1 iTasɔlɔnika 4 - ɛWee ne ìTsɛm iHywas

iHywee ne iShwɛɛ ne ifɛ i Nang ɛTaanggbey ye iRway iHwala

¹ ɛTsim mɛ gbik nigwaa en, njwii roro ne nyinɛn, njwii ta bol ne nyinɛn ndɔ ne ɛYɛso irywɛɛk ɛDaray njwii bo wu te ɛ shɛɛ ɛn ihywee ne ishwɛɛ da ne ifɛ nang ɛTaanggbey ye irway ihwala ɛli ne ˆɛ kɛ mɛmɛ ɛn nɛ ɛlɔ mos sa. ɛTsak ɛlɛy ne ˆɛ shɛɛ ɛn ɛlyilyɛghaa wo. Njwii ne roro ne nyinɛn wu te ˆɛ hante ɛn nɛ gbom.

² Daa ɛli ne ˆɛ yɛɛ ɛn ɛkɔn na ne njwi kɛ mɛmɛ nyini nɛ wo le ɛlɔ ɛDaray ɛYɛso.

³ Daa ɛli ne icwas ɛTaanggbey so te ɛ tul nyini kang. iPhɛ ɛlɛy ne ˆɛ tel ɛn ishwɛɛ ne nzangas de.

⁴ Te ɛrɔngɔ mɛmɛ nɛ ɛli ne aa wum ibek ɛbhɛ ndɔ ne iwɛwɛy te ɛ nang ito ɛbhɛ ne ndiinday.

⁵ Sɔng ˆɛ te ɛn tɛ ninaa ne hame nibhɛ so niYahodawa na nɛ nibhɛ doo ɛTaanggbey yegha nibhɛ soye nikpuru ne ihyop ne ibek nibhɛ de nang.

⁶ Sɔng ɛdɛ mon ne bees ɛgwaa ɛbhɛ irway, ɛ mɔn ɛbhɛ ibebhe daa nikɔn nɛnaa wo nang. Njwi kɛ ku tɔng nyini, njwii ne ta kpɛng nyini wu ɛDaray ya sɛ baasek ninaa ne mɔn nikɔn nɛnaa wo nggbang.

⁷ ɛTaanggbey ya kɛ yel-le njwɛɛn te njwɛɛn shɛɛ kang, sɔng i shɛɛ ishwɛɛ ne irwirwik nang.

⁸ iPhɛ ɛlɛy gbik ɛnyi gha ne ɛ kɛ ne mbaray ibol lɛdee wo, sɔng ɛten ɛsii ne ɛ kɛ ne mbaray nang. Ɛ kɛ mbaray ɛTaanggbey ye ne ɛbhɛ ɛ naas nyini iKabyik iKang Ɛbhɛ de.

⁹ Daa ne ibol ne sim nigwaa de, sɔng iphɛ ji so yaa ta haa nyini nɛ nang. Daa ɛli ne nyinɛn no ne ito mon, ɛTaanggbey ya kɛ ma ku mɛmɛ nyini nɛ, wu te ɛrɔngɔ sim ɛrɔngɔ.

¹⁰ ɛTsak, nyinɛn ninaa ne ivel ne iMakyidɔniya na gbik, ɛrɔngɔ i sim ɛrɔngɔ. Gbik ne iphɛ ɛlɛy nigwaa en, njwii ne bok nyini te ˆɛ hante ɛn nɛ gbom.

¹¹ Kyanke ɛn nyini nɛ te ihywɛɛ mon kyii ɛlɔ ɛdaan, te ˆɛ wɛɛ ɛn ɛtomɛ gha ne ɛ so ɛyisɛ mon na, tɛ ɛrɔngɔ mɔn ɛtomɛ ne ibɔ ɛbhɛ ɛli ne njwi kɛ ku tɔng nyini wo.

¹² Wu ˆɛ kɛ mɔn ɛn ɛlɛ wo, ˆaa ne te ɛn ninyi na ne hame nibhɛ soye ninaa ne iroos sa nang nyini ne ndiinday. Sɔng ˆaa ne tɔk ɛn ɛkɔn ɛlɔ ɛnyi nang.

iBhɛ Kyii ɛDaray Da

¹³ Nigwaa en, sɔng njwii sim te ˆɛ sɛ tɔ ɛn gbyik daa ne ibol ninaa nɛ nibhɛ kɛ wum nwa da ndɔ ɛKiriti gha nang, kaabi ninaa nɛ nibhɛ kɛ kus so. Daa ɛli ne ˆaa yung bees ɛn irway tɛ ninaa ne hame nibhɛ kɛ sit irwisɛ da nibhɛ sɛ́ bhɛ shɛɛ ne ɛTaanggbey ya.

¹⁴ Njwɛɛn kɛ nang ne itin nɛ wu ɛYɛso gha kɛ ku ne ɛ kyii ta yilitsik ne ikpuu da. iPhɛ ɛlɛy, njwɛɛn kɛ ne ta nang ne itin nɛ wu ɛTaanggbey ya sɛ yɛɛs ne ɛYɛso gha gbik nɛ ninaa nɛ nibhɛ kɛ wum nwa da ndɔ ɛbhɛ wo.

¹⁵ Njwii tɔng nyini daa ɛli ne iBol ɛTaanggbey de bo wu njwɛɛn no ne sɛ́ so niken na nten de ne ɛDaray ɛYɛso gha sɛ́ bhɛ kyii wo, wu hang njwɛɛn sɛ phɔt ninyi na nɛ nibhɛ kɛ ku kus so ne yaang ɛbhɛ.

¹⁶ Daa ɛli ne ɛDaray ya ne ito ɛbhɛ sɛ le daa ne irywa wo ɛ tɔm ne yel-le ne ɛgbaang ne izɔlɔs, ne izɔlɔs ɛndiinday nimalɛka gbik ne ɛntuntuung ɛTaanggbey. Ninaa nɛ nibhɛ kɛ ne kus ndɔ ɛKiriti gha ne ji tsa nibhɛ yilitsik.

¹⁷ ɛTsim mɛ ɛlɛy, njwɛɛn no ne sɛ́ ne tɔ niken na, ne kɛ mak ndɔ ɛzay ya, sɛ́ ne ma ji bo njwɛɛn ndɔ ne inɔp i bhɛ sɛme en ne ɛDaray ya daa ɛphiri ne irywa. Njwɛɛn sɛ́ ne bhɛ shɛɛ ne ɛDaray ɛYɛso gha ishwɛɛ ne inat.

¹⁸ iPhɛ ɛlɛy, ne ɛ laasek ɛn itso mon irway ne ibol lɛdee wo.