1 iTasɔlɔnika 1 - ɛWee ne ìTsɛm iHywas

iKyili

¹ ɛWee yɛwoo wo le ɛlɔ ɛBulus, ne ɛSila gbik ne ɛTimɔti ɛbhɛ phɛɛs ɛlɔ idira ninaa ne roos ne iTasɔlɔnika nɛ nibhɛ soye ninaa ɛTaanggbey ne ɛ so ɛTaa, nibhɛ ta soye ninaa ɛDaray ɛYɛso ɛKiriti. Te izɛɛng ne irway ne laal shɛɛ ne nyinɛn.

iShwɛɛ gbik ne ìNang ne iTin Ninyi ne iTasɔlɔnika

² Njwii tɔɔsel ɛTaanggbey ye irway ihwala cɛcɛɛy ɛlɔ mon na. Njwii yeres irywɛɛk mon ndɔ ne bol ne ɛTaanggbey ya.

³ Njwii tas ne nyinɛn ɛnu ɛyisɛ ɛTaanggbey ya ne ɛ so ɛTaa gha. Njwii tas ne ɛtomɛ gha ne ìnang ne itin mon da i tɔɔsel lo, ne ɛtomɛ gha ne ɛ mɔn ɛn lenɛ ne ishwim mon da, gbik ne rop iku mon de ne ɛ bok ɛn lenɛ ne sit ne irwisɛ da daa ɛDaray njwɛɛn ɛYɛso ɛKiriti gha.

⁴ Nigwaa en ne ɛTaanggbey sim, njwii yɛɛ wu ɛTaanggbey ɛbhɛ kɛ kasa nyini.

⁵ Daa ɛli ne sɔng njwi kaa yɛɛs nyini ne ibol iyɛnɛng ngge ne ɛnu zɔng nang, iphɛ kaa bok ihwet, iphɛ bok iKabyik ɛTaanggbey, iphɛ ne so hyɔrɔ ne itin. Ɛ yɛɛ ɛn ihywee ne ishwɛɛ da ne njwi kaa shɛɛ ndɔ mon no, ishwɛɛ yɛ kaa so te njwi phyik nyini.

⁶ Ɛ kɛ ne te nyini ninaa ne mɛmɛ ne ihywel mos da ne ivaa ɛDaray da. Gbik ne ihywee ne nggbang ngga ne ɛ kaa sɔ ɛn no, ne ɛ say ɛn ibol de ne irway ihwala idee ne ikabyik ɛTaanggbey de iphɛ i nang.

⁷ Kɛ ne lenɛ ɛlɛ wo ɛ te nyini ɛkɔn ne mɛmɛ nɛ ɛlɔ ninaa ne roos ne iMakyidɔniya gbik nɛ ninaa ne iKaya na.

⁸ iBol ɛDaray de kɛ ne le ɛlɔ mon na iphɛ shwalat nilɔ na gbarang, sɔng iphɛ kɛ ne kyinak ne iMakyidɔniya de ne iKaya de zɔng nang. Gbik ɛlɔ gha ne njwi kɛ bok ngɛ njwi ne phok i darat ngka ne ìnang ne itin mon de ne ɛTaanggbey ya. iPhɛ ɛlɛy sɔng njwi ne ta bok ihak ibol ne njwi yaa ta yɔngɔ dɔng nang.

⁹ Daa ɛli nɛ ninyi na ne ito nibhɛ bhɛ tɔng ihywee ne say da ne ɛ kaa say ɛn njwi wo. Nibhɛ tɔng ɛli ne ɛ kaa hyere ɛn nyini ɛlɔ ɛTaanggbey ya ɛ tek ɛn re igunkyi de ntsong nggaa, ɛ yaa re ɛn ɛTaanggbey ne itin na, ɛhaa ne iken na ntsong ngga,

¹⁰ ɛ ta i hyep ɛn bhɛ kyii ɛNgɔn ɛTaanggbey da daa ne irywa wo. ɛNgɔn na ne ɛTaanggbey ya kaa yiisik ɛbhɛ ndɔ ne ikpuu da. Kaabi ɛYɛso gha ne ɛbhɛ kɛ phɔt njwɛɛn ɛlɔ ne njenjek ge ne ihywɛ yaaso wo.