2 iKɔrɔntos 8 - ɛWee ne ìTsɛm iHywas

ìNang Ninaa ne Roos

¹ Nigwaa en, njwii sim te ɛ sɛ seng ɛn ihywee ne izɛɛng ngge ne ɛTaanggbey ya kɛ nang idira ninaa ne roos ne iMakyidɔniya na.

² Nibhɛ kaa so ndɔ ne nggbang gbom, nibhɛ so nihala hyahyak, gbik ne iphɛ ɛlɛy, irway ihwala nibhɛ da ne te nibhɛ nang ìnang ngga ne irway walala.

³ Nggɛ nang ne itin nɛ nibhɛ kaa nang kancɛng ne ihwet nibhɛ, iphɛ phyii bhɛ phee ihwet tɛ. Nibhɛ kaa nang ne irway ijwaan, sɔng kaa yɛk nibhɛ nɛ nggbinggbing nang.

⁴ Nibhɛ kaa roo njwii wu te njwi tek nibhɛ tɛ nibhɛ ma yɛk ne iwɔ ndɔ ne ìnang ngga ne i naas te phyik ninaa ne roos ne ivel ne iYahudiya da nɛ wo.

⁵ Nibhɛ ne ma yung nang iphɛ phyin ɛkɔn na ne njwi kaa i tas. Nibhɛ kaa ne tsa nibhɛ nang ɛDaray yegha irway nibhɛ nyɛɛn, nibhɛ ne ma ji nang njwi irway nibhɛ da ɛli ne ɛTaanggbey ya i sim.

⁶ Ne sɛ njwi kɛ yaang ɛlɛ wo, njwi ne roo ɛTitus segha ne ɛbhɛ ɛ kɛ ku tsa ɛtomɛ ne ìnang ngɛghaa wo, te ɛ re ɛnu ɛyisɛ.

⁷ Ɛ ku so ɛn ninaa ɛyisɛ yɛ ndɔ nikɔn na gbik, ndɔ ne ìnang ne itin nɛ, ndɔ ne ivol, ndɔ ne ishweng, ndɔ ne irway ne phyik, gbik ne ishwim ne ɛ tɔɔsel ɛn njwii. iPhɛ ɛlɛy, njwii ne sim te ɛ sɛ ta so ɛn ninaa ɛyisɛ yɛ ndɔ ne izɛɛng ne ìnang ngɛdee wo.

⁸ Sɔng nzi bok nyini wu nggbinggbing nang, nzi yang sim te nzɛɛ tɛrɛk nyini nɛ nihak te n seng ihywee ne ishwim ba ne ɛ bok ɛn.

⁹ Ɛ yɛɛ ɛn izɛɛng ɛDaray njwɛɛn ɛYɛso ɛKiriti de. Ɛ kɛ soye ɛhaa ne iryat, ɛ kɛ ne teye ɛhala daa ne igboo mon. iHala ɛbhɛ de kɛ ne te nyini ɛ te ɛn nyini ninaa ne iryat.

¹⁰ iBol de ne naa mɔng ninyi wo iphɛ dee lɛ, iphɛ kɛ jam mɛ ɛ taal ɛn ɛkɔn na ne ɛ kɛ tsa ɛn ne iwal de, sɔng ibol ne ìnang ngge ne ɛ kɛ nang ɛn no zɔng nang, ɛ kaa bok ɛn iyɔk kɛ.

¹¹ iPhɛ ɛlɛy, ne ɛ taal ɛn ɛtomɛ gha ne ihywee ne irway da ne ɛ kɛ tsa ɛn nɛ wo te ɛ mɔn ɛn kancɛng ne ihwet mon.

¹² Wu ɛ bok ɛn irway ne nang ìnang ngga, ɛTaanggbey ya yaa ne say ìnang mon da kancɛng ne ɛkɔn na ne ɛ bok ɛn, sɔng daa ɛkɔn na ne sang bok ɛn nang.

¹³ Sɔng nzi bo sɛ tek nidɛng phyongka i ji kat nyini nɛ nikɔn na nang, nzi sim te sɛ mɔn kancɛng ne ihwet ɛrɔngɔ.

¹⁴ ɛLyilyɛghaa wo, ɛ bok ɛn nikɔn na gbom ɛli ne aa phyik ɛn nibhɛ nɛ. Sɛ ne ma sɛ nten de nibhɛ bok gbom, nibhɛ ne ma phyik nyini nɛ. ɛLɛy nikɔn na ne i hyel kancɛng.

¹⁵ Te ɛli ne kɛ ku haal ndɔ ne ɛWee ne iBol ɛTaanggbey yo i bo, “Ɛnyi gha ne ɛ kɛ tumɛ gbom mo, sɔng iphɛ kɛ ne kat ɛbhɛ nang, ɛnyi gha ne ɛ kɛ ne tumɛ ncɛt to, sɔng iphɛ kɛ ne taasek ɛbhɛ nang.”

ɛTitus nɛ Nitaay

¹⁶ Njwi bok irway ihwala ne ɛTaanggbey ne ɛbhɛ kɛ nang ɛTitus se irway ne phyik nyini ɛli ne nggaa ku i has irway.

¹⁷ Sɔng ɛTitus sa kaa ne sim ibol ne yɛɛs ɛlɔ mon de daa ɛli ne njwi kɛ roo ɛbhɛ zɔng nang, ɛ kaa sim daa ɛli ne ɛ kaa ma ku bok iyɔk kɛ.

¹⁸ Njwi kɛ ne tom ɛTitus segha nibhɛ nɛ ɛdɛ ɛgwaa gha ne ngka ɛbhɛ kɛ shwalat gbom ɛlɔ ne sanga ibol iyɛnɛng ngge ndɔ ninaa ne idira ninaa ne roos de.

¹⁹ Kang ne iphɛ ɛlɛy, ninaa ne roos sa kɛ ne ku kasa ɛgwaa yɛghaa wo te ɛ roos njwii ndɔ ɛtomɛ ne nang ìnang ngɛghaa wo ne njwii mɔn te i nang ɛDaray yegha ne ndiinday de, njwi ta tɔɔrek ɛli ne njwii sim njwi sɛɛ phyik ko.

²⁰ Njwi kɛ hyel ne ɛgwaa yɛghaa wo ndɔ ne ìnang ngɛdaa walala yɛdaa wo daa ɛli ne sɔng njwii sim sɛɛ yaa rip njwii nang.

²¹ iCwas mos da so, te njwi mɔn ɛkɔn na ne aa jam, sɔng ɛnu ɛyisɛ ɛDaray zɔng nang, gbik ne ɛnu ɛyisɛ ninyi.

²² Njwi kɛ ne tom ɛdɛ ɛgwaa gha nɛ niTitus se na; ɛhaa ne njwi kɛ tɛrɛk ɛbhɛ ndɔ nikɔn na gbom, njwii ne yɛɛ ɛ bok irway ne iphyik. ɛLyilyɛghaa wo, daa ɛli ne ɛ kɛ wɔl nyini, ɛ ne sim te aa phyik gbom.

²³ Ɛbhɛ ɛTitus sa so ɛhaa ne njwii mɔn ɛtomɛ gha ne ɛbhɛ te sɛ i phyik nyini. Nigwaa ifaa yɛnaa wo nɛ nibhɛ so ne ɛbhɛ wo, ninaa ne roos sa nibhɛ kɛ ne tom nibhɛ, ɛtomɛ nibhɛ gha i ne nang ɛKiriti ye ne ndiinday.

²⁴ iPhɛ ɛlɛy ne ɛ tɔɔrek ɛn ninyi yɛnaa wo wu ɛtsak ɛ bok ɛn ishwim. Ne ɛ ta tɔɔrek ɛn nibhɛ ɛkɔn na ne ɛ kɛ te njwii hal ɛgyɛy ya ne nyinɛn no, te idira ninaa ne roos de ne ma yaang wu iphɛ so ɛlɛy.