1 iKɔrɔntos 2 - ɛWee ne ìTsɛm iHywas

iBol ɛKiriti ne kɛ Gangat

¹ Nigwaa en, ɛli ne nggaa yɛɛs ɛlɔ mon na, sɔng nggaa ne bol ne nyinɛn ndɔ ne yɛɛ ne ivol gbik ne ntsɛntsɛng ɛten ɛsii ɛli ngga tɔng nyini ibol ɛTaanggbey de ne kaa rɛɛ wo nang.

² Daa ɛli ne nggaa ku rop ndɔ ne irway nge, nten de ne nggaa so ɛlɔ mon na, wu hang naa bol ihak ibol kang ne ibol ɛYɛso ɛKiriti de ne idee ne igangat ɛbhɛ daa ne ihon no.

³ Nggaa tsa n yɛɛs ɛlɔ mon na kyɔkyɔt, nzi kparat daa ɛli nggaa bok ɛnik.

⁴ Sɔng nggaa tɔng ibol iyɛnɛng ngge de ndɔ iwɔrɔp, ne ntsɛntsɛng nang. iVol nge da kaa yang tɔɔrek igbom ne iKabyik ɛTaanggbey,

⁵ te ìnang ne itin mon da kyinak daa ne igbom ɛTaanggbey, sɔng daa ne ntsɛntsɛng niten nisii nang.

Ntsɛntsɛng ɛTaanggbey

⁶ Gbik ne iphɛ ɛlɛy, njwii ne bol nɛ ninyi na nɛ nibhɛ kɛ hɔn ndɔ ne ìnang ne itin nibhɛ ivol ne ntsɛntsɛng ngga. Sɔng ne so ntsɛntsɛng ɛzay yɛdee nang, sɔng ne so izee nigɔm ɛzay yɛdee ne iphɛ sɛ taal le nang.

⁷ Ntsɛntsɛng ngge ne nzi bol lɛ wo so ntsɛntsɛng igying ɛTaanggbey ne ɛ kɛ rɛɛ ɛten ɛsii nɛ, ntsɛntsɛng ngge ne ɛ kaa ku ryɔng ɛli ne kɛ tang ryɔng ɛzay ya te ihywɛ te i nang njwɛɛn ne ndiinday.

⁸ Sɔng ɛdɛ ɛgɔm ɛzay yɛghaa wo kɛ ne ku seng ntsɛntsɛng ngɛdee wo nang, daa ɛli ne sɛ yɔng nibhɛ kɛ seng ngo, sɔng nibhɛ saa ne gangat ɛDaray ne ito-ndiinday yegha nang.

⁹ Te ɛli ne kɛ ku haa i bo, “Sɔng irwisɛ kɛ ku yaang, sɔng itoro kɛ ku phok, sɔng irway kɛ ne ku tas icwas, ɛkɔn na ne ɛTaanggbey ya kɛ ryɔng ninyi na nɛ nibhɛ sim ɛbhɛ wo nang.”

¹⁰ Ne so njwit ne ɛTaanggbey kɛ ne tɔɔrek nikɔn nɛnaa wo lenɛ ne iKabyik ɛbhɛ. iKabyik ge phɛ phɛl nikɔn na gbik, iphɛ phyii bhɛ phɛl nikɔn ɛTaanggbey ya nɛ nibhɛ so kyukyum.

¹¹ ɛHay ɛbhɛ sɛ yɛɛ ne seng icwas ne irway ɛhak ɛnyi kang ne ikabyik ɛnyi yɛɛ? Ɛlɛy ne iphɛ so, sɔng ɛnyi sɛ yɛɛ ne seng icwas ɛTaanggbey da kang ne iKabyik ɛTaanggbey de nang.

¹² Sɔng kɛ ne nang njwɛɛn ikabyik ɛzay yɛdee bɛ nang. Kɛ nang njwɛɛn iKabyik ne iphɛ le ɛlɔ ɛTaanggbey, te njwɛɛn seng nikɔn na ne ɛTaanggbey ya kɛ nang njwɛɛn ne irway itɔrɔk.

¹³ iPhɛ ɛlɛy, sɔng njwii ne bol ivol da ne ntsɛntsɛng ne ɛten ɛsii i mɛmɛ nɛ nang, njwii yang bol ivol ne iKabyik i mɛmɛ nɛ nten de ne njwii kpɛl nikɔn ne iKabyik ka ɛlɔ ninaa nɛ nibhɛ so ninaa ne iKabyik ka.

¹⁴ ɛNyi gha ne iKabyik ge i sang hyel ɛbhɛ wo, sɔng aa ne say nikɔn na nɛ nibhɛ le ne iKabyik ɛTaanggbey de nang daa ɛli nɛ nibhɛ so te iwamang ɛlɔ ɛbhɛ gha, sɔng aa ma yung seng nibhɛ nang, daa ɛli ne i seng nibhɛ lenɛ ne iKabyik ge.

¹⁵ ɛNyi gha ne iKabyik ge i hyel ne ɛbhɛ wo, ɛ yɛɛ ne hosop nikɔn na gbik, sɔng ɛnyi i ne yɛɛ ne hosop nikɔn ɛnyi na ne iKabyik ge i hyel ne ɛbhɛ wo nang.

¹⁶ ɛWee ne iBol ɛTaanggbey yo i bo, “ɛHay ɛbhɛ yɛɛ icwas ɛDaray daa? ɛHay ɛbhɛ tɔɔrek ɛDaray yegha ɛkɔn ne mɔn ne?” Njwɛɛn, ninaa ne roos sa, ihywee ne irway ɛKiriti ne so ndɔ njwɛɛn.