Mak, echî 1 - Ejagham New Testament

Otîp í Jon nnyo mfúgha-ane-ayép

¹ Ḿfa a ri eróghá-ndə́p otîp ogyebhá-ḿbə́ŋé mbi ó kpée na Jisos Krayis nnyo Mmon Obhasi.

² Nkara-otîp Obhasi nnyo á kamá se Asaya a séŋe ka nwet eye se, “Obhasi se, ‘Ńgyê, n kí tum ḿgbán omé a raŋ mbá, a jí tʉrí mbá eya.’

³ Nne yót a ri ka etə́m, a bhíná a sə́rá ane se, ‘Tʉrî ên mbá ntûfâm, ka yê a kə́ bha. Yim ên ebhə̂k é jóe tə́níní nji yê a kí chiŋ.’ ”

⁴ Noŋ Asaya a séŋe, Jon a fâp fə́ne ka etə́m, a fúghá ane ayép a sə́rá ábho otîp Obhasi se á yóŋe ḿbə́ŋé, á mághe obhí ábho, a fúk ábho ayép. Tîk Obhasi a rî nsôn a sû obhí ábho.

⁵ Ane etî-etî á bhak mbâ Jon. Á dʉ̂ Jerusarem na nték etat ebhat í Judiya ndə́m. Á râk obhí ábho. Jon a fûk ábho ayép ka aya Jodan.

⁶ Nkʉ̂ nnyi Jon á kaghá, á yími na anyot í nnyam nnyi á bhíŋa sê kámel. A bhóbhá ekandá ngu nnyam ka ebhûn. A dík ogurobhí na akʉ́ okon.

⁷ A sə́re ane se, “Nne nnyo a kə́ bha mbá-njəm a fâŋ a chíŋi ə̂m. Ń ka bhik nnyo n kí sere m kpât kpe aríghí iyîm-akát ibhê.

⁸ Mme n kí fuk ên a ri ayép, kən nne nnyó a kí su ên ḿbə́ŋé na Obhasi Ebhare Ntʉgantʉ.”

Jon a fûk Jisos ayép

⁹ Ebhú áji Jisos a mághe Nasaret ka ebhat í Gariri, a jak mbâ Jon se a fúk yê ayép. Jon a kô yê a fûk ayép ka aya Jodan.

¹⁰ Nji Jisos á fabha ka aya mmá, a yên ósô ó kí rəbhé, Obhasi Ebhare Ntʉgantʉ a bhərá a bhák mbâ eye noŋ ibhʉ́í.

¹¹ A kpo to a yúk, eyum é fâp nnyi ósô se, “We a ri Mmon okot omé nnyo ḿ foná ekpatə́m ogyebhá-ḿbə́ŋé.”

Satan a gáe Jisos

¹² Ka ngyím ányi, Obhasi Ebhare Ntʉgantʉ a yîm Jisos a jak ka etə́m.

¹³ A kâ ágo nsam i mfín ébháe, Satan a gaá yê. Onyam obhí ó rî áfo eróŋ, kən baénjel á bhak á nyaŋa yê.

Jisos a sâŋ ayúá-osí ánî á jóe ágbán abhê

¹⁴ Ka ebhú nji á kághe Jon ka ókúmí, Jisos a chə́bhe njəm a bhák ebhat í Gariri, a sə́rá otîp ogyebhá-ḿbə́ŋé Obhasi.

¹⁵ A kí səre ane se, “Ebhú é si, otúi Obhasi ó bha. Yóŋe ên ḿbə́ŋé maghê ên obhí obhə́né. Kam ên na otîp ogyebhá-ḿbə́ŋé Obhasi.”

¹⁶ Nji Jisos á jená ka mkpe aya Gariri, a yên ayúá-osí ábháe, Simun na mmon-i-nnyen owe Andru, á rî á yúa osí ka aya na ntûfúk.

¹⁷ A sə́re ábho se, “Tôp ên ə̂m. Tîk m kpî ên noŋ o kí tʉ ên ane á tóp ə̂m.”

¹⁸ Ka ngyím ányi, á mághe ntûfúk ábho, á tôp Jisos.

¹⁹ A kpô tən a jak ochî mkpât, a yên Jems na Jon, abhon í Sebedi. Á rî ka okpi ábho, á tʉrá atû-ofúk.

²⁰ Ka ngyím ányi, Jisos a bhîŋ ábho, á mághe ńsé ábho Sebedi ka okpi na ane etûm mba yê a kóe, á tôp Jisos.

Nne-ndûm yót nnyo ojê ó kára yê oseŋe

²¹ Á bhâ sî eték nji é káma sê Kapanom. Ka ofú oyoá-biji, Jisos a jak ka óchâm Obhasi ane Jus, a jî róghe ane ekpíím achot Obhasi.

²² Ane mba á rî áfo, biji í kpô ábho na okpígha-ejûm obhê. Echî aŋ? Á ka kpí noŋ atóŋá-ebhín ábho, a kpíi na onyen-ane.

²³ Nji a nyə́ne a kpík ane, nne-ndûm yót nnyo ojê ó kára yê oseŋe, a rə̂m a gyê ka óchâm mbí, a kúghá se,

²⁴ “Wóó! Jisos, mmon i Nasaret, ó woma ó yîm jen na êt? O bháe áno ó bhá yúí êt a? Ń diŋi ekpak í nne nnyo we o ri. We a ri Obhô-orûm Obhasi.”

²⁵ Jisos a nyân ojê mbí se, “Bhuî nnyo imâ áfo, fâp maghé nne-ndûm nnyó.”

²⁶ Ojê mbí ó nyíŋi nne-ndûm nnyó gbuk gbuk gbuk, ó tâ ndûm eyum, kən ó ruá.

²⁷ Biji í kpô ane chénchén. Á róghe echoróm na atem sê, “Ńga nâ jen? Nâ ejûm efê nji é kpo bhá a? Nne a nyán ojê, ó yúk yê a?”

²⁸ Nji a yimî ejûm njí, kpe ebhú é ká rap, mbiŋ eye a jábhe nsi Gariri ndə́m.

Jisos a yîm ane-emaŋé etî-etî á son

²⁹ Nji Jisos a yimî nne nnyó a sôn, a mághe a jak ka njû Simun na Andru, Jems na Jon á tôp yê á jak.

³⁰ Á kpó to á sí njû, á kpúghi nnyen i nkáé Simun enuŋ, mô egyʉk a ri yê ka biji. Á sə́re Jisos ebhú jə́t nchot emaŋé nne-nkáé nnyó.

³¹ Jisos a jak a jî fî yê ka obhô. A kpo to a yuŋ yê a kumí okumí, egyʉk njí é mân. Nne-nkáé nnyó a jî kô édî a bhâ jíghi ábho.

³² Na egu áji, ta njúí a tân, á kô ane emaŋé na mba ojê ó kára ábho oseŋe, á bhak mbâ Jisos.

³³ Ane eték chénchén á chúi ka éré njû ányi.

³⁴ Jisos a yîm ane emaŋé etî-etî á sôn mba á máŋa bimaŋé ka mkpak ka mkpak. A bhîm fə́ne ojê a yighá ka biji ane. A ri á ka kam se ojê mbí ó chôt kpe ejûm, ka ó mə́ŋe ekpak í nne nnyo yê a ri.

Jisos a kpî ane nchot Obhasi ka Gariri

³⁵ Na ofú-ofú, ngûm a nyə́ne a nyaghá, Jisos a mághe njû Simun a jak ka echî-mbá yê átíŋ, a jî góre Obhasi.

³⁶ Simun na atem abhê á nôt Jisos á ká yen.

³⁷ Kən á kpó to á jí yén yê ka echî-mbá, á sə́re yê sê, “Ane chénchén á kí wom wâ.”

³⁸ Kən Jisos se, “É jî ên ka nték nnyi tat nnyi a ri mfá. N di ń sə́ré ane achot Obhasi ka nték ányi fə́ne. Ńjə́ne nâ é kóe ə̂m m bák ka ngun.”

³⁹ A jená mân a fará ka nték i Gariri, a sə́rá ane otîp ogyebhá-ḿbə́ŋé ka óchâm Obhasi, a yighá fə́ne ojê mbâ ane.

Jisos a yîm mmaŋa-ofunum a sôn

⁴⁰ Mmaŋa-ofunum yót a bhák mbâ Jisos. A tə̂m arúŋ ka nsi, a góre yê se, “Ka okorá-ḿbə́ŋé obhâ, yim ofunum obhámé mbí ó mân, n kâ kpô fon akôp.”

⁴¹ Jisos a fôn nsôn na yê kpe eji, a tóne obhô obhê a kə́me yê, a chôt se, “Ń kot, deê ofunum obhâ ó mân.”

⁴² Ka ngyím ányi, ofunum mbí ó mân, nne-ndûm nnyó a sôn.

⁴³ Jisos a sə́re yê se a ji. Kən a káre yê ebhín se,

⁴⁴ “Nji ó jak áno, kî nchot nnyí ka ḿbə́ŋé, ka sə́ré kpe nne yót. Choŋ mbâ nkara-agore Obhasi a kép wâ. Ebhú á kep wâ, karê ekəp ka ekpak nji ebhín í Mosis é fíi, ka etóŋóm ane se ofunum obhâ ó man, ó ka kpó fon akôp.”

⁴⁵ Kən á ka yim áno. A jak a róghe esə́rə́m ane jáé ejûm nji é fábhe. Esə́re Jisos é jên é jábhe ngûm. Jisos á ro kpó gye eték jáé. A kə̂t mân ka eji a jóe yê átíŋ, kən ane á kə̂t á maghá ngûm na ngûm á bhak mbâ eye.