2 iKɔrɔntos 11 - ɛWee ne ìTsɛm iHywas

ɛBulus sa nɛ Ninɔn ne Tom ne iRywɛɛk

¹ Nzi sim te ɛ sɛ bo ɛn ɛbɔk ncɛt ne iwamang nge de. Nzi yɛɛ ɛ kɛ ku bo ɛn ɛbɔk ka.

² N bok iphup ne nyinɛn, ihywee ne iphup ne ishwim ne ɛTaanggbey bok ne nyinɛn. Nggɛ ne ku ryɔng ɛKiriti ye nyinɛn te ɛli ne ɛnyi i ryɔng ɛngɔn ɛlyilyap ɛjejep te ɛ nang ɛtɛm ɛbhɛ.

³ Ne n bok ɛnik wu irway mon yaa yung hyereey, ɛ tek ɛn ishwim iywɛnɛng mon da ne ɛ sim ɛn ɛKiriti yegha. Aa yung hyere nyini ɛli ne ɛWaawu gha kaa hyereey yo nten de ne izɔ de kaa luk ɛbhɛ ne ntsɛntsɛng igywebhe ne ihywɛ de.

⁴ Daa ɛli ne ɛ bok ɛn ihywarat ne say ibol nihak ninyi nɛ nibhɛ kɛ yɛɛs ɛlɔ mon na. Ɛ say ɛn mɛmɛ nibhɛ daa ɛYɛso gha ivaa ne ifɛ labhe ne ivaa ne njwi kɛ tɔng nyini wo, ɛ ta say ɛn ihak ikabyik ne iphɛ labhe ne idee ne ɛ kɛ ku say ɛn no, ɛ ta say ɛn ihak ibol iyɛnɛng ne iphɛ labhe ne idee ne ɛ kɛ say ɛn ɛlɔ mos sa.

⁵ “Sɔng nzi wɛɛ tɛ ninɔn ne tom ma ne kɛ bo nibhɛ wu nibhɛ so ‘igbaang ninɔn ne tom ma’ phyin me ne ɛkɔn nang.

⁶ Yaa rɔk sɔng nggɛ bel ne ivol da nang, ne n jung bok ishweng. Njwi kɛ tɔɔrek nyini ɛlɛy ndɔ nikɔn na gbik.”

⁷ Sɔng nggɛ yɔng wu te ɛ tal ɛn mɛɛn nten de ne nggɛ sanga iBol iYɛnɛng ɛTaanggbey de ndɔ mon no nang. Nggɛ laasek ito nge te n te ɛ te ɛn nyini ninyi. iPhɛ ne so ɛfɔt ne nggɛ mɔn ne i?

⁸ ɛLi ne nggɛ i mɔn ɛtomɛ gha ndɔ mon no, ihwak ijwira ninaa ne roos nibhɛ kɛɛ taal me. Nggaa phɔrɔt nikɔn nibhɛ na nzi phyighis nyini nɛ.

⁹ Nten de ne nggaa so ɛlɔ mon na, sɔng nggaa phyilɛl nyini nten de nzi tɔk ijam nang. Nigwaa nɛ nibhɛ le ne iMakyidɔniya nibhɛ kaa yɛɛs nibhɛ nang me ɛkɔn na ne aa hɔn me. Sɔng nggaa sim naa phyilɛl nyini nang, naa ne ma ku i mɔn ɛlɛy!

¹⁰ iTin ɛKiriti de ne iphɛ so ndɔ me wo kɛ te me nzi bo wu hang ɛnyi ne sonɛ ne ivel ne iKaya da ne aa ring me ne hal ɛgyɛy ya.

¹¹ Nzi bol ɛlɛ wo wu hang nzi sim nyini naa? ɛTaanggbey i yɛɛ ɛli ne nzi sim nyini wo.

¹² “Naa ne re ɛnu ɛyisɛ ne mɔn ɛkɔn na ne nzi mɔn no, te nzɛ n hyɛghɛ ‘igbaang ninɔn ne tom mɛnaa nggyɛ wo,’ ɛlɔ nɛ nibhɛ yaa yung sɛ ɛkɔn ne hal ɛgyɛy, nibhɛ yɔng wu njwii mɔn ɛtomɛ ɛdaan nɛ nɛ nibhɛ.

¹³ iHywee ninyi yɛdee nggyɛ wo soye ninɔn ne tom ne irywɛɛk, sɔng ninaa ne itin nɛ nang. Nibhɛ luk, nibhɛ sim tɛ ninyi sɛɛ yɔng wu nibhɛ so ninɔn ne tom ɛKiriti na.

¹⁴ Sɔng iphɛ ne so ɛkɔn ne kparat nang, daa ɛli ne ɛShɛtan na ma mɔɔng ɛ hyereey te ɛmalɛka ɛwɛwɛy.

¹⁵ iPhɛ ɛlɛy, sɔng iphɛ ne so ɛkɔn ne kparat nɛ nikpuru ɛShɛtan na i ma hyere en nibhɛ te tɛ ninaa ne mɔn ɛtomɛ ɛcik ka nang. ɛTsim mɛ, sɛ ne tal nibhɛ nɛ daa ɛkɔn na nɛ nibhɛ kɛ mɔn no.”

Nggbang ɛBulus Ndɔ ɛTomɛ Ɛbhɛ

¹⁶ Nzi ne ta bo, wu hang ɛdɛ mon bo me te nzo ɛwamang nga. Wu ɛ kɛ ne bo mɛɛn te nzo ɛwamang nga, ne ɛ bo ɛn mɛɛn wu nzo ɛwamang nga, te nzɛ ɛkɔn ne naa hale ne ɛgyɛy.

¹⁷ Sɔng nzi bo wu nzi mɔn ɛkɔn na ne ɛDaray kɛ yaak me nang, daa ne ibol ne hal ɛgyɛy de, nzi ma yung bol te ɛwamang.

¹⁸ Daa ɛli nɛ ninyi na gbom i hal ɛgyɛy ya ɛli nɛ ninaa ɛzay ya mɔn no, na ne ma mɔn ɛlɛy.

¹⁹ Nyinɛn no ne ɛ kɛ ne bo ɛn ito mon de wu ɛ bok ɛn ntsɛntsɛng ngge gbom mo, ɛɛ ne shɛɛ ɛn nɛ niwamang nga ne irway ihwala!

²⁰ ɛTsak i sɛ ɛdɛ ɛnyi gha kɛ bo nyini te ɛkpuru, ɛɛ ne bo ɛn ɛbɔk ne ɛbhɛ, hang ɛhaa ne ɛ phɔrɔt nikɔn mon yɔɔ, hang ɛhaa ne ɛɛ luk nyini yɔɔ, hang ɛhaa ne ɛ bɛɛs nyini wo, hang ɛhaa ne ɛ babha nyini nggaam yɔɔ.

²¹ Naa ne yɔngɔ wu nggɛ sɔ ncwa daa ɛli njwi kɛ sang mɔn nyini nikɔn na nɛ ninaa ne luk nyini na i mɔn nyini nɛ woo? Naa yɔngɔ wu njwi kɛ so kyɔkyɔt te? Wu ɛdɛ ɛnyi gha yaa ne te irway nviit daa ɛdɛ ɛkɔn na nang, naa ne ma mɔn ɛlɛy. Daa ne ibol lɛdee wo nzi ne bol te ɛwamang.

²² Wu nibhɛ so niBiriniyawa, ne ma nzo me ɛdɛng. Wu nibhɛ so niSɛrɛla, ne ma nzo me ɛdɛng. Wu nibhɛ so icwaang ɛBaraying, ne ma nzo me ɛdɛng.

²³ Wu nibhɛ so ninaa ne mɔn ɛtomɛ ɛKiriti, ne n phyin nibhɛ. Nzi bol te ɛhaa nisan! N phyin nibhɛ ne mɔn ɛtomɛ ɛKiriti gha, nggɛ sɔ nggbang gbom, kɛ robhos me ndɔ ne ijwee ne nyang, kɛ hal me gagak tang ɛgak, nggɛ wɛɛ iku gbom.

²⁴ iGbɔm niYahodawa da kɛ yɛk ngɛ i hal me ɛte iwii, kɛ ne i sɛ yaa hal me wo, ne te me ne ihon no nzuwubɔ nwaas tang iphɛ daan.

²⁵ iGbɔm ne iRooma da kɛ ne hal me ne nggbong ɛte ɛtat. Kɛ ne ku phengɛ me nikpɛɛ ɛdaan. ɛGyirigyi inɛn kɛ ne ku nzɛɛng nge ɛte ɛtat nzo nɛ ndɔ yɛ, nggɛ ne ku shɛɛ ndɔ ɛling n phyii ra nɛ ɛdaan nyɛɛn kyi tul me.

²⁶ Nggɛ hyel ihywel da kang-ka-kang. Nggɛ ne so ɛnu ne izɛn ndɔ ne ihel, ne n da so ɛnu ne izɛn ɛlɔ ninaa ɛyi, ne n da so ɛnu ne izɛn ɛlɔ niYahodawa nɛ nibhɛ so nigwaa nge, ne n da so ɛnu ne izɛn na ɛlɔ ninaa ne hame nibhɛ so niYahodawa. Nggɛ ne so ɛnu ne izɛn na ndɔ ne igbaang nigarang, ne n da so ɛnu ne izɛn na ndɔ nihay, ne n da so ɛnu ne izɛn na ndɔ nirenes. Nggɛ ne so ɛnu ne izɛn na ɛlɔ ninyi nɛ nibhɛ luk wu soye ninaa ne roos.

²⁷ Nggɛ kyangas me ne ɛtomɛ, nggɛ tabha ilong, nggɛ shɛɛ tang nwa, nggɛ shɛɛ kpyak, nggɛ shɛɛ tang sɔ inɛn. Nggɛ wɔs ire, nggɛ shɛɛ ne ntsentseng, nggɛ shɛɛ tang ɛtura ne ibek.

²⁸ Kang nɛ nidɛng nikɔn na, ne n bok irighitik ne wɛɛ ijwira ninaa ne roos de cɛcɛɛy.

²⁹ Wu ɛdɛng kɛ te kyɔkyɔt, naa ne ma te kyɔkyɔt, wu kɛ te ɛdɛng ɛ mɔn ɛfɔt, ibol lɛ yaa ne tak me iyɔm.

³⁰ Wu iphɛ so nggbinggbing naa hal ɛgyɛy ya, naa ne hal ɛgyɛy ya daa nikɔn na nɛ nibhɛ kɛ tɔɔrek ikyɔkyɔt nge.

³¹ ɛTaanggbey i yɛɛ sɔng irywɛɛk ne nzi tɔng nang. ɛTaanggbey ya ne ɛbhɛ so ɛKyɛɛ ɛDaray ɛYɛso ɛKiriti gha. Te ne dɛp irywɛɛk ɛbhɛ cɛcɛɛy.

³² Nten de ne nggaa so ne iDimaskus, ɛgɔm-na gha ne ɛ kaa so ne iwɔ ɛgɔm ɛRɛtas kaa ne yɛk ninyi nɛ nibhɛ ra me ɛnu ne izuk ɛgarang nga te wum me.

³³ Nitaay nge kaa ne cwaak me ndɔ ne ishwap nibhɛ ji rop ishwap po ne irwik nibhɛ roos ɛdaa ne iwabha ɛgarang ngo nibhɛ tɔmɔsek ne izay, ne n ji phɔrɔt ne iwɔ ɛgɔm mo.