iKɔlɔsi 4 - ɛWee ne ìTsɛm iHywas

¹ Nyinɛn nikyɛɛ ne ijwee, boos ɛn nikpuru mon na cik, nang ɛn nibhɛ ɛkɔn na ne ɛ kɛ jam, daa ɛli ne ˆɛ yɛɛ ɛn ˆɛ ma bok ɛn ɛKyɛɛ ne ijwee gha daa ne irywa.

² See ɛn ito ne bol ne ɛTaanggbey ya, te ne ˆɛ shɛɛ ɛn ɛkanang ndɔ ne bol ne ɛTaanggbey ya, ˆɛ tɔɔsel ɛn irway ihwala.

³ Ma bol ɛn ne ɛTaanggbey ya ɛlɔ mos ne mang, te ɛTaanggbey ya phaal njwi ɛnu ne izuk ne tɔng ibol ɛbhɛ de, te njwi tɔng ibol igying ɛbhɛ de daa ɛKiriti gha. iBol igying ngɛdee wo iphɛ iphɛ kɛ te nzo ne nyang ge.

⁴ Bol ɛn ne ɛTaanggbey ya ɛli ne naa tɔng iphɛ wɛsɛrɛk, kancɛng ɛli ne iphɛ so.

⁵ Te ɛn ntsɛntsɛng ɛli ne ˆaa shɛɛ ɛn nɛ ninyi na ne hame nibhɛ so ɛn ninaa ne iroos sa. Gbik nten de ne ɛ kɛ sɛ ɛn, mɔn ɛn ɛtomɛ ne iphɛ.

⁶ Te ivol mon da jam byirik ɛli ne yaa phok iyɛnɛng ngɛ, te ne ˆɛ yɛɛ ɛn ɛli ne aa kyii ɛn ɛrɔngɔ ne ibol de ne kɛ phom nyini.

iKyili ne Taal Lɛ

⁷ ɛTikyikus yaa tɔng nyini ibol nge gbik. Ɛ so ɛgwaa mos ne njwii sim ɛbhɛ gbom, ɛnyi ne sɛ kyinak daa ne ibol ɛbhɛ, ɛtaay ɛtomɛ mos ndɔ ɛDaray ya.

⁸ ɛKɔn na ne ɛ kɛ te nggɛ tom ɛbhɛ ɛlɔ mon na nzi bo te ɛ tɔng nyini ɛli ne ncaang mos so, te ne ɛ te nyini itsɔngɔl gɛgɛy.

⁹ Ɛ sɛ yaaso gbik ne ɛNisimos ne ɛ soye ɛhaa ɛlɔ mon. Ɛ so ɛgwaa mos ne njwii sim ɛbhɛ gbom, ɛnyi ne sɛ kyinak daa ne ibol ɛbhɛ. Nibhɛ sɛ ne tɔng nyini gbik nikɔn na nɛ nibhɛ tes ɛbɛ wo.

¹⁰ ɛRisitakus ne njwi so ne nyang ge ɛbɛ wo ne ɛbhɛ i kyisi nyini. ɛLɛy ne ɛMarakus nɛ nibhɛ bok ɛgaay ɛdaan nɛ ne ɛBanabas ne mang. ɛMarakus sa ne nggɛ ku mɔng nyini ibol ɛbhɛ de, yaa ne sɛ ɛ kɛ yɛɛs so, te ne ˆɛ say ɛn ɛbhɛ ne ibɔ iphaa.

¹¹ ɛYɛsuwa gha ne i ta bok ɛbhɛ ɛYɔsitus sa i ma kyiisi nyini. Ninyi itwat tɛnaa wo nibhɛ bhɛ soye niYahodawa zɔng ndɔ ninaa nɛ nibhɛ mɔn ɛtomɛ ne igbɔm ɛTaanggbey ya ne mee wo. Nibhɛ kɛ laasek me irway gbom.

¹² ɛPafaras ne ɛ so ɛdaan ndɔ mon, ɛ ta soye ɛkpuru ɛYɛso ɛKiriti gha i kyiisi nyini. Ɛ kyangase ne bol ne ɛTaanggbey ya gbom ɛlɔ mon na te ɛ kyinak ɛn gɛgɛy ndɔ ne ìnang ne itin mon de, ɛ te ɛn hyɔrɔ ndɔ nikɔn na ne ɛTaanggbey ya sim gbik, wɛlɛng ito irway.

¹³ Mee ne ito nge nggɛ nang ishɛɛda wu ɛPafaras sa i sɔ nggbang gbom ɛlɔ mon na nɛ ninyi ne iLɔdakiya na gbik nɛ ninaa ne iHirapolis sa.

¹⁴ ɛLuka ne ɛ so ɛlighita ne njwii sim ɛbhɛ gbom, gbik ne ɛDimas nibhɛ kyiisi nyini.

¹⁵ Kyili ɛn mɛɛn nigwaa na ne iLɔdakiya de, gbik ne ɛNimpha gha, ne idira ninaa ne iroos de nɛ nibhɛ sɛmɛs se ne ijwee ɛbhɛ wo.

¹⁶ Yaa sɛ kɛ tɔng nyini ɛwee yɛwoo wo, tɛ ne ˆɛ tom ɛn idira ninaa ne roos ne iLɔdakiya na nɛ nibhɛ ma bhɛ tɔng. Nyinɛn no ne mang ne ˆɛ ma tɔng ɛn ɛwee ne iLawudɔkya wo ne mang.

¹⁷ Yaak ɛn ɛCipus sa wu te ɛ kyii ne ihywɛɛ ɛbhɛ, ɛ taal ɛtomɛ gha ne ɛDaray ya kɛ nang ɛbhɛ wo.

¹⁸ Mee ɛBulus, nzi haa kyiisi yɛdaa wo ne iwɔ nge. Sɔng ˆɛ te ɛn bap wu nzo ne nyang ge nang. Te izɛɛng ɛTaanggbey shɛɛ ne nyinɛn. Ɛɛy.