ɛMacu 15 - ɛWee ne ìTsɛm iHywas

iMɛmɛ niKyɛɛ-nikyɛɛ niYahodawa

¹ Kɛ ne sɛ ɛdɛ ɛtuk kɛ, nidɛng ndɔ niFarisawa na nɛ ninaa ne kpɛl ɛShara gha ne les ne iYɛrushɛlɛm, nibhɛ yɛɛs ɛlɔ ɛYɛso gha, nibhɛ phom ɛbhɛ nibhɛ yɔngɔ,

² “iKyee phɛ kɛ te ninɔn ne icwam mo na sang roos ikpii nikyɛɛ-nikyɛɛ mos daa? Sɔng nibhɛ kuus ibɔ nyɛɛn nibhɛ kyi re ire nang!”

³ ɛYɛso gha ne kyii nɛ ne ɛ yaak nibhɛ, “iKyee iphɛ kɛ ne ma te ɛ sang roos ɛn ikpii ɛTaanggbey da, ɛ ji roos ɛn ikpii nikyɛɛ-nikyɛɛ mon daa?”

⁴ ɛTaanggbey ya bo, “Nang ɛkyɛɛ mo ne ɛgyinɛ mo ne ndiinday, ɛnyi gha ne ɛ kɛ bɛɛs ɛkyɛɛ ɛbhɛ ne ɛgyinɛ ɛbhɛ, iphɛ ne so nggbinggbing i phoo ɛbhɛ.”

⁵ Ɛ kɛ ne yaa tɔng ɛn ninyi ɛ bo ɛn wu ɛnyi sɛɛ kyi bok ɛkɔn ne aa phyik ɛkyɛɛ nɛ gbik ne ɛgyinɛ, ɛ ji yɔngɔ wu i kɛ ku haan ɛTaanggbey ye nɛ, wu hang i phɛ ne tɔ nggbinggbing ɛ nang ɛkyɛɛ gha ne ɛgyinɛ gha ne ndiinday de ne ɛkɔn neghaa nggyɛ wo.

⁶ Ɛlɛy ne ɛ kɛ ne bo ɛn ibol ɛTaanggbey de iphɛ te buu, ɛ ji yaa roos ɛn imɛmɛ mon de.

⁷ Nyinɛn no ne ɛ so ɛn niluk ka! iBol ɛShaa de kaa so itin nɛ ne ɛ kaa boote daa ne ito mon de ɛ yɔngɔ,

⁸ Ninyi yɛnaa wo i naas me ne ndiinday de ne igbɛrɛ ɛnu, irway nibhɛ so kyaam ne mee.

⁹ Buu nɛ nibhɛ bo wu n si re me ntsong ngga. Nibhɛ i mɛmɛ ninyi na ne imɛmɛ niten nisii, nibhɛ ne ji yɔngɔ ivaa nge.

Nikɔn na nɛ Nibhɛ Nang ɛNyi gha iVebhe Da

¹⁰ ɛYɛso gha ne yel-le idira ninyi de ɛlɔ ɛdaan, ɛ yaak nibhɛ, “Tenes ɛn, Phok ɛn.

¹¹ Sɔng ɛkɔn na ne ɛɛ lel ndɔ ɛnu ɛnyi gha ɛbhɛ na ɛbhɛ ivebhe da nang, yang so ɛkɔn na ne ɛ wuusi ndɔ ɛnu ɛnyi gha ɛbhɛ nang ɛnyi gha ivebhe da.”

¹² Ninɔn ne icwam ma ne yɛɛs ɛlɔ ɛYɛso gha nibhɛ ne yaak ɛbhɛ, “Ɛ yɛɛ te ibol lɛdee wo kɛ dat niFarisawa na irway ye?”

¹³ ɛYɛso gha ne kyii nɛ ne ɛ yɔngɔ, “Gbik ɛkɔn na ne hame ɛKyɛɛ daa ne irywa gha ɛbhɛ kɛ tup po yaa ne sɛrɛse ne ilwing ngɛ gbik.

¹⁴ Tek ɛn nibhɛ, nibhɛ so niwil nɛ nibhɛ hɔ iwil ɛntsɛng. Wu ɛhaa ne iwil la i hɔ ɛhak ɛhaa ne iwil la ɛntsɛng ngo, nibhɛ wo gbik yaa ne bhɛ hoghɛ ɛyek.”

¹⁵ ɛBiturus sa ne yaak ɛYɛso yegha, “Kpɛl njwi ibol ne igɔrɔp pɛdee wo.”

¹⁶ ɛYɛso gha ne yɔngɔ, “Ɛ ma tɔ ɛn tang seng naa?

¹⁷ Ɛ doo ɛn ɛli ne i sɛ ɛkɔn na kɛ lel ndɔ ɛnu ɛnyi gha, aa phɛ ndɔ ne iphul de, ɛ kyii ta mɔɔng ɛ wuru ndɔ ne ibek gee?

¹⁸ ɛKɔn na ne ɛ kɛ ne wuru ɛnu ɛnyi gha nang, ɛbhɛ ɛ le ne irway ɛnyi da, ɛbhɛ ne i nang ɛnyi gha ivebhe da.

¹⁹ Ndɔ ne irway ɛnyi da ne icwas ivebhe da i wuusi nɛ. iCwas ne phoo ɛnyi, nzangas, re ihwel, ɛyi, iwul irywɛɛk daa nikɔn ne hame nibhɛ so itin nɛ, ne bees ɛnyi irywɛɛk.

²⁰ Nikɔn nɛnaa wo nibhɛ bhɛ ne nang ɛnyi gha ivebhe da. Sɔng re ire de tang kuus iwɔ wo ɛli ne imɛmɛ mon da i bo wo iphɛ phɛ nang ɛnyi gha ivebhe da nang.”

iTin ne iBol ɛDɛ ɛKuk Ge

²¹ ɛYɛso gha ne tek ɛlɔ yɛghaa nggyɛ wo, ɛ phɛ ne ivel da ne ifɛ so cɛcɛk nɛ nigarang ne iTaya ne iSidɔn.

²² ɛDɛ ɛkuk ne iKaana gha ne ɛ so ɛlɔ yɛghaa nggyɛ wo, ne wuru ne ishwin ɛ bo, “ɛDaray, ɛNgɔn ɛDoda, san iyɔm nge, ɛlap nge so shasha, ikabyik ibebhe bok ɛbhɛ.”

²³ ɛYɛso gha ne shɛɛ nggbyak, sɔng ɛ yɔng ɛkɔn nang, iphɛ ɛlɛy ninɔn ne icwam ɛYɛso na ne phɛ ɛlɔ ɛbhɛ gha nibhɛ roo ɛbhɛ, nibhɛ ne yɔngɔ, “Yɛk ɛbhɛ ne nkiinɛ, ishwin ɛbhɛ da i tak njwi iyɔm.”

²⁴ ɛYɛso gha ne kyii nɛ, ɛ yɔngɔ, “Kɛ tom me ɛlɔ ninyi niSɛrɛla nɛ nibhɛ kɛ biisit to zɔng.”

²⁵ Ne se ɛkuk ka kɛ phok ɛlɛ wo, ne bhɛ cwi ne irway nggburuk ɛnu ɛyisɛ ɛYɛso gha, ɛ yaak ɛbhɛ, “ɛDaray, phyik me.”

²⁶ ɛYɛso gha ne kyii nɛ, ɛ yɔngɔ, “Sɔng phɛ kɛ jam mɛ n bo ire ninɔn de n nang nibabu na nang.”

²⁷ ɛKuk ka ne yɔngɔ, “iPhɛ so ɛlɛy ɛDaray yɔɔy, gbik ne phɛ ɛlɛy, nibabu na i ne re ntsɛk ne ire ɛkyɛɛ ne ijwee nibhɛ de.”

²⁸ ɛYɛso gha ne kyii ɛkuk ka nɛ, ɛ yaak ɛbhɛ, “ɛKuk, ɛ bok ìnang ne itin gbom! ɛKɔn na ne ɛ sim mo, yaa mɔn nɛ nɛ.” ɛLap ɛkuk ka ne shii te ɛken nɛ ne nten nɛ.

ɛYɛso gha kɛ Tes Ninyi gbom Niken

²⁹ ɛYɛso gha ne tek ɛlɔ yɛghaa nggyɛ wo, ɛ roos ɛmbambang ɛLing ne iGalili gha, ɛbhɛ wara dak ne ɛwarang, ɛ soos nɛ.

³⁰ ɛGbaang ne idira ninyi wo ne phɛ ɛlɔ ɛbhɛ, nibhɛ boos nilɔɔm, nɛ niwil, nɛ nigyamil, nɛ ningkpɔy, ne ɛbyin ninaa ne isha na, nibhɛ bhɛ teesek nibhɛ ɛnu ɛyisɛ ɛYɛso gha, ɛYɛso gha ne ji tes nibhɛ niken.

³¹ Kɛ ne sɛ ninyi na kɛ yaang ɛli nɛ ningkpɔy ya kɛ yaa bol lo, nigyamil la yaa hyel tsik ko, nilɔɔm ma yaa hyel lo, niwil la ne yaa wɛɛ wo, nibhɛ ne wum ɛnu zii. Nibhɛ ne yaa dɛp ɛTaanggbey niSɛrɛla yegha.

ɛYɛso gha kɛ Renɛ Ninyi Ninom Nwaas

³² ɛYɛso gha ne yel-le ninɔn ne icwam ɛbhɛ na ɛlɔ ɛbhɛ, ɛ yɔngɔ, “Nzi san iyɔm ninyi yɛnaa wo, daa ɛli nɛ nituk ka kɛ hɔn itwat nɛ nibhɛ ku so ɛbɛ wo nɛ njwɛɛn, sɔng nibhɛ kɛ ne re ɛkɔn nang. Sɔng nzi ne sim nzɛ yɛk nibhɛ ne nkiinɛ kpyak kang, nibhɛ yaa yung bhɛ taasek gap.”

³³ Ninɔn ne icwam ɛbhɛ na ne yaak ɛYɛso yegha, “Njwɛɛn naa le ne ire de ɛbii ndɔ ɛhay yɛghaa wo ne phɛ yaa hɔn idira ninyi yɛdee woo?”

³⁴ ɛYɛso gha ne phom nibhɛ ɛ yɔngɔ, “iVɛrɛdi ifɛ maaghee ne ɛ bok ɛn noo?” Nibhɛ ne kyii nɛ, nibhɛ yɔngɔ, “iFɛ ɛniitaa nɛ izing ncɛncɛt.”

³⁵ ɛYɛso gha ne yɛk idira ninyi de nɛ nibhɛ sooset ne ivel.

³⁶ Ne ɛ bo ivɛrɛdi ɛniitaa da gbik ne izing ngge, ɛ tɔɔrek ɛTaanggbey ye irway ihwala, ɛ kpɛl, ɛ naas ninɔn ne icwam ma, nibhɛ ne ma ji bhɛ naas idira ninyi de.

³⁷ Nibhɛ ne re nibhɛ sighisiy. ɛTsim mɛ ɛlɛy, ninɔn ne icwam ma ne tang ɛbyin nɛ nibhɛ yɛk ne isap ɛniitaa hyɔrɔ.

³⁸ Ninyi na nɛ nibhɛ kaa re ire yɛdee nggyɛ wo kaa ne hɔn ninom nwaas, kang nɛ nikuk nɛ ninɔn.

³⁹ Kɛ ne sɛ ɛYɛso gha kɛ yɛk ninyi na de nkiinɛ, ne ɛ ji lel ndɔ ne ikparak, ɛ phɛ ne ivel ne iMagadan.