1 ɛBiturus 3 - ɛWee ne ìTsɛm iHywas

iShwɛɛ Niras nɛ Nikuk Nibhɛ

¹ ɛLɛy ne mang, nyinɛn nikuk ko, roos ɛn ibol niras mon de. Daa ɛli ne wu nidɛng niras sa sonɛ nɛ nibhɛ kɛ sang nang ne itin nɛ ne ibol ɛTaanggbey, sɛɛ ne yɛɛ ne lenɛ ne ihywɛɛ nikuk nibhɛ de nɛ nibhɛ kɛ tɔɔrek ko i hɔwɔ nibhɛ ma yung tɔ tang ku mɔng nibhɛ ibol.

² Yaa sɛ nibhɛ kɛ yaang ìhywɛɛ mon de ne so iwɛwɛy yo, ne hyere nibhɛ.

³ Sɔng izel mon de kyinak daa ne ryɔng ibek mon zɔng nang. Sɔng ihywɛ kyinak daa ne ban ito, ne ilway ne izinariya, ne itsura ne ijam gbom zɔng nang.

⁴ Te izel lɛ yang teye izee ne irway, kaabi izel ne ihywɛɛ gbik ne ìyak ne ihywɛ sang bees se, ihywɛ so ɛkɔn ne dɛp ɛlɔ ɛTaanggbey.

⁵ ɛLɛ wo nɛ nikuk ne ile na nɛ nibhɛ kaa so kang ngo, nibhɛ soye ninaa ne sit irwisɛ da daa ɛTaanggbey ya kaa gyura en. Nibhɛ kaa roos ibol niras nibhɛ de.

⁶ ɛSaratu kaa so ɛlɛ wo, ɛ kaa roos ibol ɛBaraying, ɛ yaak ɛbhɛ ɛDaray ne. Ne ɛ so ɛn nilap ɛSaratu na ɛtsak wu ɛɛ mɔn ɛn ɛkɔn na ne ɛ kɛ jam mo, tang ɛnik ɛten ɛsii.

⁷ ɛLɛy ne mang, nyinɛn niras so, boos ɛn nikuk mon na byirik, nang ɛn nibhɛ ne ndiinday, daa ɛli nɛ nibhɛ phyin nyini ne kyɔkyɔt. Daa ɛli ne nyinɛn no nɛ nikuk mon na gbik, ɛ sɛ re ɛn isha ne izɛɛng ne iken de ne ihywɛ le ɛlɔ ɛTaanggbey ya. Mɔn ɛn ɛlɛ wo ɛlɔ ne ɛkɔn yaa yung ring nyini ne boote ɛn ne ɛTaanggbey ya.

Sɔ ɛn Nggbang Daa ɛli ne Ɛ So ɛn Cik

⁸ ɛTsim mɛ gbik, te icwas mon da teye ijwaan nɛ. Ɛɛ san ɛn iyɔm nigwaa, ɛɛ sim ɛn nigwaa, ɛ ta i phyighis ɛn nigwaa wɛlɛng itɔɔsek ito.

⁹ Sɔng ɛ tal ɛn ibebhe de ne bebhe de nang. Sɔng ne ɛ ta tal ɛn tok ge ne tok ge nang. Yang sit ɛn nibhɛ ne ɛwɛng, daa ɛli ne ɛTaanggbey ya kɛ yel-le nyini te ɛɛ mɔn ɛn ɛlɛ wo, te ɛ sɛ ɛn ɛwɛng.

¹⁰ Kɛ haa ndɔ ne ɛWee ne iBol ɛTaanggbey yo i bo, “ɛNyi gha ne ɛ sim aa phok iyɛnɛng ne ishwɛɛ da, ɛnyi gha ne ɛ sim aa yaang nituk niyɛnɛng nga, te ɛ ring ilem ɛbhɛ ne ivol ikpɛɛ ɛ ta ring ɛnu ɛbhɛ ne bol irywɛɛk.

¹¹ Te ɛ hyereey ɛ tek ibebhe ɛ tɔk iyɛnɛng. Te ɛ tɔk irway ne laal ne irway ɛbhɛ gbik.

¹² Daa ɛli ne irwisɛ ɛDaray da so daa ninyi nicik ka. iToro ɛbhɛ de i ne tenes ishwin nibhɛ. ɛYisɛ ɛbhɛ gha i ne ji mbaray ninyi na nɛ nibhɛ mɔn ibebhe.”

¹³ Wu ˆɛ has ɛn irway ne mɔn iyɛnɛng ngge, wɛlɛng ɛnyi ne aa ne mɔn nyini ne ɛkɔn.

¹⁴ Gbik ne iphɛ ɛlɛy, wu ɛ kɛ sɔ ɛn nggbang ngga daa ɛli ne ɛ so ɛn cik ko, aa ne sɛ ɛn ɛwɛng. iPhɛ ɛlɛy, sɔng ne ɛ phok ɛn ɛnik ko nang, sɔng ne ɛ sap ɛn ɛkɔn nang.

¹⁵ Yang nang ɛn ɛKiriti yegha ne ndiinday ndɔ ne irway mon da daa ɛli ne ɛbhɛ ɛ so ɛDaray. Shɛɛ ɛn ɛkanang cɛcɛɛy ɛli ne aa kyii ɛn ɛnyi gha nɛ ne ɛ kɛ phom nyini ɛkɔn na ne ɛ kɛ te ɛ kɛ yɛk ɛn irway mon daa ne roos ɛKiriti yegha. Gbik ne iphɛ ɛlɛy, ne ɛ mɔn ɛlɛ wo ndɔ ne ihywɛɛ, ne ìnang ne ndiinday.

¹⁶ Te izɔlɔs ne irway mon da ne ku shɛɛ byirik tang ɛkɔn ne tok te yaa ne sɛ ninaa ne bol ivol ikpɛɛ da kɛ yaa bol daa ne ishwɛɛ iywɛnɛng mon da ndɔ ɛKiriti gha, nibhɛ ne sɔ ncwa.

¹⁷ Daa ɛli ne iphɛ phyin, wu iphɛ soye icwas ɛTaanggbey, ɛ sɔ ɛn nggbang ngga daa ne mɔn iyɛnɛng ngge, ne aa sɔ ɛn daa mɔn ikpɛɛ de.

¹⁸ ɛLɛy ne iphɛ kaa ne so daa ɛKiriti gha. Ɛ kaa so cik ne ɛ ku ɛlɔ ninyi nɛ nibhɛ sang so cik. Ɛ kaa ku ɛlɔ ne ɛfɔt ɛdaan zɔng te ɛ phɛ nɛ nibhɛ ɛlɔ ɛTaanggbey. Kaa phoo ɛKiriti yegha ndɔ ne ibek, ne yiisik ɛbhɛ ndɔ ne ikabyik.

¹⁹ Ndɔ ne ikabyik ge ne ɛKiriti gha kaa ne bhɛ bol ne ikpabyik ga ne ifɛ kaa so ne ijwee ne nyang ngo.

²⁰ iKpabyik kɛdaa nggyɛ wo ne so ivaa ninaa nɛ nibhɛ kaa mbaray tang roos ibol ɛTaanggbey de, gbik ɛli ɛTaanggbey ya kaa san iyɔm nibhɛ de nten de ne ɛNuhu gha kaa ryɔng ɛgyirigyi inɛn na. Nten nɛdee nggyɛ wo, ninyi ncɛt zɔng nibhɛ kaa phɔrɔt ndɔ inɛn da. Nibhɛ kaa so ɛnaras.

²¹ Kɛ ten inɛn nɛdaa nggyɛ wo ne ibatisima ne i phɔt ninyi nɛ ɛlyilyɛghaa. Sɔng i ne phɔt njwɛɛn lenɛ ne kɛ kuus irwirwik ne ibek njwɛɛn nang. I yang phɔt njwɛɛn no lenɛ ne bol ne ɛTaanggbey ye ne icwas ne irway iywɛnɛng wɛlɛng ɛkɔn ne tok gbik ne yilitsik ɛYɛso ɛKiriti ndɔ ne ikpuu.

²² ɛYɛso ɛKiriti gha kɛ ɛbhɛ kɛ ne waray daa ne irywa. Ne ɛbhɛ so ne iwɔ ne irwye ɛTaanggbey, ɛɛ re igbɔm daa nimalɛka, nɛ nigɔm, gbik ne ikpabyik.