1 iKɔrɔntos 16 - ɛWee ne ìTsɛm iHywas

ìNang te Phyik Ninaa ne Roos

¹ Daa ne ibol de ne yaa nang ɛkɔn ne phyik ninyi ɛTaanggbey ya nɛ wo, mɔn ɛn ɛkɔn na ne nggɛ mɔng idira ninaa ne roos ne iGalatiya na.

² Yaa sɛ ɛtuk ne iLaadi te ɛrɔngɔ ne tul ɛkɔn ɛ tek, cɛcɛɛy ne ɛkɔn na ne ɛ sɛ. Sɔng ɛ hyep ɛn nggyi yɛɛs so nyɛɛn ɛ kyi tuma ɛn no nang.

³ Sɛ ne sɛ nggɛ tuu, nzɛ ne nang ninyi na ne ɛ kɛ kasa ɛn nibhɛ no ɛwee ne yaa bhɛ seng nibhɛ, n ji tom nibhɛ ne iphyik mon da ne iYɛrushɛlɛm de.

⁴ Sɛ ne sɛ nggɛ yaang iphɛ kɛ jam mɛnaa phɛ, nibhɛ ne bhɛ hyeeng me.

ɛBulus sa kɛ Ryɔng Nge Aa Hyel iHywel

⁵ Naa yɛɛs ɛlɔ mon na ɛtsim mɛ ne nggɛ roos ɛgarang ne iMakyidɔniya, daa ɛli ne n bok irway ne roos iMakyidɔniya de.

⁶ Yaa rɔk nzɛ phyɔngɔle ɛlɔ mon na, hang nzɛ taal ikos ɛlɔ mon na, te i sɛ ɛ phyik ɛn mɛɛn ndɔ ne ìhywel nge da gbik ɛlɔ gha ne naa phɛ.

⁷ Sɔng nzi sim te nzɛ phyii yaang nyini ɛlyilyɛghaa wo n phee wit nang, daa ɛli nzi sim nzɛ phyɔngɔle ɛlɔ mon na gbom, wu ɛTaanggbey kɛ sim.

⁸ Naa phyɔngɔle ne iFisus de phyii re iDira ne iPɛntakos.

⁹ Daa ɛli ne kɛ phaal me nkpiinɛ nitomɛ na gbom ndɔ ne iFisus de, ninaa ne iphup ne ma jung sonɛ gbom.

¹⁰ Yaa sɛ ɛTimɔti gha kɛ tuu ɛlɔ mon na, te ne ɛ say ɛn ɛbhɛ ne irway ijwaan, daa ɛli ne ɛ ma so ɛhaa ɛtomɛ ɛTaanggbey ya te me wo ne mang.

¹¹ iPhɛ ɛlɛy, sɔng nzi ne sim te ɛdɛ mon sɛ bɛɛs ɛTimɔti yegha nang. Phyik ɛn ɛbhɛ te ɛ yɛk ɛn ɛbhɛ ne nkiinɛ ncaang, te ɛ yɛɛs ɛlɔ nge gha, daa ɛli ne nzi hyep iyɛɛs ɛbhɛ da nɛ nigwaa na gbik.

¹² Daa ne ibol ɛgwaa njwɛɛn ɛPolos de nang, nggɛ roo ne ɛbhɛ gbom wu te ɛ roos ɛbyin nigwaa gha ɛ yɛɛs ɛlɔ mon na. Sɔng ne ɛ bok irway ne yɛɛs sɛ ɛlyilyɛghaa wo nang. Ɛ sɛ ne yɛɛs nten de ne ɛ kɛ yaang iphɛ kɛ jam ɛbhɛ nɛ.

iBol ne Taal Lɛ

¹³ Shɛɛ ɛn ɛ ɛkanang, kyinak ɛn nting ndɔ ne ìnang ne itin mon de, rop ɛn irway te ɛ yɛk ɛn ihwet.

¹⁴ Gbik nikɔn na ne aa mɔn ɛn no, mɔn ɛn nibhɛ gbik ndɔ ne ishwim.

¹⁵ ˆƐɛ yɛɛ ɛn ɛli ninaa ne ijwee ɛTifanos nibhɛ bhɛ kɛ tsa nibhɛ teye ninaa ne roos sa ne iKaya de, nibhɛ kɛ ne nang ito nibhɛ gbik ndɔ ɛtomɛ ninyi ɛTaanggbey ya. Nzi roro ne nyinɛn nigwaa en,

¹⁶ roos ɛn ibol ninyi yɛdee nggyɛ wo gbik nɛ ninaa ɛtomɛ mos sa.

¹⁷ Nggɛ bok irway ihwala ne iyɛɛs ɛTifanos sa, ne ɛFatunatus sa gbik ne ɛKayakus sa. Nibhɛ kaa mɔn nikɔn na ne sɛɛ yɔng nyinɛn ɛ kɛ mɔn ɛn.

¹⁸ Nibhɛ kɛ nang me irway ihwala gbik ne nyinɛn no, ihywee ninyi yɛdee nggyɛ wo, iphɛ jam mɛ sɛɛ nang nibhɛ ne ndiinday.

iKyili ne Taal Lɛ

¹⁹ iJwira ninaa ne roos ne ivel ne iSiya de i kyiisi nyini. ɛKyila gha ne ɛkuk ɛbhɛ ɛPirisila gha gbik ne idira ninaa ne roos de nɛ nibhɛ so ne ijwee nibhɛ ma kyiisi nyini ndɔ ne irywɛɛk ɛDaray.

²⁰ Nigwaa na nɛ nibhɛ so ɛbɛ wo gbik i ne ma kyiisi nyini. Ya sɛ ɛ kɛ sɛm ɛn nyini wo nang, te ne ɛ kyili ɛn nyini ikyili ninaa ne roos.

²¹ Mee ne ɛBulus so nzi haa nyini ikyili yɛdaa wo ne iwɔ nge.

²² Gbik ɛnyi gha ne ɛ sang sim ɛDaray yegha, ne ɛ soye ɛkawɛy. Yɛɛs, ɛDaray yɔɔy.

²³ Te izɛɛng ɛDaray ɛYɛso de shɛɛ ne nyinɛn.

²⁴ Te ishwim nge da shɛɛ nyini gbik ndɔ ne irywɛɛk ɛYɛso ɛKiriti.