1 ɛTimɔti 5 - ɛWee ne ìTsɛm iHywas

Nikusang Nindiinday gbik nɛ Nikpuru

¹ Sɔng ˆɛ sit ɛhelem ma ne ɛbung nang. Yang bol ne ɛbhɛ hywɛɛ te ɛkyɛɛ mo. Boos ɛngɔn ɛphas sa te ɛgwaa mo,

² boos nikuk niharak ka te nigyinɛ mo, te ɛ boos nikuk niphas sa te nigwaa mo, ndɔ ne iwɛwɛy gbom.

³ Nang nikusang nga nɛ nibhɛ sang ɛhaa ne phyik ka ne ndiinday.

⁴ Wu ɛkusang nga ne bok ninɔn, hang nihyɛm ɛbhɛ yoo, tɛ nibhɛ ne tsa nibhɛ tɔɔrek iroos nibhɛ da daa ne boos idee nibhɛ. Yaa ne lenɛ ɛlɛy, nibhɛ tal nikyɛɛ nibhɛ na nɛ ne iyɛnɛng. ɛKɔn nɛghaa wo i nang ɛTaanggbey ye irway ihwala.

⁵ ɛKusang nga ne ɛ sang ɛhaa ne iphyik ka i ne sit irwisɛ daa ɛTaanggbey, ɛ bol ne ɛTaanggbey ya ne igbey ne ɛtuk, te ɛTaanggbey ya phyik ɛbhɛ.

⁶ ɛKusang nga ne ɛ ne roos ɛnggɔnggɔɔt ɛzay yo zɔng ngo nang, ne ɛ ku soye ikom gbik ɛli ne ɛ kyi so ɛken na.

⁷ Tɔng ninyi na nɛ nikɔn nɛ na wo, ɛlɔ nɛ nibhɛ yaa yung teye ɛkɔn ne tok ɛnu ɛyisɛ ninyi na.

⁸ Gbik ɛnyi gha ne ɛ kɛ sang nang icwaang ɛbhɛ wo ɛkɔn, yang ji so ninaa ne ijwee ɛbhɛ na, ɛ kɛ ne ton ìnang ne itin ɛbhɛ de. Ne ɛ phyin ɛnyi gha ne ɛ sang so ɛhaa ne roos sa ne ibebhe.

⁹ Sɔng ˆɛ ku shɛɛ haa irywɛɛk ɛkusang nga ne ɛ kɛ sang phee ishay nzuwubɔ ɛtaraa nang. ɛKusang nga ne ɛ kaa sang so cik ɛlɔ ɛras nten de ne ɛras sa kaa tɔ ɛken.

¹⁰ Te ɛ so ɛkuk ne ngka nitomɛ ɛbhɛ kɛ jam, kaabi ɛ boos ninɔn ɛbhɛ byirik, ɛ say ninaa ne ikpoo, ɛ mɔn ninaa roos ɛTaanggbey ye ɛtomɛ, ɛ phyighis ninaa nɛ nibhɛ i tɔk iphyik, ɛ kɛ see ito daa ne mɔn nikɔn niyɛnɛng cɛcɛɛy.

¹¹ Sɔng ne ˆɛhaa irɛɛk nikusang ngge nɛ nibhɛ tɔ niphas sa ndɔ ne irɛɛk kɛdee nggyɛ wo nang. Daa ɛli ne yaa sɛ ihyop ne ibek nibhɛ de kɛ yaa tak nibhɛ iyɔm, nibhɛ ne hosop ihywɛɛ nibhɛ daa ɛtomɛ ɛKiriti gha.

¹² Yaa ne lenɛ ɛlɛ wo nibhɛ hyɛ ito nibhɛ ɛshara, daa ɛli nɛ nibhɛ kɛ sang shwaak ibol ɛyisɛ de nɛ nibhɛ kɛ sim-mɛ wo.

¹³ Sɔng ɛnggyɛ wo zɔng nang, nibhɛ yaa ne ta teye ninaa ne itek nɛ ninaa kaan tsik nibhɛ roos idee-idee. Nibhɛ ne ta teye ninaa ne bol ivol mumuk nɛ ninaa ne ring phɔt nibhɛ ne soos. Nibhɛ bol ivol da ne hame iphɛ kɛ jam mɛ.

¹⁴ iPhɛ ɛlɛy, nzi sim tɛ nikusang nga nɛ nibhɛ tɔ niphas sa sɛ rop ɛwɛrɛ, nibhɛ yaak ninɔn, nibhɛ wɛɛ idee nibhɛ de, ɛlɔ nɛ nibhɛ yaa yung phaal ɛhaa ne iphup njwɛɛn na ikɛk ne bees ivol daa njwɛɛn.

¹⁵ Nidɛng nikusang nga kɛ ku hyereey nibhɛ kɛ yaa roos ɛShɛtan ne lenɛ ne ihywee ne ishwɛɛ yɛdaa wo.

¹⁶ Wu ɛdɛ ɛkuk ka sonɛ ne ɛ soye ɛhaa ne roos nɛ nikusang nga so ne icwaang ɛbhɛ, tɛ ne ɛ phyik nibhɛ. Sɔng i tek idira ninaa ne roos de ne righitik kɛwo nang. Wu i kɛ mɔn ɛlɛ wo, ninaa ne roos sa ya ne ma ji sɛ ikɛk ne phyighis ne ninaa nikusang nɛ nibhɛ sang ɛhaa ne iphyik ka.

¹⁷ Te nang nihelem ma nɛ nibhɛ so nindiinday ya, nɛ nibhɛ hyel ne ɛtomɛ nibhɛ gha yɛnɛng ngo ne ndiinday kancɛng ne ɛtomɛ nibhɛ gha, yang ji so ninaa nɛ nibhɛ sanga bol iyɛnɛng ngge, nibhɛ ta mɛmɛ ninyi na nɛ wo.

¹⁸ Daa ɛli ne ɛWee ne iBol ɛTaanggbey yo i bo, “Sɔng i sɔɔl ɛrandɔng ngo ne iziring ɛnu nten de ne ɛbhɛ sɔɔn ire de nang.” Ne ta yɔngɔ, “ɛHaa ɛtomɛ gha kɛ hɔn sɛ tal ɛbhɛ ilong ɛbhɛ.”

¹⁹ Sɔng ˆɛ mɔn ɛtomɛ ne ibol ne kɛ yɛɛs sɛ nɛ daa ɛndiinday ne idira ninaa ne roos sa nang, hyep ɛ kyi sɛ nishɛɛda ifaa hang itwat yɔɔ.

²⁰ Ne ninaa nindiinday ne idira ninaa ne roos sa nɛ nibhɛ ne tɔ re ɛnu ɛyisɛ ne mɔn ɛfɔt to nang, nep nibhɛ kpas ɛnu ɛyisɛ ninyi na te ɛbyin nɛ yaang ɛ wum ɛnik.

²¹ Nzi bol ne igyɛ ɛnu ɛyisɛ ɛTaanggbey ne ɛYɛso ɛKiriti gbik nɛ nimalɛka ne kɛ kasa wu te ˆɛ roos ikpii ne bol lɛdaa wo wɛlɛng sim ito, ne i sim ɛdɛng ɛ phyin ɛdɛng.

²² Sɔng ˆɛ so cwacwat ne tek ɛnyi gha ne iwɔ ɛwɛng ngo daa ne ito ɛbhɛ de nang, daa ɛli ne yaa yung sɛ yɛ ˆɛ bok iwɔ ndɔ ne ɛfɔt nihak ninyi. Tul lɛ kang te ˆɛ shɛɛ wɛwɛy.

²³ Sɔng ɛ tɔ sɔ inɛn ntsii da zɔng ngo nang, sɔ ne inɛn ɛnap ba ncɛt ɛlɔ ne irway mo da gbik ne isha de ne ihywɛ tak kɛ iyɔm be cɛcɛɛy yo.

²⁴ ɛFɔt nidɛng ninyi wo i ku tɔɔrek ghe kpas, ɛbhɛ phɔt nibhɛ ɛyisɛ ɛbhɛ bhɛ hɔn ɛlɔ ɛshara gha. ɛFɔt nidɛng i ne rɛɛ ye ɛbhɛ kyi tɔɔrek ghe ɛtsim.

²⁵ ɛLɛy ne mang, ɛtomɛ ɛyɛnɛng nga ne ma so kpas, ɛhaa ne ɛ sang so kpas so nang, sɔng aa ne re ɛnu ɛyisɛ ne rɛrɛs se nang.