1 ɛBiturus 5 - ɛWee ne ìTsɛm iHywas

Te Hyep ᐩiGyol ɛKiriti De

¹ Mee wo ne nzo ɛnu ne ikɔɔn na, ɛgwaa mon ɛhaa ne roos sa, nzi ne bol nɛ nigwaa ninu ne ikɔɔn na nɛ nibhɛ so ndɔ mon no. Nggɛ yaang ne irwisɛ nge nggbang ngga ne ɛKiriti gha kɛ sɔ wo, nzɛ ne ma sɛ ihop ndɔ ne ndiinday ɛbhɛ de ɛtuk ka ne ɛ sɛ yɛɛs so.

² Nzi bok nyini, hyep ɛn ᐩigyol ɛTaanggbey de ne ɛ kɛ tek ndɔ ne iwɔ mon no, te ɛ wɛɛ ɛn ihywɛ byirik, yɛnɛng. Sɔng ɛ mɔn ɛn te kɛ yɛk nyini nɛ ne ihwet nang, yang mɔn ɛn ne irway mon ijwaan. Sɔng ne ɛ mɔn ɛn ɛtomɛ yɛghaa wo daa ɛli ne ɛ sim ijam nang, yang mɔn ɛn daa ɛli ne ɛ bok ɛn irway ne mɔn ɛTaanggbey ye ɛtomɛ.

³ Sɔng ɛ tes ɛn nyini ninaa ne tɔɔsel igbɔm daa ninyi na ne ɛ hyep ɛn no nang, yang te ɛn nyini ɛkɔn ne mɛmɛ nɛ ɛlɔ nibhɛ gha.

⁴ Sɛ ne sɛ ɛDaray ya ne ɛbhɛ so ɛndiinday ninaa ne hyep ᐩigyol la kɛ bhɛ kyii nang, sɛ ne tal nyini ne ɛkɔn ne ito ne igbɔm ne ɛ bok ndiinday ɛɛ sang haatel.

⁵ ɛLɛy ne nyinɛn ninɔn niphas sa, roos ɛn ibol ninu ne ikɔɔn de. Gbik mon no, te ɛrɔngɔ laasek ito ɛbhɛ ɛnu ɛyisɛ ɛgwaa ɛbhɛ daa ɛli ne kɛ haa ndɔ ne ɛWee ne iBol ɛTaanggbey yo i bo, “ɛTaanggbey ya mbaray ninyi na nibhɛ tɔɔsek ito de, ne ɛ ji mɔn ninaa nɛ nibhɛ kɛ laasek ito de iyɛnɛng.”

⁶ iPhɛ ɛlɛy, ne ɛ laasek ɛn itso mon ndɔ igbɔm ɛTaanggbey da ne ɛ so gbom mo, te ɛ sɛ ne ji yinɛ nyini ɛtuk ka ne ɛ kɛ yaang iphɛ kɛ jam ɛbhɛ nɛ.

⁷ Tek ɛn ɛTaanggbey yegha nɛ nikɔn na nɛ nibhɛ tak nyini iyɔm be gbik, daa ɛli ne ɛbhɛ ɛ so ɛhaa ne wɛɛ nyini.

⁸ Wum ɛn itso mon ɛ shɛɛ ɛn ɛkanang. ɛHaa ne iphup mon na, ne ɛ so ɛShɛtan na i kaan, ɛɛ bunga ikun te ɛkuramanza, ɛɛ tɔk ɛnyi ne aa kpɛɛ, ɛ re.

⁹ Sɔng ɛ nang ɛn ɛbhɛ ikɛk nang, kyinak ɛn gɛgɛy daa ne ìnang ne itin mon de, daa ɛli ne ɛɛ yɛɛ ɛn ninaa ne roos sa nɛ nibhɛ so ndɔ ɛzay ya gbik, nibhɛ ma sɔ nggbang ngga ɛli ne ɛ sɔ ɛn no.

¹⁰ Yaa ne sɛ ɛ kɛ sɔke ɛn ne nggbang ngga ndɔ nten ncɛt nang, ɛTaanggbey ne ɛ so ɛhaa ne izɛɛng nga gbik ko, ne ɛ kɛ yel-le nyini wo te ɛ sɛ ɛn ihop ndɔ ne ndiinday ne inat ɛbhɛ de lenɛ ne ɛYɛso ɛKiriti gha, sɛ ne te nyini niphas sɛ, ɛ lɔl nyini, ɛ te nyini hyɔrɔ, ɛ ji hante nyini ne ihwet. Ɛbhɛ wo ne ito ɛbhɛ ɛ sɛ mɔn ɛlɛy wo.

¹¹ ɛTaanggbey ya ɛbhɛ bok igbɔm ne ishay-ishay. Te iphɛ ne shɛɛ ɛlɛy.

iKyili ne Taal Lɛ

¹² ɛSilibanos ne ɛ soye ɛgwaa, ɛhaa ne ɛ so sɛ kyinak daa ne ibol ɛbhɛ ndɔ ne ibol ne roos de, ɛbhɛ kɛ phyik me ne haal ɛwee yɛwoo wo. Nggɛ ne haal ncɛt te n te nyini itsɔngɔl gɛgɛy, n da yaak nyini wu iyɛnɛng ntin ɛTaanggbey yɛdee wo, kyinak ɛn gɛgɛy nɛ ndɔ yɛ.

¹³ iDira ninaa ne roos de nɛ nibhɛ so ne iBabila de, ninaa ne ɛTaanggbey ya kɛ ma kasa nibhɛ wo, i kyiisi nyini. ɛLɛy ne ɛngɔn nge ɛMarakus.

¹⁴ Kyiisi nyini ndɔ mon ne ikyili ne ishwim ninaa ne roos. Te irway ne laal shɛɛ ndɔ mon no gbik, nyinɛn no ne ɛ so ɛn ninaa ɛKiriti na. Te iphɛ ne shɛɛ ɛlɛy.