Matiyu, echî 1 - Ejagham New Testament

Ane ndə́p-i-njû Jisos éməné

¹ Ḿfa nâ ane ndə́p-i-njû Jisos Krayis nnyo eyábhé-mmon í Debhit. Debhit a ri eyábhé-mmon Abraham.

² Abraham nâ a ri ńsé Isak, Isak ńsé Jakop, Jakop ńsé Juda na abhon-í-nnyen abhê.

³ Juda a ri ńsé Peres na Sera. Nnyen ábho a ri Tama. Peres a ri ńsé Esron, Esron ńsé Ram.

⁴ Ram ńsé Aminadap, Aminadap ńsé Nason, Nason ńsé Saramun,

⁵ Saramun ńsé Boyas. Nnyen i Boyas a ri Rayap. Boyas a ri ńsé Obet. Nnyen Obet a ri Rut. Obet a ri ńsé Jesi.

⁶ Jesi ńsé ntûfâm i Debhit. Debhit a ri ńsé Soromon. Nnyen i Soromon a râŋ mbá a jóe nkáé Uraya.

⁷ Soromon a ri ńsé Reyoboyam, Reyoboyam ńsé Abija, Abija ńsé Asa.

⁸ Asa a ri ńsé Jeyosafat, Jeyosafat ńsé Jeyoram, Jeyoram ńsé Usaya,

⁹ Usaya ńsé Jotam, Jotam ńsé Ayas, Ayas ńsé Esekaya,

¹⁰ Esekaya ńsé Manase, Manase ńsé Amon, Amon ńsé Josaya.

¹¹ Josaya nâ a ri ńsé Jekonaya na abhon-í-nnyen abhê. Nâ ebhú á fíi ane Isrel noŋ asʉ́ŋ á jak nnyi Babiron.

¹² Kən ábho á kpó to á mân ka osʉ́ŋ mbí, Jekonaya a jóe ńsé Seyatiye, Seyatiye ńsé Serubabe,

¹³ Serubabe ńsé Abiyut, Abiyut ńsé Irayakim, Irayakim ńsé Aso,

¹⁴ Aso ńsé Sadok, Sadok ńsé Akim, Akim ńsé Erayut,

¹⁵ Erayut ńsé Eriyesa, Eriyesa ńsé Matan, Matan ńsé Jakop,

¹⁶ Jakop ńsé Jusep nnyo ndûm i Meri. A ri Meri nnyó nâ a jíi Jisos nnyo á kamá se Krayis, nne nnyo Obhasi a túmi se a yim ngun á sém.

¹⁷ Nâ é rî sê ndaŋa-mbá, é róghé ka ebhú Abraham ta o sî ebhú Debhit, mfan i ńgyímí ásé na abhon a ri ófó na énî. Osúí ébháe, é róghé ka ebhú Debhit ta o sî ebhú á fíi ane Isrel á jak nnyi Babiron, mfan i ńgyímí a ri fə́ne ófó na énî. Ejeghé a ri ka ebhú á fíi ane Isrel ta o sî ebhú á jíi Krayis, nne nnyo Obhasi a túmi se a yim ngun á sém, mfan i ńgyímí ásé na abhon a ri ófó na énî.

Ojî Mmon Obhasi

¹⁸ Ńgyê noŋ á jíi Jisos Krayis. Nnyen owe Meri a ri nkáé nnyo Jusep a gyée. Kən kpe atem á ká məŋé, Meri a fôn oya. Oya mbí ó dʉ̂ ka ikom Obhasi Ebhare Ntʉgantʉ,

¹⁹ kən Jusep á ka məŋé. Ka obhô mbí, Jusep a kére yê a sə́ré Meri kəma-kəma se á kâ kô atem. Jusep a fonê ekpin ka nnyen-i-mbá, á ka wóm a soné Meri ka amə̂t atem-ane.

²⁰ Nji Jusep á foná íkíkéré mfí, énjel Ńtâ Obhasi a fâp yê ka ndem a sə́re yê se, “Jusep, mmon i Debhit, efup é kâ yîm wâ! Kó Meri ka ebháé, ka oya mbi ó gyée yê áno é dʉ̂ ka ikom Obhasi Ebhare Ntʉgantʉ.

²¹ Tîk a jî mmon i ndûm. Mbiŋ eye a kí kam se Jisos. Echî aŋ? Mmon nnyó nâ a kí yim ane Obhasi á sém ka obhí mbi ábho á yími.”

²² Achot mmá fép á fábhe, á tóŋé sê nchot nnyi Ńtâ Obhasi a chorê na nkara-otîp owe a ri ka echî.

²³ Obhasi a chorê se, “Mmon i nsop nnyo á ka məŋé nne-ndûm tîk a kô oya a jî mmon i ndûm nnyo tîk á bhîŋ yê sê Emanuwel. Nâ se Obhasi a ri na êt.”

²⁴ Nji Jusep a nyəmê ka eyô, a yîm fə́ne ekpak nji énjel a sə́re yê, a kô ebháé na Meri.

²⁵ Kən kpe noŋ á rô nuŋí nná na atem, Meri a jî mmon i ndûm, a káre mbiŋ se Jisos.