2 iTasɔlɔnika 2 - ɛWee ne ìTsɛm iHywas

ɛSang-Phok

¹ Nigwaa en daa ne ibol ne bhɛ kyii ɛDaray njwɛɛn ɛYɛso ɛKiriti de gbik ne ibol ne tumɛ njwɛɛn te bhɛ sɛme ne ɛbhɛ wo, njwii roro ne nyinɛn,

² sɔng ɛ shii te ɛn buruburu ɛ kpaate ɛn ndɔ ne irway mon daa ne idɛ bol de ne iphɛ kɛ yaak nyini wu ɛtuk ɛDaray ɛYɛso gha kɛ ku tuu nang. Yaa rɔk ɛdɛ ɛnyi gha sɛ boote ɛlɛ wo, hang ndɔ ne ibol yɔɔ, hang ndɔ ne ikabyik yɔɔ, hang ndɔ ne ɛwee yɔɔ, ɛ yɔng wu iphɛ le ɛlɔ mos.

³ Sɔng ɛ sim ɛn ɛdɛ ɛnyi luk nyini ne idɛ ɛnkiinɛ wo kang nang. Daa ɛli ne sɔng ɛtuk ɛDaray ya yaa yɛɛs nang, sɛ yang kyi tsa ne isang-phok ge nyɛɛn, ɛgɔm nisang-phok ka ne tɔɔrek ghe, ɛhaa ne ɛ ku ryɔng sɛ́ bees gbik ko.

⁴ Ɛ sɛ yɛk iphup ne gbik ɛkɔn na ne i yeres ɛbhɛ ɛtaanggbey, ne ɛ yinɛ ito ɛbhɛ te ɛ phyin gbik ɛkɔn na ne i yeres ɛbhɛ ɛtaanggbey gbik nɛ nikɔn na ne i re nibhɛ ntsong ngga. Ɛ sɛ́ ma yung bhɛ lel ɛ soos ndɔ ne iDeng ɛTaanggbey de, ɛ yɔng, wu yee i soye ɛTaanggbey ya.

⁵ ˆƐ kɛ te ɛn bap ɛli ne nggaa ku tɔng nyini ibol lɛdee wo nten de ne nggaa sonɛ nyinɛn no naa?

⁶ ɛLyilyɛghaa wo, ˆɛ yɛɛ ɛn ɛkɔn na ne ɛ ring ɛbhɛ ne yɛɛs so. iPhɛ so sɛ phaal ɛbhɛ nten de ne kɛ tek ɛbhɛ nɛ.

⁷ iHwet ne isang-phok kɛdaa wo kɛ ne ku tsa ɛtomɛ gha gying. Gbik ne iphɛ ɛlɛy, ɛnyi gha ne ɛbhɛ ɛ ring ɛbhɛ nɛ wo yaa ne maa ring ɛbhɛ nɛ nyɛɛn ɛTaanggbey ya kyi ba ɛnyi yɛ.

⁸ Nɛ nten nɛ ne ji phaal ɛsang-phok kɛghaa wo, ɛDaray ɛYɛso gha sɛ ne phoo ɛbhɛ ne ifɔng ɛnu ɛbhɛ. ɛDaray ya ne ta bees ɛsang-phok ka ne iwɛwɛy ne ito-ndiinday ɛbhɛ de ɛtuk ne yɛɛs ɛbhɛ gha.

⁹ Sɛ seng ɛsang-phok ka daa ɛtomɛ ne ihwet ɛShɛtan. Ɛ sɛ mɔn nikɔn ne kparat, ne ikyarakyut gbik nɛ nikɔn nɛ nibhɛ so ishoo yɛ ihywee-ihywee.

¹⁰ Ɛ sɛ luk ninaa nɛ nibhɛ so ne ɛnkiinɛ ne bees se. Sɛ bees nibhɛ daa ɛli nɛ nibhɛ kɛ mbaray sim itin de nibhɛ phɔrɔt.

¹¹ iPhɛ ɛlɛy ɛTaanggbey ya kɛ tom nibhɛ ne ɛgbaang ne iluk tɛ nibhɛ nang ne itin nɛ ne irywɛɛk ga.

¹² Te ne ji lenɛ ɛlɛy i hyɛ gbik ninyi na nɛ nibhɛ kɛ shɛɛ tang nang ne itin nɛ ne itin de, nibhɛ yang phok yɛnɛng ne ibebhe de ɛshara ne nggbang.

Kyinak ɛn Gɛgɛy

¹³ iPhɛ so nggbinggbing njwi tɔɔrek ɛTaanggbey ye irway ihwala daa mon nigwaa en ne ɛDaray ya i sim mo. Daa ɛli ne ɛTaanggbey ya kaa ku kasa nyini te ɛ te ɛn nyini ninaa ɛyisɛ yɛ ne kɛ phɔt. Ɛ kɛ mɔn ɛlɛ wo lenɛ ne ɛtomɛ ne iKabyik ge ne iphɛ kɛ tul nyini kang gbik ne ìnang ne itin mon ndɔ ne itin de.

¹⁴ ɛTaanggbey kɛ yel-le nyini ɛbɛ wo, lenɛ ne iBol iYɛnɛng ngge ne njwi kɛ tɔng nyini wo te ɛ sɛ ɛn ito-ndiinday ɛDaray ɛYɛso ɛKiriti njwɛɛn de.

¹⁵ iPhɛ ɛlɛy nigwaa en, kyinak ɛn gɛgɛy, te ɛ wum ɛn nikɔn na ne njwi kɛ mɛmɛ nyini nɛ wo. Ninaa ne njwi kɛ tɔng nyini ne ɛnu nɛ ninaa ne njwi kɛ haa nyini nɛ ndɔ ne ɛwee wo.

¹⁶ Te ɛDaray ɛYɛso ɛKiriti njwɛɛn na ne ito ɛbhɛ gbik ne ɛTaanggbey ya ne ɛ soye ɛKyɛɛ njwɛɛn na, ne ɛ kɛ sim njwɛɛn no, ɛ wɔrɔp njwɛɛn no, ɛ ta nang njwɛɛn iyɛk ne irway iywɛnɛng ngga, lenɛ ne izɛɛng ɛbhɛ de,

¹⁷ te nyini itsɔngɔl gɛgɛy, ɛ nang nyini ihwet ne mɔn nikɔn niyɛnɛng gbik ne bol ivol iywɛnɛng.