1 iKɔrɔntos 10 - ɛWee ne ìTsɛm iHywas

Kɛ Hɔwɔ Ninyi na iTsoro daa ne iBol ne iGunkyi

¹ Nzi sim te ɛ sɛ seng ɛn nyinɛn nigwaa en, inɔp kaa kyɛngɛse nikyɛɛ-nikyɛɛ njwɛɛn gbik ndɔ ne ihywel nibhɛ da, nibhɛ wo gbik kaa ne roos ndɔ ɛLing Nding nibhɛ bere.

² iPhɛ kaa ne so te gbik nibhɛ wo kɛ yɛk nibhɛ ne ibatisima ne roos ɛMuusaa ye ndɔ ne inɔp be ne ɛling nga.

³ Gbik nibhɛ wo kaa ne re ire ne ikabyik ge,

⁴ gbik nibhɛ wo kaa ne ta sɔ inɛn ne ikabyik ga. Nibhɛ kaa sɔ inɛn ne ikɛɛ ne ikabyik kɛdee nggyɛ wo ne iphɛ kaa hyel nɛ nibhɛ wo. iKɛɛ yɛdee nggyɛ wo iphɛ ne so ɛKiriti gha.

⁵ Gbik ne iphɛ ɛlɛy, sɔng ɛTaanggbey ya kaa ne phok iyɛnɛng ne iday nibhɛ nang, ne ɛ phobho nibhɛ ndɔ ɛhay.

⁶ Nikɔn nɛnaa wo kɛ tes nɛ nibhɛ wo te tɔɔrek njwɛɛn te njwɛɛn sang sim i mɔn ibebhe de nɛ nibhɛ kɛ mɔn no.

⁷ Sɔng ɛ te ɛn nyini ninaa ne re igunkyi de ntsong ngga ɛli ne nidɛng nibhɛ kaa so wo nang. Kɛ haa ndɔ ne ɛWee ne iBol ɛTaanggbey yo i bo, “Ninyi na kɛ soos, nibhɛ re, nibhɛ sɔ, nibhɛ phyii yaa yel isham nibhɛ dat nzangas.”

⁸ Sɔng njwɛɛn ne ma lel ne ishwɛɛ ne nzangas da ɛli ne nidɛng kaa mɔn no iphɛ bhɛ hɔn ɛli nɛ ninyi ninom nzuwubɔ ifaa nɛ nibhɛ itwat ta kus ɛtuk ɛdaan na nang.

⁹ Sɔng njwɛɛn tɛɛsek ɛDaray yegha ɛli nɛ nidɛng ndɔ nibhɛ wo kaa mɔn, izɔ de phobho nibhɛ wo nang.

¹⁰ Sɔng njwɛɛn bol ivol mumuk ga ɛli nɛ nidɛng ndɔ nibhɛ wo kaa mɔn no, ɛMalɛka ne Phobho gha phobho nibhɛ wo nang.

¹¹ Nikɔn nɛnaa wo kɛ tes te tɔɔrek njwɛɛn ɛkɔn, kɛ ne ta haa te sɛ hɔwɔ njwɛɛn itsoro. Daa ɛli ne njwɛɛn so nten de ne ɛzay ya yungaa taal le.

¹² iPhɛ ɛlɛy, gbik ɛnyi gha ne ɛ ne wɛɛ te ɛ kɛ kyinak gɛgɛy, te ne ɛ wɛɛ ye yɛnɛng ɛlɔ ne aa yung ho.

¹³ Sɔng idɛ tɛɛsek ga kɛ ku sɛ nyini ivaa ne hame i sang ku tɛɛsek ɛten nɛ nang. ɛTaanggbey ya ne so sɛ kyinak daa ne ibol ɛbhɛ, sɔng aa tek i tɛɛsek nyini ɛli ne ifɛ yaa phyin ihwet mon nang, yaa ne sɛ kɛ tɛɛsek nyini wo, aa ne tɔɔrek nyini ɛli ne aa wuru ɛn te ɛ kyinak ɛn gɛgɛy.

¹⁴ iPhɛ ɛlɛy, nyinɛn no ne nzi sim nyini wo, sɔng ɛ phɛ ɛn cɛcɛk ne ɛlɔ ne re igunkyi de ntsong ngga nang.

¹⁵ Nzi bol nɛ nyinɛn tɛ ninyi nɛ nibhɛ bok ihywɛɛ, ne ɛ phɛl ɛn ito mon te ɛ yaang ɛn ɛkɔn na ne nzi bol.

¹⁶ ɛHyihyangas ɛwɛng nga ne njwɛɛn i tɔɔrek ɛTaanggbey yegha irway ihwala da i kyi sɔ wo kɛ te njwɛɛn kɛ teye nidaan nɛ ndɔ neyi ɛKiriti gha. iBɛrɛdi de ne njwɛɛn i kpɛl i re wo kɛ te njwɛɛn kɛ teye nidaan nɛ ndɔ ne ibek ɛKiriti de.

¹⁷ ɛLi ne ibɛrɛdi de so iphɛ idaan de, njwɛɛn no ne so maa wo, ne ma so ibek idaan, daa ɛli ne ibɛrɛdi idaan nɛ ne njwɛɛn ne i re.

¹⁸ Wɛɛ ɛn niSɛrɛla na. Nzo nzi bo ninyi na nɛ nibhɛ re nikɔn ne hap itsanga ɛTaanggbey ya kɛ teye nidaan nɛ daa ɛli nɛ nibhɛ re ɛraa ne hap itsanga gha nang?

¹⁹ iKyee ne nzi bol ɛbɛ woo? ɛKɔn na ne kɛ hyɛ igunkyi de nɛ wo ɛbhɛ ɛ so ɛkɔn naa? Hang igunkyi de iphɛ soye ɛkɔn?

²⁰ Kwa, ninaa ne re igunkyi de ntsong i ihap niphoo itsanga de, sɔng ɛTaanggbey nang, sɔng nzi ne sim te ɛ sɛ te nyini nidaan nɛ nɛ niphoo na nang.

²¹ Sɔng aa yɛɛ ne sɔ ɛn ɛhyihyangas ɛDaray ya ɛ ta kyi sɔ ɛn ɛhaa niphoo gha nang. Sɔng aa ne yɛɛ ne re ɛn ɛkyee ɛDaray ya ɛ ta kyi re ɛn ɛhaa niphoo gha nang.

²² Hang njwɛɛn i cɔk ɛDaray yegha irway te ɛ yɛk ɛnkyis naa? Hang njwɛɛn phyin ɛbhɛ ne ihwet naa?

Te ɛTaanggbey Sɛ Ndiinday Ndɔ Nikɔn na Gbik

²³ “Kɛ sim njwɛɛn nɛ te njwɛɛn mɔn nikɔn na gbik,” sɔng gbik nikɔn na kɛ ne jam njwɛɛn nɛ nang. “Kɛ sim njwɛɛn nɛ te njwɛɛn mɔn nikɔn na gbik,” Sɔng gbik nikɔn na ne ji bok iphyik nang.

²⁴ Sɔng ɛ wɛɛ ito mo de zɔng ngo nang, ma wɛɛ ɛkɔn na ne aa phyik ɛgwaa mo ne mang.

²⁵ Re ɛn gbik ɛkɔn na ne lɛbhɛl ɛlɔ ne lɛbhɛl inwam ba. Sɔng ɛ phom ɛn nang daa ɛli ne irway mon ya yung yaa to.

²⁶ Daa ɛli ne ɛWee ne iBol ɛTaanggbey yo i bo, “ɛZay ya nɛ nikɔn na nɛ nibhɛ sonɛ ndɔ yɛwo gbik nibhɛ so ninaa ɛDaray.”

²⁷ Wu ɛnyi gha ne ɛ sang so ɛhaa ne roos kɛ yel-le nyini ne ire, wu ɛ kɛ ne phɛ ɛn te ne ɛ re ɛn gbik ɛkɔn na ne ɛ kɛ nang nyini, sɔng ɛ phom ɛn nang, daa ɛli ne irway mon yaa yung yaa to.

²⁸ Wu ɛdɛ ɛnyi yɛ kɛ ne yaak nyini, “Kɛ hap igunkyi itsanga ne ɛkɔn nɛghaa wo,” sɔng nɛ re ɛn nang daa ne ibol ɛnyi de ne ɛ kɛ tɔng nyini wo, daa ɛli ne irway mon yaa ne ta yung yaa to.

²⁹ Nzi bo wu irway ɛbhɛ, sɔng ivaa mon nang. Ɛɛy, ɛdɛ mon sɛ yɛɛ ne yɔngɔ, “iKyee phɛ aa te irway ɛnyi da ring me ne mɔn ɛkɔn na ne nzi sim moo?

³⁰ Wu nggɛ ne nang ɛTaanggbey yegha irway ihwala daa ne ire de ne nggɛ re wo, ikyee phɛ aa ne te i yɔng wu nggɛ mɔn ɛkɔn ɛkpɛɛ gha daa ɛkɔn na ne nggɛ nang ɛTaanggbey yegha ne irway ihwala daa?”

³¹ Gbik ɛkɔn na ne ɛ mɔn ɛn, hang ɛ re ɛn yoo, hang ɛ sɔ ɛn yoo, mɔn ɛn nikɔn na gbik ɛli ne ɛTaanggbey yaa sɛ ndiinday.

³² Sɔng ɛ te ɛn nyini ɛkɔn na nɛ niYahodawa na, nɛ ninyi ne hame nibhɛ soye niYahodawa na gbik ne idira ninaa ne roos ɛTaanggbey yegha yaa yaang nibhɛ mɔn ɛfɔt to nang.

³³ Mɔn ɛn ɛli ne nzi mɔn no. Nzi kyangas me nɛ ndɔ nikɔn na ne nzi mɔn gbik tɛ ninyi na phok iyɛnɛng. Sɔng nzi mɔn ito nge nɛ zɔng nang, nzi mɔn te iphɛ phyik ninyi gbom, tɛ nibhɛ sɛ iphɔrɔt.