1 iTasɔlɔnika 3 - ɛWee ne ìTsɛm iHywas

¹ iPhɛ ɛlɛy, kɛ ne sɛ njwi kɛ yaang njwi aa sang yɛɛ ne bo ɛbɔk daa ne ibol ne sang yaang nyini wo, njwi ne yaang iphɛ kɛ jam mɛ i tek njwii nggerey mos ɛgarang ne iTina.

² Njwi ne ji tom ɛTimɔti ye ne ɛ so ɛgwaa mos ne ɛtaay ɛtomɛ mos ndɔ ne sanga ibol ɛKiriti de ɛlɔ mon na. Njwi kɛ tom ɛbhɛ te ɛ yɛɛs te ɛ te nyini itsɔngɔl gɛgɛy, ɛ hante nyini ne ihwet ndɔ ne ìnang ne itin mon de.

³ ɛLɔ ne nggbang ngɛdaa wo yaa yung te ɛdɛ mon ɛ tul irway. Nyinɛn no ne ito mon ˆɛ ku yɛɛ ɛn wu kɛ ku ryɔng njwɛɛn nggbang ngɛdaa wo.

⁴ ɛTsak, nten de ne njwi kaa so ne nyinɛn no, njwi kaa ne ku i tɔng nyini wu sɛ baasek njwɛɛn nggbang. Ɛlɛy ne iphɛ kɛ ne te, ɛli ne ˆɛ ku yɛɛ ɛn no.

⁵ iPhɛ ɛlɛy, kɛ sɛ nggɛ yaang naa sang yɛɛ ne bo ɛbɔk ka daa ne yɔm ne yaang nyini wo, ne n tom ɛTimɔti ye te n phok ɛli ne ìnang ne itin mon de so. Daa ɛli ne nggɛ wum ɛnik, nzi wɛɛ te ɛhaa ne luk ka yaa yung luk nyini ˆɛ hoghɛse ɛn, ɛtomɛ mos sa te buu.

⁶ ɛTimɔti gha kɛ ne bhɛ kyii ɛlɔ mon na ne ibol iyɛnɛng daa ne ìnang ne itin mon de gbik ne ishwim mon da. Ɛ kɛ mɔng njwii wu ˆɛɛ tas ɛn ne njwit byirik, wu ˆɛ sim ɛn te ˆɛ sɛ ma yaang ɛn njwi ɛli ne njwii ma sim te njwi sɛ yaang nyini wo.

⁷ iPhɛ ɛlɛy nigwaa en, gbik ndɔ ne nggbang mos da ne bees irway mos da, ibol ne ìnang ne itin mon de kɛ ne te njwii itsɔngɔl gɛgɛy.

⁸ ɛLyilyɛghaa wo, njwi yaa ne hante ne te niken daa ɛli ne ˆɛ kɛ kyinak ɛn ne ihwet da ndɔ ɛDaray ya.

⁹ iYa ihywee ne irway ihwala ne njwi yaa ne ji tɔɔrek ɛTaanggbey yegha ɛlɔ mon naa? Njwi yaa ne tɔɔrek ɛbhɛ irway ihwala da gbom daa ne irway ihwala da ne njwi bok ɛlɔ mon na.

¹⁰ Ne ɛtuk ne igbey njwi kyangas nɛ njwi bol ne ɛTaanggbey ya, te njwi sɛ njwi yaang nyini irwisɛ ne irwisɛ, te njwi shwaak ɛkɔn na ne ɛ so byit ndɔ ne ìnang ne itin mon de.

¹¹ Te ɛTaanggbey ya ne ɛbhɛ ɛ so ɛTaa gha ne ito ɛbhɛ, ne ɛDaray njwɛɛn ɛYɛso gha phaal njwii ɛnkiinɛ ne yɛɛs ɛlɔ mon na.

¹² Tɛ ɛDaray yɛk ngɛ ˆɛ hante ɛn nyini nɛ ndɔ ne ishwim ne ˆɛ bok ɛn ndɔ mon nɛ ninyi na gbik, te ishwim mɛ hɔn ifɛ ngisit gbom ifɛ te ɛli ne ishwim ba ne njwi bok ne nyinɛn no so.

¹³ Te ɛDaray ya yɛk ngɛ irway mon hante ne ihwet, te tul nyini kang, wɛlɛng ɛkɔn ne tok ɛnu ɛyisɛ ɛTaanggbey ya ne ɛbhɛ ɛ so ɛTaa gha, ɛtuk ka ne ɛDaray njwɛɛn ɛYɛso gha sɛ bhɛ kyii nɛ ninyi ɛbhɛ na.