ɛLuka 18 - ɛWee ne ìTsɛm iHywas

iBol ne Bol ne ɛTaanggbey tang Te Kpos

¹ ɛYɛso gha kaa ta tɔng ninɔn ne icwam ɛbhɛ na idɛ ibol ne igɔrɔp be ne iphɛ yaa mɛmɛ nibhɛ nɛ ɛli nibhɛ yaa ku i bol ne ɛTaanggbey tang nibhɛ te kpos.

² Ɛ kaa yaak nibhɛ, “ɛDɛ ɛgarang nga, ɛdɛ ɛhaa ne bol ɛshara gha kaa ne sonɛ ne hame ɛ kaa bok ɛnik ɛTaanggbey ɛ ta sang i bok ɛnyi ɛkɔn.

³ ɛDɛ ɛkuk ne izuk ka kaa ne so ɛgarang ngeghaa nggyɛ wo. ɛKuk kɛghaa nggyɛ wo kaa ne maa kyisi ɛlɔ ɛnyi gha, ɛɛ roro ne ɛbhɛ ɛ bok ɛbhɛ, ‘Nang me ɛkɔn na ne ɛ soye ɛhaa nge ndɔ ne ibol nge de ne ɛhaa ne iphup nge gha.’ ”

⁴ “ɛHaa ne bol ɛshara gha ne bo nten ɛ mbaray tang wɛɛ ibol ɛkuk ge. ɛTsim mɛ ne ɛ ji yɔngɔ, ‘Nzi yɛɛ sɔng N bok ɛnik ɛTaanggbey yang, sɔng nzi ne bok ɛnyi ɛkɔn nang,

⁵ daa ɛli ne ɛkuk kɛghaa wo ne tak me iyɔm be, naa ne nang ɛbhɛ ɛkɔn na ne ɛ so ɛhaa ɛbhɛ gha, aa yung te me n te kpos ne ɛbhɛ!’ ”

⁶ ɛDaray ya ne ji yaak nibhɛ, “Yung phok ɛn ivol ɛhaa ne bol ɛshara gha ne ɛ sang bok ɛnik ɛTaanggbey yo ɛli lɛɛ!

⁷ Yaa ne mɔn ɛli ɛTaanggbey ya sang nang ninyi ɛbhɛ na ne ɛ kɛ ku kasa wo, nɛ nibhɛ san ɛbhɛ ishwin da ne ɛtuk ka ne igbey yo ɛkɔn na ne ɛ so ɛhaa nibhɛ ghaa? Aa maa shɛɛ tang phyik nibhɛ naa?

⁸ Nzi tɔng nyini, aa nang nyini ɛbhɛ na nikɔn nɛ nibhɛ so ninaa nibhɛ na dodooy. Sɛ́ ne sɛ ɛNgɔn ɛNyi gha kɛ bhɛ kyii, ɛ sɛ ne sɛ ɛhaa ne ìnang ne itin ndɔ ɛzay ya bɛ?”

iBol ɛFarasii ne ɛHaa ne Saasel iJam ne iVel

⁹ ɛYɛso gha ne ta bol daa ne ito ninyi na nɛ nibhɛ tɔɔsek itso nibhɛ da, nibhɛ ta i bɛɛs nigwaa nibhɛ na ndɔ ne ibol ne igɔrɔp pɛdee bɛ,

¹⁰ Ɛ kaa yɔngɔ, Nidɛng ninyi na ifaa kaa phɛ ndɔ ne ideng nibhɛ phɛɛs ne boote ne ɛTaanggbey, ɛdɛng kaa ne so ɛFarasii ɛdɛng ne so ɛhaa ne saasel ijam ne ivel.

¹¹ “ɛFarasii gha ne kyinak tsik, ɛ tɔɔk ito ɛbhɛ, ɛ boote ne ɛTaanggbey ya ɛ yɔngɔ, ‘ɛTaanggbey, N bok irway ihwala ne igyɛ. Sɔng nzo te ɛbyin ninyi na nang. Sɔng nzi ne hyel ɛyi nang; sɔng nzi ne luk ɛnyi nang. Sɔng nzi ne sang hyel cik ndɔ ne ikpii ne tom ɛyɛl nge nang. Sɔng ne nzo te ɛhaa ne saasel ijam ne ivel lɛghaa nggyɛ wo nang!

¹² Nzi bo nituk ifaa ndɔ ne isaati de, nzi kuma. Nzi ne naas ihop idaan ndɔ nikɔn ɛnduwubɔ ne n bok gbik.’ ”

¹³ “ɛHaa ne saasel ijam ne ivel la ne kyinak kyakyak ne ɛnu ne idɛng nga. Ɛ see ito ɛbhɛ ne ivel. Ɛ habhare ibɔ ɛbhɛ gɛy, Ɛ ji roo ne ɛTaanggbey ya ɛ yɔngɔ, ‘ɛTaanggbey, san iyɔm nge, nzo ɛhaa ne ɛfɔt.’ ”

¹⁴ ɛYɛso gha ne ji yaak ninyi na, “Nzi tɔng nyini itin nɛ, ndɔ ninyi ifaa yɛnaa wo, ɛhaa ne saasel ijam ne ivel la kaa ne hyil le ɛ so ɛnyi ɛcik ɛnu ɛyisɛ ne ɛTaanggbey ya, sɔng ɛFarasii gha nang. Gbik ɛnyi gha ne ɛ kɛ tɔɔk ito ɛbhɛ de, yaa ne laasek ɛbhɛ, ɛhaa ne ɛ kɛ ne tɔmɔsek ito ɛbhɛ de yaa ne tɔɔk ɛbhɛ.”

ɛYɛso gha kɛ Sit Ninɔn niShɛrɛng ne ɛWɛng

¹⁵ Ninyi na kaa yɛɛset nɛ ninɔn nishɛɛrɛng ɛlɔ ɛYɛso gha te ɛ dad nibhɛ, ɛ sit nibhɛ ne ɛwɛng. Kɛ ne sɛ ninɔn ne icwam ɛYɛso na kɛ yaang ɛlɛ wo, nibhɛ ne yaa nep ninyi na.

¹⁶ ɛYɛso gha ne yel-le ninɔn na ɛlɔ ɛbhɛ, ɛ yɔngɔ, “Tek ɛn ninɔn nishɛɛrɛng nga nibhɛ yɛɛs ɛlɔ nge gha. Sɔng ɛ ring ɛn nibhɛ nɛ wo nang, daa ɛli ne iGbɔm ɛTaanggbey ba so ivaa ihywee ne ninyi de nɛ nibhɛ so tɛ ninɔn nishɛrɛng nga.

¹⁷ Naa tɔng nyini itin nɛ, ɛhiha ɛnyi gha ne ɛ kɛ sang say igbɔm ɛTaanggbey ba te ɛngɔn ɛshɛɛrɛng ngga, sɔng ɛ sɛ ne bhɛ sɛ lel nang.”

ɛDɛ ɛNyi ne iRyat Ta

¹⁸ ɛDɛ ɛndiinday niYahodawa na ne bhɛ sɛ ɛYɛso yegha, ɛ phom ɛbhɛ, ɛ yaak ɛbhɛ, “ɛKyɛɛ ne iCwam ɛyɛnɛng, ikyee ne nzɛ mɔn te nzɛ sɛ iken ne inat de daa mɛɛ?”

¹⁹ ɛYɛso gha ne yaak ɛbhɛ, “ɛYakɔn ɛbhɛ kɛ te ɛɛ bok wu nzo ɛyɛnɛng ngaa?” Wɛlɛng ɛnyi ne ɛ so ɛyɛnɛng, ɛTaanggbey zɔng ɛbhɛ so ɛyɛnɛng nga.

²⁰ “ˆƐ yɛɛ ɛn ɛkɔn na ne ikpii da bol: ‘Sɔng ˆɛ ra nzangas sang, sɔng ˆɛ phoo ɛnyi nang, sɔng ˆɛ hyel ɛyi nang, sɔng ˆɛ re gbaa ɛnyi nang, nang ɛkyɛɛ mo ne ɛgyinɛ mo ne ndiinday.’ ”

²¹ ɛNyi gha ne yaak ɛYɛso yegha, “Nggɛ ku roos ikpii yɛdaa wo gbik le ne ɛngɔn nge.”

²² Kɛ ne sɛ ɛYɛso gha kɛ phok ɛlɛ wo, ne ji ɛ yaak ɛbhɛ, “ɛKɔn ɛdaan ɛbhɛ kɛ ne ji mak kɛ, lɛbhɛl nikɔn mo na gbik, ˆɛ hosop nihala ninyi ijam mɛ, ˆaa ne sɛ iryat ɛdaa ne irywa. Te nɛ ji yɛɛs, ˆɛ roos me.”

²³ Kɛ ne sɛ ɛnyi gha kɛ phok ɛlɛ wo, ne ɛ bese irway; daa ɛli ne ɛ kaa bok iryat gbom.

²⁴ ɛYɛso gha ne yaang ɛli ne ɛ kɛ bees irywa ba, ne ɛ yɔngɔ, “iPhɛ bok nggbang gbom ɛhaa iryat ta lel ne igbɔm ɛTaanggbey ba!

²⁵ ɛTsak! iPhɛ so phyongka ɛlangkumɛ lel ne ibong ɛluula ne ɛhaa ne iryat ta yaa lel ne igbɔm ɛTaanggbey ba.”

²⁶ Ninyi na nɛ nibhɛ kɛ phok ɛlɛ wo ne phom ɛbhɛ, nibhɛ yɔngɔ, “ɛHay ne sɛ ne ji phɔt to daa mɛɛ?”

²⁷ ɛYɛso gha ne kyii nɛ ɛ yɔngɔ, “ɛKɔn na ne ɛ phyin ihwet ɛten ɛsii ba, ɛ so phyonka ɛlɔ ɛTaanggbey ya.”

²⁸ ɛBiturus sa ne shii yɔngɔ, “Njwi kɛ han nikɔn mos sa gbik njwii maa kungus sɛ!”

²⁹ ɛYɛso gha ne yaak nibhɛ, “Nzi tɔng nyini itin nɛ, gbik ɛnyi gha ne ɛ kɛ tek ijwee ɛbhɛ wo, nɛ ɛkuk ɛbhɛ gha, nɛ nigwaa ɛbhɛ na, nɛ nikyɛɛ ɛbhɛ na gbik nɛ ninɔn ɛbhɛ na, ɛlɔ ne ibol ne igbɔm ɛTaanggbey ba.

³⁰ Aa ne sɛ nikɔn na nɛ nibhɛ phyin ninaa ndɔ ɛzay yɛghaa wo, gbik ne iken ne inat ɛzay ya ne ɛ yaaso wo.”

ɛYɛso gha kɛ ta Boote iBol ne iKu Ɛbhɛ de Dɔng

³¹ ɛYɛso gha ne hɔwɔ ninyi ɛnduwubɔ nɛ nibhɛ ifaa na ne iwap ijwaan ɛ yaak nibhɛ, “Njwɛɛn phɛɛs ne iYɛrushɛlɛm. ɛNggyɛ wo ne yaa bhɛ shwaak nikɔn na gbik nɛ niNabawa na kaa ku bol daa ne ito ɛNgɔn ɛNyi de.

³² Sɛ bhɛ nang ɛbhɛ nɛ ninyi na ne hame nibhɛ so niYahodawa, nibhɛ ne bɛɛs ɛbhɛ, nibhɛ baasek ɛbhɛ nggbang, nibhɛ tuk ɛbhɛ ne ncwincway, nibhɛ hal ɛbhɛ, nibhɛ ne ji phoo ɛbhɛ.

³³ Ne sɛ ɛtuk ne itwat tɛ ne ɛ yilitsik ndɔ ne ikpuu ba.”

³⁴ Sɔng ninɔn ne icwam ma ne jung seng ibol lɛ nang. Kaa rɛɛ nibhɛ iphɛ sɔng nibhɛ ne seng ɛkɔn na ne ɛ tɔng nibhɛ nang.

ɛYɛso gha kɛ te ɛWil ne ɛ Roro ɛKen

³⁵ Kɛ ne sɛ ɛYɛso yungaa lel ne iYɛriko ɛdɛ ɛwil la, ne so ɛnggyɛ wo ɛ kɛ soos nkiinɛ, ɛ roro.

³⁶ ɛWil la ne phok izok ninyi de nɛ nibhɛ phebhe wo, ne ɛ phom ɛkɔn negha ne ɛɛ tes.

³⁷ Ninyi na ne yaak ɛbhɛ, “ɛYɛso, ne iNazarat ɛbhɛ ɛ phebhe.”

³⁸ ɛWil la ne kyangkey ɛ tɔɔk izɔlɔs, ɛ yɔngɔ, “ɛYɛso, ɛNgɔn ɛDoda, san iyɔm nge!”

³⁹ Ninyi na nɛ nibhɛ kɛ ho ɛyisɛ gha ne sit ɛbhɛ ne ɛbung nibhɛ yaak ɛbhɛ wu te ɛ kunggbyak, ne ɛ jung hante ne tɔɔk izɔlɔs, ɛ yɔngɔ, “ɛNgɔn ɛDoda, san iyɔm nge!”

⁴⁰ ɛYɛso gha ne kyinak, ɛ yɛk ngɛ wu te bo ɛbhɛ te yɛɛs nɛ. Ne sɛ ɛ kɛ bhɛ tuu cɛcɛk ne ɛYɛso gha, ɛYɛso gha ne phom ɛbhɛ, ɛ yaak ɛbhɛ,

⁴¹ “iKyee ne ɛɛ sim te nzɛ mɔn nɛ nɛɛ? ɛWil la ne yɔngɔ: “ɛDaray, nzi sim te nzɛ yaa wɛɛ.”

⁴² ɛYɛso gha ne yaak ɛbhɛ, “Ne ɛ yaa wɛɛ, ìnang ne itin mo de iphɛ kɛ teyɛ ɛken.”

⁴³ Nɛ nten nɛ, ne ɛ yaa wɛɛ ɛ ji yaa kungus ɛYɛso yegha ɛ tɔɔsel ɛTaanggbey irway ihwala. Kɛ ne sɛ ninyi na kɛ yaang ɛlɛ wo, nibhɛ ne ma yaa dɛp ɛTaanggbey yegha.