2 iKɔrɔntos 2 - ɛWee ne ìTsɛm iHywas

¹ Nggɛ bo ndɔ ne irway nge, sɔng nzi sim te nzɛ ta yɛɛs ɛlɔ mon na n bak nyini irway ishwii nang.

² Yaa sɛ nggɛ bak nyini irway ishwii da, ɛhay ɛbhɛ sɛ ne ji say me ne irway ihwala? Kyii ta so nyinɛn no ne nggɛ bak nyini irway ishwii da.

³ ɛKɔn na ne ɛ kɛ te nggaa haa nyini ɛwee yɛwoo nggyɛ wo nang daa ɛli ne sɔng nggaa sim ninyi na nɛ nibhɛ sɛɛ nang me irway ihwala da nibhɛ kyii bees me irway nang. Daa ɛli ne nzi yɛɛ wu n bok irway ihwala da, gbik mon aa ne ma bok ɛn irway ihwala ne mang.

⁴ Nggaa haa nyini nɛ wo nten de ne nggaa so ndɔ ne nggbang ne irway ishwii gbom nɛ niyilis. Sɔng nggaa mɔn ɛlɛ wo te n bak nyini irway ishwii nang, nggaa yang i sim te ɛ sɛ seng ɛn, ɛli ne nzi sim nyini ndɔ ɛkyukyum ne irway nge.

Te Hana ɛHaa ne ɛFɔt ta Nɛ

⁵ Wu ɛdɛ mon kɛ ne mɔn ɛkɔn ne irway ishwii, sɔng mee ne ɛ kɛ ne mɔn me nɛ nang, nɛ ne idɛ iwap pɛ ɛ kɛ mɔn nyini nɛ gbik. Sɔng nzi bol ɛlɛ wo te n phyingɛl nyini nɛ nang.

⁶ iGbaat da ne iday mon kɛ gbaat ɛnyi yɛghaa nggyɛ wo kɛ hɔn nɛ ɛlɛy.

⁷ ɛLyilyɛghaa wo, ne ɛ hana ɛn ɛbhɛ nɛ, te ɛ bol ɛn ne ɛbhɛ ɛli ne aa wɔrɔp ɛn ɛbhɛ, daa ɛli ne irway ishwii da yaa yung phyin ihwet ɛbhɛ.

⁸ iPhɛ ɛlɛy, nzi ne roro ne nyinɛn wu te ɛ hante ɛn ne tɔɔrek ɛn ɛbhɛ ishwim mon da.

⁹ Nggaa haa nyini ɛwee yɛwoo wo, te n phɔwɔ nyini te n yaang, hang aa sim ɛn ɛ roos ɛn iyɔngɔ nge da ndɔ nikɔn na gbik yɔɔ.

¹⁰ Gbik ɛnyi gha ne ɛ kɛ hana ɛn ɛbhɛ nɛ, nggɛ ne ma hana ɛbhɛ nɛ. Wu ɛdɛ ɛkɔn ne hana gha sonɛ ne ya hana wo, nggɛ ne ma hana. Nggɛ ne hana wo ɛnu ɛyisɛ ɛKiriti te iphɛ phyik nyini.

¹¹ Nggɛ ne hana wo, daa ɛli ne ɛShɛtan na yaa yung sɛ ikɛk ne luk njwɛɛn. Daa ɛli ne njwɛɛn i yɛɛ iluk ɛbhɛ da ncɛncɛng.

ɛKɔn na ne Ɛ kɛ Re ɛBulus segha iRway

¹² Kaa ne sɛ nggɛ phɛ ne iTurasa te mbɛ sanga iBol iYɛnɛng ɛKiriti de, nggaa ne bhɛ sɛ ɛDaray ya kɛ ku ryɔng me ɛlɔ yɛ.

¹³ Gbik ne phɛ ɛlɛy, sɔng irway nge kaa ne jung laal nang, daa ɛli ne sɔng nggaa bhɛ sɛ ɛgwaa nge ɛTitus segha ne iTurasa de nang. Ne n tek iTaruwasa de mbɛ ne iMakyidɔniya, mbɛ tɔk ɛTitus segha.

ɛKiriti gha Kɛ Re iTsom

¹⁴ Te ne dɛp ɛTaanggbey ye! Ɛbhɛ ɛ hyel ne njwit cɛcɛɛy ndɔ ɛlang ninyi na nɛ nibhɛ tɔɔsel irway ihwala ɛKiriti da ne ɛ kɛ re itsom be. Ɛ mɔn ɛtomɛ ne njwit njwi bhɛ sanga ibol ɛKiriti de nilɔ na gbik iphɛ ne ji shwalat te ɛnkyinkyɔp ne ɛturarɛ.

¹⁵ Daa ɛli ne njwi so te ɛnkyinkyɔp ne ɛturarɛ ne ɛKiriti kɛ hap ɛTaanggbey ye ne itsanga, ne mpɛ kɛ shwalat ndɔ ninaa ne kɛ phɔt nibhɛ, nɛ ninaa nibhɛ so ne nkiinɛ ne iku.

¹⁶ ɛLɔ ninaa nɛ nibhɛ ne so ne nkiinɛ ne iku wo, ɛnkyinkyɔp pɛghaa nggyɛ wo ne phɛlɛng te iku, mpɛ ne yɛɛs ne iku. ɛLɔ ninaa nɛ nibhɛ ne so ne nkiinɛ ne say iphɔrɔt da, ɛnkyinkyɔp pɛ ne phɛlɛng te iken, mpɛ ne yɛɛs ne iken. Ɛhay ɛbhɛ aa ne yɛɛ ne tɔɔk irighitik nikɔn nɛnaa woo?

¹⁷ Sɔng njwi so te ɛbyin ninyi na nɛ nibhɛ sanga ibol ɛTaanggbey de tɛ nibhɛ tɔk iryat nang. Njwi yang so ninyi ne ɛTaanggbey ya ɛbhɛ ɛ kɛ tom njwii, njwii ne bol itin nɛ ɛTaanggbey i ne yɛɛ, daa ɛli ne njwi so ninaa ɛtomɛ ɛKiriti gha.