2 ɛTimɔti 3 - ɛWee ne ìTsɛm iHywas

Nituk ɛTsim

¹ Seng ɛkɔn nɛghaa bɛ, sɛ sɔ nggbang gbom ndɔ nituk ɛtsim ma.

² Ninyi na sɛ teye ninaa ne sim ito nibhɛ. Nɛ ninaa ne sim ijam. Nɛ ninaa ne ton ito nibhɛ. Nɛ ninaa ne tɔɔsek ito, nɛ ninaa ne towos ninyi. Nɛ ninaa ne bɛɛs nikyɛɛ. Nɛ ninaa ne sang tɔɔl irway ihwala daa ɛkɔn ne kɛ nang nibhɛ. Nɛ ninaa ne hame nibhɛ kɛ tul en kang.

³ Nɛ ninaa ne sang tɔɔl ishwim. Nɛ ninaa ne boos ninyi ne irway. Nɛ ninaa ne bees ninyi irywɛɛk. Nɛ ninaa ne sang wum ito nibhɛ. Nɛ ninaa ne tɔk irywen. Nɛ ninaa ne mbaray iyɛnɛng.

⁴ Nɛ ninaa ne re ihel. Nɛ ninaa sang icwas. Nɛ ninaa ne hal ɛgyɛy. Nɛ ninaa ne sim ɛnggɔnggɔɔt ɛzay iphɛ phyin ɛli nɛ nibhɛ sim ɛTaanggbey ye.

⁵ Nibhɛ sɛ tɔɔsel kpas tɛ nibhɛ soye ninaa ɛTaanggbey nibhɛ ne kyii mbaray ihwet da ne ifɛ yaa phyik nibhɛ ne roos ɛTaanggbey yegha byirik. Sɔng ɛkɔn byinki yɛnɛ ninyi yɛnaa nggyɛ wo nang.

⁶ iHywee ninyi yɛdee nggyɛ wo i talane nibhɛ leesel ne idee ninyi tɛ nibhɛ luk nikuk nɛ nibhɛ so kyɔkyɔt ne ɛfɔt kɛ sɔ ito nibhɛ, ihyop igywebhe ta bok ihwet daa nibhɛ.

⁷ iHywee nikuk kɛnaa nggyɛ wo i saghe ne mɛmɛ nɛ nikɔn niphas cɛcɛɛy, gbik ne iphɛ ɛlɛy, sɔng nibhɛ kɛ ne seng itin de nang.

⁸ Te ɛli nɛ ne ɛYanes ne ɛYamberes kaa yɛk iphup be ne ɛMuusaa gha, ɛlɛy nɛ ninyi yɛnaa nggyɛ wo ne bok iphup be ne itin de. Nibhɛ soye ninyi nɛ nibhɛ bok nggyuk, ìnang ne itin nibhɛ da so buu.

⁹ Sɔng ninaa ne nggyuk kɛnaa nggyɛ wo yaa ne ma yung phɛ kyakyak nang. Te ɛli ne kaa shii seng ibol ninyi ifaa yɛdaa nggyɛ wo, ɛlɛy ne yaa ne ma seng iwamang nibhɛ de kpas.

iKpɛng ne Kɛ Kpɛng ɛTimɔti Ye

¹⁰ iGyɛ ne ɛTimɔti, ˆɛ kɛ roos imɛmɛ nge da, ˆɛ yɛɛ ɛli ne nzi shɛɛ, ˆɛ yɛɛ ɛkɔn na ne nzi sak me nɛ, ne ìnang ne itin nge, ne ɛbɔk nge, ne ishwim nge gbik ne irop iku nge.

¹¹ ˆƐ ta yɛɛ nggbang ngga ne ɛ ɛmpyep pa ne ɛ kɛ sɛ me ivel iNtakiya da, ne iKɔnyum de, ne iLisitira de ne itak iyɔm ba ne nggɛ bone ɛbɔk ka. Gbik ne iphɛ ɛlɛy ɛTaanggbey ɛbhɛ kɛ ne phɔt me ndɔ ne nggbang ngɛ da nggyɛ wo.

¹² ɛTsak, gbik ɛhiha ɛnyi ne ɛ sim te aa shɛɛ ihywee ne ishwɛɛ da ne ɛTaanggbey ya sim ndɔ ɛYɛso ɛKiriti gha, aa ne sɔ nggbang.

¹³ Ninyi nibebhe na nɛ ninaa ne irywɛɛk ka ya ne i hanas ne bees en. Yaa i luk nibhɛ, nibhɛ ne maa luk ninyi na.

¹⁴ iGyɛ ne ɛTimɔti wo, ne ˆɛ re ɛnu ɛyisɛ ne roos ɛkɔn na ne ˆɛ kɛ mɛmɛ nɛ, ˆɛ nang ne itin nɛ ne itin. Daa ɛli ne ˆɛ yɛɛ ninyi na ne ˆɛ kɛ mɛmɛ nɛ ɛlɔ nibhɛ.

¹⁵ Taate nɛ ɛli ɛ ku yɛɛ iBol ɛTaanggbey de ne ile ne ɛngɔn mo de. ɛWee ne iBol ɛTaanggbey ne ɛbhɛ yɛɛ ne teyɛ ɛ te ntsɛntsɛng, ɛbhɛ hyel ne nggyɛ ndɔ ne ɛnkiinɛ ne sɛ iphɔrɔt da lenɛ ne ìnang ne itin de ndɔ ɛYɛso ɛKiriti gha.

¹⁶ Gbik ivol ndɔ ne ɛWee ne iBol ɛTaanggbey yo so ifɔng ɛTaanggbey da. iFɛ kɛ jam, ifɛ i mɛmɛ nɛ, ifɛ gbaat, ifɛ nep, ifɛ niim ndɔ ne ihywel cik.

¹⁷ Te ɛnyi ɛTaanggbey ya te hyɔrɔ, ɛ ryɔng nge te ɛ mɔn gbik nitomɛ niyɛnɛng nga.