iKɔlɔsi 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛBulus ne ɛ so ɛngɔn ne tom ɛYɛso ɛKiriti lenɛ ne icwas ɛTaanggbey gbik ne ɛgwaa mos ɛTimɔti.

² Ɛbhɛ phɛɛs ɛlɔ ninyi ɛTaanggbey nɛ nibhɛ so ne iKɔlɔsi, nigwaa mos ndɔ ɛKiriti, nɛ nibhɛ so sɛ kyinak daa ne ibol nibhɛ. Te izɛɛng ɛKyɛɛ njwɛɛn ɛTaanggbey gbik ne irway ne laal ɛbhɛ shɛɛ ne nyinɛn.

ɛBulus sa kɛ Tɔɔrek ɛTaanggbey ye iRway iHwala

³ Njwii tɔɔsel ɛTaanggbey ye ne ɛbhɛ ɛ so ɛKyɛɛ ɛDaray njwɛɛn ɛYɛso ɛKiriti gha irway ihwala, gbik nten de ne njwii bol ne ɛbhɛ daa mon no.

⁴ Daa ɛli ne njwi kɛ phok ibol ne ìnang ne itin mon de ne ɛYɛso ɛKiriti gha gbik ne ishwim ba ne ɛ bok ɛn daa ninyi ɛTaanggbey ya.

⁵ Daa ɛli ne ìnang ne itin mon de so daa nikɔn na ne ɛ kɛ yɛk ɛn ne irway ne kɛ tek nyini nɛ daa ne irywa. Ɛ kaa tsa ɛ phok ɛn ibol nikɔn nɛdee wo ndɔ ne ibol ne itin de ne iphɛ so ibol iyɛnɛng ngge.

⁶ iBol iyɛnɛng ngɛdee wo kɛ yɛk ishwɛɛ iywɛnɛng. iPhɛ i ne ta hanas ne shwalat tɛ ndɔ ɛzay ya gbik ɛli ne iphɛ kaa mɔn ndɔ mon no nten de ne ɛ kaa tsa ɛ phok ɛn ibol ne izɛɛng ɛTaanggbey de, ɛ ta seng ɛn ɛli ne iphɛ so wo.

⁷ ˆƐ kɛ phok ɛn ibol ne izɛɛng ɛTaanggbey de ɛlɔ ɛPafaras ne njwii sim ɛbhɛ, ɛtaay ɛtomɛ mos, ɛ so sɛ kyinak daa ne ibol ɛbhɛ ndɔ ɛtomɛ ɛKiriti gha. Ɛ kaa ne mɔn ɛtomɛ gha ne ncwincway mos gbik.

⁸ Ɛbhɛ ɛ kɛ ne tɔng njwii ibol ne ishwim ba ne ɛ bok ɛn no ne iKabyik ge kɛ nang nyini wo.

⁹ iPhɛ phɛ kɛ te, kaa sɛ ɛtuk ka ne njwi kɛ phok ibol mon de, sɔng njwi kɛ ne kɔɔng nge i bol ne ɛTaanggbey ya ɛlɔ mon na nang. Njwii roro ne ɛTaanggbey ya wu te ɛ yɛk nyini ne ntsɛntsɛng ne iKabyik ɛbhɛ hyɔrɔ, te iphɛ te ˆɛ seng ɛn ɛkɔn na ne ɛ sim.

¹⁰ Te ne lenɛ ɛlɛy, ˆɛ shɛɛ ɛn ishwɛɛ da ne ifɛ so kancɛng ne ivaa ninaa ne roos ɛDaray yegha, ifɛ nang ɛDaray yegha irway ihwala. Te ishwɛɛ mon da ne tɔɔrek nikɔn niyɛnɛng ndɔ nitomɛ na gbik, ˆɛ raras ɛn ndɔ ne seng ɛTaanggbey yegha.

¹¹ Te ɛTaanggbey te nyini itsɔngɔl gɛgɛy ne ihwet da ne ifɛ le ne ndiinday ɛbhɛ, ɛli ne ˆaa yɛɛ ɛn ne rop ɛn iku, ˆɛ bo ɛn ɛbɔk ndɔ ne irway ihwala daa ne nikɔn na nɛ nibhɛ i tes so.

¹² Nzi bol ne ɛTaanggbey ya te ˆɛ tɔɔsel ɛn ɛTaa yegha irway ihwala daa ɛli ne ɛbhɛ kɛ te njwɛɛn kɛ hɔn sɛ ma yɛk ne ihop njwɛɛn ne isha de ne kɛ ryɔng ninyi ɛbhɛ na nɛ, nɛ nibhɛ so ndɔ ne igbɔm iwɛwɛy da.

¹³ Ɛ kɛ tul njwɛɛn ndɔ ne igbɔm igbyik ɛ yɛɛs ne njwɛɛn ndɔ ne igbɔm ɛNgɔn ɛbhɛ ne ɛ sim.

¹⁴ ɛNgɔn na ne kɛ lenɛ ne ɛbhɛ i say njwɛɛn, njwɛɛn sɛ iphɔrɔt, kaabi kɛ hana njwɛɛn ne ɛfɔt njwɛɛn no.

ɛYɛso ɛKiriti gha Phyin Gbik

¹⁵ ɛKiriti gha soye izazurum ɛTaanggbey de ne hame i yɛɛ ne yaang ne irwisɛ. Ɛbhɛ soye ɛngɔn ɛkɔɔn ndɔ nikɔn na ne kɛ ryɔng ngo gbik.

¹⁶ Daa ɛli ne kɛ lenɛ ne ɛbhɛ i ryɔng nikɔn na gbik, nikɔn ɛdaa ne irywa nɛ ninaa ndɔ ɛzay, nɛ nikɔn na ne i yaang nɛ ninaa ne hame i yaang. Kɛ lenɛ ne ɛbhɛ i ryɔng ikpabyik, ne igbɔm ne i yaang ne igbɔm ne hame i yaang, nɛ nigɔm mɛ. Gbik nikɔn na ne kɛ ryɔng ngo kɛ lenɛ ne ɛbhɛ te i nang ɛbhɛ ne ndiinday.

¹⁷ ɛKiriti gha ku sonɛ ɛyisɛ nikɔn na gbik, ɛbhɛ ɛ kɛ ne wum nikɔn na gbik.

¹⁸ ɛKiriti gha ɛbhɛ so ito ne idira ninaa ne roos de, nibhɛ ne soye ibek ɛbhɛ. Ɛbhɛ so ɛyisɛ yɛ, ɛbhɛ ne ɛ ta so ɛyisɛ yɛ ndɔ ninaa ne yilitsik ne ikpuu da, te ɛbhɛ teye ɛyisɛ ndɔ nikɔn na gbik.

¹⁹ Daa ɛli ne iphɛ so ɛTaanggbey yegha ɛkɔn ne irway ihwala ɛ shɛɛ ndɔ ɛYɛso gha hyɔrɔ ne iTaanggbey ɛbhɛ.

²⁰ iPhɛ so ɛTaanggbey yegha ɛkɔn ne irway ihwala ɛ kyii nɛ nikɔn na ne ɛ kɛ ryɔng ngo gbik ɛlɔ ɛbhɛ lenɛ ne ɛNgɔn na. Kaabi kɛ lenɛ nɛ neyi na ne ɛNgɔn na kɛ lok daa ne ihon, ɛ kyii ne ìtsɛm ndɔ nikɔn na ne ɛ kɛ ryɔng ngo ne ɛbhɛ, nikɔn gbik, ninaa ɛzay nɛ ninaa ɛdaa ne irywa.

²¹ ˆƐ kaa tsa ˆɛ so ɛn kyakyak ne ɛTaanggbey ya, ˆɛ so ɛn nyini ninaa ne iphup ɛbhɛ lenɛ ne icwas ivebhe nɛ nikɔn nibebhe ne ˆɛ mɔn ɛn.

²² ɛlyilyɛghaa wo, ne lenɛ ne iku ne ibek ɛKiriti de ne iphɛ soye inwam ba nɛ neyi na, ɛTaanggbey ya kɛ ne te ˆɛ te ɛn nyini nitaay ɛbhɛ. ɛKiriti gha kɛ ne phɛ ne nyinɛn, ˆɛ so ɛn kang, wɛwɛy tang ɛkɔn ne tok ɛnu ɛyisɛ ɛTaanggbey ya.

²³ iPhɛ so nggbinggbing ˆɛ re ɛn ɛnu ɛyisɛ ndɔ ne ìnang ne itin mon de te ˆɛ kyinak ɛn nting daa ne itin nɛdee wo. Sɔng ɛ sim ɛn i sungki nyini, ˆɛ hana ɛn iyɛk ne irway yɛdaa wo ne ˆɛ kaa sɛ ɛn nten de ne ˆɛ kaa phok ɛn ibol iyɛnɛng ngɛdee wo nang. iBol iyɛnɛng ngɛdee wo ne kɛ sanga ndɔ nikɔn na ne kɛ ryɔng ngo, ne mee ɛBulus sa nggɛ te me ɛhaa ɛtomɛ yɛwo.

ɛTomɛ ɛBulus sa ndɔ ne iDira Ninaa ne iRoos De

²⁴ ɛlyilyɛghaa wo, ne n bok irway ihwala ɛlɔ ne nggbang ngga ne nzi sɔ ɛlɔ mon no. Daa ɛli ne yaa lenɛ ne nggbang ngɛdaa wo n shwaak ɛkɔn na ne ɛ kɛ mak ndɔ ne nggbang ngga ne ɛKiriti gha kaa sɔ ɛlɔ idira ninaa ne roos de nɛ nibhɛ soye ibek ɛbhɛ de.

²⁵ ɛTaanggbey ɛbhɛ kɛ kasa me te n te me ɛkpuru ne idira ninaa ne roos sa. Ɛ kɛ tom me te n tɔng nyini ibol hyɔrɔ ɛbhɛ de.

²⁶ iBol lɛdee wo kaa so gying ɛlɔ ninyi ne izam-izam gbom, ɛLyilyɛghaa wo kɛ ne ji phaal ninyi ɛTaanggbey ya nɛ.

²⁷ iCwas ɛTaanggbey da ne so tɛ ninyi ɛbhɛ na seng wu ɛkɔn ɛgying ngɛghaa wo ne ɛ soye iryat de ɛ bok ne ndiinday de ma so ɛhaa ninyi na ne hame nibhɛ so niYahodawa na. ɛKɔn ɛgying ngɛghaa wo ne so ɛlɛ, ɛKiriti gha so ndɔ mon, ˆɛ sɛ ne sɛ ɛn ihop ne ito-ndiinday ɛbhɛ de.

²⁸ iPhɛ ɛlɛy, njwii ne tɔng ninyi na gbik ibol ɛKiriti de, njwii sin ninyi na itoro, njwii mɛmɛ nibhɛ nɛ ndɔ ne ntsɛntsɛng ne ɛTaanggbey kɛ nang njwii, te njwi nang ɛTaanggbey yegha ɛrɔngɔ hyɔrɔ tang ɛkɔn ne tok ndɔ ne ìtsɛm nibhɛ de ne ɛKiriti gha.

²⁹ ɛKɔn nɛghaa wo ɛbhɛ kɛ te nzi luu me, nzi kyangas me ne ihwet da ne ɛKiriti gha i naas me. iHwet da ne ifɛ mɔn ɛtomɛ ndɔ me wo.