1 ɛYohana 4 - ɛWee ne ìTsɛm iHywas

Te Tɛrɛk iKpabyik Ga

¹ Nyinɛn nigwaa nge ne nzi sim, sɔng ˆɛ nang ɛn ne itin nɛ ne gbik ɛnyi gha ne ɛ bo wu i bok ikabyik ɛTaanggbey de nang. Yang tɛrɛk ɛn nibhɛ te ˆɛ seng ɛn hang iphɛ le ɛlɔ ɛTaanggbey ya yɔɔ, daa ɛli nɛ ninabawa ne irywɛɛk gbom kɛ shwalat ndɔ ɛzay ya.

² ɛLɛ ne ˆaa seng ɛn ɛnyi gha ne ɛ bok iKabyik ɛTaanggbey de: gbik ɛnyi gha ne ɛ kɛ nang ishɛɛda wu ɛYɛso ɛKiriti gha kɛ yɛɛs ndɔ ne ibek ɛten ɛsii, ɛnyi yɛghaa nggyɛ wo ne bok ikabyik ne iphɛ le ɛlɔ ɛTaanggbey.

³ Gbik ɛnyi ne ɛ kɛ ne sang nang ishɛɛda yɛdee wo daa ɛYɛso ɛKiriti gha, sɔng ne ɛ bok iKabyik ɛTaanggbey nang. iKabyik ge ne ɛ bok ko soye idee ɛhaa ne iphup ɛKiriti de. iKabyik ge ne ˆɛ kaa ku phok ɛn wu iphɛ yaaso wo, ne iphɛ ku so ndɔ ɛzay ya ɛlyilyɛghaa wo.

⁴ Nyinɛn ninɔn nge ne nzi sim, ˆɛ so ɛn nyini ninɔn ɛTaanggbey. ˆƐ kɛ re ɛn daa ninabawa ne irywɛɛk ka daa ɛli ne iKabyik ɛTaanggbey de ne iphɛ so ndɔ mon no phyin idee ninaa ɛzay de ne ihwet.

⁵ Nibhɛ kaa ku soye ninaa ɛzay, iphɛ ɛlɛy nibhɛ i ne bol ɛkɔn na ne ɛ so ɛhaa ɛzay ya, ninaa ɛzay ya ne i tenes nibhɛ.

⁶ Njwɛɛn ne soye ninaa ɛTaanggbey. Ninaa ne yɛɛ ɛTaanggbey yegha i ne tenes njwɛɛn. Gbik ɛnyi gha ne ɛ sang soye ɛhaa ɛTaanggbey ya, sɔng aa tenes njwɛɛn nang. Ɛlɛ ne njwɛɛn i seng ɛnyi gha ne ɛ bok iKabyik ne itin de gbik ne ɛhaa ne bok ikabyik ne irywɛɛk ge.

ɛTaanggbey ya So iShwim

⁷ Nyinɛn ninaa ne nzi sim, te ɛrɔngɔ sim ɛrɔngɔ daa ɛli ne ishwim ba le ɛlɔ ɛTaanggbey. Gbik ɛnyi gha ne ɛ bok ishwim ba, ɛ soye ɛNgɔn ɛTaanggbey, ɛ yɛɛ ɛTaanggbey ye.

⁸ Gbik ɛnyi gha ne ɛ sang bok ishwim ba, sɔng ɛ yɛɛ ɛTaanggbey yegha nang, daa ɛli ne ɛTaanggbey ya ku tɔɔsel ishwim.

⁹ ɛTaanggbey ya kɛ tɔɔrek ishwim ɛbhɛ daa njwɛɛn no lenɛ ne ɛ kɛ tom ne ɛNgɔn ɛdaan ɛbhɛ zɔng ndɔ ɛzay ya, te njwɛɛn sɛ iken ne inat lenɛ ne ɛNgɔn ɛbhɛ gha.

¹⁰ iShwim ne itin da ne so ɛlɛ: sɔng njwɛɛn kɛ sim ɛTaanggbey yegha nang. Kwa! ɛTaanggbey ya ɛbhɛ kɛ yang sim njwɛɛn, ɛ tom ne ɛNgɔn ɛbhɛ gha, te ɛ teye ihap itsanga ne hana njwɛɛn ne ɛfɔt njwɛɛn no.

¹¹ Nyinɛn ne nzi sim, ɛli ne ɛTaanggbey ya kɛ sim njwɛɛn ɛlɛ wo, iphɛ ne ma so nggbinggbing ɛrɔngɔ sim ɛrɔngɔ.

¹² Sɔng ɛnyi kɛ ku yaang ɛTaanggbey yegha nang; gbik ne iphɛ ɛlɛy wu ɛrɔngɔ kɛ ne sim ɛrɔngɔ gha, ɛTaanggbey ya ne i shɛɛ ndɔ njwɛɛn, ishwim ɛbhɛ da ne te hyɔrɔ ndɔ njwɛɛn no.

¹³ Njwɛɛn i yɛɛ njwɛɛn i shɛɛ ndɔ ɛTaanggbey ya ɛ ma shɛɛ ndɔ njwɛɛn, daa ɛli ne ɛ kɛ nang njwɛɛn iKabyik ɛbhɛ.

¹⁴ Njwi kaa ne yaang njwi ne tɔng ninyi wu ɛTaanggbey ya kɛ tom ɛNgɔn ɛbhɛ te ɛ teye ɛHaa ne Phɔt ɛzay ya.

¹⁵ Gbik ɛnyi gha ne ɛ kɛ boote ne ɛnu ɛbhɛ ɛ yɔngɔ wu ɛYɛso gha soye ɛNgɔn ɛTaanggbey ya, ɛTaanggbey ya i ne shɛɛ ndɔ ɛbhɛ ɛ ma i shɛɛ ndɔ ɛTaanggbey ya.

¹⁶ ɛTsak, Njwii yɛɛ, njwi kɛ ne ta nang ne itin nɛ ɛTaanggbey ya i sim njwii. ɛTaanggbey ya so ishwim, gbik ɛnyi gha ne ɛ tɔɔsel ishwim ba, ɛ ne shɛɛ ndɔ ɛTaanggbey ya ɛTaanggbey ya ma i shɛɛ ndɔ ɛbhɛ.

¹⁷ iShwim ɛTaanggbey da so hyɔrɔ ndɔ njwɛɛn no, te njwɛɛn sɛ kyinak tɔrɔk wɛlɛng ɛnik ɛtuk ɛshara ɛTaanggbey ya, daa ɛli ne ishwɛɛ njwɛɛn da ndɔ ɛzay yɛghaa wo so te ishwɛɛ ɛKiriti da.

¹⁸ Sɔng ɛnik so ndɔ ne ishwim ɛTaanggbey da nang. iShwim ihyɔrɔ da i yang roos ɛnik ko, wu njwɛɛn ne bok ɛnik ko, iphɛ kɛ tɔɔrek wu njwɛɛn i tel nggbang ne sɛ bak njwɛɛn ɛlɔ ne ɛfɔt ne njwɛɛn kɛ mɔn. ɛNyi gha ne ɛ bok ɛnik ko, sɔng ɛ so hyɔrɔ ne ishwim ba nang.

¹⁹ Njwɛɛn bok ishwim ba daa ɛli ne ɛTaanggbey ya ɛbhɛ kɛ tsa ɛ sim njwɛɛn.

²⁰ Wu ɛdɛ ɛnyi gha i bo, “Nzi sim ɛTaanggbey ye,” ɛ ji kyi i mbaray ɛgwaa ɛbhɛ, ɛnyi yɛghaa nggyɛ wo ne soye ɛhaa ne irywɛɛk. Daa ɛli ne ɛnyi gha ne ɛ sang sim ɛgwaa ɛbhɛ gha ne ɛ yaang ɛbhɛ wo, sɔng aa ne yɛɛ ne sim ɛTaanggbey yegha ne ɛ sang yaang ɛbhɛ wo nang.

²¹ ɛKiriti gha kɛ ne nang njwɛɛn ikpii da ne ifɛ bo, gbik ɛnyi gha ne ɛ sim ɛTaanggbey yegha, iphɛ ne so nggbinggbing ɛ ma sim ɛgwaa ɛbhɛ ne mang.