1 ɛTimɔti 6 - ɛWee ne ìTsɛm iHywas

¹ Gbik ninyi na nɛ nibhɛ bok irighitik ne soye nikpuru na, tɛ nibhɛ nang nikyɛɛ ne ijwee nibhɛ na ne ndiinday ne iphɛ so kancɛng nɛ nibhɛ, ɛlɔ ne yaa yung bol ivol ne bɛɛs irywɛɛk ɛTaanggbey yo gbik ne imɛmɛ njwɛɛn da.

² Nikpuru na nɛ nikyɛɛ ne ijwee nibhɛ na soye ninaa ne roos sa, sɔng nibhɛ shɛɛ tang kyi nang nikyɛɛ ne ijwee nibhɛ na ne ndiinday de daa ɛli nɛ nibhɛ so nigwaa na ndɔ ne roos da nang. Tɛ nikpuru na yang hante ne nang nikyɛɛ ne ijwee nibhɛ na ne ndiinday daa ɛli nɛ nikyɛɛ ne ijwee nibhɛ na nɛ nibhɛ sɛ ɛkɔn daa ɛtomɛ nikpuru na soye ninaa ne roos, i ne sim nibhɛ. iPhɛ so nggbinggbing ˆɛ mɛmɛ ninyi na nɛ nikɔn nɛnaa wo ˆɛ ta kpɛng nibhɛ.

Te ɛKɔn na ne Bok ko Hɔn Njwɛɛn

³ Gbik ɛnyi gha ne ɛ mɛmɛ ne idɛ imɛmɛ da kang ne ifɛ kɛ sang roos ɛtsim ne ɛnting ne ibol ɛDaray njwɛɛn ɛYɛso ɛKiriti de, ifɛ sang ta so kancɛng ne imɛmɛ ne roos ɛTaanggbey da,

⁴ ɛ kɛ ne kat ito ihet, sɔng ɛ yɛɛ ɛkɔn nang, ɛɛ sim ishamas ne suruk ivol. iHywee ne ishwɛɛ yɛdaa wo i yɛɛs ne ɛnkyis, ne iphup, ne bees irywɛɛk, ne irip ivebhe,

⁵ gbik ne ishamas nɛ ninyi ne icwas nibhɛ kɛ te buruburu nibhɛ sang tɔ yɛɛ itin ne ibebhe. Nibhɛ wɛɛ te roos ɛTaanggbey da so ɛnkiinɛ ne tɔk iryat.

⁶ ɛTsak, ishwɛɛ ihywee ne ishwɛɛ ɛTaanggbey da ne so iryat, wu njwɛɛn kɛ say ɛkɔn na ne njwɛɛn bok ko ne irway ihwala njwɛɛn yɔng ɛ kɛ hɔn.

⁷ Sɔng njwɛɛn kɛ yɛɛs ne ɛkɔn ndɔ ɛzay ya nang, sɔng njwɛɛn sɛ ne kyii ne ɛkɔn nang.

⁸ Wu njwɛɛn bok ire ne itsura, te iphɛ hɔn njwɛɛn.

⁹ Ninyi na nɛ nibhɛ kat irway ne tɔk iryat de i ne hoghɛ ndɔ ne itɛrɛk, ne irwa gbik ne ihyop igywebhe hywee-hywee ne ihywɛ so iwamang, ihywɛ hɔ nibhɛ ndɔ ne bees se gbik ne iku.

¹⁰ Daa ɛli ne sim ijam be gbom mo iphɛ phɛ soye ɛtum ne ibebhe de hywee-hywee. Tɔk iryat de gbom mo kɛ te ɛbyin ninyi na kɛ hana ìnang ne itin nibhɛ de, nibhɛ kɛ hɔ ito nibhɛ irway ishwii gbom.

ɛBulus sa kɛ Kpɛng ɛTimɔti Ye

¹¹ iGyɛ ne ɛTimɔti wo ne ɛ soyɛ ɛnyi ɛTaanggbey, tel nikɔn nɛnaa wo. See ito ne tɔk ihywel cik, ne ishwɛɛ ihywee ne ishwɛɛ ɛTaanggbey, ne ìnang ne itin, ne ishwim, ne rop iku gbik ne ihywɛɛ.

¹² Tel nggbiy ne ìnang ne itin da yɛnɛng. Wum ibol ne iken ne inat de ne kɛ yel-le yɛnɛ wo ne ihwet. iBol de ne ɛ kɛ ku nang ishɛɛda iyɛnɛng ngɛ ɛnu ɛyisɛ nishɛɛda na gbom mo.

¹³ Nzi bol ne igyɛ ɛnu ɛyisɛ ɛTaanggbey ne ɛbhɛ ɛ naas nikɔn na iken de gbik ko gbik ne ɛnu ɛyisɛ ɛYɛso ɛKiriti ne ɛ kaa nang ishɛɛda iyɛnɛng ngge ɛnu ɛyisɛ ɛBilatus ɛBuntus sa.

¹⁴ Nzi bok kɛ te ˆɛ roos ikpii ne ivol lɛdaa wo gbyak tang ɛkɔn ne tok ne irwirwik, ɛDaray njwɛɛn ɛYɛso ɛKiriti gha phyii bhɛ kyii.

¹⁵ ɛTaanggbey ya sɛ yɛk ngɛ ɛkɔn nɛghaa wo te nten de ne ɛ yaang iphɛ kɛ jam mɛ. ɛTaanggbey ya ɛbhɛ soye ɛHaa ne yaa dɛp ɛbhɛ, ɛbhɛ zɔng ɛbhɛ soye ɛhaa ne re igbɔm, ɛ soye ɛGɔm Nigɔm ne ɛDaray Nidaray,

¹⁶ ne ɛbhɛ zɔng ne ɛ phyin ihwet ne iku. Ɛɛ shɛɛ ndɔ ne iwɛwɛy de ne hame ɛnyi sɛ yɛɛ ne phɛ cɛcɛk ne iphɛ. Ɛbhɛ ɛ soye ɛhaa ne hame ɛnyi kɛ ku yaang ɛbhɛ, ɛnyi i sang yɛɛ ne yaang ɛbhɛ. Te ne nang ɛbhɛ ne igbom gbik ne igbɔm ne sang taal le. Ɛɛy.

Ninaa ne Roos nɛ Nibhɛ Bok iRyat

¹⁷ Kpɛng ninaa ne iryat ndɔ ɛzay yɛghaa wo, sɔng nibhɛ tɔɔk ito, nibhɛ kyii ne irway nibhɛ daa ne iryat de ne ihywɛ so te igbil lo ne ifɛ phebhe wo nang. Tɛ nibhɛ ne yang sit irwisɛ daa ɛTaanggbey ne ɛbhɛ naas njwɛɛn nikɔn na walala te njwɛɛn i phok iyɛnɛng ngɛ.

¹⁸ Yaak nibhɛ tɛ nibhɛ mɔn nikɔn niyɛnɛng, tɛ nibhɛ hɔn gbom ndɔ ne mɔn nikɔn niyɛnɛng nga, tɛ nibhɛ phyik ninyi na ne irway walala, nibhɛ yɛk irway ne nang.

¹⁹ ɛLɛ wo nɛ nibhɛ yaa mɔn nibhɛ tuma ito nibhɛ iryat ne ihywɛ ihywɛ sɛ soye ɛtum ɛzay ya ne ɛ yaaso wo, tɛ nibhɛ sɛ iken de ne iphɛ phɛ soye iken ne itin de.

iBol ne Taal Lɛ

²⁰ ɛTimɔti, wɛɛ ɛkɔn na ne kɛ tek kɛ nɛ ne iwɔ wo yɛnɛng. Hosop pɛ ne ivol ɛbuu da ne ifɛ sang bok ɛnik ɛTaanggbey yo gbik ne ishamas ne iwamang ngge gbik nɛ ninaa nɛ nibhɛ bok iphup ne igyɛ wo nibhɛ ji yɔng wu iphɛ so ishweng ngga, kaabi irywɛɛk ga.

²¹ Kɛ lenɛ ne roos imɛmɛ yɛdaa nggyɛ wo, ɛbyin nɛ kɛ ne hana ɛnkiinɛ ne ìnang ne itin no. Te izɛɛng ngge ne shɛɛ ne nyinɛn gbik. Ɛɛy.