn mɛɛn idinari idaan ɛbɛ n yung yaang.”

¹⁶ Nibhɛ ne bhɛ bo idinari de nibhɛ nang ɛbhɛ. ɛYɛso gha ne ji phom nibhɛ ɛ yɔngɔ, “iZazurum ɛhay ne kɛ yɛk ne idinari yɛdee woo? iRywɛɛk ɛhay ne kɛ ne ta haa ne ɛdak kɛwoo?” Nibhɛ ne yaak ɛYɛso yegha, “iZazurum ɛKɛɛsat gbik ne irywɛɛk ɛKɛɛsat.”

¹⁷ ɛYɛso gha ne yaak nibhɛ, “Ne ɛ nang ɛn ɛKɛɛsat tegha ɛkɔn na ne ɛ so ɛhaa ɛbhɛ te nɛ ma nang ɛn ɛTaanggbey yegha ɛkɔn na ne ɛ ma so ɛhaa ɛbhɛ.” Nibhɛ ne yaa wɛɛ ɛYɛso yegha zii.

iPhom ɛli ne sɛ Yiisitsik ne iKpuu

¹⁸ niDɛng niSadukyawa na kaa ne phɛ ɛlɔ ɛYɛso gha. Ninyi yɛnaa nggyɛ wo kaa ne i mbaray ibol ne yilitsik ne ikpuu de. Nibhɛ ne phom ɛYɛso yegha nibhɛ yaak ɛbhɛ,

¹⁹ ɛKyɛɛ! ɛMuusaa gha kɛ haa njwii nɛ, ɛ yɔngɔ wu ɛnyi kɛ ku, ɛ tek ɛkuk ɛbhɛ tang ɛngɔn, te ɛgwaa ɛbhɛ ne bo ɛkuk kɛ ɛ yɛk ɛbhɛ ne ihywee.

²⁰ Nidɛng nigwaa na kaa ne so ɛniitaa ndɔ nibhɛ. ɛKɔɔn nɛ kaa ne tul ɛkuk ne ɛ ku sɔng ɛ kɛ tek ihywee nang.

²¹ ɛHaa ne ifaa yɛ ne bo ɛkuk ka. Ne ɛ ma kyii ku dɔng sɔng ɛ tek ihywee de nang. Ɛlɛy ne ɛhaa ne itwat tɛ ne ma ta mɔn dɔng.

²² Gbik nibhɛ ɛniitaa na, ɛrɔngɔ ne bo ɛkuk ka ɛ shɛɛ ne ɛbhɛ ɛ mɔɔng ɛ ku sɔng ɛ kɛ tek ihywee de nang. ɛKuk ka ne ma ji mɔɔng ɛ ku.

²³ Wu iphɛ ne so ɛtsak nɛ ninyi na sɛ yiisitsik ndɔ ne ikpuu ba ɛkuk kɛgha nggyɛ wo sɛ ne ji bhɛ teye ɛhaa ɛhay ndɔ nigwaa ɛniitaa yɛnaa nggyɛ woo? Gbik nibhɛ ɛniitaa na ɛrɔngɔ kɛ boos ɛbhɛ.

²⁴ ɛYɛso gha ne kyii nibhɛ nɛ ɛ yɔngɔ, “Ɛ kɛ ben ɛn gbom. Ɛ doo ɛn ibol ne iWee ɛTaanggbey yo ne ito-ndiinday ɛbhɛ de naa?”

²⁵ Sɛ́ sɛ ninaa ne ikpuu na kɛ bhɛ yiisitsik ko nang, sɔng ibol ne boos ɛkuk sɛ ne ta bhɛ sonɛ dɔng nang. Sɔng ɛras sɛ tul ɛkuk kang, sɔng ɛkyɛɛ sɛ ne nang ɛlap ɛbhɛ ne ɛnyi nang. Ninyi na sɛ bhɛ tes tɛ niMalɛka ɛTaanggbey daa ne irywa wo.

²⁶ Daa ne ibol de nɛ ninyi na sɛ yiisitsik ne ikpuu ba nang, ɛ kɛ sang ku tɔng ɛn ɛwee wo ne kɛ haa ne ibol ɛMuusaa de naa? iBol ne igboo de ne ifɛ kaa re ndɔ ɛhay ya ɛTaanggbey ya ji yaak ɛMuusaa yegha wu iyee so ɛTaanggbey ɛBaraying nga ne ɛhaa ɛShaaku gbik ne ɛhaa ɛYakub pa naa?

²⁷ Sɔng ɛTaanggbey ya ne soye ɛTaanggbey ne ikpom ninyi nang. Ɛ soye ɛTaanggbey nɛ ninyi niken. Ɛ kɛ ben ɛn gbogbom.

ɛShara gha ne ɛ Shɛs ne iGbom

²⁸ ɛDɛ ɛhaa ne kpɛl ɛShara gha kaa ne yɛɛs, ne ɛ sɛ nibhɛ so ndɔ ne ivol ba. Ne sɛ ɛ kɛ seng ɛli ne ɛYɛso gha kɛ bol ivol ɛbhɛ ba ywɛywɛy yo, ne ɛ phom ɛYɛso yegha ɛ yaak ɛbhɛ, “Ndɔ ne ivol ɛShara ba, iya phɛ yɛ iphɛ shɛs ne ihwet lɛɛ?”

²⁹ ɛYɛso gha ne kyii nɛ ɛ yaak nibhɛ, “iBol de ne iphɛ shɛs ne ihwet da gbik kɛwoo bɛ: ‘Tenes ɛn mɛɛn nyinɛn ninɔn niSɛrɛla wo. ɛHaa ne Inat ta ne ɛ soye ɛTaanggbey njwɛɛn na ɛbhɛ so ɛTaanggbey ɛdaan.

³⁰ Sim ɛHaa ne Inat mo gha ne ɛ so ɛTaanggbey mo gha ndɔ ne ikok mo, ne iken mo, ne irway mo gbik ne ihwet mo.’

³¹ iDee ne ifaa ye ne bo, ‘Sim ɛgwaa mo te ɛli ne ɛ sim ito mo.’ Sɔng idɛ ibol de sonɛ ne iphɛ ta phyin ivivaa wo ne igbom be nang.”

³² ɛNyi yɛghaa nggyɛ wo ne kyii ɛYɛso yegha nɛ ɛ yaak ɛbhɛ, “Ɛɛy! ɛlɛy ne iphɛ so ɛKyɛɛ yɔɔy! Ɛ kɛ mɔng cik ne ɛ bo ɛTaanggbey ya so ɛdaan na! Wu hang ɛdɛng ta sonɛ wo.

³³ Wu te ɛnyi gha sim ɛTaanggbey yegha ndɔ ne ikok ɛbhɛ de, ne iken ɛbhɛ de ne irway ɛbhɛ ba gbik ne ihwet ɛbhɛ ba. Wu te ne ɛ ta sim ɛgwaa ɛbhɛ gha ɛli ne ɛ sim ito mo de iphɛ phyin hap itsanga ne i wɔɔ nikɔn nɛ ne ɛbyin ne hap itsanga gha gbik.”

³⁴ Ne sɛ ɛYɛso gha kɛ yaang ɛli ne ivol ɛnyi yɛdaa nggyɛ wo so ivaa ɛnyi ne ɛ bok intsɛntsɛng nang ne ɛ yaak ɛbhɛ, “Ɛ so cɛcɛk ne igbɔm ɛTaanggbey ba.” ɛTsim mɛ ɛlɛy sɔng ɛnyi ne tang sim ɛ phom ɛYɛso yegha ibol nang.

iPhom daa ɛKiriti

³⁵ Kɛ ne sɛ ɛdɛ ɛtuk kɛ ne ɛYɛso gha so ndɔ ne iDeng ngge ɛ mɛmɛ ninyi na nɛ, ne ɛ phom nibhɛ ɛ yaak nibhɛ, “iKyee iphɛ kɛ te ninaa ne kpɛl ɛShara na bo wu ɛKiriti gha soye ɛNgɔn ɛDoda ghaa?”

³⁶ iKabyik ɛTaanggbey de kaa yɛk ɛDoda yegha nɛ ɛ boote ibol daa ne ito ne ɛKiriti de ɛ yɔngɔ, “ɛTaanggbey ne Inat ta kaa yaak ɛDaray nge gha, Soos ne iwɔ ne irwye nge, naa ne te ninaa ne iphup mo na teye ɛkɔn ne tek ne ita mo.”

³⁷ ɛDoda gha ne ito ɛbhɛ ɛ kaa yel-le ɛbhɛ ɛDaray ne. Yaa ne mɔn ɛlii ɛKiriti gha kyi ta teye ɛngɔn ɛDoda ghaa? iDira ninyi de ne i phok iyɛnɛng ne tenes ivol ɛbhɛ ba.

ɛYɛso gha kɛ phaal ɛDuk nindiinday niYahodawa Na

³⁸ Kɛ ne sɛ ɛYɛso gha so ndɔ ne mɛmɛ ninyi na nɛ wo nang ne ɛ yaak nibhɛ, “Wɛɛ ɛn nyini yɛnɛng ɛlɔ ninaa ne kpɛl ɛshara gha. Nibhɛ i sɔsɔ en igbaang ne itsura cɛcɛɛy. Nibhɛ ne ji sim tɛ sɛɛ kyiisi nibhɛ, ta naas nibhɛ ne ndiinday ndɔ nitungga.

³⁹ Nibhɛ sim tɛ nibhɛ sɛ sooset nilɔ ninu nikɔɔn ndɔ ne itɔɔy, nibhɛ ne ta i kasa nilɔ ne igbaang ninyi nibhɛ sooset nɛ ne ijwira.

⁴⁰ Nibhɛ ne phɔrɔt nikɔn nikusang, nibhɛ ne ji kyangas en nibhɛ roro ne ɛTaanggbey wu te ne yɔng wu nyin i yɛɛ ɛTaanggbey ye n shɛs. ɛShara ninyi yɛnaa nggyɛ wo sɛ ne bhɛ kat gbom!”

iZɛɛng ɛdɛ ɛKusang Ngge

⁴¹ ɛYɛso gha kaa ne soos ndɔ ne iDeng ngge cɛcɛk ne ɛlɔ gha nɛ ninyi na i cwaasek ne izɛɛng ngge ɛ wɛɛ. Ne ɛ yaang ɛli nɛ ninaa ne iryat ta gbarang i cwaasek ne igbuu ne ijam nibhɛ de.

⁴² ɛDɛ ɛkusang nga ne ɛ kaa so ɛhala hyahyak ne ma yɛɛs ɛnggyɛ wo ɛ cwaak nɛ ninyinyii ifaa.

⁴³ ɛYɛso gha ne yel-le ninɔn ne icwam ɛbhɛ na ɛ yaak nibhɛ, “Nzi tɔng nyini itin nɛ izɛɛng ɛkusang ngɛdee wo ihywee phyin izee ne ɛbyin ninyi de gbigbik nɛ nibhɛ kɛ cwaasek ngɛ wo.

⁴⁴ Ninyi yɛnaa nggyɛ wo kɛ bonɛ ndɔ ne iryat nibhɛ, nibhɛ ne naas. ɛKusang ngɛghaa nggyɛ wo nang, ndɔ ne ihala ɛbhɛ de ɛ kɛ ne bo ɛkɔn na ne ɛ bok gbikgbik, ne ɛkɔn ne re ɛbhɛ, ɛ cwaak ngɛ.”