1 iKɔrɔntos 15 - ɛWee ne ìTsɛm iHywas

iYilitsik ɛKiriti

¹ ɛLyilyɛghaa wo nigwaa en, nzi sim na taate nyini ne iBol iYɛnɛng ngge ne nggaa tɔng nyini wo, idee ne ɛ kɛ say ɛn, ɛ ta roos ɛn no.

² Kɛ lenɛ ne iBol iYɛnɛng ngɛdee wo i phɔt nyini, wu ɛ kɛ wum ɛn iphɛ gɛy ɛli ne nggaa tɔng nyini wo. Kang ne iphɛ ɛlɛy, ɛ kɛ ne nang ɛn ne itin de buu.

³ ɛKɔn na ne ɛ shɛs gbik ndɔ nikɔn na ne nggɛ say yo ɛbhɛ ne nzi ne ma tɔng nyini. Ɛbhɛ ghaa lɛ, ɛKiriti gha kaa ku ɛlɔ ne ɛfɔt njwɛɛn, ɛli ne kɛ haa ndɔ ɛWee ne iBol ɛTaanggbey yo,

⁴ kɛ rɛɛ ɛbhɛ, kɛ ne yiisik ɛbhɛ ɛtuk ne itwat tɛ, ɛli ne kɛ haa ndɔ ne ɛWee ne iBol ɛTaanggbey yo,

⁵ ɛ kaa ne bhɛ wuru ɛBiturus se gbik nɛ ninyi ɛnduwubɔ nɛ nibhɛ ifaa na.

⁶ ɛTsim mɛ ɛlɛy, ne ɛbhɛ wuru nigwaa nɛ nibhɛ so ninaa ne roos nɛ nibhɛ kɛ hɔn ikpɔl iwii nten idaan, iday nibhɛ tɔ niken izenge ɛlɛ, nidɛng kɛ ne kus.

⁷ Ne ɛ ta bhɛ wuru ɛYakub bhe, ɛtsim mɛ ne ɛbhɛ wuru ninɔn ne tom ma gbik.

⁸ ɛTsim mɛ gbik ne ɛ ma ji wuru me, mee wo ne iyɛk ifas nge da labhe wo.

⁹ Mee nggɛ taasek n shɛs ndɔ ninɔn ne tom ma gbik, sɔng nggɛ ma yung hɔn ɛli ne sɛ yaak me ɛngɔn ne tom ma nang, daa ɛli ne nggɛ baasek idira ninaa ne roos ɛTaanggbey de nggbang.

¹⁰ Nɛ so izɛɛng ɛTaanggbey de ihywɛ kɛ te me nzo ɛli ne nzo wo. Sɔng izɛɛng ɛbhɛ de daa me wo kɛ ne te buu nang. Kwa, nggɛ ma yung mɔn ɛtomɛ gha nibhɛ gbik, gbik ne iphɛ ɛlɛy, sɔng ne so mee nang, izɛɛng ɛTaanggbey de ne ihywɛ so ne me wo.

¹¹ Hang ibol nge de yɔɔ, hang ibol nibhɛ de yɔɔ, ibol lɛdee wo ne njwii sanga, ibol lɛ ne ɛ kɛ ne ma nang ɛn ne itin nɛ.

iYilitsik ne iKpuu Njwɛɛn

¹² Wu ibol de ne njwii sanga wo i bo wu kɛ yiisik ɛKiriti yegha ne ikpuu da, yaa ne mɔn ɛli nidɛng mon ne yɔngɔ wu hang iyiisik ne ikpuu da sonɛ woo?

¹³ Wu yilitsik ne ikpuu da ne sang sonɛ wo, kaabi sɔng kɛ ne yiisik ɛKiriti yegha ne ikpuu da nang.

¹⁴ Wu kɛ ne sang yiisik ɛKiriti yegha ne ikpuu da, kaabi ibol ne njwi sanga wo ne so buu, ìnang ne itin mon de ne ma so buu.

¹⁵ Wu iphɛ so ɛtsak ne yilitsik ne ikpuu da sang ngɛ wo, te kaa ne so njwi kɛ iwul irywɛɛk daa ɛTaanggbey ya, daa ɛli ne njwi kɛ tɔng wu ɛTaanggbey ya kɛ yiisik ɛKiriti ye ne ikpuu, ɛlɛy sɔng ɛ kɛ ne yiisik ɛbhɛ nang.

¹⁶ Wu iyilitsik ne ikpuu da ne sang sonɛ wo, kaabi sɔng kɛ ne yiisik ɛKiriti yegha ne ikpuu da nang.

¹⁷ Wu kɛ ne sang yiisik ɛKiriti yegha tsik ndɔ ne ikpuu da, ìnang ne itin mon de ne so buu, ne ɛ tɔ ɛn ndɔ ne ɛfɔt mon no.

¹⁸ Wu iphɛ ne so ɛlɛ wo, kaabi ninaa ɛKiriti na nɛ nibhɛ kɛ kus so kɛ ne birit.

¹⁹ Wu iyɛk ne irway njwɛɛn da ndɔ ɛKiriti gha so ivaa ne iyɛnɛng ndɔ ɛzay yɛghaa wo zɔng, njwɛɛn sɛ ne te en ɛkɔn ne san iyɔm i phyin ɛbyin ninyi na gbik.

²⁰ Kɛ ne yiisik ɛKiriti yegha tsik ne ikpuu da ɛtsak, ɛbhɛ ne ɛ so te ire ɛyisɛ ne kɛ tsa pha ndɔ ninaa nɛ nibhɛ kɛ kus so ne sɛ yiisik nibhɛ wo.

²¹ ɛLi ne iku de kɛ yɛɛs lenɛ ne ɛten ɛsii gha, ɛlɛy ne iyilitsik ne ikpuu da kɛ ne ma yɛɛs lenɛ ne ɛten ɛsii gha.

²² ɛLi ne gbik ninyi na kɛ yaa kus daa ɛli nɛ nibhɛ so ninɔn ɛDɛmu na, ɛlɛy gbik ninyi na nɛ nibhɛ soye ninaa ɛKiriti na sɛ ne ma yiisitsik ne ikpuu da.

²³ Sɛ ne yiisik ɛrɔngɔ nten ɛbhɛ: ɛKiriti gha ɛbhɛ so te ire ɛyisɛ yɛ ne kɛ tsa pha, sɛ ne sɛ nten de ne ɛ kɛ bhɛ kyii, ne ma ji yiisik ninyi na nɛ nibhɛ soye ninaa ɛbhɛ na.

²⁴ ɛTsim mɛ ɛlɛy ɛzay ya ne ji taal le. ɛKiriti gha sɛ ne kyii ɛTaanggbey yegha ne ɛ so ɛTaa gha ne igbɔm ba, ɛtsim mɛ ne ɛ kɛ roos nigɔm ma, ne igbɔm ba gbik nɛ nigɔm ne ikpabyik ivebhe da.

²⁵ Daa ɛli ne iphɛ so nggbinggbing ɛKiriti gha sɛ so ne igbɔm ba ɛ phyii bhɛ yɛk ninaa ne iphup ɛbhɛ na ndɔ ɛhay ne icwa ɛbhɛ.

²⁶ ɛHaa ne iphup ɛtsim ma ne sɛ ji taal roos so ne so iku.

²⁷ ɛWee ne iBol ɛTaanggbey yo i bo, “ɛTaanggbey ya kɛ tek nikɔn na gbik ndɔ ɛta ɛbhɛ.” iPhɛ ne so ywɛywɛy wu icwin ne ivol da ne ifɛ bo, “Nikɔn na gbik ko,” sɔng kɛ byinki ne ɛTaanggbey ya ne ito ɛbhɛ, ne ɛbhɛ ɛ kɛ tek nikɔn na gbik ndɔ ɛta ɛKiriti gha nang.

²⁸ Sɛ́ sɛ kɛ tek nikɔn na ndɔ ɛta ɛKiriti gha, ɛbhɛ ɛKiriti gha ne ɛ so ɛNgɔn na sɛ ne ma tek ito ɛbhɛ ndɔ ɛta ɛTaanggbey ya ne ɛ kɛ tek nikɔn na ndɔ ɛta ɛbhɛ gha. ɛTaanggbey ya ɛbhɛ ne ji re igbɔm nikɔn na gbik.

²⁹ ɛLyilyɛghaa wo, ninyi na ne kɛ yɛk nibhɛ ne ibatisima de ɛlɔ ninaa nɛ nibhɛ kɛ kus so lɛɛ? iKyee nɛ nibhɛ sɛ ne ji sɛɛ? Wu iphɛ so ɛtsak iyilitsik ne ikpuu da sang sonɛ wo, ɛli nɛ nidɛng i bol lo, ikyee iphɛ kɛ ne te i yaak ninyi yɛnaa nggyɛ wo ne ibatisima de ɛlɔ ninaa ne kus soo?

³⁰ Wu iyilitsik ne ikpuu da sang sonɛ wo, ikyee iphɛ kɛ ne te njwɛɛn i tɔk en ijooro dee?

³¹ Nigwaa en, nzi wɛɛ iku izenge ne ihwɛlɛ! ɛGyɛy ne nzi ne hal ne nyinɛn gbik ne ishwɛɛ njwɛɛn tɛ nidaan nɛ ndɔ ɛYɛso ɛKiriti ne ɛ so ɛDaray njwɛɛn, iphɛ phɛ kɛ te nzi mɔn ɛlɛ wo.

³² Wu nggɛ ta itsom be ne inyam ɛhay de ndɔ ɛgarang ne iFisus sa, daa ne icwas ɛten ɛsii, naa ne sɛ ikyee, wu sɛ sang yilitsik ninyi na ne ikpuu daa? “Nɛ njwɛɛn ku i re, ku i sɔ, daa ɛli ne njwɛɛn sɛ kus ne ihwɛlɛ, ɛli nɛ ninyi na i bol lo.”

³³ Sɔng i luk nyini nang, “iShwɛɛ da nɛ ninyi nibebhe na i bees ishwɛɛ ninyi niyɛnɛng.”

³⁴ Kyi ɛn ne ihywɛɛ mon de ɛlɔ ɛdaan te ɛ kɔɔng ɛn ɛfɔt to. Daa ɛli ne nidɛng mon i doo ɛTaanggbey yegha. Nggɛ ne boote ɛlɛ wo te ɛ sɔ ɛn ncwa.

iBek ge ne Sɛ Yilinɛtsik ne iKpuu Da

³⁵ Nidɛng sɛɛ phom nibhɛ yɔngɔ, “Iyiisik ninaa ne ikpuu da so ɛlii? Yaa ihywee ne ibek nɛ nibhɛ sɛ wuru nɛɛ?”

³⁶ iGyɛ ne iwamang! iPhɛ so nggbinggbing ɛkɔn na ne ɛ kɛ tup po ku nyɛɛn ɛ kyi wuru.

³⁷ ɛKɔn na ne ˆɛ kɛ tup po, sɔng ɛlɛy ne ɛ wuru nang, ibɔrɔk kɛ zɔng ne i tup, hang ɛlikama yɔɔ, hang ibɔrɔk ɛhak ɛkɔn kang yɔɔ.

³⁸ ɛTaanggbey ya nang idede ibɔrɔk ihywee ne bek ge ne ɛ kɛ sim, idede ibɔrɔk ne bok ihywee ne ibek mpɛ.

³⁹ Sɔng ibek nikɔn ɛzay de so ihywee idaan nɛ nang; niten nisii bok ibek idaan nɛ, inyam ɛhay ne bok ibek idaan nɛ, ninon ne bok ibek idaan nɛ, izing ma bok ibek idaan nɛ.

⁴⁰ Nikɔn ɛdaa ne irywa sonɛ, nikɔn ndɔ ɛzay ne ma ta sonɛ, iyɛnɛng ne nikɔn ɛdaa ne irywa de ne so kang, iyɛnɛng nikɔn ndɔ ɛzay de ne ma so kang.

⁴¹ iTol ne iroy so kang, itol ne ifɛl ne so kang, itol niyuyɔrɔ ne ma so kang, ɛdɛ ɛyuyɔrɔ i ne tol ɛ phyin ɛdɛng.

⁴² ɛLɛy ne iphɛ sɛ ne so ne iyiisik ne ikpuu da. iBek ge ne i rɛɛ wo, iphɛ so idee ne iphɛ sɛɛ sa, ibek ge ne i ne yiisik iphɛ wo, sɔng iphɛ ne so idee ne iphɛ sɛɛ sa nang.

⁴³ I rɛɛ ibek ge ndɔ ne ishis, ne yiisik iphɛ ndɔ ne ndiinday. I rɛɛ iphɛ ndɔ ne kyɔkyɔt, ne ji yiisik iphɛ ndɔ ne ihwet.

⁴⁴ I rɛɛ ibek ge iphɛ so ibek ɛzay, ne yiisik iphɛ so ibek ne ikabyik. ɛLi ne ibek ɛzay de sonɛ wo, ɛlɛy idee ikabyik ne ma sonɛ.

⁴⁵ ɛLɛy ne kɛ haa ndɔ ne ɛWee ne iBol ɛTaanggbey i bo, “ɛDɛmu gha ne ɛ kaa so ɛnyi ɛyisɛ gha, kaa ryɔng ɛbhɛ i nang ɛbhɛ iken.” ɛDɛmu ɛtsim ma ne soye ikabyik ne iphɛ nang iken.

⁴⁶ Sɔng ibek ne ikabyik ka iphɛ kaa ne tsa iphɛ yɛɛs nang, ibek ɛzay de iphɛ kaa yang tsa ɛ yɛɛs, idee ne ikabyik ge kyi kungus.

⁴⁷ Ɛnyi ɛyisɛ gha kaa le ɛzay yeghaa, kaa ne ryɔng ɛbhɛ ne ne ivel. ɛHaa ne ifaa gha kaa ne le daa ne irywa.

⁴⁸ Ninyi na ne kɛ ne ryɔng nibhɛ ne ne ivel ɛzay yɛdaa wo ne so te ɛnyi gha ne kɛ ryɔng ɛbhɛ ne ne ivel da, ninyi na ne nɛ nibhɛ so ninaa ɛdaa ne irywa na ne so te ɛnyi gha ne ɛ le daa ne irywa wo.

⁴⁹ Te ɛli ne njwɛɛn so te ɛnyi gha ne kɛ ryɔng ɛbhɛ ne ne ivel da, ɛlɛy ne njwɛɛn sɛ ne ma bhɛ te te ɛnyi gha ne ɛ le daa ne irywa wo.

⁵⁰ Nigwaa en, nzi sim te ɛ sɛɛ seng ɛn ɛlɛ, sɔng ibek ne ivel ɛzay yɛdaa wo ne iphɛ so inwam ba nɛ neyi na sɛ́ sɛ ihop ne igbɔm ɛTaanggbey da nang. ɛLɛy ne mang, sɔng ibek ne sa de sɛ ne ma sɛ ɛkɔn ne ɛ sɛɛ sang sa nang.

⁵¹ Te mɔng nyini idɛ ibol igying ngge ne njwɛɛn kaa sang ku yɛɛ. Sɔng gbik njwɛɛn no sɛ kus nang, gbik njwɛɛn no, sɛ yang sunusi ibek njwɛɛn de,

⁵² nten idaan, te irwisɛ ne te zebhet, nten de ne kɛ wuute igba ɛtsim mo. Sɛ wuute igba wo, ne yiisik ninyi na nɛ nibhɛ kɛ kus so ndɔ ne ibek ne sang sa de, ne ji sunusi ibek njwɛɛn gbik.

⁵³ Daa ɛli ne iphɛ so nggbinggbing ibek ne sa yɛdee wo hyereey iphɛ teye idee ne sang sa de, ne sunu ibek ne ku yɛdee wo idee ne sang ku de.

⁵⁴ Sɛ ne sɛ ibek ne sa yɛdee wo kɛ sunuuy ne idee sang sa de, ibek ne ku de kɛ ma sunuuy ne idee ne sang ku de, sɛ ne ji shwaak ibol ne ɛwee ne iBol ɛTaanggbey de ne iphɛ bo, “Kɛ re iku de ne itsom, kɛ phoo iphɛ nɛ.”

⁵⁵ “iGyɛ ne iku, ihwet ne phobho da so ɛbii? ɛNyɛs mo wo so ɛbii?”

⁵⁶ ɛFɔt i nang iku de ihwet ne phoo, ɛfɔt to ne sɛ ihwet nibhɛ da lenɛ ne iMɛmɛ ɛMuusaa.

⁵⁷ Te ne dɛp ɛTaanggbey, ne ɛ kɛ te njwɛɛn re ɛfɔt to ne iku de ne itsom be lenɛ ne ɛDaray njwɛɛn ɛYɛso ɛKiriti.

⁵⁸ iPhɛ ɛlɛy nigwaa nge ne nzi sim, kyinak ɛn ne ihwet, sɔng ɛkɔn sungki nyini nang. See ɛn ito cɛcɛɛy ndɔ ɛtomɛ ɛDaray ya, daa ɛli ne ɛ yɛɛ ɛn sɔng ɛdɛ ɛkɔn na ne ɛ kɛ mɔn ɛn ɛDaray yegha nɛ wo sɛ te buu nang.