2 iKɔrɔntos 7 - ɛWee ne ìTsɛm iHywas

¹ Daa ɛli ne kɛ ku sim njwɛɛn nɛ nikɔn nɛnaa wo gbik ko nigwaa nge ne nzi sim, ne njwɛɛn kuus ito njwɛɛn daa nikɔn na nɛ nibhɛ aa te ibek njwɛɛn de ne irway njwɛɛn da yɛk ivebhe da, te njwɛɛn ku tul en kang lenɛ ne ɛnik ɛTaanggbey ne njwɛɛn bok.

ɛBulus sa Bok iRway iHwala

² Phaal ɛn njwii irway mon da. Sɔng njwi kɛ mɔn ɛnyi ɛkɔn ɛkpɛɛ nang, sɔng njwi kɛ ne phɔt ɛkɔn ɛnyi nang, sɔng njwi kɛ ne luk ɛnyi njwi say ɛkɔn ɛbhɛ nang.

³ Sɔng nggɛ boote ɛlɛ wo nzi bo nggɛ hyɛ nyini ɛshara nang. ɛLi ne nggaa ku mɔng nyini ɛyisɛ gha, ɛ so ɛn ndɔ ne irway mos, njwɛɛn yaa ne ku i shɛɛ ɛlɛ wo, hang iken yɔɔ, hang iku yɔɔ.

⁴ Nggɛ cwaak nyini ndɔ ne irway gbom, nzi ne ta hal ɛgyɛy ne nyinɛn. Ɛ kɛ te ɛn mɛɛn itsɔngɔl gɛgɛy. Gbik ne nggbang ngga ne njwɛɛn i sɔ wo, sɔng irway ihwala nge da ne bok ɛgak nang.

⁵ Ɛli ne njwi kaa yɛɛs ne ivel ne iMakyidɔniya de sɔng njwi kaa phɔng nang. Gbik ɛlɔ gha ne njwi kɛ hyereey yɛ ishisim ne sonɛ. Ninyi kaa cɔk njwii irway, ɛnik ne so njwii ndɔ ne irway.

⁶ ɛTaanggbey ya ne ɛbhɛ ɛ te nikyɔkyɔt ta itsɔngɔl de gɛgɛy yo kaa ne te njwii itsɔngɔl gɛgɛy lenɛ ne iyɛɛs ɛTitus.

⁷ Sɔng iyɛɛs ɛTitus da iphɛ phɛ kaa te njwi yɛk irway ihwala da zɔng nang. iPhɛ ta so daa ne ibol de ne ɛ kɛ tɔng njwii ɛli ne ɛ kɛ te ɛn ɛbhɛ itsɔngɔl gɛgɛy. Ɛ kɛ tɔng njwii ɛli ne ɛ sim ɛn te ɛ sɛ yaang ɛn mɛɛn, ne ɛli ne ɛ kɛ yɛk ɛn irway ishwii daa ɛkɔn na ne ɛ kɛ te; ɛ ta tɔng njwii ɛli ne ɛ bok ɛn cwacwat ne phyik me. iPhɛ phɛ kɛ te n bok irway ihwala da.

⁸ Wu ɛwee nge wo kaa bees nyini irway, sɔng nzi ne sap nang. Nggaa yang sap po ne ile, daa ɛli ne nggaa yaang ɛwee nge wo kɛ bees nyini irway, gbik ne iphɛ ɛlɛy ibees irway nge da kaa ne so ndɔ ne nten ncɛt.

⁹ Ɛlyilyɛghaa wo ne n bok irway ihwala, sɔng daa ɛli ne nggɛ bees nyini irway da nang, iphɛ yang so daa ɛli ne ibees irway mon da kɛ te ɛ san ɛn ɛbɔk. iBees irway mon da kaa so ɛli ne ɛTaanggbey i sim, iphɛ ɛlɛy sɔng njwi kɛ ne mɔn nyini ɛfɔt ndɔ ɛkɔn na ne njwi kɛ mɔn no nang.

¹⁰ iBees irway da ne ɛTaanggbey ya i sim mo i yɛɛs ne isan ɛbɔk, ifɛ nang iphɔrɔt. Sɔng ifɛ te ɛnyi yaa sap nang. iBees irway ɛzay da i ne yɛɛs ne iku.

¹¹ Yaang ɛn ɛkɔn na ne ibees irway da ne ɛTaanggbey ya i sim mo kɛ yɛk ndɔ ne irway mon da: Ifɛ kɛ te ɛ yɛk ɛn cwacwat ne hyere ishwɛɛ mon. Ifɛ kɛ te ɛ te ɛn njenjek, ɛ ta wum ɛn ɛnik. Ifɛ kɛ te ɛ yɛk ɛn ne irway, ɛ ta yel-le ɛn tsik ne ihwet. Ifɛ kɛ te ɛ yaa sim ɛn igbaat ne ifɛ kɛ jam. Daa nikɔn nɛnaa wo ɛtsak, ɛ kɛ ne tɔɔrek ɛn sɔng ɛ kɛ ben ɛn nang.

¹² Sɔng nggaa haa ɛwee yɛwoo nggyɛ wo nzi tas ɛnyi ne ɛ kɛ mɔn ɛfɔt nang, sɔng nggaa ma yung i tas ɛhaa ne kɛ mɔn ɛbhɛ ɛfɔt to nang. Nggaa yang haa te n tɔɔrek wɛsɛrɛk wu ɛTaanggbey ya i yɛɛ wu ɛ kɛ sim ɛn njwii gbom.

¹³ iPhɛ phɛ kɛ te itsɔngɔl mos de kɛ te gɛgɛy yo. Kang ne itsɔngɔl de ne kɛ te njwii nɛ gɛgɛy yo, izenge ɛlɛ njwi ne bok irway ihwala gbom daa ne ihywee ne irway ihwala da ne ɛTitus sa bok ko, daa ɛli ne gbik mon no ɛ kɛ phyik ɛn ne te ɛbhɛ itsɔngɔl de gɛgɛy.

¹⁴ Ɛli ne nggɛ tɔng ɛbhɛ wu nzi hal ɛgyɛy ya ne nyinɛn no, sɔng nggɛ ne sɔ ncwa nang. Ɛli ne gbik ɛkɔn na ne njwi kɛ tɔng nyini wo ɛ so itin nɛ wo, ɛlɛy ne hal ɛgyɛy mos da daa mon no kɛ ma teye itin nɛ ɛnu ɛyisɛ ɛTitus sa.

¹⁵ iShwim ba ne ɛTitus sa i sim nyini wo i hanas se nɛ gbom, i sɛ ɛ kɛ taate ɛli ne ɛ kaa sim ɛ roos ɛn ibol ɛbhɛ de, ɛli ne ɛ kaa say ɛn ɛbhɛ ndɔ ndiinday de ne ɛnik ko.

¹⁶ N bok irway ihwala hyɔrɔ, daa ɛli ne ɛ kɛ hɔn ɛn nzɛɛ wɔl ibol mon.