2 ɛBiturus 3 - ɛWee ne ìTsɛm iHywas

ɛTuk ne bhɛ Kyii ɛDaray Ya

¹ Nigwaa nge ne nzi sim, ɛwee ne ifaa yɛwoo wo ne nzi haa nyini nɛ. Ngge ne haa nyini ifɛ gbik te n taate nyini nɛ te ɛ tas ɛn ihywee ne icwas da ne ɛTaanggbey ye i sim ne irway mon gbik.

² Nzi sim te ɛ sɛ taate ɛn ne ivol da nɛ ninabawa ne ile ɛTaanggbey ya kaa tɔng nyini wo gbik ne ikpii ɛDaray da ne ɛ so ɛHaa ne Phɔt ta kaa bol ɛnu ninɔn ne tom ma ne ɛ kaa tom nyini nɛ wo.

³ Tsa ˆɛ seng ɛn iphɛ ɛlɛ, sɛ́ sɛ nten ɛtsim be, nidɛng ninyi na nɛ nibhɛ so ninaa ne bɛɛs sɛ ne wuru nɛ nibhɛ so ninaa ne roos ihyop igywebhe ne ibek zɔng.

⁴ Nibhɛ yɔngɔ, “Nzo ɛYɛso gha kaa yaak nyini wu sɛ bhɛ kyii nang? Ne ɛ so ɛbii? niKyɛɛ-niKyɛɛ njwɛɛn na kaa ku kus ne ile, nikɔn na ku tɔ ɛli ne nɛ nibhɛ kaa ku so ne ile ne tum ɛzay de, sɔng ɛkɔn kɛ hyereey nang.”

⁵ Ninaa ne bol ɛlɛ wo i yɛɛ nibhɛ mbaray wu ɛTaanggbey ya kaa ryɔng ɛzay ya ne ile de lenɛ ne ibol ɛTaanggbey. Kaa tul ivel ɛzay da ndɔ inɛn, ifɛ ne so ɛceree inɛn da.

⁶ Ne ta so inɛn da ne ɛTaanggbey ya kaa phoo ne ɛzay ya nten de ne ɛgbaang ne inɛn da kaa reey yo.

⁷ Ne ta so ibol ɛTaanggbey idaan nɛ iphɛ kɛ tek irywa wo ne ivel da i hyep ne igboo wo. Kɛ tek irywa wo ne ivel da i hyep ne ɛtuk ne hyɛ ɛshara gha ne sɛ phoo ninyi na nɛ nibhɛ sang ɛnik ɛTaanggbey.

⁸ Nigwaa nge ne nzi sim, sɔng nɛ te ɛn bap ne bol lɛdee bɛ nang. Ɛlɔ ɛTaanggbey ya, ɛtuk ɛdaan na so te ishay ɛnom ɛdaan; ishay ɛnom ɛdaan de ne ma so te ɛtuk ɛdaan.

⁹ Nidɛng i bo wu ɛTaanggbey ya so hyɔl ne shwaak ibol de ne ɛ kɛ ku sim-mɛ wo. Sɔng iphɛ ne so ɛlɛy nang. ɛTaanggbey ya bok ɛbɔk ne nyinɛn, ɛ sim te ɛrɔngɔ sɛ san ɛbɔk. Sɔng ɛ sim te ɛnyi ɛdaan sɛ ku nang.

¹⁰ ɛTuk ne bhɛ kyii ɛDaray ya sɛ ne yɛɛs dirik te ɛhaa ɛyi. ɛTuk kɛghaa nggyɛ wo, ɛgbaang ne izok sɛ ne wungare, irywa wo sɛ ne birit ne, gbik nikɔn na ne kɛ ryɔng ndɔ ɛzay ya nɛ ninaa ne kɛ ryɔng daa ne irywa wo sɛ́ ne re igboo. ɛZay ya nɛ nikɔn na nɛ nibhɛ sonɛ ndɔ yɛwo sɛ́ ne birit.

¹¹ Daa ɛli ne sɛ ne bees nikɔn na gbik ɛlɛ wo, iphɛ kɛ ne jam mɛ ɛ sɛ te ɛn nyini iya ihywee ninyi daa mɛɛ? iPhɛ kɛ jam mɛ ɛ sɛ tul ɛn nyini kang ɛ te ɛn ninyi ninaa ɛTaanggbey.

¹² Shɛɛ ɛn ishwɛɛ ne has irway ɛTuk ɛTaanggbey ya, te ɛ ma yung mɔn te ˆaa yɛk ɛn nɛ ɛtuk kɛ yɛɛs dodooy. ɛTuk ka ne i sɛ yɛk irywa wo ne igboo wo, ɛtuk ka ne zuzuk ko sɛ te nikɔn na ne kɛ ryɔng ndɔ ɛzay ya gbɛlɛt to.

¹³ Kɛ ne lenɛ ne ɛTaanggbey ya kɛ ku sim-mɛ wo, njwɛɛn kɛ ne yaa hyep ɛzay ɛphas ne irywa ifas ɛlɔ gha ne icik sɛ ku i shɛɛ nɛ zɔng.

¹⁴ iPhɛ ɛlɛy, nigwaa nge ne nzi sim, ɛli nɛ ɛɛ ne hyep ɛn ɛtuk kɛghaa nggyɛ wo, ne ɛ mɔn ɛkɔn na ne aa yɛ ne mɔn ɛn te ɛ shɛɛ ɛn ɛnu ɛyisɛ ɛTaanggbey ya wɛwɛy tang ɛkɔn ne rip, te ne ɛ bok ɛn irway ne laal ne ɛnu ɛyisɛ ɛbhɛ gha.

¹⁵ Seng ɛn iphɛ ndɔ ne irway mon wu ɛDaray njwɛɛn na bok ɛbɔk ka daa ɛli ne ɛ sim tɛ ninyi sɛ iphɔrɔt. ɛLɛ wo ne ɛgwaa njwɛɛn ɛBulus sa kaa ne ma haa nyini nɛ ndɔ ne ishweng ngga ne ɛTaanggbey kɛ nang ɛbhɛ.

¹⁶ Ɛlɛ wo ne ɛBulus sa i bol ndɔ ne iwee ɛbhɛ da gbik ne i sɛ ɛhaa daa nikɔn nɛnaa wo. Ndɔ ne iwee ɛbhɛ da, nidɛng nikɔn na ne sonɛ nɛ nibhɛ bok nggbang ne seng. Nibhɛ nɛ ninaa ne sang seng ɛkɔn na nɛ nibhɛ so kyɔkyɔt, tang iling ngge i hyeem ibol lɛ wo. ɛLɛ wo nɛ nibhɛ ne ta hyeem ɛbyin ne iWee ne iBol ɛTaanggbey de. Nibhɛ ne hɔ ito nibhɛ iku.

¹⁷ iPhɛ ɛlɛy, nigwaa nge ne nzi sim, daa ɛli ne ɛ ku yɛɛ ɛn ɛlɛ wo, ne ɛ shɛɛ ɛn ɛkanang, ɛlɔ nɛ imɛmɛ ne irywɛɛk ne ninaa ne sang roos ikpii da yaa yung hɔ ihywɛɛ mon nibhɛ te nyini ɛ ho ɛn.

¹⁸ Yang raras ɛn ndɔ ne izɛɛng gbik ne ishweng ɛDaray njwɛɛn ɛYɛso ɛKiriti, ɛhaa ne phɔt njwɛɛn. Te ne nang ɛbhɛ ne ndiinday ne inat! Ɛɛy.