ɛLuka 4 - ɛWee ne ìTsɛm iHywas

ɛShɛtan Kɛ Tɛɛrek ɛYɛso Ye

¹ ɛYɛso gha kaa ne tek iHywel ne iWurudun no ne iKabyik ɛTaanggbey de hyɔrɔ ndɔ ɛbhɛ. iPhɛ ne ji bo ɛbhɛ, iphɛ phɛ nɛ ndɔ ɛhay.

² Ɛ kaa ne bhɛ shɛɛ ɛnggyɛ wo, ɛ hɔn nituk nzuwubɔ nwaas, ɛShɛtan ne i tɛrɛk ɛbhɛ. Ndɔ nituk kɛnaa nggyɛ wo nang, sɔng ɛ kaa ne re ɛkɔn nang, ikpyak ne wum ɛbhɛ.

³ ɛShɛtan na ne yaak ɛbhɛ, “Wu ɛ soye ɛNgɔn ɛTaanggbey ya, ne ɛ hyere ikɛɛ yɛdee bɛ, iphɛ teye ire.”

⁴ ɛYɛso gha ne kyii ɛbhɛ nɛ, ɛ yaak ɛbhɛ, “Kɛ ku haa ndɔ ne ɛWee ne ibol ɛTaanggbey de i bo, sɔng ne ire zɔng ne ɛnyi gha yaa shɛɛ nɛ ɛken na nang.”

⁵ ɛShɛtan na ne bo ɛbhɛ ɛ wara nɛ dak, ɛ shii tɔɔl ɛbhɛ igbɔm ɛzay ba gbik.

⁶ Ne ɛ ji yaak ɛbhɛ, “Naa ne nang ngɛ igbɔm daa nikɔn nɛnaa wo gbik, ne iryat tɛdee wo gbik, daa ɛli ne kɛ ku nang me, nzɛ ne yɛɛ ne nang ɛnyi gha ne nggɛ sim.

⁷ Wu ɛ kɛ ne te ne ɛkuum ɛ re me ntsong, naa ne nang ngɛ gbik.”

⁸ ɛYɛso gha ne kyii nɛ, ne ɛ yaak ɛbhɛ, “Kɛ ku haa ndɔ ne ɛWee ne ibol ɛTaanggbey yo i bo, ‘Re ɛTaanggbey mo gha ntsong ngga, ɛbhɛ zɔng ne aa re ɛbhɛ ntsong ngga.’ ”

⁹ ɛShɛtan na ne bo ɛYɛso yegha ɛ phɛ nɛ ne iYɛrushɛlɛm ɛbhɛ wara nɛ daa ɛco ne iDeng nga, ɛ ji yaak ɛbhɛ, “Wu ɛ soye ɛNgɔn ɛTaanggbey ya, ne ɛ le ɛbɛ wo ɛ taay ndɔ ne ivel.”

¹⁰ Daa ɛli ne kɛ ku haa ndɔ ne ɛWee ne ibol ɛTaanggbey yo i bo, “Aa yɛk niMalɛka ɛbhɛ nɛ, nibhɛ kyɛngɛse yɛ, nibhɛ ra yɛ.

¹¹ Nibhɛ ne phyii say yɛ, kyap, ndɔ nibo nibhɛ, ɛli ne hame icwa mo yaa hale ikɛɛ.”

¹² ɛYɛso gha ne kyii nɛ, ɛ yaak ɛbhɛ, “Kɛ haa ndɔ ne ɛWee ne iBol ɛTaanggbey i bo, Sɔng ɛ tɛrɛk ɛDaray ɛTaanggbey mo gha nang.”

¹³ Kɛ ne sɛ ɛShɛtan na kɛ taal ɛ tɛɛsek ɛYɛso yegha, ne ɛ ji tek ɛbhɛ nyɛɛn.

ɛYɛso gha Kɛ Tsa ɛTomɛ Ɛbhɛ ne iGalili

¹⁴ ɛYɛso gha ne kyii ɛ phɛ ne iGalili de. iTo-ndiinday ne iKabyik ɛTaanggbey de kaa ne so ndɔ ɛbhɛ, ngka ɛbhɛ de ne ta shii shwalat ndɔ ɛgarang nga gbik.

¹⁵ Ne ɛ ji mɛmɛ ninyi nɛ ndɔ ne idee ne itsɔɔy nibhɛ ba; ninyi na ne jii naas ɛbhɛ ne ndiinday.

Ninyi ne iNazarat ta Kɛ Mbaray ɛYɛso Yegha

¹⁶ ɛYɛso gha ne phɛ ne iNazarat, ɛlɔ gha ne ɛ kɛ hɔn nɛ. Kɛ ne sɛ ɛTuk ne Wɛsɛ nibhɛ gha kɛɛ tuu nang, ɛYɛso gha ne bhɛ lel ndɔ ne ijwee ne itɔɔy nibhɛ wo, ɛli ne ɛ ku mɔn no, ne ɛ ji yilitsik aa tɔng ɛWee ne ibol ɛTaanggbey yo.

¹⁷ Nibhɛ ne nang ɛbhɛ, ɛWee ɛnɛbi ɛShaa wu te ɛ tɔng. ɛYɛso gha ne phaal ɛbhɛ ne ɛ sɛ ɛlɔ gha ne ɛ bo,

¹⁸ “iKabyik ɛDaray de so daa mee, daa ɛli ne ɛbhɛ kɛ kasa me, te n tɔng nihala ninyi ibol iyɛnɛng ngge. Ɛ kɛ ne tom me te n yaak ninyi na ne kɛ robhos so, wu yaa biisi nibhɛ. Wu yaa ne phaasel niwil la irwisɛ. Te n phyik ninyi na ne i kɛ nggbɛɛt to.

¹⁹ Te mɔng ninyi na wu nten nɛ kɛ tuu ne ɛDaray ya yaa phɔt ninyi ɛbhɛ na.”

²⁰ ɛYɛso gha ne ji cwaal ɛWee wo, ɛ nang ɛnyi ne wɛɛ ijwee ne itɔɔy yo ɛ ji soos. Ninyi na ne sit ɛbhɛ ne irwisɛ gbik.

²¹ Ne ɛ ji yaak nibhɛ, “iBol ne ɛWee yɛdee wo kɛ shwaak ghe izenge ɛli ne ɛ kɛ phok ɛn kɛ tɔng ngo.”

²² Ninyi na ne phok iyɛnɛng ɛbhɛ, nibhɛ yaang ɛkɔn ne kparat daa ne ivol iywɛnɛng ngga ne ɛ bol lo. Nibhɛ ne yaa phomos en nibhɛ bo, “Sɔng ɛngɔn ɛYisifu yeghaa wo nang nge?”

²³ ɛYɛso gha ne yaak nibhɛ, “Nzi yɛɛ aa boote ɛn mɛɛn ibol de ne iphɛ bo, ‘Te ɛhaa ne ihwal la te ito ɛbhɛ ɛken!’ Aa ne ta yaak ɛn mɛɛn wu te mɔn nikɔn ne kparat ta ndɔ ɛgarang nge gha, ne ɛ kɛ phok ɛn nggɛ mɔn ne ivel ne iKafanahum ma.”

²⁴ Ne ɛ hante nɛ, ɛ yaak nibhɛ, “Nzi tɔng nyini itin nɛ, sɔng i sim ɛnɛbi gha ɛgarang ɛbhɛ gha nang.”

²⁵ Ɛ ta yɔngɔ, “Phok ɛn mɛɛn! iPhɛ so itin nɛ! Nten ɛLiya de, nikusang nga kaa sonɛ gbom ndɔ niSɛrɛla de, nten de ne ɛlom ma kaa ne re ɛgarang nga ishay itat ne iphɛl ɛtaraa de, iyɔm be lel ɛgarang nga gbik ko.

²⁶ Gbik ne iphɛ ɛlɛy, sɔng ɛTaanggbey ya kaa ne tom ɛLiya yegha ɛlɔ ɛdɛ ɛbhɛ nang. Ɛ kaa ne tom ɛbhɛ ɛlɔ ɛkusang nga ɛgarang ne iZarefat ne ivel ne iSidɔn.

²⁷ ɛLɛy ne nten ɛLisha de dɔng. Nikparong nga kaa ne sos nɛ gbogbom ndɔ niSɛrɛla de. Sɔng ɛLisha gha kaa tul ivebhe ɛdɛ ɛbhɛ nang. Ɛ kaa ne yang tul ɛNaaman ne nɛ ne ɛ soye ɛnyi ne iSiriya.”

²⁸ Ne sɛ ninyi na nɛ nibhɛ sos ndɔ ne ijwee ne itɔɔy yo kɛ phok ɛlɛ wo nang, nibhɛ ne te njenjek.

²⁹ Nibhɛ ne wum ɛYɛso yegha, nibhɛ tobhos ɛbhɛ, nibhɛ bhɛ hɔn ɛtsim ɛgarang nga. Nibhɛ ne ji bhɛ wara nɛ daa ne igol de ne kɛ ryɔng ɛgarang nga nɛ wo nibhɛ sim tɛ nibhɛ sɛɛ top ɛbhɛ ndɔ ne izɛn de.

³⁰ ɛYɛso gha ne shii yɔng ywet ɛ roke ɛceree nibhɛ, ɛbhɛ phee, ɛ hyel.

ɛYɛso gha Kɛ Tul niPhoo ndɔ ɛNyi

³¹ iPhɛ ɛlɛy, ɛYɛso gha ne phɛ ɛgarang ne iKafanahum, ne ɛ so ne ivel ne iGalili. Kɛ ne sɛ ɛtuk ne wɛsɛ niYahodawa na kɛɛ tuu, ɛYɛso gha ne bhɛ lel ndɔ ne ijwee ne itɔɔy nibhɛ wo, ɛ yaa mɛmɛ nibhɛ nɛ.

³² Nibhɛ ne yaang ɛkɔn ne kparat ndɔ ne ivol ɛbhɛ da, daa ɛli ne ifɛ so ivol ne igbɔm.

³³ ɛDɛ ɛnyi gha nɛ niphoo so ndɔ ɛbhɛ kaa ne ma so ndɔ ne ijwee ne itɔɔy yo. ɛNyi yɛghaa nggyɛ wo ne ta ikun ne izɔlɔs nziinzay, ɛ yɔngɔ,

³⁴ “Aa! iKyee ne ɛ sim njwii nɛɛ, ɛYɛso ne iNazarat? Ɛ yɛɛs ne bees njwii naa? Nzi ku yɛɛ ɛnyi gha ne ɛ so; ɛ so ɛnyi ɛTaanggbey ne kɛ tul kang.”

³⁵ ɛYɛso gha ne sit niphoo na ne ɛbung, ɛ yaak nibhɛ, “Cwaal ɛnu mo! Wuru ndɔ ɛnyi yegha wo!” ɛPhoo gha ne kabhare ɛnyi gha, ɛ pheng ne ivel ɛyisɛ ninyi na; ɛ ji wuru ɛ tek ɛbhɛ. Sɔng ɛ yang phok ɛbhɛ ikpom mang.

³⁶ Ninyi na gbik ne yaang ɛkɔn ne kparat. Nibhɛ ne yaa bol ndɔ nibhɛ, nibhɛ bo, “Ji so ɛya ivol ba woo? iVol ɛbhɛ ba so ivaa ne igbɔm, ifɛ ne bok ihwet; Ɛ kɛ boote ne ikpabyik ivebhe, ifɛ kɛ ne wuru.”

³⁷ Ngka ɛYɛso de ne shwalat ndɔ ɛgarang nga gbarang.

ɛYɛso gha kɛ Tes Ninyi Gbom Niken

³⁸ ɛYɛso gha ne tek ijwee ne itɔɔy yo, ɛ phɛ ne ijwee ɛSimɔn. Ndɔm kaa ne bok ɛgyinɛ ɛkuk ɛSimɔn negha gbom, nibhɛ ne mɔng ɛYɛso yegha ibol lɛ.

³⁹ ɛYɛso gha ne phɛ, ɛbhɛ kyinak cɛcɛk ɛlɔ ne laal ɛkuk ka, ɛ yaak ndɔm ba wu te mpɛ tek ɛbhɛ, mpɛ ne shii tek ɛbhɛ. ɛKuk ka yilitsik, ɛ mɔn nibhɛ ire.

⁴⁰ Kɛ ne sɛ iroy kɛ hooy, ninyi na ne tang ninaa ne ishwa na ihywee-ihywee, nibhɛ bhɛ naas ɛYɛso yegha. ɛYɛso gha ne i dad ɛrɔngɔ ne iwɔ ɛbhɛ ne ɛ shii te ɛken.

⁴¹ niPhoo na ne ma wuusi ndɔ ninyi na gbom. Nibhɛ ne i banga ikpun, nibhɛ bo, “Ɛ soyɛ ɛNgɔn ɛTaanggbey!” ɛYɛso gha ne sit niphoo na ne ɛbung, ɛ ring nibhɛ ne bol lɛ, daa ɛli nɛ nibhɛ yɛɛ ɛli ne ɛYɛso gha so ɛKiriti gha.

ɛYɛso gha kɛ Sanga iBol ɛTaanggbey ndɔ ne iDee ne iTsɔɔy

⁴² Kɛ ne sɛ ihwɛlɛ kɛ wuru, ɛYɛso gha ne phɛ ɛlɔ gha ne hame ɛnyi sonɛ. Ninyi na ne yaa tɔk ɛbhɛ, kɛ ne sɛ nibhɛ bhɛ sɛ ɛbhɛ, sɔng nibhɛ ne sim ɛbhɛ nɛ ɛ hyel nang.

⁴³ ɛYɛso gha ne yaak nibhɛ, “iPhɛ so nggbinggbing ma mbɛ tɔng iBol iYɛnɛng ne igbɔm ɛTaanggbey de ndɔ nihak nigarang, daa ɛli ne iphɛ ne ɛTaanggbey ya kɛ tom me nɛ wo.”

⁴⁴ iPhɛ ɛlɛy, ɛYɛso gha ne leesel ndɔ ne idee ne itsɔɔy ba ne ifɛ sos ne ivel ne iYahudiya, ɛ sanga ɛnu ne ibol ɛTaanggbey ya.