2 iKɔrɔntos 5 - ɛWee ne ìTsɛm iHywas

¹ Njwii yɛɛ, sɛ́ sɛ ipho yɛdee wo ne njwɛɛn sonɛ ndɔ ɛzay yɛghaa, kaabi ibek ge ne njwɛɛn bok ndɔ ɛzay yɛghaa wo, kɛ bees se; ɛTaanggbey ya ne ito ɛbhɛ sɛ ne ryɔng njwɛɛn ijwee daa ne irywa. Sɔng ɛten ɛsii bhɛ sɛ ryɔng ijwee yɛwoo nggyɛ wo nang, ifɛ sɛ soye ihoo ne inat.

² ɛLyilyɛghaa wo ne njwɛɛn so ne ibek ge, irway njwɛɛn i re, ifɛ has gbom te sɛɛ yɔng kɛ kyɛngɛ njwɛɛn ndɔ ne ijwee ɛdaa ne irywa yɛwoo nggyɛ wo.

³ Daa ɛli ne sɛ bhɛ yɛk njwɛɛn ne ivek ɛdaa ne irywa, sɔng njwɛɛn sɛ so te ikpabyik ne ifɛ hɔnɔ tang ivek nang.

⁴ I sɛ njwɛɛn so ndɔ ne ipho yɛdee wo, ibek ɛzay de, njwɛɛn i ne re irway, ne bok irway irighitik. Sɔng i bo njwɛɛn i sim te sɛ hosop njwɛɛn ne ibek ɛzay yɛdee wo nang, kwa, njwɛɛn i yang sim te sɛ yɛk njwɛɛn ne ihywee ne ibek ɛdaa ne irywa de, te ɛkɔn ne iken na wɔl ɛkɔn ne ku gha i sunu njwɛɛn.

⁵ ɛTaanggbey ya ne ito ɛbhɛ, ɛbhɛ kɛ ryɔng njwɛɛn ìsunu yɛdaa wo. Ɛ kɛ nang njwɛɛn iKabyik ɛbhɛ te njwɛɛn seng ncɛncɛng wu ɛ sɛ shwaak ɛkɔn na ne ɛ kɛ ku sim njwɛɛn nɛ wo.

⁶ iPhɛ phɛ kɛ te njwɛɛn bok irway nviit da cɛcɛɛy yo. Njwɛɛn i yɛɛ wu njwɛɛn so ndɔ ne ibek ɛzay yɛdee wo, njwɛɛn ne so kyakyak ne ijwee njwɛɛn no ne ɛTaanggbey ya kɛ ryɔng ngo.

⁷ Daa ɛli ne ishwɛɛ njwɛɛn da soye ivaa ne ìnang ne itin nɛ, sɔng ivaa nikɔn ne i yaang ne irwisɛ nang.

⁸ Ɛɛy! Njwɛɛn bok irway nviit, njwɛɛn i ta phyin sim te sɛɛ yɔng yaa hosobhe ne ibek ɛzay yɛdee wo bhɛ shɛɛ ne ɛDaray ya daa ne ijwee wo.

⁹ ɛKɔn na ne ɛ phyin gbik, njwɛɛn i phyin sim te ɛ sɛɛ phok iyɛnɛng njwɛɛn, hang ndɔ ne ibek ɛzay yɛdee wo yɔɔ, hang ndɔ ne idee ɛdaa ne irywa de yɔɔ.

¹⁰ Daa ɛli ne iphɛ so nggbinggbing njwɛɛn sɛ bhɛ kyinak ɛnu ɛyisɛ ɛKiriti gha te bol njwɛɛn ɛshara. ɛRɔngɔ sɛ ne bhɛ say ɛkɔn na ne ɛ so kancɛng ne ɛtomɛ gha ne ɛ kɛ mɔn ɛli ne ɛ kɛ so ndɔ ibek kɛdee wo. Hang ɛyɛnɛng ngɛ yɔɔ, hang ɛkpɛɛ yɛ yɔɔ.

ɛTomɛ ne Phyik Ninyi Tɛ Nibhɛ Tes en Nitaay ɛTaanggbey

¹¹ Daa ɛli ne njwii yɛɛ ɛkɔn na ne i bo wu te tel ɛnik ɛTaanggbey yo, iphɛ kɛ ne te njwii kyangase nɛ te njwii yaang njwi kɛ hɔ nidɛng ndɔ ne say itin ibol ɛTaanggbey de. ɛTaanggbey ya i yɛɛ ɛli ne njwi so, nzi ne ma wɛɛ te ɛ ma yɛɛ ɛn ndɔ ne irway mon ihywee ninyi de ne njwi so.

¹² Sɔng njwii sim njwi yaa ton ito mos ɛnu ɛyisɛ mon nang. Njwii yang sim te njwi sɛ mɔn ɛkɔn na ne aa te ɛ phok ɛn iyɛnɛng mos, te ɛ ji yɛɛ ne kyii ɛn ne ibol daa ninaa nɛ nibhɛ sim tɛ nibhɛ sɛɛ hal ɛgyɛy ya daa nikɔn na ne i yaang kang nikɔn na nɛ nibhɛ so ndɔ ne irway da.

¹³ Wu i wɛɛ te njwi kɛ te buruburu, njwi kɛ ne te buruburu wo te nang ɛTaanggbey ye ne ndiinday. Wu njwi ne so ndɔ ne ihywɛɛ mos, njwi ne sonɛ te iphɛ phyik nyini.

¹⁴ Gbik ɛkɔn na ne njwii mɔn, njwi mɔn ɛbhɛ daa ɛli ne ishwim ɛKiriti bok igbɔm daa mos. Daa ɛli ne njwii kɛ nang ne itin nɛ wu ɛKiriti gha kɛ ku ɛlɔ ninyi na gbik, iphɛ ɛlɛy ninyi na gbik kɛ ne ma kus ndɔ ɛbhɛ.

¹⁵ ɛKiriti gha kɛ ne ku ɛlɔ ninyi na gbik, te gbik ninaa nɛ nibhɛ bok iken de, sɔng nibhɛ tɔ shɛɛ ishwɛɛ ne ito nibhɛ nang, tɛ nibhɛ yang yaa shɛɛ ishwɛɛ ɛKiriti da ne ɛ kɛ ku ɛlɔ nibhɛ gha kyii ta yiisik ɛbhɛ ɛlɔ nibhɛ gha.

¹⁶ iPhɛ ɛlɛy sɔng njwɛɛn yaa ne tɔ wɛɛ ninyi na daa ne icwas ɛten ɛsii nang. ɛTsak, ne ile de njwɛɛn kaa i wɛɛ ɛKiriti yegha ɛlɛy sɔng ne ta tɔɔ wɛɛ ɛbhɛ ɛlɛy ɛlyilyɛghaa wo dɔng nang.

¹⁷ iPhɛ ɛlɛy, gbik ɛnyi gha ne ɛ so ndɔ ɛKiriti gha ɛ kɛ ne teye ɛnyi ɛphas, nikɔn nitɛl la kɛ ne phebhe ɛ kɛ ne teye ɛphas sɛ!

¹⁸ Gbik nikɔn nɛnaa wo ɛTaanggbey ya ɛbhɛ kɛ mɔn. ɛTaanggbey ya kɛ te njwɛɛn ne kaa soye ninaa ne iphup ɛbhɛ njwɛɛn tes en nitaay ɛbhɛ lenɛ ne ɛKiriti gha. Ɛ kɛ ne ma nang njwɛɛn ɛtomɛ ne phyik nihak ninyi nibhɛ tes en nitaay ɛbhɛ.

¹⁹ iBol mos de bo wu i lenɛ ne ɛKiriti gha ɛTaanggbey ya te ninyi na gbik nibhɛ tes en nitaay ɛbhɛ, sɔng ɛɛ ne tas ɛfɔt ninyi wo nang. Ɛ kɛ ne ta nang njwɛɛn ɛtomɛ ne tɔng ninyi na ibol ɛli ne aa te nibhɛ tes en nitaay ɛbhɛ na.

²⁰ iPhɛ ɛlɛy, njwi ne so ninyi ne ɛKiriti gha kɛ tom; ɛTaanggbey ya ne bol ne nyinɛn lenɛ ne njwit. Njwi roro ne nyinɛn ndɔ ne irywɛɛk ɛKiriti, sim ɛn te ɛTaanggbey ya hyere nyini te ɛ te nyini nitaay ɛbhɛ sɔng ninaa ne iphup ɛbhɛ nang.

²¹ Sɔng ɛKiriti gha kɛ ku mɔn ɛfɔt nang, gbik ne phɛ ɛlɛy, ɛTaanggbey ya kɛ ne bo ɛbhɛ te ɛhaa ne ɛfɔt, te ne lenɛ ne ɛKiriti gha njwɛɛn ne te cik ɛnu ɛyisɛ ɛTaanggbey ya.