1 ɛTimɔti 4 - ɛWee ne ìTsɛm iHywas

niKyɛɛ ne iCwam ne iRywɛɛk

¹ iKabyik ge kɛ ku mɔng wɛsɛrɛk wu sɛ́ sɛ nten ɛtsim be, nidɛng ninyi na sɛ ne hana ìnang ne itin nibhɛ de nibhɛ roos ikpabyik ne wul irywɛɛk gbik nɛ nikɔn na nɛ niphoo i mɛmɛ nɛ.

² iHywee ne imɛmɛ yɛdaa nggyɛ wo sɛ le ɛlɔ ninyi nɛ nibhɛ soye niluk, ninaa ne wul irywɛɛk. Ninyi ne izɔlɔs ne irway nibhɛ kɛ ku, ihywɛ kɛ te ngkit te ɛkɔn ne kɛ wɔɔ ne igyɔs kpikpiy.

³ iHywee ninyi yɛdee nggyɛ wo sɛ yɛk ngɛ i ring ne robhos niwɛrɛ. Nibhɛ ta yɛk ngɛ wu hang i re idɛ ihywee ne irwye da dɔng. iPhɛ dee ɛTaanggbey ɛbhɛ kɛ ne ryɔng irwye da gbik tɛ ninyi na nɛ nibhɛ kɛ nang ne itin nɛ wo nibhɛ ta yɛɛ itin de say iphɛ ne irway ihwala.

⁴ Daa ɛli ne gbik nikɔn na ne ɛTaanggbey ya kɛ ryɔng ngo kɛ jam, iphɛ ɛlɛy, sɔng ne mbaray ɛdɛ ɛkɔn na nang wu kɛ say ɛbhɛ ne irway ihwala.

⁵ Daa ɛli ne i te ire de teye ɛkɔn ne say lenɛ ne ibɔrɔk ne ibol ɛTaanggbey ne kɛ boote ne ɛTaanggbey.

ɛKpuru ɛYɛnɛng ɛYɛso ɛKiriti

⁶ Yaa sɛ ˆɛ kɛ mɛmɛ nigwaa na nɛ nikɔn nɛnaa wo, ˆaa ne teyɛ ɛkpuru ɛyɛnɛng ɛYɛso ɛKiriti gha. ɛHaa ne ɛ kɛ hɔn ndɔ ne ibol ne ìnang ne itin de gbik ne imɛmɛ iyɛnɛng ngga ne ˆɛ roos so.

⁷ Shɛɛ kyaam ne nggbyɛrɛs ne bɛɛs ɛTaanggbey yegha gbik ne ivol ɛbuu da. Yang gbaat ito mo te ɛ shɛɛ ihywee ne ishwɛɛ ɛTaanggbey da.

⁸ iGbaat ne ibek ga bok iphyik, ishwɛɛ ihywɛɛ ne ishwɛɛ ɛTaanggbey da ne bok iphyik ga ndɔ nikɔn na gbik. Daa ɛli ne ishwɛɛ ihywee ne ishwɛɛ ɛTaanggbey da kɛ sim njwɛɛn iken ɛlyilyɛghaa wo gbik ne ɛzay ne ɛ yaaso.

⁹ iBol lɛdee wo so itin nɛ sɛ kyinak daa ne iphɛ, iphɛ kɛ hɔn sɛ say iphɛ gbik.

¹⁰ iPhɛ phɛ kɛ te njwii sɔ nggbang njwii kyangase ne ɛtomɛ gha daa ɛli ne njwi kɛ sit irwisɛ daa ɛTaanggbey ne iKen, ne ɛbhɛ so ɛHaa ne Phɔt ninyi na gbik, yang ji so ninaa ne ìnang ne itin na.

¹¹ Mɛmɛ nɛ nikɔn nɛnaa wo, te ne ɛ yɛk ngɛ ninyi na mɛmɛ nɛ.

¹² Sɔng ɛ sim ɛnyi bɛɛs sɛdaa ɛli ne ɛ tɔ ne ifas nang. Yang teyɛ ɛkɔn ne mɛmɛ nɛ ɛlɔ ninaa ne roos sa ndɔ ne ivol mo, ne ishwɛɛ mo, ne ishwim mo, ne ìnang ne itin mo gbik ne ishwɛɛ wɛwɛy mo.

¹³ Nyɛɛn nggyi yɛɛs so, see ito ne tɔng ɛWee ne iBol ɛTaanggbey yo ndɔ ne idira ninaa ne roos de, te ɛ sanga iphɛ, ɛ mɛmɛ nibhɛ nɛ.

¹⁴ See ito ne mɔn ɛtomɛ ne ìnang ngga ne iKabyik ge kaa nang ngɛ wo. ìNang ngga ne kaa nang ngɛ ɛli nɛ ninyi na kaa bol ibol mo de nten de nɛ nindiinday ninaa ne roos sa kaa teesek kɛ ne ibɔ ɛwɛng ngge daa ne ito de.

¹⁵ See ito ne mɔn nikɔn nɛnaa wo. Nang ibek mo ndɔ nibhɛ gbik te ɛrɔngɔ yaang ire ɛnu ɛyisɛ mo.

¹⁶ Wɛɛ ito mo yɛnɛng gbik ne ɛkɔn na ne ɛ mɛmɛ ninyi na nɛ wo. Kyinak gɛgɛy ndɔ nibhɛ, daa ɛli ne wu ˆɛ kɛ mɔn ɛlɛ wo, ˆaa ne phɔt ito mo gbik nɛ ninyi nɛ nibhɛ i phok kɛwo.