2 iKɔrɔntos 4 - ɛWee ne ìTsɛm iHywas

iRyat ndɔ ne iRon ne iTsom

¹ iPhɛ ɛlɛy, daa ɛli ne njwii mɔn ɛtomɛ yɛghaa wo lenɛ ne isan iyɔm ɛTaanggbey, sɔng njwi aa ne tul irway nang.

² Njwi kɛ yang mbaray nikɔn ncwa na ne i rɛrɛs so, sɔng njwii iwul irywɛɛk nang, sɔng njwii hyeem ibol ɛTaanggbey de njwi tɔng nang. Njwii yang tɔng itin de wɛsɛrɛk, ɛTaanggbey i yɛɛ iphɛ ɛlɛy, gbik ninyi na ne yɛɛ wu iphɛ so itin nɛ ndɔ ne irway nibhɛ.

³ Wu ibol iyɛnɛng ngɛ de wo ne njwii sanga wo so gying, iphɛ ne so gying ɛlɔ ɛnyi gha ne ɛ so ne nkiinɛ ne iku.

⁴ ɛShɛtan na ne i re ɛbhɛ ntsong ngaa, ne ɛbhɛ ɛ so ɛTaanggbey ne izam mɛghaa wo ne ɛ phebhe wo kɛ cwaal ninaa nɛ nibhɛ kɛ sang nang ne itin nɛ wo irway, tɛ nibhɛ sang yaang iwɛwɛy ne ito-ndiinday ne iBol iYɛnɛng ɛKiriti de ne ɛbhɛ soye izazurum ɛTaanggbey de.

⁵ Sɔng njwii tɔng ibol ne ito mos nang, njwii yang tɔng ibol ɛYɛso ɛKiriti de njwii bo wu ɛbhɛ ɛ so ɛDaray, njwit to njwi ne ji so nikpuru mon lenɛ ɛYɛso gha.

⁶ ɛTaanggbey ya ne ɛ kaa yɔngɔ, “Te iwɛwɛy tol ndɔ gbyik,” ɛbhɛ kɛ ne te iwɛwɛy de i tol ndɔ ne irway mos da te ne i tol ninyi na, nibhɛ seng ito-ndiinday ɛTaanggbey de ɛyisɛ ɛKiriti gha.

⁷ Gbik ne iphɛ ɛlɛy, njwit to ne njwi bok iryat ne iKabyik kɛdee wo njwi ne so te iron ne itsom zɔng. Njwi kɛ te ɛlɛ wo te njwi tɔɔrek wu ɛTaanggbey ya ɛbhɛ bok ndiinday gbik, sɔng njwit nang.

⁸ Kɛ baasek njwii nggbang ihywee-ihywee, sɔng njwi kɛ ne te nɛ kpos nang. Njwii mɔɔng njwi yaa to irway, sɔng njwi ne tul irway nang.

⁹ Kɛ tak njwii iyɔm, gbik ne iphɛ ɛlɛy sɔng ɛTaanggbey ya kɛ ne te ne njwit bap nang. Kɛ hal njwii i bunga njwii ne ivel sɔng kɛ ne phobho njwii nang.

¹⁰ iZenge ne ihwɛlɛ, njwi so ɛnu ne iku te ɛYɛso gha, te sɛ yaang ihywee ne ishwɛɛ ɛYɛso da ndɔ ne ibek mos de ne iphɛ so idee ne ku de.

¹¹ Gbik ndɔ ne ishwɛɛ mos da, njwi so ɛnu ne iku ɛlɔ ne ibol ɛYɛso de, te sɛ yaang ishwɛɛ ɛYɛso da ndɔ ne ibek mos de ne iphɛ so idee ne iku de.

¹² iPhɛ phɛ kɛ te njwi so ɛnu ne iku gha te nyinɛn no ɛ sɛ ɛn iken de.

¹³ Kɛ ku haa ndɔ ne ɛWee ne iBol ɛTaanggbey yo i bo, “Nggɛ nang ne itin nɛ, iphɛ phɛ kɛ te nggɛ boote wo.” Daa ɛli ne njwi bok ikabyik ne ìnang ne itin idaan nɛ wo, njwi kɛ ne ma nang ne itin nɛ, iphɛ phɛ kɛ ne te njwii bol lo.

¹⁴ Daa ɛli ne njwii yɛɛ ɛli ne ɛTaanggbey ya kaa yiisik ɛDaray ɛYɛso yegha ndɔ ne ikpuu da. Ɛ sɛ ne ma yiisik njwɛɛn gbik ne ɛYɛso gha, ɛ yɛɛs ne njwɛɛn ɛnu ɛyisɛ ɛbhɛ gbik ne nyinɛn no.

¹⁵ Kɛ mɔn ɛlɛ wo gbik te iphɛ phyik nyini, sɛ ne sɛ izɛɛng ɛTaanggbey de i hanas ne sɛɛs ninyi na gbom nang, iphɛ ne teye ɛkɔn ne hanas tɔɔsel ɛTaanggbey ye irway ihwala gbom, te nang ɛbhɛ ne ndiinday.

iShwɛɛ Lenɛ ne ìNang ne iTin Nɛ

¹⁶ iPhɛ ɛlɛy, sɔng njwi kɛ ne tul irway nang. Gbik ɛli ne ibek mos sɛ de wo i bees se wo, ikabyik mos de ne tes se iphas sɛ izenge ne ihwɛlɛ.

¹⁷ Daa ɛli ne nggbang ncɛt tɛdaa wo ne mpɛ yaa sang phyɔngɔle wo yaa yɛɛs njwɛɛn ne ito-ndiinday ne inat gbom ne iphɛ phyin nggbang ngga ne njwii sɔ wo wu kɛ ten-nɛ.

¹⁸ Sɔng njwi kɛ ne sit irwisɛ mos da daa nikɔn na ne i yaang nang, njwi kɛ yang sit daa nikɔn na ne i sang yaang. Daa ɛli nɛ nikɔn na ne i yaang ngo so ninaa ne phee, ninaa ne i ne sang yaang ngo ne so ninaa ne inat.