1 ɛTimɔti 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛBulus, ɛngɔn ne tom ɛYɛso ɛKiriti lenɛ ne iyɛk ngɛ ɛTaanggbey ne ɛ so ɛHaa ne phɔt njwɛɛn gbik ne ɛYɛso ɛKiriti ne ɛbhɛ ɛ so ɛhaa ne sit ne irwisɛ njwɛɛn.

² Ɛbhɛ phɛɛs ɛlɔ ɛTimɔti ne ɛ soye ɛngɔn nge ɛhaa ne itin ndɔ ne ìnang ne itin de. Te izɛɛng ne isan iyɔm gbik ne irway ne laal ne ifɛ le ɛlɔ ɛTaanggbey ne ɛ so ɛTaa gbik ne ɛDaray njwɛɛn ɛYɛso ɛKiriti shɛɛ ne igyɛ.

iBol daa Ninaa ne Mɛmɛ ne iRywɛɛk

³ Nzi sim te ˆɛ sɛ shɛɛ ne iFisus de, ɛli ne ngga mɔng ngɛ nten de ne naa phɛ ne iMakyidɔniya de. Nidɛng ninyi na so ne iFisus de nɛ nibhɛ i mɛmɛ ninyi na ne ivol ne irywɛɛk, nzi ne sim te ɛ sɛ yɛk nibhɛ nɛ nibhɛ kɔɔnge.

⁴ Yaak nibhɛ tɛ nibhɛ kɔɔng tɔng ivol ne nggbyɛrɛs da gbik ne ibol ne irɛɛk nikyɛɛ-nikyɛɛ de ne iphɛ sang bok ɛgak ko. Daa ɛli ihywee nikɔn nɛnaa wo i yɛɛs ne ishamas zɔng. Sɔng nibhɛ phyik ne ɛkɔn ndɔ ɛtomɛ ɛTaanggbey ya ne i saras lenɛ ne ìnang ne itin de nang.

⁵ ɛKɔn na ne kɛ cwaak ɛyisɛ ndɔ ne ibol lɛdee wo so ishwim, ivaa ne ifɛ le ndɔ ne irway iwɛwɛy, ne izɔlɔs ne irway iywɛnɛng gbik ne ìnang ne itin ne itin.

⁶ Nidɛng ninyi na kɛ ku labhe nibhɛ tek nikɔn nɛnaa wo, nibhɛ kɛ ku mak ghe ne ivol ɛbuu.

⁷ Nibhɛ sim tɛ nibhɛ sɛ teye ninaa ne kpɛl iMɛmɛ ɛMuusaa, sɔng nibhɛ ne kyi yɛɛ ɛkɔn na nɛ nibhɛ i bol nang, gbik ɛli nɛ nibhɛ bo wu nibhɛ ku yɛɛ wo.

⁸ Njwii yɛɛ wu iMɛmɛ ɛMuusaa da kɛ jam, wu kɛ mɔn ɛtomɛ ne ɛbhɛ kancɛng.

⁹ Njwi i ne ta yɛɛ, sɔng iMɛmɛ ɛMuusaa da so daa ne ito ninyi ne cik nang. iMɛmɛ yɛ yang so daa ne ito ninaa nɛ nibhɛ tes ikpii ne imɛmɛ da tsaan. Nɛ ninaa ne ito ihet. Nɛ ninaa nɛ nibhɛ sang shɛɛ ishwɛɛ ɛTaanggbey. Nɛ ninaa ne ɛfɔt. Nɛ ninaa ne hame nibhɛ kɛ tul en kang. Nɛ ninaa ne bɛɛs ɛTaanggbey ye. Nɛ ninaa ne phobho nikyɛɛ gbik nɛ nigyinɛ, nɛ ninaa ne phobho ninyi.

¹⁰ Nɛ ninaa ne ra nzangas. Nɛ niras nɛ nibhɛ ra nɛ nilyiyap-ne-kut gbik nɛ nikuk. Nɛ nibhɛ ra nzangas nɛ nikuk. Nɛ ninaa ne yibhɛ ninyi nibhɛ lɛbhɛl. Nɛ ninaa ne wul irywɛɛk. Nɛ ninaa ne naas ishɛɛda ne irywɛɛk, gbik nɛ ninaa ne mɔn nikɔn na nɛ nibhɛ sang so kancɛng ne imɛmɛ ne itin.

¹¹ iMɛmɛ ne itin nɛdaa wo so daa ne ibol iyɛnɛng ne iphɛ shɛs idee ɛTaanggbey ne ɛ so ɛhaa ɛwɛng. iBol iyɛnɛng ngge ne kɛ nang me te n sanga wo.

iRway iHwala ɛLɔ ne iSan iYɔm ɛTaanggbey

¹² N bok irway ihwala ne ɛDaray njwɛɛn ɛYɛso ɛKiriti gha, ne ɛbhɛ ɛ kɛ nang me ihwet da ndɔ ɛtomɛ yɛghaa wo. Ɛbhɛ ɛ kɛ yaang sɛ kyinak daa ne ibol nge, ɛ nang me ɛtomɛ ɛbhɛ gha.

¹³ Gbik ɛli ne nggaa so ɛhaa ne bol ivol ne bɛɛs ɛTaanggbey yegha, ne ɛhaa ne baasek ninaa ne roos ɛbhɛ na nggbang ngga, ne ɛhaa ne towos ɛTaanggbey yegha, kaa ne tɔɔrek me isan iyɔm. Daa ɛli ne nggaa mɔn nikɔn nɛnaa wo daa ne yɔm ne iyɛɛ gbik ne yɔm ìnang ne itin.

¹⁴ ɛDaray njwɛɛn na kaa ne sit izɛɛng ɛbhɛ de walala daa mee, ɛ ta nang me ìnang ne itin ne ishwim ba ne ifɛ so ndɔ ɛYɛso ɛKiriti gha.

¹⁵ iBol lɛdee wo ne so itin nɛ sɛ kyinak daa ne iphɛ, iphɛ kɛ hɔn sɛɛ say iphɛ gbik. iBol de ne iphɛ bo, “ɛYɛso ɛKiriti gha kaa yɛɛs ndɔ ɛzay ya te ɛ phɔt ninaa ne ɛfɔt.” Mee wo ne n bok ɛfɔt to n shɛs ndɔ ninaa ne ɛfɔt ta.

¹⁶ Gbik ne iphɛ ɛlɛy, ɛTaanggbey ya kɛ ne tɔɔrek me isan iyɔm gbom, mee wo ne n shɛs ne ɛfɔt to ndɔ ninaa ne ɛfɔt ta. ɛYɛso ɛKiriti gha kɛ mɔn ɛlɛ wo te ɛ tɔɔrek wu ɛbɔk ɛbhɛ ne ɛ sang ɛgak, te n te me ɛkɔn ne mɛmɛ nɛ ɛlɔ ninaa nɛ nibhɛ sɛ nang ne itin nɛ ne ɛbhɛ, nibhɛ sɛ iken ne inat de.

¹⁷ Te ne nang ɛGɔm ne iNat ta ne ndiinday ne igbom cɛcɛɛy! ɛHaa ne ɛbhɛ ɛ soye ɛTaanggbey ya zɔng ngo, ɛhaa ne ɛ sang ɛgak ko, ɛhaa ne i sang yaang ɛbhɛ wo. Ɛɛy.

¹⁸ ɛTimɔti, ɛngɔn nge, nzi teesek kɛ ne ibol lɛdee wo ndɔ ne iwɔ mo ɛli ne ɛTaanggbey ya kɛ ku nang ninyi na tɛ nibhɛ bol daa ne ito mo de. Te ne lenɛ ne ˆɛ kɛ roos ibol lɛdee wo, ˆɛ yɛɛ ne ta itsom ntin de, ˆɛ ta ihywɛ yɛnɛng,

¹⁹ ɛ bok ìnang ne itin mo de gɛy ɛ tenes izɔlɔs ne irway iywɛnɛng mo. Nidɛng ninyi na kɛ mbaray tang tenes izɔlɔs ne irway nibhɛ da, ìnang ne itin nibhɛ da kɛ ne bees se.

²⁰ Ndɔ nibhɛ wo, ɛHyimaniyus sonɛ, ɛLɛzɛnda ne ta sonɛ. Nggɛ ne ku nang ɛShɛtan ne ihwet daa nibhɛ. ɛBɛ wo yaa ne mɛmɛ nibhɛ nɛ ɛli nɛ nibhɛ yaa kɔɔng nge bɛɛs ɛTaanggbey yegha.