1 iKɔrɔntos 14 - ɛWee ne ìTsɛm iHywas

iZɛɛng ne iLwem ne iVol ɛNɛbi

¹ See ɛn ito ɛ tɔk ɛn ishwim, te ne ɛ yɛk ɛn ihyop daa nikɔn na ne izɛɛng ne iKabyik ɛTaanggbey de i naas so, yàng ji so izɛɛng ne ivol ɛnɛbi da.

² Daa ɛli ne sɔng ɛhaa ne bol ilwem ba i bol nɛ niten nisii nang, ɛ bol ne ɛTaanggbey. Sɔng ɛnyi i seng ɛkɔn na ne ɛ bol nang, daa ɛli ne ɛ tɔng nikɔn nɛ nibhɛ so gying lenɛ ne ihwet ne iKabyik ge.

³ ɛNyi gha ne ɛ ne bol ivol ɛnɛbi da nang, ɛ ne bol nɛ niten nisii te ɛ byinɛ nibhɛ, ɛ te nibhɛ itsɔngɔl gɛgɛy, ɛ mɔn nibhɛ ɛkɔn na ne aa laasek nibhɛ irway.

⁴ ɛNyi ne bol ilwem ba i byinɛ ito ɛbhɛ zɔng, ɛhaa ne bol ivol ɛnɛbi da ne byinɛ idira ninaa ne roos de.

⁵ Ɛɛy, nzi sim te gbik mon ɛ sɛ bol ɛn ne ilwem ba, nzi ne phyin sim te ɛ sɛ bol ɛn ivol ɛnɛbi da. ɛNyi ne bol ivol ɛnɛbi da phyin ɛhaa ne bol ilwem ba, wu ɛhak ɛnyi kɛ sang kpɛl ɛkɔn na ne kɛ bol ndɔ ne ilwem ba te iphɛ phyik idira ninaa ne roos de.

⁶ Nigwaa en, wu nggɛ yɛɛs nzi bol ne nyinɛn ndɔ ne ilwem ba, iphɛ aa ne phyik nyini bɛ? Kwa! Naa phyik nyini wo wu nggɛ phaal nyini idɛ ibol de, hang ishweng yɔɔ, hang nggɛ bol te ɛnɛbi yɔɔ, hang nggɛ mɛmɛ nyini ne ibol ɛTaanggbey yɔɔ.

⁷ Yung wɛɛ ɛn nikɔn na nɛ nibhɛ sang iken de ɛli lɛɛ, nikɔn ne isham ma te ɛmandɛɛng ngo ne nzom be. Wu izɔlɔs sɛ kɛ sang wuusi yɛnɛng sɛ ne seng iywel lɛ bɛ?

⁸ Wu kɛ ne sang wuuti igba wo ɛli ne yaa seng, ɛhay ɛbhɛ aa ne wuru ɛ phɛ ɛhay yaa?

⁹ ɛLɛy ne iphɛ ne so ɛlɔ mon na, wu ɛ kɛ bol ɛn ilem be ne kɛ sang seng ngo, yaa ne mɔn ɛlii i seng ɛkɔn na ne ɛ bol ɛn noo? iPhɛ ne so ɛ kɛ bol ɛn buu.

¹⁰ iLwem ba so ndɔ ɛzay ya ihywee-ihywee, idee ne bok ɛkɔn na ne iphɛ bol.

¹¹ Wu nggɛ ne sang seng ilem be ne i bol lo, ninaa nɛ nibhɛ ne bol lo ne so te tɛ ninaa ne kpoo ɛlɔ nge gha, naa ne ma so te ɛhaa ne kpoo ɛlɔ nibhɛ gha.

¹² ɛLɛy ne iphɛ ne ma so ɛlɔ mon na. ɛLi ne ɛ bok ɛn ihyop ne izɛɛng ne iKabyik ɛTaanggbey de, ne ɛ see ɛn ito te ɛ nang ɛn ihwet mon daa ne izɛɛng ngge ne ihywɛ byinɛ idira ninaa ne roos de.

¹³ iPhɛ ɛlɛy, ɛnyi gha ne ɛ ne bol ilwem ba, iphɛ ne so nggbinggbing ne ɛ boote ne ɛTaanggbey te ɛ nang ɛbhɛ ito ne kpɛl ivol lɛ.

¹⁴ Wu nggɛ boote ne ɛTaanggbey ya ne ihak ilem be, ikabyik nge iphɛ ne bol ne ɛTaanggbey ya, sɔng irway nge sonɛ nang.

¹⁵ iKyee ne naa ne mɔn ne? Naa boote ne ɛTaanggbey ya ne ikabyik, ne n da boote ne ɛbhɛ ne irway nge dɔng. Na yɛk ne iywel ne tɔɔk ɛTaanggbey ye ne ikabyik nge, ne n da yɛk ngɛ ne irway nge dɔng.

¹⁶ Wu ɛ kɛ ne tɔɔrek ɛTaanggbey yegha irway ihwala da ndɔ ne ikabyik ge zɔng ngo, ninaa nɛ nibhɛ ne tenes sɛ wo yaa ne yɔng wu “Ɛɛy” yɛ ɛlii, nɛ nibhɛ kɛ sang seng ɛkɔn na ne ɛ bol loo?

¹⁷ Ɛ sɛ kyi tɔɔrek ɛTaanggbey yegha irway ihwala mo da yɛnɛng, sɔng iphɛ kɛ ne phyik ɛhak ɛnyi nang.

¹⁸ N bok irway ihwala ne ɛTaanggbey, ne nzi bol ilwem ba n phyin nyini gbik.

¹⁹ Gbik ne iphɛ ɛlɛy, ndɔ ne idira ninaa ne roos de, nggɛ ne phyin sim nzɛ boote icwin ne ivol da ifɛ iwii ne ifɛ le ne irway nge, nɛ ninyi na yaa seng te mɛmɛ nidɛng ngɛ, ne naa bol icwin ne ivol da ninom ɛnduwubɔ ne ihak ilem be.

²⁰ Nigwaa en, sɔng ɛ tas ɛn tɛ ninɔn nang, yang te ɛn tɛ ninɔn na ɛlɔ ne mɔn nikɔn nibebhe, te icwas mon da ne ji so ivaa ɛnyi ne ɛ kɛ hɔn.

²¹ ɛDaray ya i bo ndɔ ne ɛWee ne iBol ɛTaanggbey yo, “Na boote nɛ ninyi yɛnaa wo lenɛ nɛ ninyi nɛ nibhɛ bok ihwak ilwem, gbik ne ilwem ninaa ne ikpoo, gbik ne iphɛ ɛlɛy sɔng nibhɛ yaa ne tenes me nang.”

²² Te kaabi sɔng izɛɛng ne bol ne ihwak ilwem ba i tɔɔsel ninaa ne roos sa ɛkɔn nang, iphɛ yang tɔɔsel ninaa ne sang roos. Yang so izɛɛng ne tɔng ivol ɛTaanggbey iphɛ tɔɔsel ninaa ne roos sa ɛkɔn na, sɔng ninaa ne sang roos sa nang.

²³ iPhɛ ɛlɛy, wu idira ninaa ne roos de ne so ɛlɔ ɛdaan, ɛrɔngɔ ne i bol ne idɛ ilem be kang, wu nidɛng kɛ ne sang seng ɛkɔn na ne i bol, hang ɛdɛng ne ɛ sang so ɛhaa ne roos kɛ lel yɔɔ, yaa ne sang yaa bo wu ɛ hoghɛ ɛn nisan ne i?

²⁴ Wu ɛrɔngɔ ne tɔng ibol ɛTaanggbey de te ɛnɛbi, ɛdɛ ɛhaa ne sang roos ne lel, hang ɛnyi gha ne ɛ kɛ sang seng ɛkɔn na ne i bol lo kɛ ma lel yɔɔ, ibol lɛ yaa ne dat ɛbhɛ, ne ɛ yaa tɔk ɛli ne aa san ɛbɔk.

²⁵ Yaa ne phaal nikɔn ne gying ndɔ ne irway ɛbhɛ da, ne lenɛ ɛlɛy aa ne ji te ne irwa-nggburuk ɛ re ɛTaanggbey ye ntsong, ɛ yɔngɔ, “ɛTsak, ɛTaanggbey so ndɔ mon.”

Te iHyel ne iRe Ntsong Ngga Byirik

²⁶ Nigwaa en, ɛkɔn na ne nzi bol lo ɛbhɛ ghaa lɛ, i sɛ ɛ kɛ sɛm ɛn nyini ɛlɔ ne re ntsong ngga, ɛdɛng yaa ne bok iywel, ɛdɛng ne i mɛmɛ ninyi nɛ, ɛdɛng ne tɔɔl ɛkɔn na ne ɛTaanggbey kɛ phaal ɛbhɛ nɛ, ɛdɛng ne bol ne ihak ilem, ɛdɛng ne ji kpɛl ɛkɔn na ne i bol ne ihak ilem be. iPhɛ ne so nggbinggbing te mɔn nikɔn nɛnaa wo gbik ɛli nɛ nibhɛ yaa phyik ninaa ne roos sa.

²⁷ Wu nidɛng yaa ne boote ndɔ ne ihak ilem be, sɔng nibhɛ ne phee ninyi ifaa nang, hang itwat yɔɔ, te ɛdɛng ne boote ɛdɛng ma kyi kungus, te ɛhak ɛnyi ne ji kpɛl ɛkɔn na nɛ nibhɛ bol lo.

²⁸ Wu ɛnyi ne sang sonɛ ne aa kpɛl ibol lɛ, tɛ nibhɛ ne shɛɛ nggbyak ndɔ ne idira ninaa ne roos de, te ɛrɔngɔ ne bol ne ɛTaanggbey ya ndɔ ne irway ɛbhɛ ne ihak ilem be.

²⁹ Tɛ ninyi ifaa hang itwat yɔɔ, ne kɛ nang nibhɛ ibol ɛTaanggbey de ne bol te ɛnɛbi, tɛ ɛbyin nɛ ne ji tɛɛsek ɛkɔn na nɛ nibhɛ bol lo.

³⁰ Wu ɛTaanggbey kɛ ne shii phaal ɛdɛ ɛhaa ne ɛ kɛ sos so ibol ne aa mɔng, te ɛhaa ne ɛ ku bol lo ne kunggbyak.

³¹ Gbik mon no ɛ sɛ yɛɛ ne tɔng ɛn ibol ɛTaanggbey de te ɛnɛbi. Nzi ne bok nyini te ɛdɛng ne i bol, ɛdɛng ma bol te gbik mon no ɛ mɛmɛ ɛn nɛ te iphɛ te nyini itsɔngɔl gɛgɛy gbik.

³² Seng ɛn, ɛnyi gha ne ɛ tɔng ibol ɛTaanggbey de te ɛnɛbi ɛ bok ito ne ɛ sɛɛ wum ito ɛbhɛ te ɛhak ɛgwaa ɛbhɛ ma bol.

³³ Daa ɛli ne sɔng ɛTaanggbey njwɛɛn na soye ɛhaa ne ikabyik buruburu nang, ɛ soye ɛhaa ne irway ne laal. ɛLɛy ne iphɛ ne so ndɔ idira ninaa ne roos de gbik.

³⁴ Tɛ nikuk ka shɛɛ nggbyak ndɔ ne idira ninaa ne roos de, daa ɛli ne sɔng kɛ sim nibhɛ nɛ tɛ nibhɛ bol nang, tɛ nibhɛ yang roos nɛ ɛli ne iMɛmɛ ɛMuusaa da kɛ bol lo.

³⁵ Wu ɛdɛ ɛkɔn na ne sonɛ nɛ nibhɛ sim tɛ nibhɛ sɛɛ seng, tɛ nibhɛ ne bhɛ phom niras nibhɛ ne idee. iPhɛ so ɛkɔn ncwa i sɛ ɛkuk ka i bol ndɔ ne idira ninaa ne roos de.

³⁶ ɛLɔ mon na ne kɛ tsa ne bol ɛTaanggbey dee? Hang ɛlɔ mon na zɔng ne iphɛ kɛ tuu?

³⁷ Wu ɛdɛng i ne wɛɛ te ɛ so ɛnɛbi, hang ɛ wɛɛ te ɛ bok izɛɛng ne ikabyik yɔɔ, te ne ɛ seng wu ɛkɔn nɛghaa wo ne nzi haa nyini nɛ wo, ɛDaray ɛbhɛ ɛ kɛ yɛk me nɛ.

³⁸ Wu ɛdɛng kɛ ne sang tenes ibol lɛdee wo, sɔng ɛ ma tenes ɛn ɛbhɛ nang.

³⁹ iPhɛ ɛlɛy nigwaa nge, ne ɛ yɛk ɛn ihyop ne tɔng ivol ɛTaanggbey de te ɛnɛbi gha, sɔng ne ɛ kyɛngɛ ɛn ne bol ne ihwak ilwem ba nang.

⁴⁰ Te ne mɔn nikɔn na byirik ɛli ne iphɛ kɛ jam mɛ, nɛ ne nkiinɛ yɛ gbik.