1 iTasɔlɔnika 5 - ɛWee ne ìTsɛm iHywas

¹ Nigwaa en, daa ne ibol ɛtuk ge ne nten de nɛ nikɔn nɛnaa wo sɛ te wo, sɔng iphɛ ji ta so yaa haa nyini nɛ nang.

² Daa ɛli ne nyinɛn no, ˆɛ yɛɛ ɛn ntsɛntsɛng wu ɛtuk ɛDaray ya sɛ yɛɛs te ɛhaa ɛyi ne ɛ yɛɛs ne ɛtuk.

³ Sɛ́ sɛ ninyi na i bo, “Ncaang sonɛ, irway ne laal sonɛ,” nggbang ngga ne sɛ nibhɛ dirik, te ɛkuk ne isik ne ɛngɔn kɛ yaa rɔ ɛbhɛ. Sɔng iphɔrɔt sɛ sonɛ nang.

⁴ Nigwaa en, sɔng ne ˆɛ so ɛn ɛlɛ wo nang. Sɔng ɛ so ɛn ndɔ gbyik ne ɛtuk kɛghaa nggyɛ wo sɛ ma sɛ nyini dirik te ɛhaa ɛyi gha nang.

⁵ Gbik mon no ˆɛ so ɛn ninɔn ne iwɛwɛy, ninaa nibhɛ hyel ne igbey. Sɔng njwɛɛn soye ninaa ɛtuk ka nang, sɔng njwɛɛn ne ta soye ninaa ndɔ gbyik ka nang.

⁶ iPhɛ ɛlɛy, sɔng njwɛɛn ne te te ɛbyin ninyi na nɛ nibhɛ kɛ wum nwa da nang. Te njwɛɛn shɛɛ semey te kyii ne ihywɛɛ njwɛɛn ɛlɔ ɛdaan.

⁷ Daa ɛli nɛ ninaa ne wumus nwa da i wumus ne ɛtuk. Ninaa ne sɔ iguut de nibhɛ tes ziizii wo i sɔ ne ɛtuk.

⁸ Daa ɛli ne njwɛɛn soye ninaa ne igbey ya, te njwɛɛn ne kyii ne ihywɛɛ njwɛɛn ɛlɔ ɛdaan. Te njwɛɛn yɛk ghe ne ìnang ne itin de gbik ne ishwim ba te ɛtura ne igyɔs ne kyɛngɛ ɛgyɛy. Te njwɛɛn yɛk ghe ne sit ne irwisɛ da ne iphɛ nang iphɔrɔt da te ɛkɔn ne ito ne igyɔs.

⁹ Sɔng ɛTaanggbey ya kɛ kasa njwɛɛn te njwɛɛn sɛ sɔ nggbang ne njenjek ɛbhɛ nang. Ɛ kɛ yang kasa njwɛɛn te njwɛɛn sɛ iphɔrɔt, lenɛ ne ɛDaray njwɛɛn ɛYɛso ɛKiriti gha.

¹⁰ ɛKiriti gha kɛ ku ɛlɔ njwɛɛn, ɛlɔ ne sɛ́ sɛ ɛ kɛ yɛɛs te njwɛɛn shɛɛ ne ɛbhɛ ne njwɛɛn so niken, ne njwɛɛn kɛ wum nwa.

¹¹ iPhɛ ɛlɛy, te ɛrɔngɔ ne te ɛrɔngɔ itsɔngɔl gɛgɛy, te ɛrɔngɔ ryɔng ɛrɔngɔ ɛli ne ɛ ku mɔn ɛn no.

iBol ne Taal Lɛ gbik ne iKyili

¹² Nigwaa en, njwii roro nɛ nyinɛn, nang ɛn ninaa ne tak iyɔm ne ɛtomɛ gha ndɔ mon ne ndiinday. Kaabi nindiinday mon na ndɔ ɛDaray ya, nɛ nibhɛ kpɛng nyini wo.

¹³ Nang ɛn nibhɛ ne ndiinday gbom te ˆɛ sim ɛn nibhɛ ɛlɔ ɛtomɛ yɛghaa nggyɛ wo nɛ nibhɛ i mɔn no. Shɛɛ ɛn ncaang ndɔ mon no.

¹⁴ Njwii roro ne nyinɛn nigwaa en, kpɛng ɛn ninaa ne itek ka, tes ɛn ninaa ne irway tɔtɔk ga itsɔngɔl gɛgɛy, phyighis ɛn nikyɔkyɔt ta, te ˆɛ bo ɛn ɛbɔk nɛ ninyi na gbik.

¹⁵ Wɛɛ ɛn yɛnɛng, sɔng ɛnyi tal ibebhe ne ibebhe nang. Yang yɛk ɛn irway ne mɔn nikɔn niyɛnɛng ndɔ mon no nɛ ɛbyin ninyi na cɛcɛɛy.

¹⁶ Boos ɛn irway ihwala cɛcɛɛy.

¹⁷ Bol ɛn ne ɛTaanggbey cɛcɛɛy.

¹⁸ Nang ɛn ɛTaanggbey yegha irway ihwala ndɔ nikɔn na gbik, daa ɛli ne ɛbɛ wo ne ɛTaanggbey ya i sim ɛlɔ mon ndɔ ne ishwɛɛ ne ìtsɛm mon de ne ɛYɛso ɛKiriti gha.

¹⁹ Sɔng ˆɛ yɛbhɛk ɛn ɛtomɛ ne iKabyik ɛTaanggbey ya nang.

²⁰ Sɔng ˆɛ bɛɛs ɛn ìnang ninyi da nɛ nibhɛ tɔng ibol ɛTaanggbey de nang.

²¹ Yang phɔwɔ ɛn nikɔn na gbik, te ˆɛ boos ɛn ɛhaa ne ɛ kɛ jam.

²² Shɛɛ ɛn kyaam ne gbik ɛkɔn na ne ɛ so ibebhe.

²³ Te ɛTaanggbey ya ne ito ɛbhɛ ne ɛ soye ɛhaa ne irway ne laal la, tul nyini kang yɛnɛng-yɛnɛng, ɛ te ikabyik mon, ne iken mon, ne ibek mon de shɛɛ wɛlɛng ɛkɔn ne tok, ɛtuk ka ne ɛDaray njwɛɛn ɛYɛso ɛKiriti gha sɛ bhɛ kyii wo.

²⁴ ɛHaa ne ɛ kɛ yel-le nyini wo, ɛ so sɛ kyinak daa ne ibol ɛbhɛ, aa ne mɔn ɛlɛ wo.

²⁵ Nigwaa en, bol ɛn ne ɛTaanggbey daa ne ito mos.

²⁶ Kyisi ɛn nigwaa na gbik ne ikyili ne ishwim ninaa ne roos.

²⁷ Nzi roro ne nyinɛn ndɔ ne irywɛɛk ɛDaray, tɔng ɛn gbik nigwaa na ɛwee yɛwoo wo.

²⁸ Te izɛɛng ɛDaray njwɛɛn ɛYɛso ɛKiriti shɛɛ ne nyinɛn. Ɛɛy!