2 iKɔrɔntos 3 - ɛWee ne ìTsɛm iHywas

Ninaa ne Mɔn ɛTomɛ ne iBol ne ìTsɛm iHywas

¹ Njwi yaa ne ji yaa ton ito mos see? Kwa! ɛByin ninyi na i tɔk te sɛɛ haa ɛwee nɛ ɛbhɛ yaa tɔɔrek ihywee de nɛ nibhɛ so, njwii ne tɔk ɛdɛng ɛlɔ mon naa? Hang yaa yang nang njwi ɛdɛng njwi yɛɛs nɛ ɛlɔ mon naa?

² Nzo nyinɛn no ne ito mon ɛ so ɛn nyini ɛwee mos so, ne kɛ haa ndɔ ne irway mos tɛ ninyi na gbik yaang nibhɛ ta i tɔng.

³ Ɛ kɛ tɔɔrek ɛn wu ɛ so ɛn ɛwee ɛKiriti lenɛ ne ɛtomɛ mos. Sɔng kɛ ne haa ɛwee yɛwoo wo ne ngkyi nang, kɛ yang haa ne iKabyik ɛTaanggbey ne iken. Sɔng kɛ ne haa daa ne ikpɛɛ ne sɛp te igbii nang, kɛ yang haa ndɔ ne irway ninyi.

⁴ Njwi kɛ boote ɛlɛ wo ne irway mos tɔrɔk daa ɛli ne njwi kɛ kyinak ndɔ ɛTaanggbey lenɛ ne ɛKiriti.

⁵ Sɔng njwi bok ɛkɔn ne njwi aa tɔɔrek wu ìyɛɛnɛ mos ne njwii mɔn ne ɛtomɛ yɛghaa wo nang, ìyɛɛnɛ mos da le ɛlɔ ɛTaanggbey.

⁶ Ɛbhɛ kɛ te njwi kɛ yɛɛ ne teye ninaa ɛtomɛ ne ibol ne ìtsɛm ihywas de ne kɛ rop po, izee ne sɔng i lenɛ ne ikpii ne kɛ haa nang, i yang lenɛ ne iKabyik, daa ɛli ne iKpii da ne kɛ haa wo i yɛɛs ne iku, iKabyik ge i ne nang iken.

⁷ Kaa haa iMɛmɛ ɛMuusaa da daa ne iKpɛɛ ne kɛ sɛp te igbii, ndiinday ɛTaanggbey kaa ne toolte nten de ne yaa nang iphɛ wo. iHywɛɛ ne itol da ne iphɛ kaa so ɛyisɛ ɛMuusaa gha kaa so idee ne iphɛ yaa phee, gbik ne iphɛ ɛlɛy iphɛ kaa ne toolte gbom ɛli ne hame ninyi niSɛrɛla na yaa yɛɛ ne wɛɛ ɛyisɛ ɛbhɛ gha. Wu iMɛmɛ yɛdaa wo ne iphɛ yɛɛs ne iku de kɛ yɛɛs ne ndiinday de ɛlɛ wo,

⁸ igbom ne ndiinday de ne iphɛ so idee ne iKabyik ge sɛ ne ji so ɛli daa mɛɛ?

⁹ Wu ɛkɔn na ne ɛ yɛɛs ne iku de kɛ sɛ ndiinday de, iphɛ ne so nggbinggbing ɛkɔn na ne ɛ yɛɛs ne cik ɛTaanggbey de ya phyin ne ndiinday de gbom.

¹⁰ ɛTsak, sɔng ndiinday ne ibol ne ìtsɛm itsɛl de ne kaa isim-mɛ wo tɔ ne ndiinday ɛlyilyɛghaa wo nang, wu kɛ ten iphɛ ne ndiinday ne ibol ne ìtsɛm ihywas de ne kɛ isim-mɛ wo.

¹¹ Wu ɛkɔn na ne aa phee wo kaa yɛɛs ne ndiinday de, ndiinday ɛhaa ne inat de yaa ne ji so ɛli daa mɛɛ?

¹² Daa ɛli njwɛɛn kɛ sit irwisɛ da daa ne ìtsɛm ihywas de, iphɛ kɛ ne te njwɛɛn tek irway njwɛɛn tɔrɔk.

¹³ Sɔng njwɛɛn so te ɛMuusaa gha ne ɛ kaa cwaal ɛyisɛ ɛbhɛ gha ne ɛtura wo, te ɛ ring niSɛrɛla na ne wɛɛ itol ɛyisɛ ɛbhɛ da ɛli ne iphɛ yaa taal le wo nang.

¹⁴ Kaa ne ku cwaal irway nibhɛ da. iZenge ɛlɛ, ɛtura yɛwoo wo ne ɛbhɛ ring nibhɛ ne seng itin de i ne sonɛ nten de nɛ nibhɛ tɔng ɛwee ne ìtsɛm itsɛl lo, daa ɛli ne i yɛɛ ne phaal ɛtura yɛ lenɛ ne ɛKiriti gha zɔng.

¹⁵ iZenge ɛlɛ, i sɛ i tɔng ɛwee ɛMuusaa wo, ɛtura yɛwoo wo ne cwaal irway nibhɛ da.

¹⁶ I ne sɛ ɛnyi gha ne ɛ kɛ hyereey ɛ yɛɛs ɛlɔ ɛDaray ya, yaa ne phaal ɛbhɛ ɛtura wo.

¹⁷ ɛDaray ya ɛbhɛ ne ɛ so iKabyik ge. ɛLɔ gha ne iKabyik ɛDaray de ne sonɛ wo, ninyi yɛ yaa ne sɛ ishwɛɛ ne ito nibhɛ.

¹⁸ Njwɛɛn no ne kɛ sang cwaal ɛyisɛ njwɛɛn na nang, njwɛɛn ne tɔɔsel ndiinday ɛDaray de, ne jii hyeem njwɛɛn te njwɛɛn te te ɛbhɛ. iHyeem ba ne hyeem njwɛɛn no ne hanas se ne ndiinday, ndiinday de ne iphɛ le ɛlɔ ɛDaray ya ne ɛ so iKabyik ge.